ماعاد يغريني نور القمر صرت اتباهى بنوره .

23

{ البارت الثالث والعشرون }

[ سِيف ]
دخل للبيت وعلى طول لف للصالة لما سِمع صوت تركي ، جلس بالارض قُربه وهو يأخذه بحضنه ويضمه بلطف وتركي بادله
سيف ابعده عنه وبدأ يلعب معه وهو يضحك ، ومن زمان عن ضِحكته ذي العفوية مع تركي ، بعد ما تعَب غفى بحضنه وهو أبتسم على شكله
ورفع نفسه على الكنب وهو يناظر فيه بإبتسامة ماغابت أبداً ، تركي ملامحه طِبق الأصل لِسيف من انفه لين فمه وحتى العيون الكبيرة والرمش الكثيف
كأنه سِيف صغير ، رفع عيُونه لصوت خطوات مشاعل الي وقفت جنبه وهي تقول : متى نام ؟
سيف : ليه مخليته هنا لِوحده ؟
مشاعل : كان عِند عمتي ، أكيد طلع من عندها وما أنتبهت
ناظرها بنظراته المُعتادة وهي تأفتت بنفسها وودها تسأل وش فيه ، بس خايفة
انحنت وهي تأخذ تركي ثم لفت له وقالت : بتنام الحين ؟
ناظر ساعته ثم هَز رأسه بإية : إطلعي أنتي
مشت عنه وهي تطلع جناحها وهو أرسل رِسالة لنورة تجيه بالحديقة الخلِفية وطلع لها
وهي لبّت ندائه وأخذت حجابها وهي تلبسه على شعرها وبيدها نقابها تحسباً لظهور إبراهيم
وطلعت بسرعه وهي تتجه للحدِيقة وقفت وراه وناظرت له مِستند على الكرسي ويناظر للسماء
قربت وهي توقف جنبه وعلى طول نزل عيونه لها وأبتسم
ناظرت له وقالت : كنت سرحان بزيادة كيف أنتبهت لي ؟
ضحك بخفة وجلس على طرف الطاولة وهو يقربها منه ويمسك يدينها : لحظة حضورك حتى الهواء من حولي يتغير .. تصبح النسمات أرق وأعطر
أبتسمت لكلامه وهي تناظر له : سم وآمر ، وش بخاطرك ؟
سيف : سم الله عدوك يالطيبة ، بخصوص المعهد إلي كلمتك عنه ، إنتهينا من التسجيل وبإذن الله بعد يومين يبدأ دوامك
ابتسمت بببفرحة وناظرته ثم كشرت : يالله ، كل شيء تراكم علي المعهد وبيتنا وزواج توق !
سيف ضغط على يدها : ماعليك ، رتبي وقتك وكل شيء بيكون كويس ، بيتنا صار جاهز الا شوي ، نكمل باقي الترتيبات وحتى إن ما اكتمل ننتقل له ونكمل الباقي واحنا فيه ، والباقي يمديك عليه
هزت رأسها : ممكن كذا ، أجل عطني اسم المعهد عشان أروح أبحث عنه وأقرا
سيف سكت يتذكر الاسم ثم قال : معهد ميعاد الراجي أعتقد كذا
نوره فكت يدينها : تمام يالله
رجع يمسكها : وليييه مستعجلة ، ماتدرين إني ما شفتك من العصر ! والوقت الي يمر بدون وجهك مر كثييير
ابتسمت وقربت وهي ترفع يدينه وتبوسها ثم ناظرت له : الود ودي ، بس التعب بعيونك ماهو بقليل .. رح إرتاح
ناظرها لدقائق وهي بقت مكانها ومبتسمة على نفس حالها ثم وقف وهو يقول : لولا بوسة اليد ما رضيت أتحرك شبر من هنا !
ضحكت بخفة وهو تبسم وومشى معها لين غرفتها ثم طلع لجناحه ، بقت تناظر فيه لين اختفى من الدرج ثم تنهدت بضيق ..!

