#فراقد
#قوقعة-جمر
#ح- ٩ -
*********************
فاضحني الكلب بس يبجي بالليل.
موكافي البجي حس الليل مسموع.
محد شال همك ياكلب ليش.
وعليك اليوم صار الفرح ممنوع.
كف الدمع ما ينفع بجي ونوح.
شاريهم جنت واليوم مبيوع.
باعوك برخص ياوسفه ياحيف.
وبعد هيهات للباعوك مرجوع.
جرح السيف لابد ينمحي بيوم.
بس جرح المحب للموت مطبوع.
++++++++++++++++++++++++
كفاح /
من عرفت نائل عرفت أشكال المصايب
أيقنت وجودة طركاعه بحياتي
وحمدت الله من اتبلغنه من الأمن هو مفقود
قنعت روحي إني أصبحت أرمله
أصبح أرمله أهون عليه من وجودة
مسربت ودايح ومحسوب عليه رجال
صابتني رحمة من أنفقد،،،
أبسط شي أخذ شوري من راسي واللصم حلوك،،،
واشد احزامي وأصيرن أم وأب لبناتي
للعيشه ما أشيل هم
الزايد والناقص على حساب أجداد البنات
ما مقصرين بحكنه
بناتي أشواق وابتهاج حديثات
وحدتهن طيورة ذهب
ومطيعات يفهمني على الإشاره
واثقه بيهن
ما خاف منهن لو أفكر يزلن ويجلبن الشينه
وحدتهن حدر يمناي.
بس حظ ما عدهن،،،
حظهن أنكس من حظي
قسمتهن انردت عليها باب حقد العكارب
وبعد كلنه نعرف لو العكارب حقدن
يشيعن صيت الباطل ويلطخن السمعة
بس أني لازمة حبل الله وناخية رحمته الهن
ما بيدي شي عليهن غير بس أدعيلهن
فوزية أخيتي ما حاسبتها حماتي
صارحتني بكلام دار بينها وبين سماح
إني أم وكلبي يعصرني على ضناي
بس فرحة مو بنيه عاديه
طينتها نكسه بذرة طينة أبوها
من هي جاهله تفطن لسوالف الكبار
وتصفن على الحلوك
وتقلد شكو شي يجذب النظر
بعدها صغيرة من تمشي للمدرسه
جدتها صفنت على سوالفها ولعبها وحجيها
وكالت
- هاي البنت غويه
بس تطول شبر تجرش الشلب
ظلت حجايتها ترن براسي
وصدك يوم على يوم ثبت عندي صحة كلامها
والله ستر حالها واخذها ابن عمها
وكلت بعد ذيب وأسمة عليه
و لو جابل العايل يفصم ظهره
وهي أصبحت بذمته أمنت عليها
طلع ذيب يمها ما يحل رجل الدجاجة
يطيح كبل لا طيح دمعة عيونها
يمثل جدامنه هو قاسي عليها
وهي تسر عمتها فوزية تكلها- ما يكدر على زعلي
حرت بطبعها وحرت بزماني
لا من أقسي عليها أكدر أشمكها واسيطر عليها
ولا من اهملها يرتاح كلبي
صفنت ويه حالي
وعرفت شلون اكسبها لجانبي
دخلت عليها لكبتها
وحجيت وياها بالبسكوت
وطمعتها أمشي وياها وين ما جان بلكت تحبل
وكبل لا أنفذ هذا الشور الطلع براسي
سريت فوزية وبلغتها
خاف باجر عكبة كلشي يصير هي تسندني
لأن ذيب مانع عنها طلعت الباب
كلش فرحت من عاينتني أريد اساعدها
وحذرتها ما تسولف عن شي لو طلعنه
بس أني بالبسكوت بكلشي أبلغ فوزيه
أخذتها وطلعت
ومن طلعت حجيت بصوت عالي أريد أسمع الكل بحساب اريد أخذها للخياطة
بس بلغت فوزية بالصدك
أني ماخذتها لفليحة العبده أم طشة تعاين فالها.
