دخل احمد غرفه نور ليطالعه اسلام ونور اسلام
#مرداش يفتح برضه
هز احمد رأسه نفيا ليجلس بجوار اسلام الذي قال
#انا مش عارف افهم هو عمل كده ليه
نور باختناق #انا السبب انا اللي قلتله حنين بتحبك ،،، بس اخر حاجه ممكن اتخيلها انه يستغل ده
احمد #لاء يانور مش ادم اللي يستغل
قاطعته بحده #طب تقدر تقولي عمل كده ليه ،،، اشمعني حنين ،،، اخوك استغل انها بتحبه وضغط علي كده
اسلام #حنين مش عبيطه ومش غبيه يانور
احمد #اسلام صح ،،، احنا لحد دلوقتي منعرفش هي قالتله ايه
اسلام #ادم رحلها الكليه ،،،،،،،،،،قص اسلام كل ماسمعه من ادم ليختم حديثه وابوكوا فضل سامع سامع وهوب اتنطر مره واحده واتحول بالشكل ده
نور #انا اول مره اشوف بابا كده ،،، عارف كنت بدعي ربنا ان ادم ميردش
احمد #بس قلبي وجعني عليه اووي دي اول مره بابا يمد ايده عليه
اسلام بهدوء #بس هو غلطان ،،، عارف هو مغلطش في القرار بالعكس المره دي اختار صح وصح جدا كمان
عقدت نور ذراعيها
#امال غلطان في ايه يااسلام
عدل اسلام وضع منظارة الطبي ليقول
#غلطان في التوقيت ،،، كان علي الاقل استني لما يتخرج كمان كام شهر ،،، كانت الحكايه اتنست شويه ،،، مشكله ادم انه اتسرع
احمد باستغراب # يعني انت شايف انه صح يخطب حنين وهو لسه بيحب اسيل
اسلام بجديه #ادم اصلا مش بيحب اسيل
حدقه كلاهما ليقول احمد بحنق
# اه راح يخطبها شفقه
اسلام #لاء الحكايه كلها مشاعر عيالي اتعلق بيها بس حب حقيقي لاء بدليل ،،، ان اللي بيحب بيسامح
نور بحيره #دا لو اللي بتقوله ده صحيح تبقي مصيبه
ربت اسلام علي كتفها #انتي وضعك مختلف
احمد بغيض #مهي هياها يافلته عصرك
تحرك اسلام ليقف امامها وقال بجديه
#لاء طبعا ،،، ادم غير ناصر خالص ،،، ادم قفل علي نفسه بزياده اووي ،، يشوفها بس من بعيد مش بيتكلم حتي في حدود القرابه ،،، فبالتالي ادم ميعرفهاش ،،، هو حب صوره بيشوفها ومواصفات في دماغه ،،، ناصر لاء ،،، ناصر تقريبا كان عايش معانا ،،، بمعني بيتكلم مع نور اه في حدود بس عارف تفكيرها اللي بتحبه واللي مبتحبوش كان بيشوف رد فعلها علي الطبيعه ،،، ناصر ربط بين الصوره والمواصفات عشان كده ناصر مشاعره صح ووجهها صح ،،، ادم حب صوره اسيل بس بمواصفات حنين ،،، بدليل كلامه محدش بيفهمني في العيله دي غيرها ،،،، الحكايه كلها ان ادم محتاج يشوف صوره حنين فهيعرف انه بيحبها هي
احمد بحيره #يخرب عقلك انا تهت ،،، انت يلا جايب الكلام ده منين
اسلام #من عقلي ،، فكر كويس وانت تعرف اني بتكلم صح ،،، بس بابا كمان عنده حق ،،، بابا مضغوط زياده عن اللزوم واحنا كمان اثرنا
نور #اثرنا في ايه يااسلام
اسلام #اننا نقف في ظهر عمنا اللي شفنا كلنا الكسره في عنيه ،،، كلنا شلنا خاطر ادم وبعدنا حتي انت يااحمد بعدت عن اسر
