رواية نقطة ضعف

الحلقه17

#نقطـة_ضعف
الجزء الثاني
الحلقة 17 "ماقبل الأخيرة "
الديب شدلها ذقنها وقال : الكسرة هذه يلي في عيونك اطيحلي في نـص عمري !
ابتسمت نور ولما قرب منها سمعو صوت الباب انفتح
خشت ام حسام وفي ايدها مفتاح الشقة وهي تقول : نور كان نقولك لقيت زي سيارة حسام ولدي لوطة
طلع حسام من المطبخ فـ عيطت امه بعد تصديق وغطت فمها بإيديها لما شافاته
طلعت بعده نور من المطبخ وهي مبتسمة
قربت منه امه وحضناته وهي تبكي وتقول : الحمدالله ع سلامتك ياوليدي طيب فيك طيب فيك هذا وين ارتاح قليبي
الديب مسح ع ظهر امه بحنية : الله يسلمك
امه طلقاته شافتله وهي مبتسمة وعيونها يلمعو وقالت : امتى اعطوك افراج وخيرك ما قلتش !؟
الديب حك لحيته بتردد وقال : والله مش افراج ، قصة طويلة تو نحكيهالكم
فادية كانت واقفة ورا امها و قالت : باهي خلينا نسلمو عليه حتى حني
تنحت امه ع الجنب وسمحت لفادية انها تسلم عليه وتحظنه وتقول : الف الحمدالله ع السلامه
وبعدها سلم عليه حسن ، وكذلك بوه
تلفتت امه لنور وقالت بعتاب : خيرك ما اتصلتيش قلتي انه روح !
شافت نور للديب بإستنجاد وكأنه تبيه يدخل ، فـ فهم هو نظراتها وقال لأمه : اني مالياش ربع ساعة كيف واصل
امه : لكن مفروض اتصلت اول ما خشيت
فادية نخصت امها من زندها وقالت : امي خيرك عليهم ؟!
ف شافتلها امها ورجعت شافت لحسام وقالت : اني نسكت وخلاص ، المهم روحتلي !
وشافت لـ ايده وكأنها اول مرة تلاحظها وقالت بإستغراب : خيرها ايدك !
الديب : ضريبة الطلعة
نور ادخلت وقالت : قعمزو مابين نحطلكم الغدي
وخشت لمطبخها وهما قعدو يهدرزو ع الصالون ، مـر الوقت ، وحل الليل ..
السـاعـة 12:20 ليلاً :
كان الديب مقعمز هو وخوه في البلاكونة ويهدرزو ، بينما كان بوه راقد وامه تقاوم في النوم ع خاطره وفادية تهدرز في الهاتف في غرفتها
شاف الديب هاتفه وسكره ورده في جيبه وناض
شافله حسن وقال : وين ؟
الديب : وقت وتعبان نبي نرقد !
حسن : ترقد ع الصالون ؟
الديب : لالا حجزت هوتيل قريب من هني ، تو نجيكم غدوا الصبح
حسن : براحتك
الديب ضرب كتف خوه بلطف وقال : نتلاقو غدوا ، ما تسهرش !
حسن : انشالله
خش الديب ولقي امه مقعمزة ع الصالون وتتفرج وعيونها مليانة نعاس قاللها : خشي ارقدي
امه شافتله : نراجي فيك باش نفرشلك في دار خوك
الديب : لالا حاجز البرا
امه : وين ؟
الديب : هوتيل قريب هني ، تو نجيكم غدوا
امه وقفت وقالت : خلاص اماله اني بنخش نرقد ، تصبح ع خير
الديب : قدامك كل خير
وخشت امه لدارها ، اما هو خش لـ نور الواقفة في المطبخ ع الحوض وهي تغسل في ايد ايهم بالمية
الديب : خيره
نور شافتله ورجعت شافت لإيد ايهم وقالت : لاقي طرف شكلاطة فاتحها ولاعب في الدنيا كلها ، امسخ يديه وحوايجه وفمه والورغان
الديب باس ولده وقال : هكي الصح بابا
نور شافت للديب وقالت : مصحك واني نقعد نعاني فيه ونجري وراه
الديب : هي كان بتبدلي
نور سكرت الشيشمة وشافتله وقالت بـ استغراب : وين ؟
الديب : بتمشي معاي الهوتيل !
نور عقدت حواجبها بإستغراب وقالت : مش بايت هني ؟
