رواية نقطة ضعف

(4)نقطـة ضعف💜🍃

وقف الديـب ع طاولتهم وشافلهم هما الزوز بتقزز ولما حس بوه بيه شافله وانصدم : انت انت شن جابك هني !

حسام بغيض : والي خالقك ياحاج تجيب هـ الزبالة ضرة علي امي قهوتك لما نحرقها وانتم فيها !

أميرة عقدت حواجبها وشافتله : احترم نفسك

الديـب طبسلها وهو رافع حواجبه استغراباً في وقاحتها وقلة ادبها : عاودي ؟

وخرت اميرة واتكت ع الكرسي بـ خوف لما شافت الشر يتطاير من عيون الديـب

تلفت الديـب لبوه بنفس النظرات وقال بـ لهجة حازمة : عندي معاك دوه اركب للسيارة

بوه بغضب لأن فسد عليه موعده الغرامي : اعتقنيي كرهتني في عيشتي خليني في حالي تررربح

الديـب : اطلع ما تخلينيش نعريك توا

اميرة وقفت بعد ما نفذ صبرها من شخصية بو حسام الضعيفة :ولدك هكي يكلم فيك كيف تبيني نحترمك ؟امسح رقمي من عندك وانساني !

بوه : اميرة استني

طلعت اميرة اطقطق بكعبها بغضب ، اما هو شاف لـ ولده بعد ما طفح الكيل : ارتحت توا

الديـب بحزم : رد لـ امي فلوسها !

بوه : صرفتهم من زمان

الديـب : 60 وين صرفتهم ؟

بوه : رديت بيهم ديني

الديـب بوعيد وتهديد : وربي لما نطلعهم من عيونك كان مجبتهمش بطيب خاطر !

وطلع وخلى بوه غارق في خوفه ، امّا عند نور الي كانت كيف كملت فحص الضغط المستقر ،

كانت زينب تحكيلها ع حسام الديب : عاش طفولة مهمشة ، يمكن هذا الي خلاه يكبر وهو هكي ! من عمره تمانية سنين بدي يخدم باش يساعد بوه ، كبره قبل عمره وعطاه مسؤولية كبيرة ، حرمه من اقل حقوقه ، كان يهزب فيه ويضرب فيه لـ اتفه الأسباب ، ولما كبر عليه بشخصيته هادي لامني اني !

نور بتعاطف : باه علاش كان يعامل فيه هكي ؟

زينب ناضت وصبت طاستين شاهي من الطرمس واتجهت ومدت لنور وحدة وقعمزت ع الصالون وقعمزت قدامها نور ،

تنهدت زينب وقالت : حسام كان عدواني جداً وطبعه صعب من لما كان بيبي ، تعبت في تربيته هلبا وكذلك بوه ، اني استعملت الاسلوب العاطفي وجيتيه بالحنية والطيبة ومشي معاي زي العجينة لكن بوه لا ، حسام يعاند وبوه بعاند ، هو يغلط وبوه يضرب وهو يرجع يغلط تاني لأنه بوه ضربه ، وهكذا لن فقد السيطرة عليه

نور : بوه مش نادم توا ؟

زينب : نادم لكن يكابر ومايبيش يوضحلي

نور : حرام كسرلي خاطري

زينب :ديمة انقوله ولدك لما يكبر خاويه شي ما يبيش يفهم

نور بطريقة اعتراف : تبي الحق ابلة زينب ؟ بصراحة ولدك عييت نتحسب فيه وفيه غطرسته لكن توا بعد ما حكيتيلي عليه تغيرت نضرتي

زينب : مش انتِ بس هكي ، نفتح في الفيس نلقا نص الناس نازلين فيه ويسبو فيه ويهددو ويتحلفو ويتهمو فيه بالسكار والخانب ! هذا كله بس ع خاطر واقف في وجوهم ، مع انه والله مافي اطيب من قلب وليدي

وانسمجت نور في الحديث معاها ، لن فات الوقت وروحت مع العصريات ، خشت لدارها بدلت حوايجها وارتمت ع السرير وخشتلها امها تهدرز

امها قعمز ع السرير : شن جو الخدمة ؟

نور قعمزت بحماس وربعت رجليها : مليح ، ترا قولي حوش منو طلع ؟

امها بفضول : منو ؟

نور : امالـي الديب !

امها عقدت حواجبها بإستنكار : اللطف متقوليش الديب هدا امتع الـ ..

نور قطعت عليها : ايه هو !

امها : فوتيها اماله !

نور زال حماسها : علاش ؟

امها : عقابها تخدمي في حوش هالفاسد !

نور ابتسمت بطيبة وهو تحاول تقنع امها : ماما اليوم حكتلي عليه امه ، والله ماهو هكي والكلام الي ينقال عليه كله إشاعات

امها : طبيعي امه ح ادافع ع ولدها وسمعة ولدها

نور : بالعكس حسيت كلامها مقنع نوعاً ما

امها : فوتيها بنتي حتى الناس يسمعو بيك تخدمي في حوش اماليه مش ح يسكتو

نور بإنفعال : ماما شن دخلي بالناس وشن يبي يقولو !! المرا تهبل وطيبة لن خلاص ، واني مضايقتش غادي والمرتب كويس

امها : جي للحوش ؟

نور : من هو قصدك ؟

امها : الديب ! نور : لالا

امها سكرت عيونها شوية بطريقة كشف
الكذب : هاا ؟

نور استسلمت : ايه خش

امها : خشلك في الدار الي انتِ فيها؟

نور : سلم ع حناه وطلع اقسملك بالله

امها : ياودي مش عارفة شوفي بوك اشك انه يخليك تكملي

نور : تو نقوله بعدين

امها : اني عندي حوايج في الغسالة خلي نمشي ننشرهم وطلعت الام وسكرت وراها الباب اما عند حوش حسام الي كانت الأجواء فيه متوترة جداً

بو الديـب " رجب " : وديني ما نعبد ولدك معاد معتبها عندي في الحوش اني نوريه

زينب ام الديب : غر استهدي بالرحمان ولدك هذا

رجب بإنفعال : جيييي وحشمني قدااام الرررجاله في القهوة يقولي ردلي فلوس امييي !!

زينب : والله ماقتله حاجة ولا قلت نبيهم الفلوس امتى ما تردهم ردهم عادي

رجب شافلها بغضب : تبيهم انتِ قصدك ؟
زينب : امتى ما تردهم عادي مش مستحقتلهم توا رجب : يعني تبيهم !!

زينب : شن بنكذب عليك ، 60 الف ماهو شوية يارجب

رجب وقف بعد ماكان مقعمز ع الصالون : والله لما نجيبلك بيهم عليك مرااا تو تشوفي

زينب انصدمت : اللطف ياربي شن جاك

رجب : تبيهم وله ؟ تو نوريك وطلع وقربع الباب

يـتـبعـ .........

للگآتبهہ‏‏: MeMe Ali💖