شظايا شيطانية~للكاتبة صرخة المُشتاقه

٢٨

◦•✖ || البآرت الثامن والعشرون || ✖•◦•.

جلست مكانها ورجعت للآيباد من جديد ..
وقفت شوي وقالت: وش صار ..؟! من وقت ما قلت لأمي عن البنت اللي ماتت بمدرستنا وهي ما عاد فتحت معي الموضوع ..
تحولت نظراتها لحزن تقول: ما راح أرتاح لو كانت هالخرابيط صدق .. أبوي ما تزوج .. أبوي ما عنده أولاد غيرنا .. أبوي ما يحب غيرنا ..
عضت على شفتها وقالت: لما تجي بأواجهها .. لازم أعرف إن كان هالكلام صح ولا لا .. ولو كان صح ...
سكتت لفتره فقطع تفكيرها صوت رن الجرس ..
قامت وراحت له ..
فتحته ..
؟
عيونها .. تدريجياً تحولت للصدمه ..
هذا .... هذا ..!
تقدمت خطوه لقدام وهي تقول بصدمه ممزوجه بإشتياق: بابا ..؟!!
وقدامها كان أبوها .. رجال في بداية الخمسينات من عمره ..
يبان أنه أصغر من كثر سفراته للخارج ولعبه بالفلوس ..
وهالمره جايهم بثوب عكس العاده يجي من الخارج ببدله ووراه شنطه ..
نزلت دموعها على خدها وعلى الرغم من الملامح الجامده المرسومه على وجهه إلّا إنها ما أهتمت ونطت تحضنه وهي تبكي ..
مسح على شعرها بهدوء وقال: وين أمك ..؟!
بعّدت عن حضنه وقالت وهي تمسح دموعها: بالمُستشفى ..
ضاقت عيونه فكملت: آنجي تضاربت مع شغاله ودخلت المُستشفى .. ماما وأُسامه راحوا يزوروها ..
الأب: تضاربت مع شغاله ..!! طيب وين كِرار ..؟!
هزت كتفها تقول: مدري .. هو أربع وعشرين ساعه برى .. أمس ما نام بالبيت ..
الأب بدهشه: ومن متى هو ينام برى ..؟! صحيح يلف مع صاحبه بس ....
قاطعته تقول: صاحبه مات .. فصار دايم يأخذ سيارته ويطلع برى البيت يومين ثلاثه ويرجع وهكذا ..
طالعها لفتره بعدها قال: ماشي .. إتصلي على أُمك وقولي لها إني جيت .. أنا رايح المجلس معاي ضيف ..
حلا بتعجب: ضيف ..؟!
لف خرج برى يدخل ضيفه للمجلس ..
ظلت واقفه بمكانها لفتره ..
حست إنها .. ما أمداها حتى تشبع منه ..
ما عليه .. دامه رجع فبيقعد عندهم كثير ..
لفت وراحت جري للجوال حقها حتى تتصل على أُمها وتخبرها ..

