شذرة الشاهين

البارت ٤١

حياكم الله 🩵
الكاتبة // ميــس آل صـلاح

...

صديت لعيونه وخزرني
گال شتبي گتله ارد اغني
گال شعلي گتله انته لحني
وبلشت احط باليوجعني
ياگدار شوفي الينضم اعليك
يطلع لان مفضوح داعيك
ماتستحي من تنشد شبيك
وشبيه خايب ميت عليك

...
شذر

صعدنا إنرش السطح آني وأيه
وعفت شهومي يم عمتي
شفت ايه وجهها مغيم مو طبيعية

شذر : شبيچ؟

ايه : كله صوچي اني السبب

شذر : بشنو ؟

ايه : اني كلت لخديجة علمود يجوون بيت عمي

شذر : يمعوده قابل تعرفين انتي بمرته يمهم ؟ هو كل اللي صار بالصدفه

ايه : إي اعرف وسويت كل هذا
حتى يجي هو إيبات هنا يمنا
وتظل هيه هناك ابيتهم
شمدريني راح يجون كلهم
عبالي أمه تظل بالبيت وتبقى وياها !
لان اول تالي مرة عمي تجي تبات يمنه ؟

شذر : وليش متجي مثلا ؟

ايه : ولچ هيه گضت العمر كله تكره ابويه كره العمى
هسه حبتنا واجت إتبات عدنه !!

شذر : تكره ابوچ ؟

ايه : يوووه سالفه طويله !

شذر : ربي ماكو هيج ...عائله أسرارها ما تخلص ! 

أيه: ههههه لا مو أسرار بس سالفه قديمه
أني هم ما چنت اعرف سبب هذا الكُره مالتها لأبويه بس ليث سولفلي !

شذر : هسه لازم إنصعد الدواشگ و البطانيات !

ايه : لاا مو أحنا الولد يصعدوهن

شذر : هسه لو نايمين جوه مو أحسن ؟

آيه: نومة السطح إلها طعم خاص
نريد نعيد الذكريات الحلوة !

شذر: يابه چنتو زعاطييط هسه كبرتوا

ايه : هههههه حتى لو المهم نرجع الذكريات

شذر : اني لو ينطوني مليار
ما أريد ذكرياتي ترجع !
كَضيتها مرت عمي تكتلني
وبيبي الله يرحمها تسكت بيه
اوووي وين رجعتيني افففف

ايه : حبيبتي ميخالف الله عوضچ الحمد لله !

شذر : عوضني بيكم صرتوا أهلي وناسي
ما حسستوني بيوم اني غريبة عنكم
انتي وسمره دائما تعاملوني معاملة الأخت
لو عمي خطية صارلي اب و فهد ويوسف
ما فرقوني عنكم انتي وسمره !