احمد #انا مبعدتش يااسلام ،،، اسر هو اللي قفل علي نفسه
اسلام #وانت اخوه لما يقفل تفضل تخبط لحد مايفتحلك ،،،، المشكله اللي حصلت فيها الخير لسبب ادم لوكان اتجوز اسيل كانت جوزتهم فشلت وساعتها كان خسارته هتبقي اكبر بكتير
نور #عندك حق كلنا بعدنا فعلا ،،،، انا كمان شيلتهم ذنب ان ادم مقاطعني
اسلام #ابوكوا بقي متقطع مابين اخوه وابنه ،،، بابا كبير العيله صعب عليه يحس انها بتفلت من ايده
#عندك حق يااسلام ديما بتتكلم بعقل اكبر من سنك
التف الجميع لادم الواقف علي الباب ليهرع نحوه الجميع احمد بقلق
#انت كويس
هز ادم راسه موافقا نور #طب اتكلم ياادم
اجتمع الاخوه الاربعه فوق الفراش ليقول ادم
#عاوزني اتكلم اقول ايه ،،،
نور #ايه اللي خلاك تعمل كده ياادم ليه حنين
ادم #مش انتي اللي رشحتي وامك موافقه وحنين ست البنات متتعيبش ،،، فكرت بعقلي يانور عشان قلبي جبني لورا
اسلام #فكرت صح بس استعجلت اووي
ادم #في دي عندك حق ،،، عمك ليث قلي انت متسرع وعنده حق
احمد #ادم حنين غاليه علينا كلنا لو مش هتجبها
ادم بتاكيد #انا مش هحب تاني ،،، انا كمان حنين غاليه عليا ومقدرش اجرحها
نور #طب لما انت مش هتحب تاني عاوز تخطبها ليه
ادم #قلتلك يانور فكرت بعقلي مش اكتر
اسلام باسما #العقل والقلب مرتبطين ببعض ياادم
ادم #خلاص يااسلام عقلي هو اللي هيمشي حياتي بعد كده
احمد #بس ياريت يعرف ان في اختراع اسمه فرامل كده برضه بوظت خطوبه البنيه اللي حيلتنا
اشاحت نور بيدها #خطوبه ايه بمنظر ابوك ده الواد ده بينه فقر يوم ماامك كلمتني كارثه عمك مامون حصلت قال ياخطوبه الدنيا اتقلبت
احمد ضاحكا #هو برضه اللي فقر ولاانتي اللي بومه
حكت نور راسها #بين كده دا حتي البت اللي كانت هتظبطني مش هتيجي ومفيش قدامي الاشويه الخناشير دول
اسلام باسما #هتيجي هروح اجيبها انا واحمد
ادم بحده #تجيبها ازاي يعني
تبادل احمد واسلام النظرات ليقول احمد
#خليك انت يااسلام انا هروح اجيبها حنين مبترفضليش طلب ابدا
نظر ادم له شذرا وقال بعصبيه
#انا هروح اجيبها
تطلع ثلاثتهم لبعضهما لتقول نور ضاحكه وهي تتحسس وجه ادم
# ماشاء الله اللهم بارك صوابع ابوك الخمسه معلمه في وشك تقولش بيعمل فيش
تشاركا اسلام واحمد في الضحك ليقول ادم بغيض
#متحترمي نفسك يازفته
نور #ياحبيبي انا خايفه علي منظرك قدام الموزه هتروحلها ازاي ببصمات ابوك دي
اخيرا ابتسم ادم ليفرك خده
#حقه ،،وانا اللي كنت بقول ان امك ادها مرزبه دي طلعت كيوته جنب ابوكي
#تحب تجرب الجنب التاني
التف الجميع الي فرحه الواقفه علي الباب تحركت للداخل
#رحتلك الاوضه متلقتكش سمعت صوت ضحكوا ماشاء الله جبلات
تنحنح ادم بقوه لتقول نور
#ياماما كنا بنخفف عنه يعني احنا غلطتنين
جلست فرحه علي المقعد امام الفراش لتقول بجديه
