ذاكرة القلب

بارت 21

مرحبآ 👋

#ذاكره_القلب
_______________________________________

امير : كلش تعبت نفسيتي وجنت اخر فتره وياج شفتيني شلون عصبي وبس اتعارك ردتج تعوفيني باي شكل جان ردت اذيج حتى ما اخليج تعيشين هل شي المعفن..

ما ادري هاي ٣ اشهر الي مال خطبه شفتها يمكن ٣ مرات لو ٤ وهمين جان سحل يلحون وعيب ومدري شنو...

حتى جاي يقدمون  عصير لو شي ابد ما اشرب بس ادخن وعصبيه بعيوني. مبينه امها ما راضيه عليه ولا رايدتني لين خليت شروط ما ادري شنو معناها..

بس عمود اخليها تبطل و اهلها يفصخونها وتطلع سالفه من عندي..

نور.. اسمعه وابجي رغم كل هذا الي عاشه هوه والوجع الي بكَلبه بس ما يبرر اله يكَدر الف حل اكو يكدر يسوي هواي سوالف...

اسمعه وابجي بس بلا صوت بس دموع خفت لا اختنكَ من جديد بس قويت نفسي جريت نفس على كيفي..

نور : شنو شروطك الي خليتهن..

امير : هيه جانت سادس علمي  واهلها مدرسين ومدرسه اهليه ويمكن بال ٨ ملايين شامرين عليها و جانت تمتحن وبطلتها..

بدله ماكو من هذني.. كلها مقطبه وحجاب والحنه كذالك فستان مستور وهيج...

موبايل ماكو.. اذا تريد تخابر امي موجوده لو اني..

ردتها بس تخرب ابوها من سمع صار عصبي وكَالي انت من هسه تشمر عليه شنو ما عندي لكَمه وهيج اشمرها عليك..

اني ما صدكَته كَتله هذا موجود وطلعت وهيه ما  اعرف منو بعدين قانعه وساكت ورضه..

ونفذت كلشي كَلته الها بس شحجي يوم عرس دنيا كلها طالعه من عيني  كل ساعه اريد ابجي شلون ما جان..

بيوم العرس دخلت الها وهيه مبنيه فرحه بعيونها  واني عبالك  شكلي مال واحد عندا جنازه َ..

اخذتها بدون واهس وبدون اي كلمه حتى بدون ما اباوع الها قهر كتلني من كملت عفتها  و كَمت غسلت وجهي و اطيتهم نيشان واجيت رجعت لكَيتها مبدله وكاعده  تمددت. وخليت ايدي على عيوني..

هيه بقت بمكانها تخاف تجي عبالها اصيح عليها لو شي..
كَمت من مكاني كَعدت كَبالها..
كَتلها كلشي عليج وعليه..

نور : عزا بعيني اني عرفتها تدري بيه بس ما توقعت هيج بيوم عرسها كَايل الها شنو هذا كَلبك ولك..

أمير : ما ادري و الله بس كَلت خلي تعرف علمود ما تحبني ولا تكَعد تنكَ عليه علمود طبعي.. جانت دنيا كلها ما بعيني ولا هامني شي فوكَ تعبي وشغلي و ضيم كَلبي .. نوب هيه عليه شدراني حجيت بعد عبالك اطلع اذيتي بيها..

مدامهم جبروني عليها اطلع حركَتي بيها ..

كَتلها اني احب وحده واسمها هيج وهيج ولين من غير طائفه ما كَدرت ازوجها وامي خطبتج هيج واني ما بنفسي شي بعدني لهسه احبها..