قوقعه الجمر

تكملة ح - ١٢ - ( الجزء الثالث )

حكاية 📖 #قوقعةجمر

📝 - تكملة ح -١٢- ( ١٢- ج الثالث )

✍️#فراقد

%%%%%%%%%%%%%%%%%%%%

ضاقت فلما استحكمت حلقاتها ..... فرجت
وكنت أظنها لا تفرج ...................
++++++++++++++++++++++++++++

نضال ..... بسمة

وللمغرب لا أهلنا الرجعوا من مقابلة الريس
ولا جانا الطارش وبشرنا بخبر زين ...

ويه وذان العشه ،، وتدخل أمي عمشة وباجي فوزية
وحده تردم على الثانية ..

نسألهم على زلمنا وين
تجاوب باجي فوزية :- حبسوهم من وره أمج

يااا أسم الله ليش ،، شصار

أمي عمشة ردت شيلتها على وجهه وكامت تعتب وتبجي ...

وباجي فوزية تلوم بيها ...

-باجي فدوة اروح الطولج شصار ...

عاط يابه عارف :- مااااا تحجين فوزية خلينا نفهم شكووو

تربعت باجي فوزية..
- عاين عليه وأسمع زين ...

من الصبح وصلنا للقصر ...
واستقبلونا أولاد الخير بهذيج القاعة ما أدري الصالة التخبل ... وقدمولنا هذيج الضيافة الزينة

وبس أحنا عدنا مقابلة وبعد ثلاث عوايل

أبو موج ( قصي أبن الريس ) ربي يجازي بكل خير ويعوض تعبة ويانه بخير الدنيا والآخرة
هو أول واحد أستقبلنا ويانه باقي العوايل

أول عايلة :- خطية عدهم وليد صغير مريض عنده الخبيث بالغدد ( ال أنفاوية ) و أميمته (أمة )خطية تكسر القلب تصب كل دمعها هلكبرها

جت واسطة عن طريق الهيبة أستاذ عبد حمود

أبو موج وقع فايل اوليدها ...
ودخله أستاذ عبد حمود للريس بعد عمري
جرلك عليه هذاك الخط اليخبل وافق عليه بعد طولي
حت يسافرون أهل الوليد للخارج ( دولة اجنبية )
يعالجون الوليد على نفقة الدولة ...

ثاني عايلة :- عدهم قضية مصادرة أموال
جي ألاب والأخ الجبير وبنية
والاب مقدم مظلومية لن أكو اشتباة بالأسماء
وجايبلك ضبة أوراق هلكبرها

أبو موج بعد طولي طوله
خذ ضبة الأوراق وظل فوك نص ساعة يكلب بيها

ما وقع عليها ،، ناده على ضابط
جي دخل علينا بهذيج الهيئة التخبل
سلمه ضبة الأوراق وكاله :- دقق كل شاردة واردة تخص هذه القضية وأريد تقرير مفصل عنها خلال أربعة وعشرين ساعة...

ويا خيي بعد عمررري ،،،، كام بهذاك الطول الهيبه
وصافحلك الأب ،، وكاله :- بعد بأجر راجع ضابط ....
قضيتك صارت بعهدته ،، ان شاءالله ما يقصر وياك .
ورجع وصه الضابط ،، وأكد عليه يهتم بالقضية

وجي سرانا ،،
أحنا بعد قضيتنا معروفة بخصوص الفرج عن ذيب

شكلك يا خيي ،، اعظامي صارت اطكطك
من اشرلنا هذاك الشاب الهيبة نتقدم اني وأم عثمان
ونتقرب ونكعد قريب أبو موج ...

هو ( أبو موج ) من عاين أم عثمان (عمشة )مرأه جبيره وبس أني وياها كام بوجهنا :- حياهم الله
هلا يمه تفضلي ..

وأمر بلسان طيب الشاب :- ساعد الحجية يابه

ويتقدم علينا الشاب ويسند أم عثمان

وهي (عمشة ) ما أكلك يا خيي من باب القاعة
تهتف :- يا يمه يا قصي يا بعد أمك جيتك مضيومه لا تردني ...