أخذتها ومشيت
وهي الطريق كله تسولف وياي بسوالف ما سامعتها منها من كبل
ظلت جالكه حلكها من طشت المرأه العبدة إلها الفال
بشرتها بكثرة البزرة،،،وتمل منهم
وبشرتها وهي تعاين بالفال الها حوش وحدها
وبشرتها بحب رجلها إلها
وهو يصبح رجل صاحب صيت وسلطة
رجعنه للحوش وهي شاركة حلكها فرحانه
إني ما عرف بسوالف الجبسة
بس من كعدنه يم فليحة العبده سمعت النساوين يسولفن أشكال وارناك السوالف
كلت الروحي
هذا الدرب هو اليقرب فرحة من يمي
ميته على الحباله و تريد جاهل تلتهي وياه
وصفنت على تفكيرها
تكلي
-يمه من اجيب ولد ذيب يحبني أكثر
وأريد اخلف كومة ولد حتى ما يعاين على غيري
يمه أني أخاف من يكبر بعد
ويصير ضابط جبير
يمل من يمي لو يتزوج عليه
اريد أربطة بكثرة الخلفة حتى بعد لا يحيص ولا يفيص
بالبسكوت بلشت وياها
بحجة أفك الجبسة من يمها
وإني اجذب عليها كلشي ما أعرف
غير السامعته من النساوين والتعلمني عليه فوزية
يوم اطكطك الها عدس وملح
ويوم أحضر إلها مي و ورك سدر واكلها غسلي بي
ويوم اقرأ على رأسها أية الرحمن
وهي لزكت يمي ما تفاركني
لان فهمتها كلشي نسوي يظل بيناتنه
تكربت من خواتها
وتكربت مني
وكامت تسولفلي الصغيرة والجبيره
كبل ما تبات بكبتنه من يلتحق ذيب
تنام وحدها بكبتها
من خاويتها كامت تاكل وتشرب وتنام عدنه
أعاينها تفرح بجازة رجلها
وتنغمت روحها من يلتحق
المفلوكة تعشكة وتموت على طاريه
وتنصب عزه بيوم التحيض وما تشكل وياها الحباله
كتلها
-اخذج للجدة هي تعرف ليش ما تحبلين
أستشاريت فوزية وكالت - أخذيها أحنه هم نريد وليد نفرح بي ويشيل إسم ذيب
وحك الله هي كلش تأخرت وما شالت
والحجي يوصلونه النه من العكارب
على هااا هي عاكر وما تضني
مشيت بيها للجدة
وأم رؤف أيدها عافيه كلش شاطره
مولده نص نساوين المنطقة على ايدها
كشفت عليها،،،سألتها،،،كلبت بطنها
كالتلي - أمشي بيها للمشفي
ما أعرفلها
وعلى ما أظن بيت رحمها خربان
رجعنه للحوش وهي مهضومة وتبجي
سولفت لفوزية
كالت - خليها عليه أني ادبرلج طلعه واخذيها للمشفي
وصدك ناوشتني دفتر الاورزدي
وبحجة أمشي اشترى شغلات للبنات
امشي بيها مناك للمشفي
بطرت الفجر غبشت بيها لمشفي الولادة
وأنوب ازدحام على كبة الطبيبة
والفراشه ادفع بالنساوين
لحد ما وصل سرانه زعت العافيه كلش تعبت
الطبيبة كشفت عليها
وسألتها
وكتب إلها ورقة جديده حولتنه على غير كبه
ويا حبيبه يا يمه السرة يكطع باب الكلب
كولن دخلنه على طبيبة مرأه جبيره بالعمر
جدامها تلفزيون تعبان حت مابي صورة واضحة
مشت على بطنها جف صغير واصل بالكهرباء
وهي الطبيبة تعاين بالتلفزيون بس نمش
مابي صوره
كالت الها
-ماما رحمج صغير ما يصير عندج حمل
اتورطت على عمري وسألتها
-فدوة اروحلج خيه ما تفهميني شلون بيت رحمها صغير وهي بت حديثه وتغسل وصارلها شكثر من عرست
لو أكلتني وشربتني
واخذتني بلسانها
فرجت النساوين عليه
وتصرخ
-شلووون يعني أعووف المراجعات ينتظرون بالسره وأكعد ادرسج وافهمج شنو رحمها صغير وما يصير عدها حمل
- بنتج يكبر عمرها وجسمها
بس رحمها يبقه صغير ما يكبر
وما يشيل وزن الجنين
-تعرفين شنو يعني الجنين
لو الا أكول جاهل يلا تعرفين
كلش خجلت واستحيت زفتني زفة معدله
أنهضمت أخذت فرحة وطلعت
أجت الفراشه تركض ورانه ناوشت لفرحة ورقة
هي توسلت بيه نرد على كبه اول طبيبه
رديت وياها والدنيا طلعت من نواظري
الطبيبة قرت الورقه
كالت إلها
-ماما خلي عينج بعين الله ما يصير عندج حمل
رحمج ما يكبر يبقة صغير رحم طفلة
اعاين عليها عيونها تهمل وتعاين بهضيمة
بوجة الطبيبه.
