شذرة الشاهين

الشذرة الرابعة 🩵

حياكم الله شذراتي 🩵
..
.
ما بينه بعد نبچي
عمود البيت لا ترحل
عليك البيت متچيي
حطو قطع سود
على الحياطين
عليك اليوم حزنانه الجوارين
وسفه الموت خلانه بعيدين
ااااخ شگد ما يستحي الموت
و عمت عينه
يوميه عزيز مودعينه
.
.
ناس حزينه و البيت مليان بريحة الموت .. و عيون تباوع عليه بعين الشفقة و حيرة دروب الدلال الما تدري نهايتها وين؟

الحجية ام علي ( تودع ابنها لأخر مرة) : علاوي يممممه مشيت الزهرة و ام البنين امهات المصاب يصبرني على فراگك حبيبي( فدوة لهالنومة يوليدي معدل فدوة لهالنومة يوليدي معدل) (هوسة شعبية) وتبوس وجنته وعيونه فدوة لهالضحكة يمه فدوة لهالشوارب والعباس فرحانه بيك محالل و موهوب لاا تخاف هاي بنيتك بأمان الله ومريتك ووليدك وياك يمه 

شذر : بيبي وين راح يروح بابا؟

الحجية ام علي: سودا بوجهي يمه بوسي بابا حبيبتي
بست بابا من خده چان مبتسم بس وجهه شاحب لونه ما بيه روح

مرت عمي : يبووووو راح وما شبع من شبابه ماخذ مريته وابنه للسوگ و صار الانفجار الله لا ينطيهم ان شاء الله حسبي الله ونعم الوكيل بيهم المايخافون من الله يتموها لهالبنية ما گالوا وين تنطي وجهها لا حول ولا قوة الا بالله

عمي ( بحزن)  : يلا يمه يا دوب نلحگ نزورهم الامام وندفن ما ظل وكت علينا

الحجية ام علي (تبچي) : مستعجل تدفن اخوك يمه

عمي : يمه شهيد هنياله اكو احسن من مرتبة الشهداء عند الله

اخذوا التوابيت وصعدوهم ع السيارات واني بعدني بالصدرية مال المدرسة وتوجهت السيارات للنجف الاشرف لزيارة أمير المؤمنين الإمام علي (عليه السلام) نمت بحضن بيبي بالطريق وصلنا وبيبي اخذتني و دخلتني يم سياج مزرف  وگامت تسولف : يااا علي سيدي و مولاي راح وليدي اللي مسميته على اسمك اخذه رب العالمين شهيد والحمد لله لا اعتراض على حكم رب العالمين وهاي اليتيمة جبتها يمك وانت ابو اليتامى ما عدنا غير الله وانت ( تبچي)

صافنه وما مفتهمة شديصير بنص زحمة الناس وحنيني واشتاقي لأهلي و لبابا خصوصاً دفنوهم وبيبي ما قبلت اشوف الدفنة گعدتني بالسيارة و گالت ابد لا تنزلين بس طفلة ما اسمع كلام نزلت يم السيارة اباوع عليهم من بعيد شلون يدفنون و اجى ولد وگف يمي اسمر و عيونه كبار گلي شبيچ ؟ ليش تبچين ؟ گتله شنو يعني من واحد يموت؟ گال يعني بعد متشوفيه

شذر: بس اني احبه لبابا و اريد اشوفه

الولد: لا تبچين هسه تشوفيه ويجيج بالحلم وتشبعين منه لا تخافين

شذر ( تبچي بحرقة) : شلون ما اخاف وبابا ماكو اريد بابا معليه اني اريده

الولد : اذا تبچين راح يزعل لان أكيد ابوچ ميريد هاي العيون الحلوة تبچي مو صح هاچ هاي النستلة كلش طيبة