والزلمه يا خيي ما قصر بعد حيلي
ينادي :- حياهم الله
ان شاءالله ماكو ضيم

وتصل يمه ( قريب علية ) أم عثمان ( عمشة )
وتجرخه بوستين شفطت خده

وهو بعد حيلي ما فشلها وسلم عليها
:- وشلونج يمه
وحياج الله
وهلا ومرحبا باهلنا وناسنا الطيبين

وعاين عليه وسلم بهذاك اللسان الطيب
:- شلونج حجية عساج طيبة
تفضلوا حياكم الله

و الشاب الهيبة خذ الملف من أيدي
سلمه اليه النقيب أول ما دخلنا للقصر
وسالنا شنو قضيتكم وأسم الشخص المعني

ويكضب الملف أبو موج بعد عيوني
ويكلب من ورقه لورقة
ضحك وكال :- يابه أنتم من ال ....

واني جاوبتة - اي والله يا يمه من ال ...

- حياكم الله...

وعاين على أم عثمان
- سهله يمه ان شاء الله اوليدج الذيب بأجر الصبح هو بحضنج ،، تدللين أنتي والذيب

ويجرلك هذاك الخط اليخبل ويوقع
ويأخذ الفايل أستاذ عبد حمود ويدخله للريس

شويه وطلع علينا الأستاذ
- حجية يابة تفضلوا سيدي الرئيس طالبكم
حياكم الله...واشرلنا نكوم ندخل للقاعة الثانية

أستاذ قصي عاين على الأستاذ
واشرله بيده يعني شكو
جاوبه :- سيدي استوقفة لقبهم

أبتسم أبو موج وكال بصوت ناصي
- لا والله ما تعبر على الصكر

خشن صوته وكال :-
تفضلوا يابه
بس لا دوخون رمز الأمة تعبان بس حضر لخاطركم وخاطر أهلنا الطيبين

عاينتة أشر وغمز للأستاذ عبد حمود
وكاله :- الجماعة بعد بعهدتكم

جاوبة الأستاذ:- تدلل سيدي

وجي نفس الشاب الهيبة وسند أم عثمان
وكومها ويايه واخذناها دبيب للقاعة الثانية...

يا ييييمه يا خيي اعظامي صكت وآني أعاين كبالي
شنو الهيبة شنو الهيئة التخبل

شنو المبسم اليرد الروح

شنو الصوت الصيدح :- حياهم الله

شنو الكشخه التسطر

شنو من عطر هجي يكفخ الخشم كفخ وينعش الروح

يممممه يااااخيي موووو زلمة لا ورب الكعبة
هيييييييييبتة تسطرررر

أكلك خيي شو الريس يختلف عن اليطلعوه بالتلفزيون؟ شكلك هجي طوله فارع
جتافة هلعرضها...
وجهه هلعرضه ...

يا يمه من أبتسم تكول ليث
ليث شنو ...؟؟!!! لا أحلى من مبسم الليث

ونفز كلنا الكاعدين ومندمجين على وصفة وكلام باجي فوزية على عيطة يابه عارف :- وووووتالي فوزية
الولد ووووين صفه بيهم الحظ

هي خطية من فشلتها وأخذها الواهس توصف
لا والله تتغزل بشوفة الريس
كالت بالضحك :- ما يسجنوكم ال الكليط
وافزعلكم
حت أمشي اقابل الحكومة و اطلعكم

يابه عارف جاوبها بعصبيه
هو متفركع تفركع من الخوف على أهلنا
وباجي سارحه وما خذها الانبهار بشوفة الريس
وصارلها ساعه كاعده كبالنا وتوصف وتتغزل
:- ووووتالي فوووووزية

- اااي شصار غير اسولف الكم بالتفصيل شصار

اي ... ويدخلنا الأستاذ عبد على الريس ...
ويمشي ويانه لحد ما وصلنا كباله ...
ياااا يمه مشخص وكاعد على هذاك السكملي الملكي
والهيئة تسطررر بالقاط الأسود الكاشخ بي

بعددد عمري من سلمت عليه أم عثمان
وكف لحيله وسلم عليها ...

وهي ما قصرت جرخته بوسه هجي طالعة من قلبها
يمكن بعمرها ما مبوسه أبوها لو أخوها هجي بوسه

واعاين يا خيي على أم عثمان
وتهدلك العبايه على جتافها
وعيونها تكوطر كل دمعة هلكبرها
وتفتح شيلتها تريد تفرع كبال الريس

وهو ( الريس ) قسم الها الشغلة الجاية عليها تمت وتبشر بيها
ما رضى تفرع وتتكشف كبال الزلم

وصوته يصدح :- تفضلوا يابه
داركم ،، ومضيفكم
حياكم الله

وأشر لأولاد الخير يقدمولنا كهوه

وآني أختك يا عارف
خذت الفنجان من ايد الكهوجي وخليته كبالي على الطبله ...وكتله :- يمه أبو عداي يبعد أهلي
جيتك مضيومه تفزعلي لو أجمد هذا القلب بصم حجار وأخلي عيني بعين الله ...

