عشق الضواري

بارت27

ايمن بقلق: هو انه جيت اول ماخابروني جاي ابلغ النسوان وكل الي بالبيت اي واحد يلكه تليفون ادهم يضمه ولا تكلوله لكيناه خاف ياخذه ويخابرونه ويتسودن على صاحبه . . يلا انه رايح ابقى ويه ادهم يجدي حتى اذا وصله خبر ودره امنعه ولو ادري ماينكظ اذا يدري بس احاول وياه .

ضاري: الله وياك بوية . . يلا كوم عمار واحمد ومنذر بسرعة اطلعو لبغداد هالساع وانه رايح لبو حسين ابلغه واجيبه وراكم حتى نستلم جثته وندفنه ونرجع اريد الگاكم مسويله جادر يوسع العمارة كلهه وجهزو العراضه يبعد ابوكم لا تگصرون حسين خوش حسين زلمة معدل يركض للعدو وللصديج مانريد نگصر ويه اهله بشي وخل نسوانه يدارن امه ومرته وفريخاته .

كامو ولد ضاري واحفاده كلمن طلع يجهز شغله وهمه مقهورين ويتحسبون ع الي غدرو بحسين وجماعته . . منهم الي طب ع النسوان يحذرهن يحجن كلمة كدام ادهم ومنهم الي راحو يجهزون الجادر واحتياجات الفاتحة ومنهم الي انقهر ونزلت دمعته على صاحب عمرهم وشيال همهم . . اما ايمن فرجع يم اخوه ادهم الي كاعد على ضفاف دجله بواحد من بساتينهم .

ايمن وهو يكعد بصف اخوه ويلزم السنارة : همزين مارجعت وياي للبيت .

ادهم: ليش بعدهه گابة . . هذول يمته يملون من المشاكل والمصايح مو حتى گمت مالي واهس اطب للبيت . . يلا هوه اول وتالي اليوم ابات هنا وباجر الله كريم .

ايمن وهو يدعي الملل: اي والله يخوي صايرة هوسة هالنوب زايدين عن البارحه انه اگول على رايك نبقى هنا والصبح نرجع انه وياك ولا يضل بالك على امي طبيتلها وگتلها راح نبات بالصريفه العله النهر ، وكالت اهم شي اخوك يرتاح خله يريح راسه من هوستهم ويمته مايريد يرجع .

ادهم بحسرة: الله كريم . . شوف سنارتك جنهه تحركت .

. . . .

بغداد/ زيونة

طلع جواد من غرفته بأتجاه الصالة ، يروح للمطبخ يشرب مي ، وهو يفرك عيونه بنعاس ويتثاوب ، لمح زيد كاعد بالصالة وهو مدنگ ويباوع للگاع ويتحسر بقهر ، اقترب منه وهو يحاجيه بقلق .

جواد: خير شو وجهك مايطمن . . صاير شي عد اهلنه .

زيد بقهر: خابروني قبل ربع ساعه حسين استشهد .

صفگ جواد ايديه وصاح بقهر: لاااا حسين يروح بهالسرعة البارحه جان يحجي ويانة بكروب الواتساب ونضحك ونسولف . . شلون مستشهد ماگالو .

رفع زيد عيونه الي صايرة حمرة بلون الدم من قهره على صاحبه الي خلص عمره بار بأمه وابوه ومتكفل بأخواته ومداري مرته وجهاله والناس كلهه تحلف بأخلاقه وطيبة گلبه .

زيد: يگولون البارحه صاحبه الوياه بالنقطه متصل بالمقر مالتهم وطالب تعزيزات وكايل الهم عساس اثنين بنات شاردات وطالبات مساعدتهم مخطوفات مدري شنو ولاحكينهن الخاطفين وهمه الي كاتلينهم . . ومثل ماتدري حكومتك مابيهه خير التعزيزات واصلتلهم بوكت متأخر ولاكينهم مكتلين كلهم رصاصة بالراس الا حسين ضاربينه بكل طرف من اطرافه ومهشمين وجهه .

تحسب جواد عليهم وهو يحلف يساعد ولد عمه واخوته ويلگون هالعصابه وياخذون بثار صاحبهم واخوهم الي مات بشرف وهو يدافع عن بنات محد لكالهن اثر .

جواد: يعني اليوم مانرجع للعمارة مو؟.

زيد: لا راح يجي عمي عمار واحمد ومنذر وجدي يلحكهم يجيب ابو حسين حتى يستلمون الجثة ويدفنونها ومن نرجع احنه ناخذ عمتي وجمانة ونلحكهم عود باجر .

. . . .

وصل هيبت وربعه للبيت الي جان مبني من البلوك ، متكون من غرفيتن ومطبخ وتواليت خارجي يبعد عن البيت مايقارب الخمس امتار ، وكفو گدامه ونزلو من السياره وهمه يباوعون وراهم للسياره الثانيه الي جانو بيها بس اثنين من ربعهم ، طبو وهمه يتفحصون البيت لحد ما طلب منهم هيبت يمشطون البستان خاف اكو بيوت بالصفحة الثانية لأن طول ماهمه يمشون مالمحو اي بيت على طريقهم والأشجار جانت تغطي الجهة الثانية فمايبين شنو الي وراها ، مشو الي جانو بالسيارة الثانية وهمه يسولفون بيناتهم ولحكهم السايق الي جان يسوق بسيارة هيبت وهوه يشاركهم الحديث . . باوعلهم هيبت وهز ايده بعدم رضى وهو يوجه كلامه لشاكر .

هيبت: دشوف شوف ذوله البهايم كنالهم واحد منكم يروح يشوف محيطنا خاف اكو احد يمنا وننكبس راحو تلاثتهم وعافونا بله هذول شتحجي وياهم . . لا هايهيه مبينه هواي راح نربح من وراهم .

شاكر بأستهزاء: دعوفهم يمعود خيولون هيه بس هالمره نجيبهم ويانه باقي الشغل بعد اجيبلك ربعنه القديمين شغلتهم يشتغلونها من كل كلبهم . . مو ذول الي البارحه صارو ومن ثخن عضمهم انحرفو وجايين مسوين نفسهم خريجين سجون وخبرة بعملياتنا . . شفتهم شلون يتراجفون من شافو الجنود يرمون علينه وختلو وره السيارات هاي وهمه شايلين سلاح وربك لو بدون سلاح جان سووها جواهم . . بعدهم ذولة مزعطه لتهتم الهم .

هيبت: لاا ميشغلون تفكيري اني بس ماريدهم يجيبولنا العيون لهنا ويكشفون مكاننه اقلها لحد مانطلع باجر ناخذ البنات
يلا هسه روح اخذ البنات للغرفة الاخيرة وطلع الصمون والاكل خليهم فوك السياره لا يصير بالاكل ريحه منا لليل .

مر الوكت بسرعه عليهم بس ع البنات الساعه تمر بسنة والخوف اكل عقولهن وكلوبهن بعد ماحجت شاهندة لاختها كلشي سمعته وهنه بالسياره وشلون يريد هيبت يبيعهن لناس كبار بالخليج هنه وبعد بنات وهالشي خوف روزة اكثر على اختها الزغيره لكن الي طمنها وبث بيها ذرات من الامل هوه لمن حجتلها شاهندة عن الشي الي لمحته من بعيد .

. . . يتبع . . .

لا تنسو الضغط على النجمة للتصويت
ومتابعة حسابي لقراءة باقي القصص
🌹⁦❤️⁩🌹