الديب عقد حواجبه : لا
نور ابتسمت وقالت : اوك شوية وجاية
الديب : جيبي ساكوك معاك
نور قالت وهي طالعة : اوك !
خشت ع فادية يلي كانت تتكلم بالتليفون وفتحت دولابها وشنطتها وبدت تحط في حوايجها في الشنطة ، ف شافلتها فادية وقالت : وين يا طير ؟
نور قالت بمزاح وهي متظاهرة بالغرور : ماشية للهوتيل مع راجلي
ضحكت فادية وقالت : اضربي من زيك شهر عسل ثاني
نور عضت شاربها التحتي ورفعت حواجبها وقالتلها : اسكتي الراجل يسمع فيك
فادية قالت لعلي يلي ع الهاتف : العقبالنا
وكملت تهدريزها معاه بينما نور بدل حوايجها وطلعت وفي ايدها ولدها وايدها التاني ساكوها
الديب شاف لولده وقال :لازم تجيبيه معانا ولي العهد ؟
نور عقدت حواجبها بإستنكار : حسام بديرها يعينها هكي معاش فيه حشم ولا شنو ؟
الديب ضحك وخدي منها الساكو وهمس جنب وذنها : مش ذنبي مستاحشك هلبا
نور ابتسمت بخجل : باهي اطلع بلا فضايح
وطلعو هما الزوز ، نزلو من المصعد وركبو السيارة وجوهم حلو
ولع سيارته وطلع من البركيدجو وقاللها : ديري الحزام ماعنديش نية نحصل في جماعة افرح بيا
ضحكت نور ودارت حزامها وقالت : جيت بنشد في ايدك لقيتها معلقة
الديب : واني جيت بنقولك شدي في ايدي حتى الملعقة
ابتسمت نور وشدت في ايده اليمين المعلقه ع كتفه وهو طول الطريق شاد ايدها وحاطها ع قلبه لن وصـلو قعمزت نور ع صالون الاستقبال وهي تتفرج ع الهوتيل الفخم ، وماهي الا عشرة دقايق حتى عطوهم رقم الغرفة وركبو
خشت نور للحجرة وهي تتفحص فيها ، وحطت ولدها في سرير البيبي المركون بجنب البلاكونة ورجعت شافت للديب يلي قعمز ع الكنبة وهو ينحي في سبيدروه
نور : حلوة الغرفة
الديب قام راسه ووقف لما نحا سبيدروه واتجهلها وقال : مش بقد حلاوتك
نور ابتسمت : شن جايك اليوم
الديب قرب منها وشدها من خصرها ليه وقال : مستاحشتك
نور حطت يديها ع كتافه وشافتله بحب وقالت : سادس مرة تقولهالي اليوم حبيبي عندك علم ؟
الديب حط جبته ع جبتها وقال : مستاحشك ، مستاحشك ، مستاحشك ، مستاحشك
نور ضحكت وقالت : مهبول انت ؟
الديب بجدية : نبي نسكرهم ع العشرة
نور : ح تقعد طول حياتك تكره النواقص وتحب الحاجات الكاملة هكي !؟
الديب بنظرات حب : هذا سبب حبـي ليـك ❤️
نور ابتسمت بسعادة وقالت : مش كتر الفرحة اني معاك مش عارفة شن نقول
الديب بنظراته الشقية قاللها : ما تتكلميش ، أفعلي !
قربت نور واختطفت قبلة منه !
اما عند فادية يلي يأست من محاولة اقناع علي بـ موضوع الشقة استسلمت وقالتله : اوك خلاص ، دير رايك اصلاً اني حضي ونعرفه
علي بإنزعاج : خيرك هكي فادية مداير جهدي الله غالب هذا ما عندي شن تبيني نخنب ؟
فادية عقدت حواجبها وقالت : شن قصدك يلي عندهم حياش كلهم مخانب ؟
علي : ادوري في مشكلة ؟
فادية : جاوبني علي قصدك حسام خوي خناب ؟
علي : ياربي الصبر تي من قال هكي اني قلت هكي خيرك تحرفي في الدوه الزفت ، اسمعي مدامك خاطرك تنكدي عليا اني ماعنديش جواجي
فادية بإنزعاج : بتسكر عليا ؟
علي : مابين ما تهدي
فادية : اني يلي بنسكر عليك !