رديت لدار عيالي وعساني لا رديت
سودة بوجة حدهن هجمت حياة سماح
وفزعت فوزية يشهد إلها التاريخ
وتسولف بيها كعدات الدواوين
الله أكبر نوبات المواقف تبين معادن البشر
ومرات تخلي يطلع عن طوره
سماح /
بهذيج الليله الكشره العزم بيها حكيم أصدقائه
على العشه،،،وحضر الميز والشرب
بطرت الفجر يلا دخل للكبة
و غادي طين من شرب العرك
مديت فراشه ولف راسه ونام
رؤى كعدت تبجي جوعانه تريد ممية
اني أجهز اثنين مميات الها
بس وحدة شربتها أول الليل
و لآزم اغسلها حمضت
وحدة عمتي انطتها لسطان سكتته و نومته
شلت روئ
وأخذت المميه وطلعت للمطبخ
أنوب ظلمة يادوب طار ضوه الفجر
و رؤى تبجي شايلتها على صفحتي
وبيد وحده اغسل بالمميه
وما أسمع بس صوت حدهن صرخت
يبووووووو يااااا هل عررررب لحكوووووا
كل ضني واحد من جهالها تخربط
عدها البنية الجبيرة مصابه بالربو
خطية تختنك ويقبط صدرها تجر النفس بالكوه
التفت مخروعة على صريخها
باب المطبخ لمحت جهامة رجال
المكشوف أظلم،،،والمطبخ أظلم
يادوب شاع ضوه الفجر
ما فرزنت ملامحة هو منو
يادوب مبين هو رجال
هو صرخ
-خيرررر شبيج
هي بعد لا تسمع ولا تعاين
هرجت الدنيا بالصريخ يبووووو ما يبووووو
ما أتذكر شلون طلعت من المطبخ
وشلون وصلت يمها
وكل فكري وبالي واحد من جهالها صار عليه شي
رؤى تخبلت من صريخها وصوتها العالي
اتفركعت من البجي
عمتي أجت مخرعة وتصرخ
- برررد يمه الرحمن وايه القرعان
-هاااا حدهن شمالج،،،شجرالج
باب الشارع تكسر علينه وصوت ازلام فازعين
عاينت الرجال الغريب هو الفتح باب الشارع
فلشوها الازلام علينه
ودخلوا فازعين شكو،،،وشبيكم
وهي حدهن كعدت بالكاع ودك ولطم
وتصرخ
-عمه تخزينه وانشهرنه
-عاااايني لجنتج بنت الشيوخ جانت نايمة بحظن هذا الزلمة الغريب
-كرصتهم بالمطبخ وصرخت حت اندهج
أنصدمت منها هاي شبيها،،،شجاها
تحجي صدك لو تخبلت
لو انذبح بهذيج الدقيقة ما يحصلون مني نكطة دم.
ياربي اعاين زين هذا سلطان صديق حكيم
ويعزة أكثر من أخوة
حتى سمه أبنه على أسمة
وهاي مو أول مره يبات عدنه.
عمتي تعرفة عز المعرفه
وتعرف أهله،،،وتعرف مرته وجهاله
دوم تواصلهم وتمشي لدارهم.
