كما يحلو لي (حوار بالعامية المصرية) الجزء الأول

بعض النقاط الهامة وخبر حلو

ازيكم عاملين ايه يارب تكونوا بخير..

أول حاجة فيه فصل كمان شوية.. هنشره الليلادي في خلال ساعتين إن شاء الله..

تاني حاجة..

دي بعض مشاركات لستات وبنات فيه منهم اللي سنه صغير وفيه اللي سنه اكتر من 30 سنة ومعاه أولاد ومشاركاتهم لغاية ما قروا اخر فصل اتنشر..

ياريت نحاول نفهم النقط دي زيهم يمكن تفيدنا في خلال تعاملنا مع الشخصيات ومع نظرة المجتمع نفسها..

أول مشاركة لميريهان ..

عمر...

محاور ومفاوض شاطر جدا جدا ده كان المفروض يشتغل فى السلك الدبلو..ماسى يارا..جل ده انا كنت هعيط وانت عامل ملاك كدا .. عمر طول الفصل بيقنع روان انها عمرها ماهتكون مجب..رة وكل شئ هيتم بموافقتها مع انه مابيعملش حاجه طول الفصل غير انه بيجبرها وبيستغلها وبيضغط عليها علشان توافق

1. بدأ بتجاهلها ١٠ ايام من غير ولا كلمه ولا اى تعامل بينهم علشان يجبر..ها انها هى اللى تتكلم وتطلب وتتفاوض

2. طول الفصل بيجبرها بخبثه وخبرته مع الستات وبيشتتها بلمساته وحركاته ويقربها منه بزياده بيوصلها لدرجة الاحتياج لقربه لدرجه انها ماتعرفش ترفض شروطه

3. بيجبرها بتأثيره عليها بضحكته وابتسامته الجذابه بنبره صوته وانفاسه ونظراته ليها

4. بيجبرها بمغازلته ليها وانه بيرملها شويه ود صغيرين شويه شكلك حلو وشويه حلوة الشامه وشويه الفستان والميكب

5. قالها مش هننفصل الا اما نجرب الاول وبعد كدا نقرر هنكمل ولا هننفصل

6. بيقولها ادق التفاصيل اللى هى بتفكر فيها وبتدور فى عقلها وده لسببين الاول انه يرميلها كارت ارهاب بانها كتاب مفتوح بالنسباله وبيبقى عارف وفاهم كل اللى فى دماغها وانها عمرها ماتقدر تكدب عليه او تخدعه بيحاول يربكها ويوترها ويجبرها على الصراحه دايما والتانى ان يحصل شويه اعجاب من ناحيتها بيه انه بيعرف يفهمها ويحس بيها من غير ماتتكلم وديه طريقه مستتره اوى للاجبار

7. بيحاول يهينها ويجرح انوثتها وكبرياءها بيقولها لو عايزة اى علاقه تانيه معايا قولى بيوصلها انها هى اللى تبقى عايزة وبتطلب وبتسعى انها تسأل على كل شى محرج بالنسبالها

وفى الاخر يقولها كله هيبقى بموافقتك وانا مابجبرش الستات على حاجه وكل ده ماهو الا اجباااااااار بس ملفوف فى ورق سلوفان ومتقدم بشياكة

عمر ذكى جدا وواضح اوى بالنسباله خوف روان من الفشل والانفصال وده شئ هيستغله ضدها وقالها مش هسيبك غير اما انتى تطلبى وده طبعا مش علشان يطمنها ولا انه راعى نقطه ضعفها اطلاااااقا هو بس عارف كويس ان باللى ناوى يعمله فيها فهى هتفضل تتحمل لاقصى درجة ممكنه لحد اما فى الاخر هتطلب الانفصال وهو ده اللى عاوزه(من اول طرق التعامل مع شخص سادى انك ماتعرفهوش نقاط ضعفك او مخاوفك لانه هيستخدمها ضدك)

روان

عندها خوف رهيب من كلام الناس وحكم المجتمع عليها اما تنفصل عن جوزها بعد ١٠ ايام بس وده لاننا فى مجتمع مر..يض لازم يجيب الغلط على الست وطبيعى فى الحالات ديه هيتقال ان الست هى اللى عندها مشكلة وده طبعا غلط جدا

(وستات كتير بتضطر تقبل انها تستمر فى جوازه اكتشفت فيها مصيبه كبيره تمنع استمرار الجواز خوفا من المجتمع وتقول استحمل حبه وبعد كدا انفصل وبعد كدا بتكتشف انها لبست فى الحيطة) روان فكرت فى امها واخوها وكل ماهو حواليها ونسيت روان نفسها وانها هى اللى هتعيش مش هما وهى اللى هتتحمل المر ده مش هما ..