وجان يضحك بعد حيلي
هجي كله يهتز حت بضحكته يررررهب
- أشربي كهوتج يابه
الجاين عليه هين
تفضلي يابه تفضلي

اخذت فنجان القهوه وشربته...

أعاين الأستاذ عبد دنك علية شاورة
ضحك بعد عيووني
وكال :- يدللون هم وأبو موج واليخصهم

وجرلك القلم حت يوقع ما أدري يكتب شي
كال :- مقدم ذياب سبع وربات ديوان
شجاع الذيب من هو برعم خادم الدولة
يستاهل يطلع تقاعد ويتكافى بعد

وان شاء الله نزوجو بنت الحلال وتجيبلو ليث تايشيل أسمو ...

حجية شلون توفت زوجتو وفقد عقلو عليها ؟؟؟

هسه يا أم عثمان سولفي عن وفاة المرحومة
لا أجفصت بطن خزعل وهو متمدد ومطروح
بمحمد السكران

وتجاوبة :- والله يا بعد أمك
هو تخبل من عدمو السجين كباله ...
هو كال السجين مظلوم لانه مهبول
واعدموا بدل واحد عامله فاينه هلكبرها...وتاشر بيدها

يااا يمه اندسها أريدها بس تسكت ماكو انطلقت

أستاذ عبد نطت عيونه علينا ...

وانتبهت زلمة هيبه واكف ليغادي
اشرلها تسكت بس هي بعد انطلقت

الريس بعد حيلي...ما وقع
أخذلك صفنه على الأوراق
وانوب عاين علينا
- يابة شنو هذا الحجي ،، مقدم ذياب مو فقد عقلو لان زوجتو توفت بحادث مؤسف
لو أكو غير شي أحنا ما نعرفو ...؟؟

يااا خيي يا عارف
وتفرشلك أم عثمان كباله
وتنسرد هذيج السرده الكفوو ...
وتحجيلك حياة ذيب من جابتة وسن لهذا يومك

ووول يا امة الإسلام وعزة المسلمين الشفاااعة
اندسها وهي لابستني لبسة الكلو

وهي تسولف ندستها
وجان تعيط عليه :- لاااا تندسين اني ما اعرف أجذب
الصدك هو يحل المشاكل

الريس أمرني بعد ما احجي ولا اندسها...

وهي ما قصرت خرطت الأول وتالي ...

وهذاك الزلمه الهيبة الواكف غادي
تخبل واكف على عصابة (هو نفسة فلان صديق هيثم)

الريس بعد عيوني ،، شاور الأستاذ عبد
ويطلع بسرعة من الصالة .
ويرجع مسرع وياه أبو موج بعد عيوني ...

الأستاذ عبد بلسان طيب
طلب من عدنا نطلع نكعد بالصالة الخارجية .

ونكعد وننتظر هذاك الانتظار اليشلع القلب

وأولاد الخير ما قصروا جابولنا الغدة

وأنوب أخذونا للحمام
وتوضينا ،، وصلينا الظهر بالقاعة

وبس أني وأم عثمان بالقاعة بعد مابيها طير الطاير ...

وكاعدين وننتظر ...
وحكم علينا فرض العصر
ولا مرنا الطارش ،، ولا جانه المبشر

وره وين جي علينا شاب عسكري
طلب من عدنا نتحول ونكعد بغير مكان

ونكوم ونتحول بصالة أصغر من هاي الصالة
بس كعدنا ،، جي علينا أبو موج
كعد كبالنا ،، أبتسم وكال :-يابة حاولنا نساعدكم بس الحجية ما قصرت
أنتم اتوكلو وارجعوا لداركم وان شاء الله لنهاية الأسبوع تنحل كل الامور ...وزلمكم محتاجيهم
يبقون يمنا معززين مكرمين .

أني سألته:- يمه فدوة رحت الطولك
على منو تقصد زلمكم ،، قصدك على ذيب ..