#اسمعوني بقي ياولاد فهد ،،،، ،،، ابوكوا كبير العيله دي اللي الكل بيتلم حواليه ،،،، هو الاصل لو اتهز العيله تتبعتر ،،،، من يوم ماعرفت ابوكوا وهو علي كده ،،، كنت بشوف حبه لاخواته وحب اخواته ليه واقول يارب ارزقني بعيال تحب بعضها وتبقي سند بعضها كده ،،،، ومش اخواته بس لاء بنات عمه كمان فهد حاجا علي الكل وسند الكل ،،،، وهيفضل كده هو اللي بيلم ويحاجي ،،،، اللي بيقع منهم بيسنده ،،،،، بس لما يقف عاجز انه يلم اخواته بسبب ولادي يبقي انا معرفتش اربي
الجميع #ماما
قاطعتهم #محدش يقطعني
نظرت الي ادم #انا مش بحملك غلطه اسيل ،،، اسيل تتحمل غلطتها ،،،، انت متعرفش عمك كان عاوزيعمل فيها ايه لولا كلامي وكلام ابوك معاه ،،،، عمك اللي انت مقاطعه ووقفت في وش ابوك تقوله اخوك معرفش يربي بنته ،،،كان هيرميها للواد اللي ضحك عليها ،،،، كان عاوزيجوزهاله ويطردها ،،،
احمد بصدمه #عمو مامون ازاي يفكر كده
ادم #اللي غلط يصلح غلطته
عقدت فرحه ذراعيها وقالت #ابوك عنده حق انت مبرتحمش ،،،، الواد اللي لعب في دماغها كان كل اللي عاوزه فلوس وبس ،،، الحركات الهبله دي عشان ياخد خمسه مليون من عمك وميفضحوش ،،، ولعلمك الولد ده مش راجل وملوش في الجواز من اصله ،،،، وارد ان اي حد يتلعب عليه ،،،وارد ان اي حد يتخدع ،،،، انت بقي ايييه ،،، ربنا بتحاكم الناس وتدخلهم نار وجنه يااستاذ ادم
الجميع #استغفر الله
ادم #انا محكمتش حد
فرحه بتاكيد #لاء حكمتنا كلنا ،،،، بعدت وقفلت علي نفسك ومش عاوز اكلم حد ،،، قطعت اختك وقفلت في وش اخواتك الباب ،،،، وفي الاخر جاي تحاسب ابوك ،،، تحاسبه عشان بيحافظ علي الباقي ،،، انت فاكر انها سهله عليه ان يشوف اخوه كده ،،،، حد فيكوا بيسال علي عمه ،،،، لاء طبعا كلكوا وقفتوا ورا ادم حتي لو ظالم واخد حد بذنب حد
ادم باختناق #ازاي ياامي ملوش ذنب هو اللي مربيها
صفقت فرحه بيدها #بر افو عليك هو اللي مربيها زي ماسيدنا نوح ربي ابنه وطلع كافر اييه مبتحصلش ،،، مبيقباش راجل صالح ويبقي ابنه فاسد ،،،،، فووووق دا ربك بيحاسب بمثقال الذره ،،،، مين انت عشان تحاسبه
ادم #ياماما انا محسبتوش
فرحه #لاء حاسبته عمك اعتذر انه يجي خطوبه نور عارف ليه قال لابوك مش هقدر ابص في عين ادم يعني هو شايل خاطرك وانت بتجرح فيه وقدام كبيره ،،،، الابن يتعوض الاخ لاء يابن فهد ورايح تعك الدنيا مع التاني عاوزه يعملك ايه يسقفلك يقولك برافو عليك ياحبيبي هتبقي السبب في اني اخسر اخواتي الاتنين
ادم باختناق #ياماما انتوا ليه شيفنها كده ،،، انا اخترت حنين بعقلي وبس
فرحه#وشايف ان هو ده الصح ،،،
ادم # انا وحنين بنعرف نتفاهم
زفرت فرحه بقوه# اسمع ياادم موضوع حنين دلوقتي في ايد عمك ليث ،،،، يعني القرار عنده انا مش هدخل فيه ،،،، بس سواء وافق او رفض دا حقه ،،،،، بس يكون في علمك ابوك هيشيل ايده من الموضوع ده خالص