روان عندها خوف من الفشل فى الشغل والجواز وعلاقتها بأهلها وفى كل حاجه وصممت انها تكمل فى الجوازه علشان بس ماتفشلش واتعاملت مع الجواز على انه صفقه من الصفقات اللى قدرت تنجح فيها وبتحاول تضحك على نفسها وتطمن روحها ان كل حاجه هتبقى بموافقتها مع انها واحده بذكائها كانت فهمت كل الاجبااااار اللى بيمارسه عليها وقررت انها تقدم تنازلات وتجرب وبتحاول تلغى وتتناسى عقلها والمنطق اللى بيقولولها اهر..بى بسرعه ديه مش انتى

اخيرا بتول مقدمه كمية نصائح كتيره جدا فى الفصل ده:

1. لو قابلتى شخصيه زى عمر اهربى بسرعه اوعى تسمحيله يدخل جوا عقلك ويضحك عليكى

2. معظم الرجاله السادين بيرفضوا الاعتراف بكلمه سادى لانها بتحض وبتخوف فريستهم اللى بيسعوا وراها وبيفضلوا يستخدموا كلمه مسيطر لكن اللى زى عمر ده فهو سادى بكل ماتحمله الكلمة من معنى

3. ماتصدقيهوش اما يجمل الكلام ويقولك اللى بعمله ده تقويم لسلوكك مش عذاب ولا اجبار لانه بيبقى استاذ فى التلاعب بالالفاظ وانتى مش هتقابلى معاه غير عذاب واجبار

4. ماتصدقيهوش لما يقولك الساديه ديه مش مرض انما هى مجرد ميول واسلوب حياه الكلام ده مش مظبوط لانه مفيش راجل طبيعى هيستمتع بالام الست اللى بيحبها وبتشويه جسمها ونزيفه على ايده ولو ديه ميول فهى ميول مرضية بحته

5. ماتصدقيهوش اما يقولك انتى مش محتاجه تفكرة وتتعبى نفسك سبينى انا اقود وثقى فيا انى عمرى مأذيكى ولا اعمل اللى ماتتحمليهوش لان الراجل ده بعيد كل البعد عن الثقه وعن احساس الامان المزيف اللى بيديهولك

6. ماتقبليش تلغى حياتك وانك تكونى انسانه من حقك تختارى وتقبلى وترفضى اللى انتى عايزاه علشان علاقه ولا راجل ... سورى طظ فى الاتنين

7. ماتعمليش حساب لكلام الناس وحكم المجتمع لان الناس فى كل الاحوال هتتكلم ومش بتبطل كلام والمجتمع فيه قصور كتير اوى ومحتاج يتعالج وماتعمليش غير اللى انتى شايفاه هيريحك ويبسطك وبس طالما مابتعمليش حاجه غلط

8. الجواز مش صفقه ولا ينفع يتعامل معامله الصفقات الجواز ده موده ورحمه ورضا وقبول مش موجودين يبقى شكرا

9. مش كل الانفصال فشل ساعات كتير جدا بيكون الانفصال هو قمه النجاح واستمرار العلاقه اكبر فشل

&&&

تاني مشاركة لريما وعلى فكرة روايتها حلوة جدًا اقترح عليكم تقروها RimaMatoug

بصراحه البارت ده وجعني جدا ، حسيت بتول بتتكلم في مشكلة ستات كثيره وهيمن الفضيحه ، الخوف من الفشل ، الحت دي هاجس عند كل الستات بغض النظر عن مستواهم الاجتماعي ، من مش حتتفض ام تطلق بعد 10 ايام من جوازها ، وطبعا اكيد اكيد هي اللي معيبوبه محدش حيصدق السبب الاصلي ، اه مش كل الرجاله زي عمر الجندي بس عارفين في كم ست سكتت عشان الفضيحه وعدت بلاوي ، كم وحده قالت كم شهر يعدو بس ولقت نفسها لبسه في راجل ناقص لسنين ...