جاوبني :- لا أستاذ حمود
والدكتور يونس
والسبع شبيب
يبقون يمنا لنهاية الأسبوع

وتعيط أم عثمان:- قصي يمه أجيت بوحده أرد بثنين

جاوبها بضحكة حلوة :- لا تخافون يبقون عدنا ضيوف محتاجيهم بشغلة ضرورية...

وأمر الشاب بلسان طيب
أخذنا وصلنا لباب القصر
واجرلنا تكسي ودفع كروتنا...

وهاي كل سالفة...

بس سكتت باجي فوزية ،، يابة عارف تفركع تفركع
حقة ،، شكد كعدوا الولد وحفظوها لأمي الحجي
وفهموها شدكول ما دكول ..بس هي بعد هذا عقلها وتفكيرها..بقول الصدق تنحل المشاكل وماكو داعي للكذب ...

يمه مريم تلوب من صفحة
تفركعت تفركع على يونس ...

وباجي جوهرة ادك وتلطم على عمي شبيب

واجتنا الاء هداده شلون ورطنا حمود بشغلة ذيب
الحقيرة تستعار من أخوها...

هي ( الاء ) و ولاء يحسبن بس حميد اخوهن
ما يعترفن بخوتهن من يونس و ذيب ...

وسن أم ذيب الله لا يوفقها وصلت شماتتها النا
تكول :- من عساهم باأخس وانكس حال يونس وذيب
هذا اليعق والديه ما يتوفق بحياته

-ذيب شال خشمه علينا
والله خوش كفخة بسمعتة وبشغله
من عساه لا توفق ولا تهنا

-ويونس عساه يركض وعشاه حمكَه
وعساه لا تهنا ولا ضاك حلاة البزرة

باجي فوزية متندمة بس على شغلة وحده
شلون هذيج السنة كتلتها بالمسحاة ( الكرك ) بسالفة زعلة بيداء وما كتلتها كتلت موت وخلصتنا من شر السانها...

وبهجت ما تبجي كبالنا
بس من تنزل من كبتها عيونها وارمه من البجي

وحنفيش يبجي ليل ونهار يريد أبوه

وهاي ميمونه تبجي الجبير والصغير على أبوها ( شبيب )

جوهرة خطية تعبانه على باب الولادة
عكدت طرف شيلتها
وما وكع من لسانها ((يا فضه فضيها،،ويالزهره حليها))

يابة عارف هو وعمي عثمان
مشوا لأهلنا بتكريت بلكت يحصلون مساعده لو خبر عن أهلنا..

ضحى من تعاينا مخبوصين و دايخين
تكول :- ورب الكعبة لحالكم خايفين
هسه يجي أبوي ذيب وعمامي .

أمي عمشه كالتلها:- بس يصدك كلامج
نذر عليه أوزنج بذهب وفضة

هي ضحكت بخجل وكالتلها:-لا جدة ما أغيد ذهب
أغيد أزوج علاوي إبن باجي سماح ،،
واغوح اعيش هناك يمهم بغداد

باجي فوزية كالتلها:- ورب العزة اذا الله خلاني عايشة لهذاك وكتج ازوجج لعلاوي ،،
بس يصدك كلامج ويطلع أبوج من شدته..

أني حرت بضيمي،،
صدري المصاب ( جهه العملية ) طلع روحي من الألم
ورم وجغد حت صخن اهجسة يفور من الحراره
فطمت مسرة من عنده بقت ترضع على الجهه الثانيه..

مشيت للدكتوره كشفت عليه كالت :- ماكو شي يخوف هذي جغد حليب لأزم تنزلي مو زين تحبسي،،
نطتني بس علاج ألتهابات..

يمه اهجس نفسي شوية وافقد من الألم
من انزل من عنده الحليب ،،

وصدك لون حليبه يختلف عن الثاني السليم

مرت عمنا كالت :- ما يفيدج غير الطين الحري
يبرد عليج ويسحب الحراره

باجي جوهرة ناوشتني من عدها تربتين ( تربة الصلاة)
كالت :- هاي تربة الحسين بيها الف شفاء لألف داء
وطينهن حري ،، بجاه الحسين كون اطيبين
نكعيهن وخليهن الج دوه .

اخذتهن ونكعتهن وبردت بيهن صدري المصاب

أنوب ريحة الطين طيبة ،، اشمشم بالطاسة

ضحى كاعده كبالي كالت :- باجي أنتم جعفقية ( جعفرية )

ما جاوبتها...

