الحلقه ١٤
دخلت سهي الي القصر لتجد سالي جالسه مع ليلي و آسر فقالت لهم سهي:
سهي:مساء الخير
آسر و ليلي:مساء النور
سالي(مكمل حديثها كأن شيئا لم يكن):مقولكيش بقي يا طنط امبارح ده كان جامد موووت
سهي(وهي تجلس بجانب آسر):و امبارح اللي كان جامد موت ده قضتيه مع انهي حيطه يا لولو
سالي(بنظره ناريه):قصدك ايه؟
سهي(متصنعه البرائه):لا ابدا مش قصدي حاجه بس امبارح كان جامد موت ازاي يعني
سالي(بغرور):حاجه بين اتنين متجوزين ملكيش فيها
سهي(بسخريه):ايه ده هو آدم اتجوزك؟بجد؟امتي ده حتي كان بايت معايا امبارح
سالي(وقد احست انها هزمت):انا طالعه لحسن الجو حر اوي
آسر:دي طلعت بتحس يا سو
سهي:لا يابني تلاقيها جت معاها صدفه كده
سالي:انا طالعه يا طنط
ليلي:في داهيه
سهي(بمرح):اوبا ده طنط دخلت معانا علي نفس الخط
آسر(مخاطبا سالي):انا لو منك كنت سيبت العيله دي و رحت موت نفسي
سالي:ده انت بقي يا حلو
سهي:عارفه لو آدم سمعك و انتي بتقولي كده ده ممكن يموتك
سالي:صحيح هو فين ادم؟
سهي:بيجبلي دوا من الصيدليه
سالي:طب ابعد عنها يا آسر لحسن تتعدي
آسر(ضاحكا):هههههههه لا المرض اللي عندها مش بيعدي
سالي(باستفزاز):طيب كويس عشان انا بخاف علي صحتي اوي
سهي(باستفزاز هي الاخري):اهو انتي بذات مش هتعرفي تتعدي
سالي:ليه يعني
ليلي:اصل سهي حامل
سالي(بصدمه):نعععععععمم؟
آسر(وهو ينظر الي سهي):مالها دي؟
سهي(وهي تذهب ناحيه السلم):انا هطلع بقي عشان مليش في الافلام الهندي
ليلي:طيب يا حبيبتي هبقي اخلي حد من الشغالين يبعتلك الغدا علي اوضتك
سهي(وهي تصعد السلم):لا يا طنط ميرسي انا لو جعت هبقي اكل اي حاجه كده
ليلي:مينفعش كده لازم تتغذي كويس عشان النونو اللي جاي ده
سهي:حاضر يا ماما
ليلي:شطوره يا سو
•••••••••••••••••••••••••••••••••
صعد اَدم الي غرفه سهي التي كانت قد ابدلت ملابسها و ارتدت
دخل آدم التفت اليها ليجدها تبكي فذهب اليها مسرعا و قال لها:
آدم(بفزع):في ايه يا سهي مالك؟
لم تجبه سهي بل زاد بكائها و نحيبها فقال لها آدم:
آدم(وهو يحتضنها و يقول لها بقلق):مالك يا حبيبتي في حد مضايقك؟
لم تجبه سهي بل اكتفت بهز رأسها يمينا و يسارا فقال لها آدم:
آدم(بنفس قلقه وهو ينظر اليها):طب في حاجه وجعاكي
هزت سهي رأسها نفيا مره اخري فقال لها آدم:
آدم(وقد ازداد قلقه):اومال مالك
سهي(بصوت خافت و بكاء):مفيش
آدم(بنفس القلق):طب مالك طيب
لم تجبه سهي بل ازداد بكائها ففضل آدم ان يخرج و يتركها وحدها و ما ان خرج حتي ازداد بكائها اما هو فاخرج هاتفه و قام بمهاتفه جيهان قالت له:
جيهان:الو
آدم(بحزن):الو ازيك يا جيجي
جيهان:الحمدلله ايه مال صوتك؟
آدم:سهي عماله تعيط و انا مش عارف مالها كل ما أسالها مالك متردش عليا
جيهان:ده عادي جدا خاصه انها لسه في اول الحمل فالهرمونات متلخبطه فهتبقي شويه مكتئبه و شويه فرحانه و شويه زعلانه انت حاول تستحمل يعني
آدم:مش مشكله بس دلوقتي اعمل ايه