—
—
—
" بِنهاية الشهر وقبَل مراسِيم الزفاف بيومين "
[ نُورة ]
كانت واقفة بِسطح بيتها وبمكانها هي وسِيف إلي من أنتقلو قبل أسبوع بدأ ينقل شيء بسيط من مكانه الخاص لبيَته معها ، مكتفه يدينها وواقفه بالبلكونة قدام السور الأبيض إلي بأطرافها
قرب من وراها وهو يحط كأس الشاي على طرف البلكونة ويسحب طرف بكلتها بخفة فتناثر شعرها على كتفها وظهرها ولفت بإرتباك من وجوده المفاجىء قال وهو يبتسم : ‏أفتحي شعرك لي، وأنا على العادة ملهوف و جدا
إستوعبت الموقف ثم إبتسمت وهي تبعد خصلات الشعر الي استقرت على وجهها وترجعها لورى إذنها ثم قالت : متى جيت ؟
لف لورى وهو يأخذ كوب الشاي من يده : لي فترة من الوقت ، حتى اني سويت لنا شاي !
ابتسمت ومدت يدها بتأخذه بس هز راسه بلا فأستغربت وهو أردف وقال : أمد لك كوب شاي وتمدّي لي طرف خدك؟
ضحكت بِخجل وتوردت خدودها وهي تقرب منه بطواعية وهو تبسم وقرب وهو يقبِل شامتها إلي من عرف إن القبلة فيها ما تمر مُررور الكِرام عند نوره صار يتعمد إرباكها ، إبتعدت بسرعه عنه بعد ما حست بحرارة بخدها واحتدت حُمراته وهي تشتت نظراتها للسماء قرب وهو يحط الكوب قدامها ومبتسم لوضعها الخجول ، وهي اخذته وهي ترتشف منه ، هو قادر بتصرف بسيط يسبب فياضانات بقلِبها نزلت الكوب من يدها وهي تقول : ما قلت لك إن إنتقالنا بالوقت هذا خطأ ، حسيت توق زعلانة لأني خليتها لوحدها
سيف رفع كتوفه : خليهم يزعلون ، أهم شيء رضاي أنا
رفعت حاجبها وهي تناظره بطرف عين وهو ضحك : يا نوره يا قمَري أنا ما صدقت على الله ينتهي تأثيثك إلي بقيتي تحفرين فيه وكل شوي تغيرين ، من دخلتي هالمعهد قلبتي البيت رأساً على عقب وشيل هذا وجب هذا ، هذا غير إن باقي أشياء كثير ، عموماً أنا من أنتهى تأثيث أهم الاشياء بالبيت وأنا عاقد النية ننتقل ، يعني حتى لو كان هاليوم يوم زواج توق كانت انتقلت ، أبي أختلي بقمري يا عالم ! وبعدين أنتي من الصباح للمساء عندهم وش الي يزعل ؟ إلا إذا عاد ودك تنشبين لهم بالنوم بعد
كشرت بوجهه وهي تضرب كتفه : الشرهه مو عليك ، الشرهه علي أنا إلي وافقت ع الإنتقال ودخلت برجولي لـ..
قاطعها : لا حبيبتي لا تنسين ، أنتي ما دخلتي برجولك
أنتي دخلتي وأنتي بحضني ، يعني لا مُحال لك مني طول عمرك
ضحكت غصب عنها وهي تتذكر إنه حلف ما تدخل البيت إلا وهو شايلها وناظرته بإبتسامه ، ودعوات قلبها إن فعلاً ما يكون لها مُحال منه ولا إبتعاد عنه طول ماهي تتنفس هواء هالارض ..
-
-
[ تُوق وسارة ]
قالت وهي تمسح دمعتها بطرف كُمها : للآن الموضوع ينهش قلبي والله ماني قادرة أنام ولا أرتاح من كثر القهر ، شلللون فهميني ، شلون تتزوج أختي الوحيدة والصغيرة وأنا بعيدة عنها ، للآن ماني قادرة أغفر سوات أبوي ولا كتمانه للموضوع
توق تنهدت بضيق من عرفت سارة عن زواجها وهي كل شوي تتصل وتبكي وتتحلطم ، وتوق بالمِثل وتحس فِعلاً خلصت دموعها خصوصاً إن ساره فكرت ترجع لو على الأقل يومين بس ما قِدرت بسبب إختباراتها وبسبب خوفها إن غازي يقول دامك رجعتي فأنثبري هنا ..
