شذرة الشاهين

الشذرة الاولى 🩵

اسمع صوت بداخلي يريدني اسألها منو مزعلج واتعوذ من ابليس امشي بالسيارة واباوع عليها بالمراية و هيه بغير دنيا صافنه وحايرة بزمانها ، عيونها ذبلانه والهم ماخذ من عمرها عمر . .

فجأة كامت تناشغ وتبچي بطريقة هستيرية و تصيح بعد ما اكدر اتحمل والله بعد ما اكدر يا ررررربي باوع لحالي يالهي والدموع تتسابق ع خدها طبگت السيارة و نزلت فتحت الباب من جهتها هيه گاعده ورايه فتحت بطل مي وغسلت وجها وهاي جانت اول مره ألمسها

هيه صحت من الحالة اللي جانت بيها لان المي بارد و اني .. اني تكهربت حسيت ايدي گامت ترجف ،بالگوة لازم نفسي وما حضنتها

كتلها كولي يالله واستهدي برحمانچ يا بنت الحلال شبلاج ؟ منو وياج؟ وان شاء الله اگدر اساعدج

گالت الدنيا كلها ضدي تگدرلها؟
كتلها هذا شاربي مو عليه اذا خليت احد يگرّب عليچ ومستعد اوگف بوجه الدنيا بس فهميني سالفتج شنو؟

رجعت تبچي استغفرت ربي و گمت سحبت جكارة لان حسيت گلبي وج نار ظليت ادخن و هيه تبچي واني اسمعها و احس روحي فرفحت مدري شصار بيه هسه البنية لا اعرفها ولا تعرفني شجاني وهيج گمت ارجف عليها

صار سكوت يعني كملت بچيها ذبيت الجكارة و سألتها وين تريدين تروحين كالت ما اعرف بصوتها بحة تكتل كتل

شسمج ؟ كالت شذر كتلها اني شاهين ابن الشيخ محمد الصگر ومشكلتج احلها الج لو يبقى اخر يوم بعمري بس اهدئي و فهميني بيها بس مو هسه من نوصل للبيت و تاكلين و تشربين و ترتاحين وشغلتج محلوله بعون الله وميكون خاطرج الا طيب

شذر: يا بيت قصدك؟
شاهين: بيت اهلي مو بعيد قريبين عليه و الحجية هسه محضرة العشه والبنات موجودات شوية تغيرين وياهن من نفسيتج سالفه منا ضحكة منا حتى شوية تتركين التفكير والقلق

شذر : لا فدوة ما اريد ازحمكم بس وصلني الشارع الرئـ .... قاطعت كلامها
شاهين: رحمة مو زحمة ابوية لا تحچين هيج بعد و لا تفكرين نروح واذا ما ارتاحيتي اخذج ونطلع وين ما تريدين اوديج متفقين ؟
شذر : بس مو خا..
شاهين: لا تشلعين گلبي اروحلج فدوة خلي نتوكل ابوية
شذر : رحمة الله والديك
شاهين : و لوالديج الرحمة يلا نتوكل

وصلنا للبيت جانت خايفة و مستحية
شاهين : يلا يابه انزلي

شذر: نزلت و روحي تلوب خايفة يندلوني اووووف يا ربي دخيلك الهي اني يتيمة و ما عندي غيرك يا رب
دخلت البيت ما شاء الله قصر مو بيت حديقته ترد الروح والكراج متروس سيارات وچانوا اكو زلم ٣ واكفين بالكراج يسولفون اثنين بعدهم شباب و واحد كبير بالعمر اتفاجئوا من شافوني و ملامحهم كلها اسئلة بس دنگوا بسرعه

فهد: هلا بأبو الصگور

ابو شاهين : هلا برفعة راسي و هلا بخطارك تفضلي بنيتي وصاح بصوت اعلى ( يا بنات وينچن سمر ايه .. )
طلعت بنية تنطي شبه لشاهين كلش حلوة و مرتبة