رواية نقطة ضعف

الحلقه 6

#نقطـة_ضعف
الجزء الثاني
الحلقة 6
درس الديب سيارته قدام حوشه وشاف المرا يلي طالعه من باب الحوش
قعد يشبحلها ثواني بإستغراب ونزل ، خش للحوش ، فتح الباب بالمفتاح وخش
خش لدار النوم ولقاها مسكرة بالقفل ، عقد حواجبه بإستغراب وطقطق
نور : دقيقه
الديب : خيرك مسكرة الدار ؟
نور : شويه وطالعه استنى !
وخر الديب وهو مستغرب ، وطلع للصالة وقعمز شد هاتفه وفتح النت
طلعت نـور من دار النوم بـ فستانها الأحمـر الاصق ع جسمها الرشيق ، وفتحة تكشف عن فخدها ، وصدر واكمام مرصعة !
روج احمر ، مكياج ثقيل ، شعر ويڤي بإتقان ومفتوح
شافلها الديب بدهشة وصفر تصيفرة الاعجاب وقال : الشي والضي
ابتسمت نور ، ووقف هو وقال : لازم تمشي للحفلـة ؟
نور رفعت حواجبها بتأكيد : اكيد حبيبي لازم
الديب قعد يشبحلها لثواني وكأنه يروي في نفسه بـ جمالها وقال بحب : شاد روحي ع تفسيد الروج بالسيف
نور بمزاح : اختصاصك عاد انت
الديب : مكيجتي بروحك ؟
نور : لالا جتني مرا للحوش ، قداش ليا ع المكياج الثقيل وعرس نوسة مانبيش نجازف الحق نبي حاجة مضمونة
الديب : بارك الله فيها اخت برهوم يلي دارت عرس وخلتني نشوفك بالأحمر
نور ضحكت وقالت : الساعة كم ؟
الديب شاف ساعة ايده وقال : تمانية وتلت
نور : وقت بتروح بكري هي
الديب : باهي خشي البسي عبايتك مابين طلعت ايهم وساكوه
نور : اوك
وفعلاً صار وطلعو ، ركبت السيارة المتعلية ووصل بيها ع الصالة وحطها قدام الباب بالزبط
شافتله نور وقالت : زي ما قتلك بابا بيروح بيا !
الديب : باهي
نور : مع السلامة
ونزلت وسكرت الباب ، خشت للصالة وكالعادة نحت عبايتها ، خشت الحمام تأكدت من شكلها وطلعت
خشت للصالة سلمت ع ام العروسة بحرارة ، وحطت هديتها ع طاولة الهدايا وخشت وحاسة ان فيه بعض الانظار عليها
يتاهمسو ، ينتاخصو وهما يشبحو للجميلة المحظوظة في رايهم
بعد ماصارت قصة زواجهم حديث الناس
اتجهت للطاولة يلي مقعمزة فيها امها وجارتهم وبناتها ، سلمت عليهم وقعمزو
مرت الحفلة بسرعة ، وسرعان ما زفو ايناس مع زوجها ..
فات العرس وروحو اغلب المعازيم ، اتصلت نور بـ بوها تلاته مرات ولا رد
وقفت ولبست عبايتها ووقفت في الاستقبال امتع الصالة
سمعت صوت كلاكس وهي مقعمزة ع صالون الاستقبال ، حست الصوت مش غريب عليها فـ ناضت وفتحت الباب شوية ولقتها سيارة الديب
طلعت وركبت السيارة وقالتله بإستغراب : مش ع اساس بابا بيروح بيا ؟
الديب طلع من الصالة وقال : لالا مصارش
نور : علاش ؟!
الديب : هكي
نور : باهي حطني في حوش اماليا اهو قريب خطوة من هني وبات عندنا
الديب : وعلاش هذا كله ؟
نور : قصدي بتروح بيا للحوش بعيد هلبا والاوضاع مش تمام وايهم قعد هني في حوش اماليا قصة !
الديب : ما يصير الا يلي كاتبه ربي
نور سكتت لثواني قبل ما ترجع وتقول : مفهمتش علاش هذا كله
الديب ابتسم وماردش عليها
نور فتحت شنطتها الصغيرة وقالت : اه حقا جبتلك بكلاوة
وطلعتله الباكو الصغير ومدتهوله
ابتسمت الديب وخداه منها وقال هو : خليلي الحنين
نور ابتسمت : عاداتنا هادم عاد
وفي خلال نص ساعة وصلو للحوش ، فتح الديب الباب لنور حتى تشوف الحوش مظلم ومزين بالشموع والرائحة العطرة
ضحكت نور وخشت وخش هو بعدها
نور وقفت ونحت عبايتها وشافتله وهي مبتسمة وقالت : شن هذا حبيبي ؟
الديب خدي منها العباية وقال : شن رايك ؟
نور قامت قفطانها شوية حتى ما تعترش وخشت بكعبها العالي وهي تشبح للأجواء الرومانسية بإعجاب وقالت : الله حوشي يهبل ، امتى لحقت اديره هذا كله ؟
الديب : من لما طلعتي روحت ودرته ، وباش نكون صادق معاك جبت زوز ولاد نعرفهم يخدمو في شركة تنسيق ساعدوني
خشت نور للصالة يلي مفتوح عليها غرفة اكل مزينة الطاولة وعليها عشاء من مطعم وشموع وموسيقى هادية
نور تلفتتله بسعادة وقالت : ياقلبي انت علاش هذا كله شن المناسبة ؟
