شذرة الشاهين

الشذرة الثانية والعشرون🩵

حيــاكم الله 🩵

....

بعد ما عاتبك تندل عناويني

من أمس واصلني كونك موش ناسيني

اضروفك والمسافه اعذار محترگات

شمس شتكلفلك الجـيه الروازيني

لچن بينت من مرسالك بلا شـوگ

صلاة متأخـره بس اتريد تگضيني

للشاعر (حيدر هواد)

...

دخل شاهين للغرفه والضحكة تارسه وجهه صفن على الجنطة واختفت الضحكة من عيونه..

شاهين: هاي شنو؟!!

رحت على موبايلي چان على ميز التواليت وفتحته

شذر: سلامتك ماكو شي .. راح اخابر خالي راكان يجي ياخذني ما اظل بعد هنا ليلة وحده ووجهك ما اريد اشوفه بعد... !!!

دگ الاتصال رنه وحده وما حسيت غير شاهين يسحب الموبايل من أيدي ويغلقه

شذر: انطيني موبايلي !

شاهين: شبيچ؟؟ شنو صار وهيج تتصرفين ؟؟ قبل شويه چنتي ويايه احلى من العسل! شنو اللي اختلف هسه؟

رديت عليه واعصابي تلفانه: انطيني الموبايل خلي أولي لأهلي لتخلي صوتي يطلع والعالم جوه بعدهم ديطلعون ! لحد الان عندي ذرة عقل لا تخليني افقد عليك واتخبل!

حط موبايلي بجيبه وگال: هسه اجيچ !!

وصل لباب الغرفة ورجع على ميز التواليت فتح الجرار مدري شيريد

شذر: انطيني موبايلي وروح أصلًا ما اريد اشوفك ...!

شاهين: مو قبل ما افهم شنو صاير!

شذر: ضحكتني والله علساس متدري مو! ليش خليتني أحبك واسلمك نفسي وانت متزوج ! حسبي الله ونعم الوكيل عليك!

شاهين: هاي شبيج ؟ منين جبتي هذا الحچي اني ما متزوج غيرچ ؟ (طلع مفتاح الغرفة)

شذر: هاي شدسوي أنت ؟ ليش أخذت المفتاح ؟

شاهين: راجعلچ!

عافني وطلع وسمعته قفل باب الغرفة ...

ظليت ادگ على الباب حيييل بكل قوتي وأصيح

شذر: أفتح ألباااااااب حقييير تريد تحبسني أفتح البااااااااب
ظليت ادگ وأصيح اريد احد يسمعني ماكو گعدت بالگاع وظهري على الباب وابچي ما اعرف من الم روحي او من الم بطني اللي دمرني!