حتى حماي يعرفة ويعرف أهله وإخوانه
الرجال اتبلهت وزكح عليها
-شجاااج تخبلتي
-عيببب عليج كصري حسج
اعاين للجوارين يعاينون عليه بنظرات ما عرفت افسرها،،،اتمنيت الكاع تنشك وتبلعني ولا اوكع من نظرهم
هي كامت تبثول وتقسم الف قسم
وتأكد على جذبها وحقارتها
موقف لليكرهه الكلب ما اتمناه
سلطان تولاها رزايل ومسبه
وشكله مبين مو كلش سكران
وهو الي بلش يقسم ويحجي للناس
هو لا يعرفني،،،ولا لامح ظلي
ولا يدري بيه أني بالمطبخ
داخل للتواليت
وبطلعته صرخت حدهن
إني اخرسيت،،،حلكي انلصم
الموقف جدآ صعب عليه
من الخجل والمستحة و نظرات الناس اليه
لزمتني الرجفه
هو ظل يقسم ويبريني كبل لا يبرى روحه
واحد من الزلم كال
-وين رجلها؟؟؟؟؟
شنهي كل هاي الهوسه وهو نايم
عمتي اخرست وبس تعاين بوجهي
مشت ودخلت لكبتنه تنده حكيم
بنتي على أيدي اتفركعت من البجي
الناس مجموعين داير مدايرنه
وعيونهم شاخصه عليه وتسولف بالباطل
وجنهم صدكوا بجذب حدهن
هي حدهن كاعده بالكاع وتلطم على رجليها
وتقسم بكل قسم يهز عرش السموات
وتعيد وتزيد بجذبها وحقدها
سلطان تخبل وظل يتخطة بمكانه
طلع حكيم من كبتنه وجهه وراسه ينكط مي
مبين عمتي غسلت راسه بماي سراحية
المخليتها للجهال
هو أجاني شلون الثور الهايج
دفرني منا شمرني هناك
كومني بجلاق
وكعدني بكفخه
صرت هلكدني كبال الناس
هذا الي فزعلي
وهذا الي ظل واكف ويتفرج
سلطان فزعلي ولزم حكيم وجتف ايده وره ظهره
حكيم مبين هذاك هو سكران
يخيط ويخربط بالحجي
أنوب صار شكد قوي
هاج على سلطان وتولاه بوكسات
وغلط وفشار ومسبه
ويصرخ
-ليششش تمس عرضي وتكسر شرفي
وتنام ويه مرتي،،،،شمسويلك وهجي غدرتني
سلطان يقسمله ويحجي ويبريني
حكيم بهذيج الساعه
وبسبب سكره وخبالاته
ضرني ما نفعني
وبسبب هجومة عليه وعلى صديقة سلطان
ثبت للناس مصداقيه جذب حدهن
وزاد الطين بله من دفعني وطلعني للشارع
واخذ روئ من حظني
والناس بعد ما صدكت لكت علج وتعلج بي
من الخجل تيهت منين أمشي لو وين أروح
ردت أستر حالي وسمعتي وسمعت أهلي
اتوسل بحكيم و طحت بوست ايدة
بس أريده يتركني ارجع ادخل للحوش
هو تفل بوجة سلطان صديقة ودفعه للشارع
أنوب عمتي زرفت كلبي
وإني انخاها واحشم بيها تفزعلي
ترد
-شعندج طلعتي من كبتج بظلمة؟؟؟
-من أمس نبيتج وكتلج أركدي بكبتج
شعندج طلعتي؟؟؟؟
اقسم الها وأكلها
-رؤى كعدت تبجي جوعانه
وطلعت اغسل مميتها محمضه من حليب الليل
وأخذتها شايلتها على أيدي
-وحدهن صرخت وجمعت الناس علينه
-قسماً بعرش الله ما ادري أكو رجال بايت عدنه
هي هزت أيدها ولوت حلكها
كالت
- ما ندهتيني انا اكوم أغسلها
-و منهو يكول كلامج صدك!!!!!
-ومرت حماج كاعده تحلف بروس جهالها
كضتج وأنتي نايمة بحظن الزلمة
سلطان هنا صرخ بصوت هز الكاع
-مشيييت أبوووول وبطلعتي من المرافق هاي العار بلشت تصرخ
-ياااا عالم المرأه بريه
لا شفتها ولا لمحت خيالها
ولا أدري بيها هي بالمطبخ
هي حدهن صرخت
-جذذذاب وروح أخوي
وراس أولادي كرصتك حاظنها وتمطك بيها
وايدك تلعب على ثد.... ها...
