كما يحلو لي (حوار بالعامية المصرية) الجزء الأول

طلب صغنن بخصوص الرواية

بصوا يا أهل الخير.. 

أنا ولا قولت إن الرواية حالمة رومانسية.. ولا قولت إنها ستأخذكم إلي مريخ الأوهام الرومانسية..

مبدئيًا ده ملخص الرواية ..

ودي وسوم الرواية..

ودي مقدمة الرواية..

هو مش نفسية دي يعني حاجة دايرة جوا النفس.. هو البيه مش بيفكر؟! هنعرف ردود افعاله منين وهو مصاب بموجات اكتئاب بيسكت خالص فيها ونوبات هوس بيبقى فيها كويس؟

بصوا يا جماعة الخير.. الرواية يمكن توصل لأربعين فصل او اكتر..

انا بدأت نشر فيها بإنتظام بعد العيد الصغير ووصلنا للعيد الكبير اهو ب 24 فصل.. 

يعني في حدود شهر لشهر ونص هكون خلصتها!

اللي مضايق من الحوارات النفسية ميقراش..

المشاهد جريئة بالنسباله ميقرهاش (البنات الصغيرة مش بتبقى فاهمة وتيجي تقولي يعني ايه، صغيرين جدًا.. بتعملي ايه يا عسلية هنا وانتي موصلتيش لسن 18 سنة؟) 

اللي بيكره يستنى الفصول ميقراش

هل من العدل إني انشر فصل 14000 كلمة وراه فصل 3000 كلمة وبعدين الناس تزعل وتفضل فين البارت فين البارت؟

هل من العدل إني اقدركم وانشر على صفحتي اعتذارات والناس متقرهاش وبعدين تيجي تزعل؟

رجاءًا الرواية بحاول ألم فيها جميع اوجه السادية الشرقية اللي بتتمارس في كل بيوت المجتمع الشرقي ضد المرأة (كلام وتصرفات وتحكم لاذع وتهديد لصورة المرأة كأم أو زوجة ولسه كمان كبنت) فاللي مش مستلطفة القصة متكملش بدون كلام جارح..

بحاول اوضح يعني ايه اغتصاب زوجي في اكتر من صورة علشان البنات اللي بتقول يعني ايه! بحاول ابين قدر الإمكان إن الخُبث بعيد كل البُعد عن الذكاء.. 

بحاول افهم البنت انها متقبلش تتجوز والسلام بدون ما تناقش اللي هتتجوزه في تفاصيل كتيرة.. 

بحاول اوضح إن مش علشان العلاقة الحميمة بنستمتع بيها يبقى نستغل فيها الطرف التاني! 

الكذب اخرته هباب ومش كويسة..

الحمد لله إن فيه ناس كتيرة بتتابعها، ودي نعمة إن يبقالي قراء كتيرة.. بس رجاءًا لما اجي اتأخر كام يوم تبقوا تفتكروا اني كنت بنشر بالتلت فصول في اسبوع واحد وكان بيبقى منها فصول طويلة وافتكروا اني بكتب فصحى وعامية نسختين علشان ارضي جميع القراء! 

اي حد متضايق من الإنتظار يستنى الشهر ونص دول معلش.. واي حد متضايق من التفاصيل وشايف الرواية وحشة ويع ليه مطلق الحرية في عدم القراءة .. اي حد بيطالبني بطلبات من وحي خياله فأنا مني ليكو كامل الإحترام بس دي رؤيتك مش رؤيتي.. اكتبيها وانشريها وليكي مني كل الدعم على قد ما اقدر

ياما ناس ابتدت وحاولت اساعد قدر الإمكان بملاحظاتي المتواضعة على كتابتهم وعمري ما رفضت اساعد حد لو وقتي وحياتي الشخصية تسمح..

أنا مش كاتبة بدوام كامل.. أنا كاتبة بتحب الكتابة.. هوايتي اللي ملازماني من وأنا طفلة.. هافضل احارب ورا افكاري علشان اطلعها بشكل يليق ويرضي شريحة كبيرة من الناس ولكن لولا اختلاف الأذواق لبارت السلع.. 

برجاء بعض التقدير زي ما بقدر تفضيلاتكم وبحترمكم ..

بلاش كلام جارح علشان خلاص جبت اخري..

اللي شايفة الفصل (صغير - مستفز - وحش - رخم - ممل - يع - اي كلام) ممكن تستنى تقرا الرواية كاملة أو متقرهاش لو كانت لا تليق بذوقها الأدبي.. 

الي شايفاني بتأخر فأنا بعتذرلك بس غصب عني مشغولة وبواجه صدمة كبيرة في حياتي مش عارفة اصمد قدامها لغاية دلوقتي.. 

الكاتبات بشر ليهم حياة والفصل اللي بتقريه في نص ساعة بنكتبه في ست ساعات او احيانًا بتوصل ليومين.. 

دمتم بخير وكفاية تجريح..