&&&

تالت مشاركة لشيماء احمد

كان عندي اقتناع كده زمان انه أصعب شخصية ممكن الواحد يتجادل معاها هى شخصية المحامين الصراحة كنت بحترمهم وبحترم دماغهم لكن بعد لما شوفت الشخصية دى انا مش طايقهم!

شخصية جدلية لأبعد حد دايما وانا بقرأ الحوار بتاعه شايفة أنه هدفه الفوز بالحوار دا شيء اسمي له اللى هو يا أنا يا مفيش تعابير وشه وتحركاته اللى مشروحه بطريقة عظمة مخلياني حاسة انه قاعد قدامي، من الفصول اللي نزلت كلنا لاحظنا قد ايه هو بيلعب على نواقص اللى قدامه مستغل قلة خبرة روان فى العلاقات سواء الجنسـية أو الاجتماعية عموما..

ماسك الخيوط كأنها عروسة قدامه وهو قاعد يحركها بغض النظر عن شخصية روان اللى بقت تفكر اكتر وتتناقش اكتر لكنها لسه مخرجتش من zone عمر فى التحكمات ولحد دلوقتي كل تصرفاتها المتحكم الوحيد فيها هو عمر و توقع ايه!

دي أوضح صفات الشخصية الســادية أنه يقنعك ويقنع نفسه احيانا انه الاموار فى ايدك والاختيار ليك ومفيش إجبار نهائي لكن فى الاول والآخر دا منافي لكل مطامع الشخصية الســادية أو الشخص المسيطر بس نعتبرها كستارة مثلا رغم اختلاف الشخصيات والمواقف والروايات لكن لو حد فاكر حوار أدهم وفريدة اول لما عرفت انه ســادي الجاحد كان بيقنع دكتورة فى علم النفس أنه السادية مش اضطراب لكنها اساليب مختلفة فى العلاقة

وزي شهاب بردو لما بيقنع فيروز انها تفضيلات مش اكتر رجالة تجيب الهم!

شخصية روان الجزء الكبير من مشاعري ناحيتها قبل كده هو الغضب بسبب سذاجتها لكن بعد آخر بارت اكتشفت انها زي كتير أو ضحية بردو، ضحية تربية غلط مورايث اتولدت لقيتها خوفها من الفشل يمكن الجزء الإيجابي منه انه خلاها سيدة أعمال ناجحة لكن لو نركز فى كلامها انها اتولدت فى عيلة مشفتش فيها غير باباها اللى بيحترم مامتها وبيحبها وجو هادي جميل مناسب لنفسية اي طفل في انه يطلع سوي لكنه وفى رأيي انه الاهالي بتنسي الجزء التاني من التربية وهو اني اوري ابني أو بنتي العالم اللي خارج البيت اطلعها من الدايرة الورديه دي وزي ما شوفتي اننا الصح لازم تشوف العلاقات الغلط اللي مش ساوية مفيش حد هيعرف الغلط لمجرد انه دايما عايش فى الصح! طلعت زي ستات كتير خايفة من الكلام خايفة تطلق والفشل يلاحقها وامثلة الواقع كتير اوي اللى خايفة تطلق عشان بس متخدش لقب مطلقة واللى خايفة تطلق عشان أولادها و سيب القوس مفتوح يابني اتمنى في يوم ثقافتنا العقيمة تتغير وتسمح للواحد انه يغلط بدون جلـد أو خوف من الغلط وأنهم يتقبلوا الست بكل أشكالها يمكن فى يوم نطلع جيل مش مشوهه زي دلوقتي.. نأسف على الإطالة

ملحوظة : رواية أدهم وفريدة هي never let me go - the other face of love - after burn دول تلت اجزاء للكاتبة Ghada_hazem

ملحوظة : رواية شهاب وفيروز دي روايتي الجزء التالت من ثلاثية دجى الليل واسمها شهاب قاتم هتلاقوها في رواياتي 

يارب الكلام بتاعهم يكون قدر يوضح ليكم الفكرة كاملة..

دمتم بخير ..