▒▓ ×✖• ►︿︿︿︿︿︿︿︿︿︿︿︿◄•✖× ▓▒

مسقط ~ سلطنة عُمان ..
بكت وإشتكت وطلعت كُل اللي بقلبها ..
وهو بجنبها .. إستمع لها وللنهايه ..
وبعد هالفتره من البُكاء والشكوى هديت شوي وبدأت دموعها تجف ..
قدم لها علبة بيبسي فإبتسمت وأخذته ..
فتح علبته وشرب منها شوي بعدها قال: ها كيفك اللحين ..؟!
ترف بهدوء: أحسن ..
ضحك يقول: ههههه رجعت ترف البكايه .. تذكرين .. أول مره قابلتك فيه كنتي تبكي وتقولي سرقوا فلوسي ..
ترف: بس عاد .. هذا ماضي ما يشرف ..
إبتسم وهو يطالعها .. لفت عليه تقول: شفيك ..؟!
هز كتفه يقول: مدري .. بس وحشتيني ..
رفعت حاجبها تقول: إحلف ..؟!
إندهش يقول: أفا .. ما تصدقيني ..!!
بعدت عيونها عنه تقول: أكذّب كُل الناس إلا باسم ..
طالعها باسم لفتره بعدها إبتسم وقال: ترف ما سمعت .. عيدي ..
شربت ترف من البيبسي وهي مطنشه ..
دخّل إيده بجيبه وقال: ما قدرت بعد سنوات ما شفتك فيها ما أجيب لك هديه ..
لفت عليه من سمعت طاري هديه ..
كان في بريطانيا .. أكيد الهديه مو عاديه ..
قدم لها بسكوت بريك يقول: شرايك ..؟! أحلى هديه صح ..؟!
إختفى حماسها وطالعت في البسكوت ..
إختفت إبتسامته يقول: شفيك ..؟! ما حبيتيها ..؟!
لفت وجهها لقدام تقول: كنت ببريطانيا وهذا اللي قدرت عليه ..!! بسكوت بريك وكمان سايح ..
طالع في البسكوت وتوه إستوعب إنه سايح ..
حطه جنبه يقول بإنزعاج: كُله من هالجو الحار .. صدقيني لما شريته كان مثلج ..
شربت ترف لها رشفه وقالت: ومن فين شريته ..؟!
باسم بإبتسامه واسعه: من بقالة البركه .. اللي قريبه من العماره تعرفيها ..
لفت عليه تقول: بخيل ..
مدت يدها وسحبت البسكوت تقول: ومع هذا ما راح أرفضها .. هالبسكوت صار عشقي ومن سافرت لإندنوسيا ما أكلته ..
إبتسم وهو يشوفها تفكه وتاكله وقال: في كُل مره أمر فيها من جنب الأسواق في بريطانيا كنت أشتري شيء وأقول أكيد بيعجب ترف .. مرت ثلاث سنوات وصارت هالأشياء لها شنطه كبيره لحالها .. نرجع السعوديه وأعطيك هيه ..
لفت عليه تقول بدهشه: صدق ..!!!
هز راسه بإيه فكملت تاكل وهي تقول: ومع هذا إنت بنظري بخيل ..
باسم بدهشه: ترف هذا مو عدل ..!! أقولك شنطه .. شـنـطـه .. دقيقه دقيقه أوريك صورتها ..
طلّع جواله وقلب فيه وبعدها وراها صورة شنطه شوي كبيره وقال: هذه هي الشنطه ..
ميلت شفتها وقالت: ما أقصد كِذا ..؟! أقصد ...
سكتت شوي وقالت: لو تلفون .. لو مره وحده إتصلت كان بيكون هذا أكبر هديه والله ..
باسم: وأنا من فين أعرف رقمك ..؟! أو حتى رقم البيت ..؟! يا دوب أعرف رقم يحيى .. وطبعاً هو من البدايه منزعج مني ومن تصرفاتي فما بيقول يا هلا والله ويعطيك الجوال تكلميني ..
ترف: على طاري .. إنت كيف عرفت إني هنا ..؟!
باسم: سألت أهلي وخبروني إنك سافرتم عُمان ..
ترف: أهلك ..!!
باسم: هههههههه يب اللي من البدايه ما كانوا حابينك غسلوا إيدهم مني وصرت كُل ما أتصل عليهم أسأل عليك ..
ترف: طيب وش دراك إني هنا بالضبط ..؟!
باسم: بسيطه .. أخوك ما شاء الله عليه مدري كم له سنه ما غير رقم جواله .. المُهم إتبعت رقمه عن طريق الخرائط وعرفت هو في أي عماره .. ومن وصلت شفتك نازله فلحقتك ..
ترف: مُتحري ما شاء الله عليك ..
باسم: ههههههههههه عشانك أكون أحسن من كونان نفسه ..
طلعت ترف منديل من شنطتها وبدأت تمسح إيدها من الشوكولاته السايحه وهي تقول: طيب كان جبت مع البريك تبوله ..
عقد حواجبه بإنزعاج يقول: ترف ..!!
ترف: ههههههههههه ليه تذكرت ماضيك بعد ..؟!
تنهد وطالع قدام وقال: يا شيخه ذيك الأيام غبيه ومابي أتذكرها ..
ترف: طيب حكيني .. إنت قلت لما تكبري راح أقولك وش قصة التبوله ..
لف عليها يقول: وإنتي اللحين عبالك إنك كبيره ..!! لسى حتى ما خلصتي الـ17 سنه .. صغيره كثير ..
رفعت حاجبها فضحك وقال: ماشي ماشي .. الزبده مثل ما إنتي عارفه إن أمي وأبوي سوريين ومن المهاجرين من سوريا للسعوديه .. هاجروا وأنا بعمر ثلاث سنوات .. الزبده بعدها بثلاث سنوات دخلت المدرسه وكلامي وقتها شوي مكسر مابين السوري والسعودي .. سألني الأستاذ عن جنسيتي وعلمته .. ومن بعدها الأولاد كُل ما مروا من جنبي يرددو *تبوله , تبوله* وهكذا .. من القهر صرت كُل ما مريت من جنبهم أقول *رز , رز , رز* ..