وثوبها مشلح لجتافها
هنا حكيم تخبل رسمي من سمع هذا كلامها
دفرني وكعني للكاع
وسحلني من شعري شمرني بالشارع
كلبي من ذهول الموقف
والخوف،،،والصدمة
اهجسه راح يطلع من ظلوعي
حدهن ظلت تبثول وتحجي بصوت عالي
- يعااالم لا بحسابكم اكرهه و تبليت عليها
- هن عدهن رس خايس
بنت أخوها بطول النعال غاويه و خفيفة
أخذها إبن عمها بالحرام
وبساع بساع ستروهم وعرسولهم
-ولكم نسيتوا أخوها فيصل نهب بنت من الكليه
وخلف نغلة شمروها اجدادها أهل أمها
على أهلها (تقصد أهل سماح)
-وأخوها نائل كلكم تعرفون بي
ساقط ومسربت وسمعته بالطهارة
-الله يا الله مكيفه أبوها كليط
وبزرته كلهم عارات وسكوطة
أني بس اتلفت بالوجة
واعاين بعيوان الناس شلون يتفرجون عليه
وحالتي ما أعرف اوصفها شنو
حكيم سحب عمتي
وسحب حدهن لداخل الحوش وطبك الباب
اجاني رجال كلش جبير
مدلي إيده وكالي
-كومي بويه كومي ربج موجود
ما أعرف شصار بيه
شهكات هضيمتي تشك صدري وتصعد للسمه
-والله العظيم يااابه بريه
وروح اخوي الشهيد بريه
وشرف مريم أم عيسى بريه
هو خطيه دنك عليه ولزم ايدي يساعدني حتى انهض لحيلي
أنوب أريد انهض من الكاع بعد حيلي تفلش
والناس واكفين يتفرجون عليه
الرجال ساعدني وشجعني حتى انهض
-كووومي بويه عفه السبعه
ابوج ما يستاهل هذا الصيت
-كووومي بعد خالج
لا تهتمين أنتي واهلج نجمكم لامع بشمس الضحه
رجال ثاني شمره عليه عبايه
-كومي خويه أمشي لاهلج
بيت أهلي مسافه مو مال مشي بهذا حالي
هذا الرجال الجبير حشم شاب
يجيب سيارته
هم جوارينه مو بعيدين علينه
جاب الشاب السياره
وصعد وياي الرجال الجبير
وصلوني لحد باب أهلي
-كالي
بويه دخلي لحوشكم
ما أنزل وياج اعذريني تصير جبيرة بحكج
- لو نشدج أبوج ياهو الزتج
كليله خالي أبو جبير فراش دائرة البريد
نزلت لحوش أهلي
واهجس الكاع تفتر بيه
ورجليه مخيطة ما أكدر اخطي
تلكتني مريم كاعده تكطع بالعجين تريد تخبز
شاجرة تنورها
كعدت باب الحوش من الداخل
وصرخت
-بووووووووويه أبووووو عثمااان تلكاني
جيتك مظلومة
طلعت فوزية من المطبخ مخروعة
واجت أمي تركض من كبتها
وأبوي طلع من كبته وجهه مخطوف
التموا عليه أهلي
وعارف بكبته يصرخ خطية ما يكدر يمشي
-مرررريم شكوووو
يوووونس وووووينك تعال شيلني
بس كلت
-بووويه حدهن تهمتني ويه سلطان صديق حكيم
ولمت الناس عليه
وحكيم كتلني وطردني بالشارع
سوده عليه أنهد حيله
و وكعد بهدكة بالكاع
أمي خرطت خدودها
فوزية عضت اصبعها وركضت
أبوية لزم رأسه وأنوب كام يفرك بصدرة
واشر لمريم على حلكة يريد ماي
وتطلع فوزية محزمة بعباة أمي
ولافة شيلتها...وبيدها رشاشة أبوي
وطلعت تركض للشارع
لحكها يونس وهي زكحت عليه وردته
بس ما عافها راح يركض وراها
وهم لحكتها مريم تركض وراهم
ولابسه ثوب الخبز فوك ثيابها
عارف سندته بسمة واشواق
وجابنه يمشي بخطوات ميته لحد ما وصل ليمي
كعدت كباله اسولفه بهضيمة وعيوني تهمل جمر
على ظلم الباطل
وهو سودة عليه يدك على رجليه
كطعن بي وما يكدر يمشي