قالت بضيق وهي تحاول هالمرة ما تبكي : أرجوك والله تعبت من البِكاء ، خلاص على قولة إبراهيم تحضرين إلكترونياً والله بخلي وحده تتكفل بالموضوع شخصياً وتبقى ماسكه الجهاز طوال الزواج
سارة لما حست إنها فعلاً زودتها وبدأت تنكد الجو على توق إلي المفروض إنها تضحك حالياً ومستانسة قالت وهي تمسح دموعها وتبتسم : إيوة بخصوص الفستان أخر صورة أرسلتيها ثبتتي عليه صح ؟
هزت راسها بإيوة وهي تأشر وراها : علقته هِناك
ضحكت بهدوء : إييية ، بديتي تحلمين من الحين إنك تنزفي لعزام صح ؟ قولي قولي اصلاً من يوم الملكة وأنتي متغيرة وصرتِ لاذعة وحسك مو معك أبداً
توق سكتت وناظرت لها وهي تتذكر إنها ما سمعت صوته من آخر مكالمة لما عاتبته على تحديد الموعد بدون علمها ومتضايقة من الموضوع لسبب تجهله مع ذلك تحمل نفسها نص المسؤولية لأنه بالمرتين قفلت بوجهه وكأنه ما تبيه يتصل ، والواضح إنه فهم إن الموضوع صد لذلك أحترم رغبتها
سارة : يالله وبدينا نسرح لما ينذكر إسمه ، أعتقد إنه مو هين أبداً
ناظرت توق للساعه لقتها 12 بعد منتصف الليل : الواضح اننا بدينا طقطقة ، لذلك تصبحين على خير
ساره: ويييين ! تو الناس
توق : حبيبتي إذا عندك الوقت العصر ترانا بنص الليل ، يالله فارقي
قفلت في وجهها وساره تأفتت وهي توقف وتحط جوالها بجيبها ونزلت على طول للحي ، إلي صار من روتينها بالعصرية تجلس مع أم لؤي وبقية البنات وتاخذهم السوالِف
-
-
[ عزام ]
يده على وجهه ويحرك شعر وجهه بعدم إهتمام
فكره وباله هالفترة مشغولة وكثيييير ، بقى مشتت وأشياء كثير تخليه يقطع تفكيره عشانها
من تجهيزه لزواجه إلين أمه إلا غياب منصور إلي مستمر للآن.. لتُوق وحياته الجديدة معها
والأهم لِسييف .. !
إلي ماعاده بسِيف إلي خابره ! الواضح إن الهم كاسيه والضحكة غابت كثير عن باله ، حاول يعرف الموضوع ويسأل أو يلمح ولو طرف خيط لتغيره المفاجىء ، خصوصاً إنه لا مبرر له ونوره عنده !
طلع جواله وهو يتصل على إبراهيم لعله يخمد هو نار التفكير برأسه إلي مل منها : هلا إبراهيم
إبراهيم إلي كان منتهي من مناوبته ويبدل لبسه : هلا عزام فيه شيء ؟
عزام باستغراب : وانا ما اتصل الا اذا فيه شيء !
ضحك : لا المقصد ان الساعه ستة الصباح ، وصدقني لو ما كنت صاحي ومناوب وانت متصل وانا نايم يمكن كان فتحت عداد الكهرباء بعيونك
عزام ماكان منتبه للوقت أبداً وما أهتم لكلام إبراهيم قال بسرعة : إبراهيم .. تدري وش صاير مع سيف !
إبراهيم تذكر إنه أغلب الوقت إلي مضى ما صادف سِيف والمرات الي جلس فيها معه تنعد على الأصابع لكنه ما خفى عليه الضيق الي بوجهه وكأنه يحمل بصدره هم يهد جبال ، مع ذلك ما سأل لأنه يعرف أشد المعرفة إن الجواب ما رح ينعرف من فم سيف أببببداً : والله وأنا أخوك كلنا ملاحظين ذبوله الي لا منطق له ، لكني سمعت من توق إن الذبول يزهر مع بنت سعيد وهالشيء مطمنيّ من ناحية
تنهد عزام : يهاالسسيف لا شال همّه . شال همّه لحاله واذا فرح وزّع على اللي حواليه !