ترف: ههههههههههههههههههههههههه أعجبتني رز هذه ..
باسم: شسوي ما لقيت غيرها .. المهم بعدين صرت أطنشهم .. وشكلهم هم لما كبروا حسوا بالحركات الغبيه اللي كانوا يسووها وبطلوا .. وللحين أختي الكبيره لا بغت تستهزئ علي تقول تبوله تعال .. تستهبل حضرتها ..
ترف: ههههههههههههههههههه متخيله شكلك وأنت حاقد تناديهم بـ رز ههههههه ..
باسم: ترف خلاص .. لا تخليني أتذكر بزرنتي .. وربي أتفشل من نفسي ..
إستمرت تضحك فإبتسم وقال في نفسه: "كويس .. قدرت أطلعها من ضيقتها شوي" ..
قطع ضحكها صوت جوالها ..
لفت على شنطتها وطلعته .. شافت المُتصل يحيى وردت عليه ..
يحيى: ترف ..
ترف: هلا ..
يحيى: وينك ..؟!
ترف: أتمشى .. ليه ..؟!
يحيى: لا بس الجو بدأ يصير حار .. تعالي إرتاحي عشان بعد الغدا بنسافر لنزوى ..
ترف: طيب .. شوي وأجي ..
قفلت فقال باسم: وش يقول ..؟!
ترف: يقول تعالي إرتاحي لأنه بعد الغداء بنسافر لنزوى ..
باسم: وشهي نزوى هذه ..؟!
هزت كتفها تقول: مدري .. يقول قريبه من مسقط .. يمكن مثل الفرق بين جده والطائف أو مكه .. مدري ماني كويسه بالمسافات ..
طلّع جواله ودخل قوقل فقالت: وش تسوي ..؟!
باسم: لا بس أشوف وش أحلى شيء بنزوى ..
ترف بتعجب: طيب وليش ..؟!
باسم: بس عشان أخبرك عنها وتروحي تزوريها ..
ترف: هههه أنت من وش مصنوع عقلك ..؟!
طالعها بتعجب يقول: ليش ..؟!
ترف: هههههه مافي شيء إستمر إستمر ..
رجع لجواله يقلب فيه وترف تطالعه وهي تشرب البيبسي حقها ..
لف عليها يقول: ترف فيه شيء أكشن وبيعجبك ..
ترف بحماس: وشو ..؟!
قفل جواله وهو يقول بضيق: لا مو لازم ..
ترف بتعجب: وليش ..؟!
طنش وما رد ..
ميلت شفتها وقالت: تبوله .. ياللا قول لي وشو ..؟!
لف عليها يقول بإنزعاج: ترف ..!! ترى والله لأرجع أناديك بالبسكوت ..
ترف وهي تتصنع اللا مُبالاه: إنت حُر ..
بعدها كملت حتى تنسيه سالفة البسكوت: طيب وشو هالشيء الأكشن ..؟! وليه بطلت تقوله ..؟!
ميل شفته يقول: لأنه مو عدل .. أنا بعد أبي أروح له .. ما يصير تروحي وأنا لا ..
رفعت حاجبها تقول: إحلف ...؟!
تنهد وفتح جواله من جديد يقول: إسمعي .. فيه ...
سكت شوي بعدها قفل جواله يقول: ما بقولك .. ياللا روحي تأخرتي على أخوك ..
ترف: ليه تحمسني وتبطل ..؟! هذا أكره شيء بحياتي ..
باسم: هههههههه معليش بس والله مو قادر .. ياللا ياللا روحي ..
ترف: ليه تطردني وكأن السوق بيت أهلك ..؟!
باسم: يعني أنا اللي أروح ..؟!
طالعته لفتره بعدم رضى بعدها أخذت البيبسي حقها وقامت ..
بغت تروح بس وقفت ولفت عليه تقول: بترجع السعوديه ..؟!
هز راسه يقول: طيارتي الليله ..
ترف: طيب ليه جيت دامك بتروح بدري ..؟!
باسم: مضطر .. أخذت رحلة ذهاب وإياب .. وبكره بروح الجامعه عشان بخلص لي موضوع هناك .. وغير كِذا أهلي ما جلست معهم ..
هزت راسها بتفهم فسألها: وإنتو متى بترجعوا ..؟!
ترف: أمم يمكن بعد خمس أيام .. إحنا جينا حتى نجلس لأسبوع ..
إبتسم يقول: أنتظرك ..
رفع يده وكمل: باي ..
لوحت له وبعدها لفت وراحت بإتجاه الشقه ..
ظلت الإبتسامه ملازمتها ..
وحشها .. وحشها كثير وما توقعت أبد إنها بتشوفه قريب ..
كان صديق طفولتها الوحيد ..
كلمة تحبه قليله في حقه ..
لفت ورى تشوفه إن كان راح ولا لسى جالس فتفاجأت فيه وراها ..
لف وجهه يصلح نفسه يطالع بالمحل ..
ترف: اللحين وش هذا ..؟! تونا مودعين بعض ودراما وفي النهايه لاحقني ..!
قال وهو يغطي فمه بإيده ووجهه بعيد عنها: إنتي غلطانه إختي ..
رفعت حاجبها وفيها الضحكه على حركته الغبيه ..
فقالت تجاريه: أوه أجل أنا آسفه أخوي ..
لفت وراحت للشقه ..
وصلت لباب العماره ولاحضته للحين يتبعها ..
طلعت للمصعد وبعدها راحت للشقه ..
دقت الجرس فسمعت همسه يقول: ياللا نلتقي في جده ..
لفت عليه ولوحت له بإيدها فرجع للمصعد بعد ما شاف الباب ينفتح ..
فتح يحيى وقال بإستنكار: ما أفطرتي وتشربي بيبسي عالريق ..؟!
طالعت ترف بالبيبسي اللي بإيدها وقالت: ههههه تصدق ما لاحضت ..
تعجب من نفسيتها المتغيره عن الأيام اللي راحت ..
إبتسم .. ضحكتها القصيره هذه كافيه بإنها تريحه ..