شذرة الشاهين

تكملة الجزء الثاني البارت ٣٢

 

حياكم الله 🩵
الكاتبة // ميــس آل صـلاح

...

انا جروحي محطه وناس تدفع ناس
ركب بيه الحزن والنوح والدمعه
وجرى بروحي الحزن مجرى النهر لو فاض
وغرق ناعور حزني وما نشف نبعه
انقفل باب الفرح واسئلت عالمفتاح
اضنه ببير يوسف وياهو الي يطلعه
صبح خشبه الكَلب يتونس عالنار
حرك هندام روحي وياهو الي يصلحه

...
عطش گلبي مثل صحرا و شيحيحة ماي و آنه بعازة الگطرة..
نبت بيه العطش إعله شوفتك حمامة و فارگت عشها وما عاودت مَرّة ..

( يوم حنة اية و ليث)
سمر

القدر رسم قصتي بطشة زار ...
يفتر بيه دولاب الدنيا .. يفتح أبواب ويغلق شبابيك ..
وتموز العمر نشف دموع عيوني...

گعدت على كفخة مخدة من نبع الحنان فيروز بيتنا و بلبل الصباح ...

وخصوصاً اذا چان عدنا مناسبة تغرد تغريد من الصبح صلوات على محمد ...

وخرت المخدة من على راسي زفرت معاناتي اليومية من الوالدة طار شعري عجبتني الحركة ظليت أنفخ و خصلات تطير ...

ام شاهين: ولچ انتي وتالي وياچ ولچ مرمرتيني ... وعليتي گلبي !

سمر: شبيچ يمممه ...

ام شاهين: وغمممه ! گومي يلا صار ساعه أصيح وأنتي ولا عبالك نومة أهل الكهف..

سمر: إنيالهم... على الأقل شبعوا نووم مو مثل حظي أكرب من الصبح لليل..

لطمت على صدرها : شلووون عيني ؟ هاي منية التكرب من الصبح لليل انتيييي ؟

سمر: قابل أچذب عليج يا يمه !

شالت الشحاطة من رجلها وشمرتها عليه طفرت من مكاني انضربت الشحاطة بالتاج مال السرير

سمر: يمه صدگ چذب ...قناص أنتي ؟

ام شاهين: ولچ اليوم حنة اختچ انزلي جوة ساعدينا وبلا لغوة عابت اي والله عابت

سمر: حنة أختي انتي گلتيها يعني اني بس ارگص بيها و الحنة بعدها ما بلشت ! من تبلش صيحوني ارگصلكم

دخلت شذرة للغرفة

شذر: صباح الخير

سمر: شوفي يمه الناس الطبيعية شنو ادگول من الصبح!

أم شاهين: شاهيييين ولك يمممه شاهين تعال وشوف ضيمي !

شذر: ههههه يمه شاهين طلع يجيب صمون !

ام شاهين: يووووسف!

سمر: لا يمه أبوس ايدچ كلشي ولا يوسف ! هسه راح أنزل وامري للواحد القهار...

طلعت امي من الغرفة وشذر دخلت وسدت الباب و تقربت مني و حچت بصوت ناصي..

شذر: ها شنو أخباركم انتي وسردار؟