الحلقة 48 :
جاكي؛ ريان مش كأنوا بزاف !! .. ديب واب علابالك وش معناها متحتاجش تكون عميل بش تعرف توابع اللي صرا .. غير منار و سليم اللي وراك.. و اياد اللي مش فاهم علاه رجع .. و باباك اللي منعرف وين .. غير انك جزء من المخابرات بصح مش سامعين اذا راكي حية ولا ميتة . مش كانوا بزاف .. سنين و نتي تجري .. بصح راكي قاعدة ترجعي تكوني الضحية مرة خلاف مكيش حاسة !!!
ريان؛ نعرف تعبتكم معايا.. اصلا مخممة غدوة ننتقل منا .. و
جاكي؛******** واش راني نحكي و وش راكي تحكي
ريكي؛ مجاتش في تعبنا راكي ختنا .. و بلا ما نكونوا مافيا ولا بوليس علابالك وش نقدروا نديرو علاجالك
غزرتلهم و تبسمت
ريان؛ يا عمري تهبلوا
خزروا فيها في زوج ..
جاكي؛ ملخر عندنا عرض خدمة فلاس فيغاس على ثلاث ايام .. و ديجا كنا مخممين تروحي معانا .. عندي صاحبي دوك نهدر معاه يريقلك الفيزا .. و نتحركوا منا 3 أشهر منها فاكونص و منها خدمة .. و تبعدي شوي على هاذوا لحق الوقت اللي لازم تعيشي حياة طبيعية .. اذا عجبتنا تم نستقروا سينون .. نبدلوا
ريان؛ و خدمتكم هنا مام انا محال نروح
ريكي؛ رايحين نكريو النادي هنا .. و مام صال دوسبوغ تاعك اللي مفرطة فيها تاني ..هكا كون تتحتم منخسروش خدمتنا هنا ..
غزرتلهم . . مهلابالهاش وش تدير..
جاكي؛ بزاف ريااان .. لحق الوقت اللي تتجاوزي كلش .. عالأقل حاولي ..اذا مقدرتيش .. ارجعي فرغي السلاح فيهم و حنا معاك مي جربي ..
ريكي؛ راكي مجربتيش تتجاوزي خلاص .. سنين و نتي تخممي غير فالانتقام .. جربي وش رايحة تخسري ..
ريان؛ اوك موافقة
غزرولها مشوكيين .. متوقعوش تقبل ..
ريان؛ هههه شبيكم
جاكي؛ اقرصني نتا منيش مأمن
قرصوا
جاكي؛ آي ******* نصل يدي خير
ريان؛ هههههه ودوكا خلييييوني ناكل جععععععت
ناضت دارت اندومي ..و واحد فيهم دار السلاطة .. و لاخر قلا السكالوب .. تعشاو .. جبد ريكي التيليفون بعث ميساج لاياد بلي اي روحت بخير .. بلا ما يحسوا .. كل واحد حكم بلاصتوا. خرجت من الدوش .. هبطت الكاب ..غزرت للتراسات اللي على كتافها و رقبتها .. تنهدت .. و لبست تريكو و شورت .. ترمات عالسرير .. مش رايحة تنسا .. و غير سليم اللي يتعفن فالحبس .. لحق الوقت وين تنظم للFBI ..
FBI ..
جبدت البيسي .. تحكي مع الجنرال .. بالجيميل .. حكاتلوا للتفاصيل تاع الهجوم و كلش .. و بلي رايحة تسافر للماريكان .. و انو معندهاش الجرأة تواجهوا بعد ما ظهرت بنت مافيا ..باقي يقنع فيها متحبسش من المهمة .. بصح هي رفضت ..
ريان؛ رايحة نجي غدوة نسلم سلاحي و شارتي .. بونوي جنرال ...
