كما يحلو لي (حوار بالعامية المصرية) الجزء الأول

اخبار هامة بخصوص الرواية وتوضيح

ازيكم عاملين ايه يارب تكونوا كويسين.. 

فيه شوية توضيحات لازم ولابد نناقشها (ملهاش علاقة لا بأمراض ولا غيره لا ده بالرواية كمجمل واستمرارها ومواعيدها) 

وبم إن القانون لازم ياخد مجراه يالا بينا كده..

أولًا..

ناس كتيرة بيقولولي إن التشابه كبير جدًا في ماضي عمر الجندي بطل الرواية وبطل رواية أخرى اللي هي ثلاثية never let me go وخصوصًا جزء after burn.. للكاتبة  Ghada_hazem  اللي هي صاحبتي أصلًا.. 

مش هقولكم غير إن حقيقي الكلام ده بس بعد ما قريت وكان توارد افكار بحت جدًا ولو تفتكروا الناس اللي تابعت الرواية زمان اه كان في مدرسة عسكرية واه كانت تصرفاته عدوانية ويزيد الجندي حكى لروان عن كده بس عمري ما كنت وضحت ايه اللي حصل وفي النسخة المُعدلة وضحت..

مبدئيًا كده غادة صاحبتي.. لا مش صاحبتي دي نصي التاني.. وعلى فكرة في وقت نشر الفصول اللي تخص ماضي عمر هي كانت معايا تقريبًا جوا حياتي وفاهمة ظروفي كويس ففعلًا مكنش عندي أي وقت إني اقرا واكتر من اني ارمي الفصل واجري وارد على تعليقات مفيش حرفيًا لحظة تانية.. 

ولكن توضيح مهم..

أنا عمري ما اخسر حد قريب اوي مني علشان خاطر فكرة في رواية.. ولاحظت الناس بتعلق على الموضوع كتير لغاية ما دخلت وقريت الفصل عند غادة بنفسي.. 

لذلك قررت.. 
اني اغير كل إللي حصل وغيرته خلاص واتنشر.. أي حد قرأ الرواية بداية من تاريخ 20 - 9 فهو كده معاه النسخة النهائية للرواية ومبقاش فيه أفكار متشابهة نهائي

حتى ولو توارد افكار ولكن أنا اتعرضت لموقف قبل كده واحدة واخدة اجزاء من روايتي جسارة الإنتقام بالحرف بالكلام بالحوار ونسخاها عندها.. 

فإحساس إنك تشوفي فكرتك متاخدة ده شيء يوجع القلب ومرضاهوش لحد.. 

وإذا حدث تشابه للدرجة الرهيبة دي فمعرفش حصل ازاي سوى إنه توارد افكار لأني وأنا بعدل الرواية اخدت الشخصيات في حياتها بمُعطياتها وقولت هامسك النقطة كذا وابني عليها كذا .. 

ولو في قلب غادة أي زعل (مع إن واثقة إن مفيش) فده اعتذار موثق مني 

ونحب نطمن الناس اننا زي الفل واتكلمنا واتواجهنا وادعولنا ربنا يديم علاقتنا بخير..

وقولولها بحبها وهي كانت شايفة إن مفيش داعي لكل ده وكل مدى بتبهرني بإسلوبها المحترم اللي ميختلفش عليه اتنين وكون إن الإنسانة دي عرفتها وموجودة في حياتي بقالنا اهو سنة ونص اصحاب جدًا فدي نعمة من ربنا بحمده عليها.. 

ولما شوفتها كانت احلى بنت ممكن تقابلوها في الدنيا 💙💙💙

ثانيًا

احنا ككاتبات مش بنكسب تعاطف مع الأبطال السيئين ولكن لابد من وجود اسباب منطقية تُفسر التصرفات العدوانية البشعة ليهم يا إما كده أي كاتب يبقى يا إما مش متمكن يا إما بيسرح بيكم..

فلازم كل شخصية تبقى مرت بحاجة اديتها الدافع للي بتعمله سواء طيب ولا شرير أو فعل خير أو شر

يعني ليه روان بتسامح وبتعدي؟ بصوا لحياتها وخبرتها في البشر

ليه عمر طلع عنده عدوانية تلخصت في السادية؟ تبصوا لماضيه كله ولسه فيه حتت متكشفتش لسه 

فاحنا مش بنعلي على بعض في مشاهد العنف للأطفال والله يا جماعة

ثالثًا

بخصوص الرواية هتكون جزء ولا جزئين.. والمواعيد

هو مش حكاية اني سخيفة ومخدتش بالتصويت في الفيسبوك.. مع إن ناس كتيرة في الواتباد شايفين تكون جزئين..

حرفيًا كتبت الافكار وقسمتهم على فصول لقيت عمر هيبدأ في العلاج بعد 15 فصل يا جماعة ده غير باقي الاحداث.. 

وركزوا العلاج .. العلاج.. لكن التغيير هيجي في الفصل 35 عادي جدًا ..

صدقوني مش سخافة مني نهائي ودي بالذات لو مليت وقلبتها بسرعة هتبقى في منتهى السذاجة ومش هتليق بالقصة أبدًا..

وفيه مواضيع كده سنتطرق ليها مهمة لكل بنت وللتربية عمومًا وحقيقي اتمنى الحاجات دي تتنفذ يومًا ما وهتحسوا انكم بتقروا حاجة تانية تمامًا.. ومتأكدة إنها هتعجبكم إن شاء الله..

أنا عدلت كما يحلو لي مخصوص لأني لقيت 90% من الناس فاهمين قصدي غلط وأنا كنت في بداية مشواري الروائي.. ومبحبش أبدًا اسيب شيء غير كامل أو أنا أكون غير راضية عنه..

كده متبقي فصلين للنهاية

الفصل 34 هيكون يوم التلات اللي هو بعد بكرة.. 

الفصل 35 يا إما الجمعة إن شاء الله يا إما يوم الحد على حسب وقتي..

الجزء الثاني بداية من 1 أكتوبر

والتعديل هيخلص ويتنشر قبل كمان ما انشر الجزء التاني.. 

يارب مكونش زعلتكم ولا زعلت غادة ولا زعلت سواء قرائي ولا قراء غادة.

دمتم بخير يارب دايمًا 💙💙💙