جان تكول :- تغى( ترى ) أني أعغف( اعرف ) عمي معن واوس جعفغية ( جعفرية ) وانتي صرتي نفسهم ..

-مامه أنتي منين عرفتي هذا الحجي ..؟؟

تجاوبني :- أني سمعت عمي هاغون يكول معن جعفغي
ويخغب ( يخرب) عقل أبنة ويصيغ ( يصير ) جعفغي اصلي

-مامه أنتي مالج شغل بهذن السوالف
عليج بمدرستج وبلعابتج

- مو أني ما أغيد أتزوج أوس أغيد أتزوج علاوي إبن باجي سماح

- لا إله الا الله مامه منو مخلي فكرة الزواج براسج
بعدج صغيرة أمي عيب تحجين بهذن الشغلات

هزت راسها يعني أي...وظلت ساكته

حاجيت غيدة تفتح عشرة عيون على البنات
وشوية تضب تربيتهن..

معن جي ورجعنا للدار .. أبرار تريد أختها يمها

وعدت يومين ثلاثه ايامنا عاديه ...

وبهذاك اليوم يجيني أوس طاير من حلة المدرسه

- نضاااال جيبي البشاررره

- يااااا ربي خير ،، أبشر وبشرني

- عمامج واخوانج طلعوهم من السجن

- عللليك الله

- والله العظيم

- وذيب

- كلهم طلعوا...

كوووومي أمه الإسلام مكلوبة بيت اهلج

يمه يا فرحتي ما أعرف شلون اوصفها
شبكت أوس ولميته لحضني أبجي وأبوس بي
:- فدوة رحت لطولك على هاي البشارة...

هو خطية استحه من عندي
أطول من عندي صاير ...

بساع بدلت وناديت على أبرار بالحمام
عود يجبها أوس ورايه ،، اخذت مسرة وطرت لدار أهلي

يمه شلون اوصل
وشوكت اوصل
هجي روحي طايره عليهم كبل جسمي

اعاين أهلنا وعمامنا وأهل المنطقه غالقين الشارع...
والمزيقة ادك ...
الله يخلي الريس ،، الله يطول عمره
ندعيله بكل ساعة ،، غالي وحلو اطباعة

وباجي فوزية تهلهل وطش الواهليه على العالم

جي عليه واحد من ولد عمنا عبرني من بين الزلم
وادخل طايره لدار أهلي . .

يمه ويصير كبالي عمي شبيب يريد يطلع للشارع
واشمر نفسي عليه وابوسه بخوف
اريد أكوله:-شلونك عمي ،، ما تطلع الكلمة من لساني
كل جسمي يرجف ، وانفض من الرهبة والفرحه

وبعد ما سلمت عليه ،، اركض للربعة
خليت مسرة بحظن مرت عمي
واشمر نفسي على يونس
شايل أبنة حنفيش ويبوس بي

اشهك وابجي بحظنه
:- يمه يا خيي من عمري على عمرك
أني وبنتي نندار فدوى ونذر لطولك

هو خطية يبوسني ويريد بس يهديني
بس أني بعد فقدت ما أكدر أسيطر على حالي من الفرحه ...

ويصير كبالي اخوي ألحيد كاعد بمكان أبوي الكليط على الكرويتة الخشب بنص الربعه ...

يا يمه يا كرت عيوني
يا فرحة سنيني
و يا هيبتي
و يا عزوتي
و يا سندي
ويا حزام ظهري وتجوة شدتي

واشمر نفسي عليه ...
أبوسه بكل وجهه وما أشبع من ملكاه

جريت النفس من نحره وما مصدكه هو كاعد كبالي

حضنتة بقوة هجي طبكت ظلوعي بظلوعه
أريد بس اصدك هو موجود كبالي بس روحي تجذب عيوني ...

هو بش شال ايدة مسح على راسي
:- كافي يابة

- ذيب خيي يبعد حيلي وعيوني
عرفتني أني منو ...؟؟

بس هز راسة يعني أي

يمه ودموعي تكوطر من عيوني وكل دمعة هلكبرها توكع ... وأرجع احضنه بقوة .

أهلنا كلهم متواجدين بالربعة ...
وكلهم عيونهم على الحيد ..

يمه مريم كاعدة بالكاع يم رجليه ولازمة ايدة

وأمي عمشه كاعده بصفه وتبجي

يابه عارف كاعد على بأية الدرج يبجي

غيدة حاضنة البنات ( كوثره و ضحى )
وكلهن يبجن...

