بلغتني يمة مريم أبوي خزعل ويابه عارف وعمامي والولد وافقوا على قسمتي من فراس
بس يابه عارف خايف ويسأل -ليش فصخ من هذيج البنية (خطيبته السابقة) وشنو قصدة من يكول - لأسباب خاصه بيه فركشت الخطوبة وبنت العالم مالها ذنب وهو واصل وياها للعرس وعاقد عقد شرعي،،،ومكمل عقد المحكمة شنو هاي أسبابه الخاصه لآزم أعرفها اخاف تتورط البنيه وياه (يقصد بسمة)
يمه ما أدري هجي موضوع الخطوبه يسببلي أحراج وخجل أستحي اطلع كبال أبوي لو عمامي لو الولد ومن أسمعهم يجبون طاري قسمتي لو طاري فراس أريد بس اركض والبد واضم روحي من يمهم.
باجي فوزية هي ويمه مريم مشن لدار فراس والحجة بحجتين هم يجيكن وضعهم ودارهم وهم يرجعن الهم جواب الموافقه وهم باجي فوزية تستجوب أمه واخته وتعرف ليش فصخ خطوبته
من رجعن كعدت ويايه يمه مريم -يمه حالة الولد على كد الحال الحمد لله ربج ساترهم
بيتهم طابو بأسم أبوهم الله يرحمه بس مو ذاك البنيان بي عينج وما تبصر حوش الولد مسوي كراج لسيارته