ادم #بمعني
فرحه #يعني دا قرارك لوحده افتكر انك معنتش صغير وتقدر تتحمل نتيجه قرارتك عمك ليث رفض وافق هو حر ،،، العلاقه اللي بينا مش هتتهز ،،،، الاهم من ده كله بقي عمك مامون والكلام ليكوا كلكوا ،،،، عمكوا مامون اللي لما كان بيسافر ويرجع من بره يجي علي شقتنا القديمه قبل مايروح بيته ويقول هدايا العيال الاول قبل عيالي ،،، عمك مامون ياادم اللي غصب علي بنته عشان ميقولكش لاء ،،، عمك مامون يااستاذ احمد اللي راح اشترالك عربيه اول مادخلت طيران عمكوا مامون اللي عمره مازعل حد فيكوا ولااجا علي حد فيكوا ايه للدرجادي معندكوش اصل ،،،،
احني الجميع رؤسهم للاسفل لتكمل فرحه
#ذنبه ايه اسر ذنبها ايه جومانه اللي كانت مشلوله ومحدش فيكوا سال عليها ،،، كل شويه ااقول هيحسوا علي دمهم لكن البعده جبلات مبتحسش ،،،،،
نور بتوتر #ياماما احنا ااابنسال فون
فرحه #ومن امتي كان الاهتمام فون ياست نور ،،،، لما كنا في المستشفي وانتوا وقفين حواليه مع عمكوا ومراته وبنته كنت حاسه ان ظهري مسنود انتو بقي عملتوا ايه اتقمصتوا كلكوا وبعدتوا عشان اخوكوا ،،،كلكوا بعدتوا وسيبتوا ابوكوا لوحده ،،،، ولاده موقفوش في ظهره ،،،، لاء والبيه جاي يكمل عليه ،،، لحد كده وكفاااايه اوووي ،،، فووووقي بدل ماافوقكوا انا
انهت كلماتها لتخرج من الغرفه وتصفع الباب بقوه خلفها نظر الاربعه لبعضهما البعض اسلام
#انا لسه قايل الكلام ده من شويه
احمد #ماما عرتنا كلتنا ،،،
نور # لاء انا لسه لبسه
ادم بغيض #انتي ليكي نفس تهزري
نور #هي خطوبه نحس انا عارفه
احمد #طب علي الاقل يااختي انتي عرفتي سكتك الدور والباقي عليا عامل زي اللي رقصوا علي السلم
نور #اه رقصوا وامك وابوك هينفخوك
اسلام #هي ايه الحكايه
نور باسمه #ولااي حاجه خااااليييص احمد عاوز يتجوز
حدق الاثنان بوجهه احمد
#ننننعم
احمد #في ايه انا عاوز اتجوز مش انتحر
ادم برقب #ودا من امتي ان شاء الله
نور #من اسبوعين بس ،،،، تقي ماانت عارفها
قطب ادم #تقي بنت عم محمود
احمد #ايوه وانت تعرفها منين بقي ان شاء الله
ادم #شوفتها عند حنين كام مره وعارف ابوها وابوك كمان عارفه دا حارس الكليه اللي بيشتغل فيها عمو ليث
احمد #دي احلوت اوووي
اسلام #انت قلقان من ايه مش هي بنت كويسه
نور #جداجدا ،،، ملتزمه وخاتمه وروحها طيبه واخلاقها حلوه ،،
اسلام #ايه المشكله بقي
ادم # عشان اهلها علي قد حالهم يااسلام بس مفتكرش ابوك هيعترض
احمد بغيض #بعد اللي انتوعملته ده ،،،، دا مش بعيد يسيبك خالص ويطلع غلبه فيا انا
ادم بترقب #اهم حاجه قبل ما تاخد اي خطوه اسال عليها كويس. وان كان علي ابوك انا عارف انا هصالحه ازاي
❤❤❤❤❤صلي علي النبي محمد ❤❤