قفلت البيسي . تنهدت .. جاستخا صعيبة انها تخرج من الاستخبارات الجزايرية .. بصح موصلتش وين حابة ..و الموضوع أكبر من استخبارات محلية . كي دخل فيها الديب واب . اكيد راح يسعاو وراها .. محال يخليو واحد منهم يموت بلا تفاصيل... تفكرت وقت تعاملت مع مدير الفؤع التنفيذي تاع ال FBI و نصحها تنظم ليهم . لانوا احترافيتها تليق للمهام الكبار... خذات نفس و عاودت حلت البيسي بعثتلوا ايميل .. و محاتوا اونكا يخترقوها ... تكات راسها للتالي .. ضربت في خشمها ريحتوا .. و هو على رقبتها .. مزالها تحس براسوا . غمضت عينيها بقوة و حلتهم تحكي مع روحها ..
ريان؛ اوكي ريان .. كنتي راح تتجاوزي كلش على جالوا .. خيرتيه بصح هو اختار صف عايلتوا عالأقل حاولتي . مش رايحة تندمي انك مجربتيش .. هو رفضك و قال لالا ..
الكلمة التالية وجعتها بصح .. مش هي المرا اللي تبكي كي يرفضها راجل و بعمروا الحب يخليها تكون وحدة مذلولة .. هي كلها تجاوزات .. والطفلة اللي يحكم فيها قلبها .. تقعد حياتها كل ضعيفة تحوس على اي حد يسندها .. حياتها كامل هي سند روحها و مش رايحةتستناحتى واحد يسندها .. غمضت عينيها و غفات. ...
نهار جديد.. ........
غزر للميساج يقرا فيه و يعاود ..
"لازم نتلاقاو منار .. من وكتاه نهربوا من بعضانا .. "
عدا يدو على وجهوا رقبتوا مدقدقة كي رقد قاعد.. ناض دار دوش و خرج لبس و بعثلوا ميساج .. "الحقني للقارب " ...ركب فطوموبيلتوا و تحرك ....
..............
الجنرال؛ متأكدة !!!
غزرتلوا .. نظرتها جدية معندهاش شك فقرارها
ريان؛ امممم .. ههه واش رايح تتوحشني .. هاك كنت ديما تسحب رخصتي
الجنرال؛ على اساس كنت تمشي برخصة .. رايك ديريه ديريه
ريان؛ ههه حالة اللي عاش التمرد حياتو بكل . و زيد فدموا يمشي التمرد .. هاو طلع اصلي ناقص هههه
غزرلها .. علابالوا ورا السخرية هذي بزاف وجيعة ..
ريان؛ ههه متشوفش هكا ..عادي مبقيتش نتفاجئ.. ممم احتمال ننظم مع جيمس ..
الجنرال؛ علابالي تكوني قدها
ريان؛ علابالك نكره الوداعات و كلش .. بصح حبيت نقولك مرسي على كلش .. كنت ليا اب قبل ما تكون رئيس .. صح كنت كيما الشوكة ساعات ..هههه.. بصح تعلمت منك بزاف ..و هكا لحق الوقت اللي نخرج .. نتا تعرف علاه دخلت هنا .. كانت غاية وحدة بصح كنت فرحانة اني عاونت و لو بشوي بلادي .. ايه قبل ما ننسا .. هاذوا معلومات و دلائل على قداه من رجل أعمال .. و بعض الصفقات السوداء ... معلومات على الخط اللي حاكموا يزيد مفيهش أدلة ضدهم .. هام يخدموا كلش بالقدا .. بصح بالاك يعاونوكم نتا و صهيب كون كشما يديرو ...تاع الهاشمي هام كامل عندك .. نظن هكا كملت واجباتي .. نهبط نسلم الشارة و السلاح للمخبر ..
وقفت وقف جرتها ..
ريان؛ ههه على غير العادة ليوم انا اللي قاعدة نهدر بزاف و نتا ساكت
الجنرال؛ روحتك خسارة كبيرة للفرع .. بصح فرحت كي تعاملت معاك
أنت تقرأ
العميلة306 الجزء الثاني (اللهجة الجزائرية)
Actionالعميلة 306 للجزء الثاني : كون جينا نختاروا حياتنا كيفاه تكون بيدنا .. كون كل واحد فينا يخير .. وش يحب وش يكره .. يحط غير الفرحة فحياتو .. ميخليش مجال و لو شوي للدموع يعرفوا طريق لعينيه .. ينوض كل صباح ..و هو علابالو بلي مش راح يقلق .. و كل شي راح...
