شذرة الشاهين

الشذرة التاسعه عشر🩵

حيــاكم الله 🩵

صحيح الخال والد و أعتز بخالي
وبيه الخال اله ثلثين وثلث للوالد الغالي
انه حگي من اشيدن بيك ادري بيرغك عالي
والبيرغ عالي بزودك وما ينجاس

...

شذر
من شفتهم مشاعري ما أگدر أوصفها... حسيت بأمي دخلت عليه تريد تشوفني.. حسيت بقوة وعزوة ... هذوله اهلي وناسي ...

ام شاهين: گرة عينچ يمه بشوفتهم حبيبتي ..
دموعي نزلت حضنتني خاله وگالت ان شاء الله دوم دموعچ دموع الفرح والله يبرد گلبچ حبيبه

الحجية: گرة عينچ يمه عسى دوم لمتكم بالافراح وتشوفيهم داير مدايرچ بالخير

رحت على الحجية بوستها وهيه حضنتني ... خطية اية هم حضنتني

أيه: مبروك حبيبتي الله لا يفرقكم ان شاء الله
شذر: الله يسلمچ حبيبتي يوم عرسچ وافرح بيچ

سمره اجت شاورتني: أگلچ احنه مو خوات وكذا! ديري بالچ عليه هههههه

شذر: انچبي انتي!

سمر: معليه ابو النيلي اريده والله اذبح وانذبح عليه فهمتي

شذر: خووش ماشي بس اسكتي لا تسمعچ خاله وتهلس شعراتچ الباقيات وينهزم ابن خالي ههههههه

سمر: اني الچ شذره خاتون !

زوجات خوالي دخلوا يمنا و حضنوني و سلموا عليه وبنت خالو رامان الصغيره ضحكتها تجنن اخذتها وصرت اعضعض بخدودها الحلوة وهيه تخرب ضحك وزوجة خالو راكان گالت..

ام سردار:  فدوه حبيبتي تشبهين المرحومة كلش الله يرحمها برحمته الواسعه ... خالچ كلش فرحان من سمع بالخبر لحد الان واني فرحت لان ما عندي بنات والله رزقني بيچ

شذر: تسلمين خاله متقصرين

ام شاهين: تره ام سردار عربية شذره اصلها من بغداد!

ام سردار : اي والله وهم صارت مشاكل يلا تزوجنا والحمد لله ماكو فرق ان شاء الله كلها خير وبركة

ام شاهين: اي والله ماكو فرق انتو اهل والنعم منكم

ام سردار: حبيبتي ام شاهين تسلمين

الحجية: تفضلوا عيني نگعد بالهول وهم أعرفكم على چنايني يلا عيني تفضلوا

اخذتهم الحجية وراحت للهول تعرفهم على نسوان عمامه لشاهين و شويه ودخل شاهين للمطبخ فتح الي اديه رحت حضنته باس راسي

شاهين: الله يديم لمتكم حبيبي (رفعت راسي من صدره و التقت عيوننه )

شاهين: يلاا نروح؟؟ خوالچ يريدون يملون عيونهم بشوفت حبيبي ( هزيت راسي بالموافقه) شبك ايدي بأيده ومشينا سوا من وصلنا يم الباب مال الديوان حسيت گلبي يريد يطلع من ضلوعي .. فتح شاهين الباب ودخلنا وشفتهم كلهم گاعدين وعيونهم على الباب اللي انفتحت