الديب ابتسم وقال : عيد ميلادي !
نور عقدت حواجبها بإستغراب : عيد ميلادك ؟ حبيبي عيد ميلادك مزال عليه تلاته شهور ! ؟
الديب حط عبايتها ع الصالون وقاللها بنظرات حب : لا ! اليوم عيد ميلادي ، ذكرى اول مرة نشوفك فيها قبل سنتين !
نور اندهشت وقعدت فاتحة عيونها وتشبحله وهي مش عارفة شن تقول من فرط الفرحة
الديب قرب منها وشدلها خصرها وقال : يوم شفتك وحبيتك هو يوم ميلادي ❤️
نور ابتسمت بلطف وحطت يديها ع وجهه وقالت : ياعمـري انت
الديب غمض عيونه بإسترخاء وحط جبته ع جبتها وقال : من قال ، ح تجي وحدة في يوم من الايام ح تخليني نحب الدنيا بعد ما كنت حاط روحي في كفة ايدي ومش فارقة معاي متت ولا قعدت عايش
نور وهي تشبحله : من قال حتى ني
الديب فتح عيونه وشافلها بإستغراب وقالت هي : نحب الديب الشرير يلي كنت نلعن فيه في خاطري كل ما نسمع اسمه او نسمع سيرته !
الديب باسها بلطف وقال : في شخص تاني في الديب مايعرفاش الا انتِ !
نور ابتسمت براحة : ليا الشرف
الديب طلقها وقال : شن نتعشو ؟ لأني جعان هلبا
نور حنت حواجبها بإعتذار وحطت ايدها ع بطنها : حبيبي والله شبعانة
الديب شافلها : باهي بعد ما درت هذا كله ما تبيش تسايريني !؟
نور تنهدت وقالت : اوك خلاص
واتجهو للطاولة ، جبدلها الكرسي حتى تقعمز وقعمزت هي وقالت : واو جنتل
ابتسم الديب واتجه لكرسيه وقعمز : عارف روحي الايام يلي فاتت كنت مقصر معاك هلبا ، مانقعدش معاك في الحوش ، وتعاركت معاك وبدينا شوية نباعدو ع بعض واني هالشي هذا ما نبيشي يصير ، لأن اليوم يلي ما نتكالموش فيه نحس فيه رزين هلبا عليا ، وانتِ عارفة المشاكل يلي نطلع ونواجه فيها والتهديدات يلي نسمع فيها ، سببولي ضغط نفسي مش طبيعي
نور حطت ايدها ع ايده وقالت : متفهماتك حبيبي ، ولاكنهادا راني ماجيتش وفتحت معاك الموضوع وحاولت نرضيك
الديب شدلها ايدها وباسها وقال : ربي ما يذوقني يوم من غيرك
ابتسمت نور وقطع ع جوهم الرومانسي صوت اشعار رسالة ع الواتس من هاتف الديب
شافت نور للهاتف المضوي وقالت بإستغراب : مني ؟
الديب شاف هاتفه وقال : واحد صاحبي
نور : اهااا
الديب غير الموضوع وقال وبدي في الماكلة : شن جو العرس
نور هزت راسها وقالت : حلو ، وزحمة الصالة مشالله
الديب : ربي يهنيهم ، تلاقيت اني وابراهيم خوها ، شد فيا نقعد معاه غادي
نور : وطبعاً ماقعدتش ع خاطر الفاجئة الحلوة هذه
الديب : ايه
فجأة مسكت الديب راسه بألم وغمض عيونه
نور استغربت وقالتله بخوف : حبيبي ؟
الديب قعد ساكت وهو ماسك راسه بصبعيه الابهام والوسط ويدلك فيه
نور وقفت واتجهتله وطبست عليه وقالت بقلق : خيرك حسام ؟
الديب فتح عيونه : صداع بسيط
نور : نمشي نجيبلك بنادول ؟
الديب : لالا مش محتاج ، الم يجي اقل من دقيقة ويمشي !
نور عقدت حواجبها : هذا مش صداع !
الديب شافلها وقال : شنو اماله ؟
نور بخوف : لازم تمشي ادير صورة !
الديب : انشالله
نور قعدت تشبحله بخوف وهي حاطة ايدها ع كتفه ، ف رحع شافلها هو وقال : فسدتلك جوك ؟
نور : لا بس خفت عليك
الديب : مافي شي خلاص قعمزي ارتاحي
قعمزت نور ، وفات الوقت
تاني يوم في الصبح :
لبست نور ايهم لبسته يلي خدتهاله من شهرين وبس توا كيف جت عليه وطلعت عليه حلوة
سكرتله بطم اللبسة وشافتله بحب وقالت : محلا وليداتها ياربي
وطبست باساته بقوة من خده وشافتله وقالت : عسل
، خدت هاتفها لقاته مقفل ، فـ خدت هاتف حسام وفتحاته ، فتحت ع الكاميرا وصورت ايهم وبدون قصد مسحتها
طلعت من البوم الصور وهشت ع المحذوفة مؤخراً يلي كانت تحتوي ع حوالي 23 صورة فقط !
اخرهم صوره لـ غادة !
بفستان بنفسجي قصير لاصق ع الجسم ، وشعرها القصير مفتوح ومصورة وهي واقفة ع المراية !
ومن كلمة " يوم واحد " عرفت نور ان الصورة ليها حوالي شهر محذوفة
فتحت نور عيونها بدهشة وخشت ع الصورة ، كانت غادة فعلاً

يتبع

للكاتبه:MeMe Ali💖