جوهرة كاعده هناك امدده رجليها وتنافخ خطية
بالكوة تجر النفس بطنها لخشمها ... وتبجي

وبهجت جت من بره جانت يم خالتها
مطرشه عليها تريدها بشغلة ...

وتشمر روحها على يونس وتحضنه وتبوس بي
وتسب با أبوها وأبوه...

هو هم عيار أخوي وأعرفه زين
يحبها يموت عليها بس مخبل
لمها لحضنه هي وحنفيش

أمي عمشه طردته السافل بحجة يبوس حنفيش بوسها كبالنا ...

هي عاينت ذيب موجود
عاطت ،، ياااااخيي
وشبكته بقوة وتعيط وتبجي

وهم بس كاللها:- كافي يابة

يمه مريم كامت جابت بناته قربتهن عليه
ما رادهن ويحرك براسه يعني لا ...

وهن خطية طكن من البجي
وعيونهن شابحه عليه وشابكات غيدة

اثاري خطية أول ما داخل للدار متلكياته
وهو دافعهن ...

ورب العزة نظراتهن وشبحة عيونهن
وشهكات بجيهن يكسرن قلب الكافر

وتعدي الساعات ساعة بعد ساعة
وذيب على نفس كعدته
لا يحجي ولا يسأل ولا جنه موجود ويانه ...

و مبين هذاك هو خايف ...
وسبحان الله ما آمن غير لعمي شبيب

الا اجاه وخله ايدة بيدة يلا كام دخل للحمام
وهو (عمي شبيب ) ما تركه سبحه وطلعه
يونس شاورة يخافون علية لا يأذي روحه

وما يقبل عمي شبيب يتحرك من يمه لو يتركه وحده كاعد يمنا ...

من نسأله تعرف فلان تعرف فلان
يحرك راسه يعني أي
بس من يحجي كل سوالفة خيط وخرابيط

وما يقبل يعاين للتلفزيون يخاف..
يكول هذا راح يقتلني

الجهال فرحانين ويلعبون
من يعيطون بصوت عالي هو يفز ويبقى يتلفت ..

انتبهت لو يحرك اصابيع ايدة بشكل مستمر
لو يطكطكهن ( اصابيعه )
لو يعصر كفوف ايدة بقوة ويفتحهن على وسعهن

يمه كسر خاطري من سمع دكة ناقوس الساعة
فز وخله ايدة على راسة يحامي نفسه
ويصرخ :- مووو اني

وبسماط العشة الا عمي شبيب أكل كباله يلا أكل وراه

أهلنا من فرحتهم بوجوده ما يردون ينامون ...

بس هو خايف ويتلفت ،،ما يقبل ينام

طفت الكهرباء لو تخبل يصرخ بصوت عالي هز حياطين الدار بصوته...

سبحان الله بس هيئة أخونا الحيد
بس ولا هو
تصرفاته ما محزورة
كل شوية نكتشف بي شغلة جديدة تكسر خاطرنا علية

وعدت الأيام
وأهلنا خايفين عليه ما يتركوه يكعد وحده
حت للحمام يدخل عمي شبيب وياه
خطية طلك الدنيا وأهلها وتفرغلة...

أبواب الصحيات شالو منهن القفل الداخلي
حبس روحه جوة وبعد ما يعرف يفتح الباب ويطلع
كسروها وفلشوها يلا كدروا يطلعوه

وهو جمع العالم علينا بصوته العالي
يخاف لان كسروا بالباب عليه

وما يحجي شي قليل

بس يعرف يكول جوعان لو عطشان لو أريد أنام

استغفر الله كأنما عقلة عقل طفل ما يجاوز ال عشرة سنوات ...

الريس ربي يجازي بخير الدنيا والآخرة
أكرمه بالعفو المطلق وما عليه اي قيد او اي شرط

وأكرمه بعد من حولة على التقاعد
( طلع تقاعد بسبب فقدان الأهليه العقلية/
يعني طلع من خدمة السلك العسكري برتبة المقدم
وتحول إلى متقاعد ( أسباب صحيه )

واكرمه الريس بعد وكتبله توصيه
يستلم كافة مستحقاتة العسكرية
ومكافأة عن منصبه المهني ( الإداري )

يونس هو الركض وكمل كل معاملة تقاعده

أنوب بلش ياخذه للأطباء ويراجع بي
من الطبيب النفسي لطبيب الجملة العصبية
محد وكف على علته ...