و يكوم يفزعلي
أمي ملخت حالها وهي تسمع بالظلم الطاح عليه
أبوي كالي
-بسج بويه لا تهمين وخشمي يشم الهوى
-لا تهمين لبشر بويه
اني أعرف تربات ايدي شنهي
-الا اكٓرم رجلج النذل واخلي يزحف على طي.... ه
بنات أخوي شالني وسندن روحي
واخذني للحمام
أريد اغسل كلبي بماي بارد بلكت يهيد ويستجن
مشيت وكعدت بكبة أمي
ولن تجي فوزية
كعدت كبالي
-عايني عليه،،،و ربج،،،،وحك دين النبي
اخذت حكج مربع
- هديت على رجلج السكيطة
-هجمت باب حوشه عليه
-ولج عينج لا بصرت لعبت بيهم فلك
-بس عمتج الباطلة فكت الباب
صليت الفشك فوك راسها
-دفرتها بصدرها
-ودخلت لنص الحوش واخرط الفشك عليهم
-ولج رجلج ما طلع رأسه الجايف
-هجمت باب كبة حدهن عليها
وطكيتها بفشكتين خليت صريخها هي وبزرتها يوصل للطاك
-جمعت أمه الإسلام عليهم
-ووولج اااخ يا نااار كلبي
انا يطلع عليه حكيم العركجي يتهادد بالأصخرية
-صليت فوكاه الفشك بطحته بالكاع خليته ما يتنفس
-بلغته وجدام كل العالم
اذا للعصر ما حول لديوان ابوي
ودم الشهيد
الا أخلي الراجمة تهلهل بحوشه
إني الوب من هضيمتي وقهري
ويونس يضحك ويقلد شلون فوزية هجمت على عيالي
-مو مرأة آفة وداعت عزيز كلب ذيب
-جدة لا تنقهرين سبعج فوزي فاط بيهم
بول حكيم بسرواله
-جدة نتفت امه بخمص العرجة دعبلتها هناك
-وحدهن يمكن سلمت لأمانة لله
دخان الفشك طلع من الحياطين
فوزية ما أدري بيش هفته وطردته
تفووور من القهر
بعد سمعتي أنلطخت
و سمعت أبوي وأهلي الجانت تلمع
نجحت حدهن بالباطل ولطختها
اخواني طشرهم الوكت
فيصل سودة عليه انتكل بسبب خلاف عشائري
كريم سودة عليه استشهد
عثمان تعوق بالحرب ومسافر للعلاج هو وابنة حميد
عارف مكابلني وكاعد شبه المشلول
شبيب عسكري وملتحق بجبهات القتال
نائل وجوده وعدمة وجوده ما يفرق
أنوب شارد وخزه أبوي بين العربان
ذيب طالب عسكري وملتحق
يونس طالب مدرسه وفقير
مو صاحب مشاكل
بس ابوي سودة عليه واكف على طوله ويلوب أهجسه مجتف وما يعرف شيسوي
خلف الله على فوزية متحزمة واكفه بطوله
فوك هضيمتي الأمن طوقوا دارنه
لان ممنوع ينرفع اسلاح بدون علم الحكومة
وممنوع الرمي بداخل المناطق السكنيه
طلع عليهم ابوي
ويونس دفع عارف بالعربانه
وتلكوهم بالديوان
رجال الأمن مو غربه ولد المنطقة ويعرفون أبوي
بس المسؤول عنهم غريب مو من ديرتنا
أبوي فهمهم أن الموضوع عائلي
وعركة نساوين
وأعتذر منهم
و وعدهم يحضر للمركز العصر ويتصافون هناك
عمتي وحدهن هن المقدمات البلاغ
وكايلات بالشكوة يونس هاد عليهن
انسحبوا الأمن ورجعوا للمركز
شوية وردوا رجعوا
جتفوا يونس يردون ياخذونه وياهم
عارف تخبل عليه
بعده صغير وفقير
مو مال يدخل سجن وتشوه روحة ويخرب تفكيره
فوزية بعد تربات أيد ابوي
وساندة ظهرها بأسم اخواني
لفت شيلتها،،،وتنكبت،،،ولبست عباة أمي
وشالت الرشاشه ومشت للديوان
وكعدت بطارف الديوان
وحجت الصدك لجبير رجال الأمن
هو باقي يضحك ومفتخر بفزعتها
طالب منها تسلمة الرشاشه وتسقط الدعوة...