وسكرت عليه الخـط وحذفت الهاتف جنبها وغمت راسها ورقدت
الساعـة 3:47 ليلاً
نور متكية ع صدر الديب وايدها ع لحيته وهي تمسح عليها بلطف قالتله : حبيبي
الديب شافلها : روحـه ؟
نور : احكيلي كيف قدرت تهرب منهم ؟
الديب باس ع راسها وقال : مش مهم كيف هربت منهم ، المهم اني معاك توا
نور شافتله وقالت بحزن : يارا حاولت تساعدنا لكن قتلها
الديب : عندي علم
نور : من قالك ؟
الديب : فتحت النت وشفت صورها ، الله يرحمها ويوسع عليها غبية ماتدريش انه صادق حتى يخش يرقد يخلي في حراساته يعسو عليه قدام الباب !
نور : علاش ؟
الديب : مهووس بالدنيا ، والفلوس ، والنساوين، يسحاب كان حط حد يحرسه مش ح يموت
نور : شن يخدم هو ؟
الديب : في وزارة المالية
نور : هذا علاش
الديب : لكن الفلوس ما تشريش السعادة ، بالرغم من الأموال الطائلة يلي عنده الا انه اكتر راجل مكتئب في الدنيا ، من كثر الاكتئاب ديمة مبتسم ببرود
نور : هذا مريض نفسي
الديب : حتى المريض النفسي مش هكي ، اني كنت مريض نفسي ووضعي مكانش زيه
نور شافتله وقالت بعتاب : معاش تقول هكي ، انت مرضك وراثي ويعتبر نوع من الاكتئاب مش مرض نفسي حقيقي
الديب ابتسم : خليلي يلي يبررلي
نور : نتكلم بجد ع فكرة
الديب : اوك ، المهم خلينا منه انتِ احكيلي شن درتي في الشهور ، كيف تصرفي ، اماليا شن مدايرين معاك ؟
نور : ماقصروش معاي الحـق ، وحتى بوك ما توقعتاش يساندني هكي ويقولي تعالي اقعدي عندنا ويبعتلي في فادية وحسن يباتو معاي
الديب ابتسم بقهر وقال : مش محبة فيك ، طمعاً في الفلوس يا حلوة
نور شافتله بإستغراب فقال هو : اني لو متت ايهم مش ح يورثني لأن بوي قاعد حي ، فـ هو قاعد يتوددلك ويبعتلك ويعزم فيك حتى ما تعارضيش الحكم يوم تسمعي بيه واكل كل شي ، لكن ما يسحابنيش اني كاتب اغلب املاكي بـ اسمك
عقدت نور حواجبها وقعمزت ع مرفقها وشافتله بصدمه وقالت : شنو ؟! بعقلك انت؟
الديب بجدية : ايه بعقلي ، اني مش ضامن حياتي ، كتبلتك الحوش وشقة تركيا والمزرعة بأسمك ، ومحل الغذائية يلي مأجره بأسم حسن وقطعة ارض بأسم امي !
نور قعمزت وقالت بإنزعاج : شن هالتفكير هذا بعيد السـو عليك
الديـب : اني عارف لو خليت كل شي بوي مش ح يعطي حتى قرش لـ ايهم ! واني يهمني انه ولدي يكون مستقبله ويترحم عليا كان ما لحقتش عليه
نور لمعو عيونها وقالت بخوف : والله العظيم حرف تاني لما نزعل منك ومعاك نكلمك بكل
الديب ابتسم : تعالى ارقدي عوضيني ع ليالي يلي رقدتهم ع الارض اليابسة في عز الصقع
رجعت نور رقدت ع صدره وهي زعلانه وهو يمسح ع شعرها ويقوللها : حبيبي
نور : ها
الديب : كانك تحبيني افرديهم
نور : معاش تقول الكلام هذا تو نفردهم
الديب : خلاص باه
نور : نحبك
الديب : نموت فيك وفي حبـك ❤️
نور شافتله وقالت : معاش تجبد سيرت الموت
الديب ابتسم : باهي خلاص ارقدي
رقدت نور ع قلبه وقالت : تصبح ع خير
وبعد ثواني كانت غافية ، وهو كذلك !
يتبع ..

للكاتبهMeMe Ali💖

تفاعلوا خلاص مزال حلقه وتنتهي الروايه على خير💜

منقوله للكاتبه::::MeMe Ali