حت للمشايخ آخذة يرقوه بالرقية الشرعية

المشكلة هو مو مجنون رسمي
أغلب تصرفاته اليومية زينة
بس يخاف ... عنده خوف فضيع

وكلساع وكال فلان يريد يقتلني...

هذا كاعد يخطط على قتلي ...

هذا كاعد يدبرلي مكيدة ...

انتبهنا ينادي على بهجت شهرمان

من يطلب شي منها يناديها بالشهرمان

حت هي خطية خافت كالت :- استغفر الله خاف يتخيلني المرحومة لو بعقلة أني هي ويحصرني
يعني بعقلة استغفر الله أني مرته شلون بيه ...

يونس مجاوبها:- لا انتبهي كل ذكرياته وتصرفاته
على وكت مراهقته وشبابه ...

- لا يونس انت متوهم يعرف كوثره وضحى بناته
مو يكول عليهن وحدتهن نغله

- لعد خليج حذره ،،
والله يسهلي وادبرله سفرة للخارج
هنا سكطوه بالعلاج المابي فايدة والمهدئات

أنوب الحظ المايل كام يتخبل من أمي عمشه
بوده بس يلزمها ويكتلها...

ويتخبل من صوت الجهال ..

خطية حت جوهرة من ولدت وجابت ولد...
سموه ( عبد العزيز ) انادي عبودي
مشت ارتاحت يم بيده بسكن حميد

ما شاء الله عمي شبيب صار عنده من جوهرة
خمسة ( ٥ أولاد )
( حويدر ،، سعد ،، مهيمن ،، منصور ،، و عبد العزيز )
وبنية وحده بس ( ميمونه )
وبيداء بعد هي بنتة البكر ..

بهاي الأيام وتبشرنا بهجت بخبر حملها...
هي الفرحانه أكثر من يونس

هو يضحك ويكول:- يلا صار بالغلط

وهي تكول :- ورب الكعبة أني سويتة
أني الكمزت عليه وجلبت بي
يخاف على روحه المربوووع
ووووين تريد تضم روحك أطير وراك

ورب العزة لو ما سوالف يونس وبهجت
فلا ينحمل قهر دارنا وكآبه أهلنا
ساعة يصيرون فارة وبزون
وساعة يصيرون حبايب دهن ودبس
وما ينعرف صدكهم من جذبهم .

بس حك الله ينكال يونس تعب
متشلخ وصاير بستين رجال ..

-ايد ويه ذيب وعلاجه ومراجعاتة

-وركضة قدم ويه مرتة (بهجت) بداية حملها وتعبت من السكري ومشاكل رفع الطحال .

-وما يلحك على المصرف خطية
نهبته المراجعات الطبيب نهيبه
أسم الله على العالم من شر المراجعات وشراية الدوه

-و كل شغلات أهلنا وأمور حياتهم
والزايد والناقص واكعه براسه .

وبهاي ألايام الحمد لله ربي جبرني بفرحة جديدة
وحبلت من جديد ...

أوس أول ما عرف بية حامل ضحك
وكال:- هالمره محتاج أخ

ضحكت وكتلة :- مو راح تصعد للكلية وبعدك بهذا تفكيرك ....

ضحك ودنك راسة خجلان :- لا بعد كبرنا

- هااا ما دام عرفت عجل استحقيت العرس

أبتسم بخجل :- الله وايدج

ناديت بصوت عالي على معن
- ووووينك معن تعااال
الولد طلب حقه

هو خطية خجل ،، طفر علية وسد حلكي
مستحي وخجلان من ابوة

ألف الحمد لله والشكر لله
أوس كل ما يكبر يعقل ويركز

صار صديقي مو بس أبني...

بس شنو يتخبل من ينغز بالحجي الباطل
بطاري المرحومة ،،
استغفر الله كأنما ياخذني بذنبها
بس بعد عرفت طبعة
يومين ثلاثه ويفش ويتغير مزاجه وتفكيره
ويرجع لطبعه العادي ..