لان المرأه هي الرمت
وهم بعد يعرفون ابوي يكدرون يسدون السالفة
من يمهم
مجاوبته
-أنا كحيلة سلف ما تواطني أم هدان
انا ربات المضيف وهزت الفنجان
انا ربات صدام وفزعت العربان
أنا ربات الخير أبو عثمان
انحرني هنا بديوان أبوي وما اسلمك سلاحي
بعمرك سامع الحره بالهين تسلم شرفها
هذا سلاحي شرفي
انحرني وأخذ العرجة مني
هو ضاحك بفخر ومسلم على أبوي
ومفتخر بشجاعة فوزية وفزعتها
دخل يونس متباهي
ورافع ذرعانه يمشي متبختر
ويفتل بشواربه،،،
يصرخ
-جددة إوليدج فوزي بيض الوجة بديوان خزعل
- جدة اظن راح يسحبون أسم فوزي
للجيش الشعبي و يعينونه قائد يضب النسوان
أحنه وين وسوالف قشمره يونس وين
واحدنه داخ بزمانه
أبوي مشه يبلغ عمامي بسالفه
أنوب السالفة تجيد نار وتسعر بالكلب
حكيم يصير أقرباء أمي من بعيد
هو من نفس عشيرتنا
بس فخذهم يختلف عن فخذنه
للظهر ولن تدخل كفاح وفرحة
حتى ما فكدتهن وين جانن مختفيات من الصبح
اعاين لفرحة عيونها مكلوبه دم
وناطات،،،وخلقتها مكلوبه
كفاح وفوزية كعدن يسولفن بالصار
وكفاح تحمس بفوزية وتشجعها على فزعتها
للعصر اشتعلت ناررر بحوشنه
ديوان أبوي هجمة حكيم وجبير فخذهم على روسنه
واحدنه ما شام كفة إيده ويحزر شضامله غدر البشر
إني عرست بس بشهادة عقد المؤمن
ما ثبتت اليه شهادة زواج عند الحكومة
ومن ولدت جهالي ثلاثتهم
ولدتهم بدار الجدة
وهي على بطاقتي وبطاقه حكيم
ورقة عقد المؤمن بيها أسمه وتوقيعه
ثبتت ألهم بيانات الولاده
شكثر نبيت حكيم يطلع للجهال بطايق
و يثبت النه شهادة زواج بسجلات الحكومة
يسكتني و يكول اليوم وباجر
يتعاجز يمشي بمعاملة
حكيم رجلي واعرفة من يتوازه وينحصر
يهبد البصفة حتى يخلص روحه
الفجر جان سكران مو بوعاته
ما عرف يلملم الموضوع
حدهن نجحت بحقدها وثبتت جذبها براسي
يعني بعد ما افيده طشت سالفتنه بين العربان
وأنوب فزعة فوزية قللت من قدره
راد الطلاك وما يتنازل
وأبوي بعث لصديقة سلطان
حضر هو وأهله وجبيرهم وكعد بديوان أبوي
براني من التهمة الباطله
بس حكيم بعد لا يعاين ولا يسمع
مصر على الطلاك
عمامي ما قابلين على الطلاك
لان تثبت عليه التهمة بس يطلكني
حكيم مفأجئ الكل وكال
-اطلكها ونفضها بيناتنه
أحسن ما اشهركم بالمحاكم
لا عدكم عقد زواج يثبت زواجنه
ولا موقفكم يسمحلكم ترفعون عليه دعوه تظلم
متلازم هو وعمي وصايره بيناتهم دمايه
أنوب تخبل بالزايد
شلون عمي يضربة بنص الديوان وبوجود جبيرهم
وأبوي مفتخر بفزعة فوزية الصبح
وهدتها عليه
مهدد راح يمشي للمحكمة ويقيم دعوة
ويسجن أبوي وعمامي وحتى فوزيه
و اسبوع تجر الشيوخ والعكل
و الواسطات وطباببين الخير
الله أكبر على كل ظالم
أني الضحية والمظلومة والمطعونه
شو صفة الحق الهم وحكموا عليه بالموت.....
ولنا لقاء قادم ان شاء الله
+++++++++++++++++++