إبراهيم : هذا الي قالوا عنه "يربت على كتفه بيدّه"
عزام : بما إني مالقيت جوابي عندك فـ فارق
إبراهيم : ترى أختي باقي ببيتنا ، لا تخلينا نتراجع
ضحك : يومين وهي ببيتي ، وخل مذلتك لك
إبراهيم كشر لما سمع صوت إنقطاع الإتصال والواضح إنه قفل بوجهه
حط جواله بجيبه وعلق جكيته على الشماعه وهو يأخذ مفتاح سيارته ويطلع من مكتبه مِتجهه لبرى المستشفى بعد ليلة ما كانت بتنقضي من كثرك الحالات إلي وصلت لهم ، وبعد ما سلم الدكتور المناوب بعده إستأذن وطلع
لف بسرعة على صوت نداءها وصوتها العالي وهي تناديه وأستغرب وهي وقفت قدامه وهو تنحني وتلتقط أنفاسها من ركضها وهي ماسكه كأس العصير بيدها الثنتين بعد ما هدأت انفاسها رفعت راسها وهي تبتسم وتمد له الكأس : بصراحة كنت توني بشربه ، لكن من شفتك عرفت انك انت الي تستاهل تشربه لأنك تعبت أكثر مني
ناظرها للحظات ثم غصب عنه أبتسم وما قدر ما يردها فأخذه من يدها وهو يشرب منه
قالت بتساؤل : عندي مناوبة بعد أربعه أيام تقريباً
إبراهيم ناظرها باستغراب
ضي : إلي أقصده إن أغلب الدكاترة ما يصادف إنهم يلتقون سوا بمناوبات إلا مرة أو مرتين بينما أنت وأنت هذي عاشر مرة !
إبراهيم : ويعني ؟ وين المشكلة
رفعت كتوفها بعدم معرفة وهي تقول : لا بس من عرفت إن بإمكان الأخصائين تغيير جدول المناوبة وأنا ببالي أفكار كثير
بانت على طرف ثغره طيف إبتسامة وهو يناظرها بهدوء وفاهِم الي بباله ويدري وش تفكر فييه ، إيوة طوال الفترة السابِقة وهو يعدل بجدول المناوبات عشان يبقى معها ويكون متواجد بالفترة إلي تتواجد فيه ، لأن ماكان فيه شيء قادر يثير فضوله غيرها ، وخلال الفترة السابقة عاش مواقف معها ماهي بقليلة عليه ، يمكن تظنهاضي بسيطة وهي تسويها له وتبديه على نفسها بكثير اسياء بينما هو يعتبرها شيء كبيير وكثيير ، خصوصاً إنه ما تعود على إن يكون المقام الأول وإنه فيه أحد ممكن يآثر له ! ويعطيه قبل يعطي نفسه .. كان متعود إنه يضحي هو دائماً سواء بشعور او كلام او تصرف
ناظر لكأس العصير وابتسم اكثر .. او حتى اكل وعصير
ضي أستغربت إبتسامته وهو قال وهو يمشي : إرجعي إرتاحي تعبتِ كثييير
قالت بتأفف : وأفكاري !
لف له بنص جسده وقال بضِحكة : راقبي أفعالك وعلى وزنها أفعالي ترى !
عقدت حواجبها من جملته وكانت بترد بس بتر كلمتها وهو يمشي عنها ويطلع من المستشفى ..
—
—
[ سارة ]
كانت جالسه على جنب بجلستهم وهالمرة ما شاركت كثير بسواليفهم كانت مجرد مستمعة
وإن تطلب الموضوع تتكلم ، كانت ترد بإختصار شديد
لذلك فضّلت تنسحب لأن هالمرة فعلاً ماكانت بوضع إنها تِسولف معهم ، طلعت من البيت وهي تخرج للشارع وتنهدت وهي تلم يدينها لبعض ، للآن الشِتاء ما أنتهى وبكل مرة تزيد البرودة كثير
وسارة من النوع الي تِميل للربيع والدفء أكثر
لفت على صوته ورااها وهو يقول : أعتقد إني ببقى حارس جنب بابك وأشيك على لبسك بكل مرة ، مو معقول إنه صار لي شهر أنبهك عليه !