الريس ربي يجازي بخير الدنيا والآخرة
أكرم الشعب العراقي جميعآ
وفرج عن السجناء وأنطاهم عفو عام

وصار تقريبا بالسنتين استعدل سلم رواتب الموظفين
وقوى دخل الفرد ،، وتحسنت عيشة العوائل

ومنا الدولة وزعت علينا مواد غذائية بكميات جبيرة
عدنا المخزن طخ للسكف بأنواع المواد

والف الحمد لله والشكر لله ويه هلت الخير
بهجت بعد تعب وشهور العناء ولدت بنية ..
سماها يونس ( بان )

حنفيش ( قائد ) أخوها مات من الغيرة
خطية حت ضعف .. وبس يزعل ويبجي

على غفلة ما يهجسون الا مسوحلها
لو فجأه يضربها ..

المسكينه بعدها طفلة أنفاس
وهطرها بالممه مليانه حليب على كصتها
شك حاجبها صارت ضربتها على شكل زائد
ويخيطون كصتها وحاجبها خطية أربعة ( ٤ ) خياطات

يمه ويلزمة يونس يخبزة خبز
طلع بي كل قهرة على حالة ذيب
وتعب وثقل مسؤولية أهلنا علية

وتزعل بهجت ،، وتأخذ جهالها ( حنفيش و بان )
ومنا هي ولدت عملية
وتمشي يم بيداء

بعد طكت حوصلت يونس
وهو هم بشر والله يساعده على التعب وثقل المسؤولية
تخبل على بهجت ،،
لو ترجع للدار لو يطلكها...

وهي هم تعبانه من الحمل وعملية الولادة
وحملها يلعب النفس
حالتها تختلف عن باقي النسوان بفترة الحمل
هم عدها سكري،، وهم رافعه الطحال

هي ( بهجت ) بعد عاندت ما قبلت ترجع وياه ...

ويلزمها ( يونس) ويكتلها وهي بفترة النفاس
وحت بعدها ما شايلة خياط العملية
تخربطت جوة ايدة...

وهذيج العركة السودة اشتعلت
بين يونس وبين حميد

حميد تخبل شلون يضربها ( يونس ) بداره
من باب ما احترمه
وهم شالتة غيرته عليها ( هم بنت عمه ،، وهم مرت أخوة ،، وهم تنحسب أم مرته / بيداء )

ويدفع يونس بسبب عصبيتة الثمن غالي
ويحير بهجت وياخذها من مشفى لمشفى

والجهال حارت بيهم باجي كفاح

والراح والجاي يلوم بي محد قبل على فعلته ...

وهي خطية وصلت للموت ...
لزمتها الصخونه...
ولا دكتور وكف على علتها

هو ( يونس) غدة هلكبره من التعب والمسؤولية والقهر
خطية كلشي براسه

يابه عارف رجال جبير
هو ويمه مريم واحد مداري الثاني وشايلين حملهم

عمي شبيب مكابل ذيب وكاعد
صار هو أمه وهو أبوه

فوكع كلشي براس يونس خطية.

شو جي علينا بهذاك اليوم حمود خايف
كال :- شعدكم فلوس ودايع اي شغلات مالية بالبنوك سحبوها

-وحضروا جواز سفر لذيب

- و حفروا بير ماي بالبستان ،، وجهزولكم ملجأ

ولا تبيعون المواد الغذائية..

يابة شكو وشصاير ...؟؟

جاوب بخوف :- ألامريكان علنو الحرب علينا
بس بعد ما نعرف شوكت ادك ساعة الصفر

أسم الله على بلدنا ودولتنا وأهلنا وناسنا
من شر وضيم الحروب
خلصنا حياتنا حرب ومعركة وهجوم

وبهاي الأيام القلقة والمتوترة
ولدت طبيعي بالمشفي
واجاني ( أحمد )

فرحة أوس بولادة أخوة أحمد
اكثر من فرحة معن ...

أبرار بعد عمري فرحانه
لان كثرت عائلتنا
وتكول :- اي هسه تعادلت كفة الميزان
صرنا اثنين بنات و اثنين ولد .

لا إله إلا الله ،، بين ليلة وضحاها
انهجم حال بلدنا ....

والاناشيد الوطنية تخوف وتربك أكثر من الحماس البيها...

وساعة السوووووودة بهذاك اليوم
العلنوا بي سقوط النظام الرئاسي ...

ولنا لقاء قادم أن شاء الله
++++++++++++++++++++

من دعائكم لا تنسوي 😔

شكرا جزيلا نابع من أعماق قلبي 💖
لك من ذكرني بالدعاء 🤲
ولكل من اتصل 💫
ولكل من سأل يطمئن عن حالي وصحتي 🌹