قالت بضحكة وهي فعلاً لاحظت إنه إنبح صوته وهو ينببها إنها تلبس ثقيل وهي تنسى أو تحس إن اللبس ثقيل بس يفجاءها لما تصير برى إنه زي الورقة بالخفِة : أعتقد إني تعودت على مُناولتك لي لمِعطفك
فارس ناظرها ثم أبتسم : ولو ، وببقى أناوله لك إلين تتعلمين تلبسين شيء يدفيك
سارة : كنت ببيت ام لؤي عشان كذا ما لبست شيء ثقيل طلعت بسرعه وما أمداني
هز راسه وهو يتذكر ويقول : زواج أختك بكرة !
هزت راسها بضيق : لا تذكرني
تِضايق غصب عنه من ملامحها من تذكر الليلة إلي صحت الحي كله على صراخها لما عرفت عن الموضوع وهو وأهل لؤي تجمعو ببخوف من إنه صار لها شيء بحكم إنهم أقرب شقتين لها ولما عرفو ، نص منهم شره عليها ونص تضايق معها ، لأنها فعلاً كانت تبكي بقهر : ترى للحين صامل على موقفي ، لو حابه أسحب معك بعد واوديك واجيبك
ناظرته وسكتت وهي ممتنه لمبادرته ثم ردت عليه : لاخلاص ، تقبلت الموضووع ، وماباقي الا ادعي لها بالسعادة
قرب منها وهو يوقف جنبها بالضبط : طيب اضحكي ، توك صغيرة والزعل ختيار
إبتسمت بخفة من كلامه ومن مصطلحاته إلي صارت تشبه كثير لمصطلحات لؤي ثم قالت : فيه أحد عنده فارس وما يبتسم ؟
حك راسه بإحراج فعلاً وهي تداركت الموضوع وقالت : تِذكر كتاب رسائل كافكا !
هز راسه بإيوة : باقي تقرينه ؟
ساره : للآن أقراها ، كنت أبي أقولك إني بعطيك إياه بعد إسبوعين
أستغرب : وليش بعد إسبوعين
ابتسمت : لأنه باقي لي 14 ورقة أقراهم ، هذا غير إن لي غاية
فارس : ماشي ، الله يريحك
انتبهت ليدينه الي خلف ظهره طوال الوقت وأثار الوضع فضولها : مخبي شيء ورى ظهرك !
قفل على كفينه وهو يهز راسه : ولا شيء
لكن ساره ما رضخت وفعلا لفت بسرعه وهي تناظر لكفه الي مقفل عليه الورد وغصنها واضِح قالت : كتمت الوردة يا فارس
ابتسم من نبرتها والتفت لها وهو يفتح يدينه بخفيف الين وضحت الوردة
أخذتها من يدينه وهي تبتسم قربت من إنفها: الوردة الي طِحت بغرامها من لما جِيت
أنتبهت لنفسها ورجعتها بسرعه : أوه أسفة
أبتسم لوجهها لربكتها لحركاتها ورفع الورده الي كان جايبهابالأصل لها بس ماكان عنده جراءه يعطيها : الورد يميل للي يشببه وبما إنك ملتي لها فأعتقد إنها تبي تبقى عندك .. أفضل من إنها تعتصر بين كفيني
ساره أخذتها بتردد وهي تناظر له : ياليتني وردة
ضحك من تعليقها غصب عنه لسببٍ ما ، لأنها لما أخذت معطفه كانت يتمتم بـ ياليتني أنا معطفي
ويعتقد إن كلمتها باللحظة ذي رد لكلامه
أستحت ساره من كلمتها الي قطتها بدون إهتمام وبنية بريئة والأهم أستحت من ضحكته العالية ومشت بربكة عنه وهي تطلع لشقتها
بينما هو تدارك ضحكته وهو يحط يدينه بجيبه ويناظر لها وهي تبتعد عنه ، أخذ شهيييق زفيييييييييرر ثمَّ ..ابتسامه
-
-