جيهان:يا سيدي بما ان سهي صحبتي و انا عارفاها كويس انت هتخش عليها دلوقتي تقولها بحبك و بموت فيكي و جيبلها ايس كريم او وافل و هي هتبقي كويسه
آدم:بس كده طيب سلام بقي
جيهان:مع السلامه
•••••••••••••••••••••••••••••••••
دخل آدم الي الغرفه مره اخري ليجد سهي قد هدأت قليلاً فقال لها:
آدم:هديتي
سهي(وهي تومئ برأسها):اه
آدم(وهو يمسك يدها):بحبك
سهي(وهي تنظر له باعين دامعه):بجد
آدم(وهو يحتضنها):و بموت فيكي كمان
سهي:يعني هتفضل تحبني حتي لو تخنت و عجزت و كده
آدم(وهو ينظر لها):يا هبله عشان كده بتعيطي
سهي(وهي تومئ برأسها):امم
آدم:ده انا هكون مت قبل ما انتي تعجزي
سهي(بسرعه):بعد الشر عليك
آدم:اه والله انتي مش مصدقه يعني انتي لما تعجزي يبقي عندك كام سنه؟
سهي(مفكره):اممم ممكن خمسه و اربعين سنه
آدم:طيب انا بقي ساعتها هيبقي عندي واحد و خمسين سنه يعني انتي هيبقي كتر خيرك لو فضلتي معايا لحد ما يبقي عندي خمسين سنه
سهي(وهي تسند رأسها الي صدره):انا ممكن افضل معاك طول العمر (ثم قالت وهي تنظر اليه)بس انت اللي مش مضمون
آدم(بمرح):طب انا عايز استغل اللحظه الرومانسيه دي و اقولك اني عايز اتجوز
سهي(بنظره ناريه):والله اموتك
آدم(وهو يقبلها):ولا تقدري اصلا
سهي(وهي تبتعد عنه):تصبح علي خير
آدم(بابتسامه):و انتي من اهله
•••••••••••••••••••••••••••••••••
استيقظت سهي في صباح اليوم التالي اخذت دشها بسرعه و
نزلت درجات السلم بسرعه لتجد الجميع ملتفا حول طاوله الطعام فقالت لهم:
سهي:صباح الخير
الجميع:صباح النور
نظرت سهي الي سالي لتجدها جالسه بجانب آدم فتوجهت الي الناحيه الاخري من الطاوله و تحديدا امام آدم و جنب آسر الذي قال لها:
آسر(بصوت خافت وهو يميل علي اذنها):كان لازم تنزلي بدري تحجزي المكان
سهي(بصوت خافت هي الاخري):استني بس اخد نفسي و اتفرج عالمسرحيه اللي هتحصل
آسر:يا جامده (ثم تابع قائلا):بس لازم تخليه يغير شويه عليكي مش ينفع كده
سهي(وهي تنظر الي طبقها):وهو دلوقتي مش غيران ده شويه و هيقوم يموتنا احنا الاتنين
نظر آسر الي آدم ليصطدم بنظرات آدم الناريه المتوجه نحوه هو و سهي فقال لها:
آسر(بصوت خافت):يلاهوي ده هيموتنا بجد يعني بصي عليه كده
سهي(وهي تنظر له):ابص ايه يا ابني ده انا ممكن اسقط من الرعب
آسر(وهو يضحك بصوت عال):هههههه يخرب عقلك يا سهي
سهي(وهي تنظر له بتوعد):اخرس يا نيله ودتنا في داهيه
سالي(بغيظ):بتضحكوا علي ايه متضحكونا معاكو
آسر:و انتي مالك
سهي(وهي تهمس باذن آسر):اتفرج و اتعلم بقي (ثم قالت مخاطبه سالي)مش ناويه بقي يا لولو تشدي حيلك كده و تجيبيلنا نونو كده صغنتوت
آسر(بصوت خافت):اوبا ده انتي كده بتلعبي بالنار و جيتي علي الجرح دي لو مماوتتكيش النهارده انا ممكن اشك ان دي سالي
سهي(بثقه):ولا تقدر (ثم قالت مخاطبه سالي)ايه يا لولو مكسوفه تقولي عادي يعني احنا كلنا عارفين اللي فيها
سالي(بغيظ):و لما انتوا عارفين اللي فيها بتقولي ليه يا حبيبتي (ثم استطردت قائله)بعدين دي حاجه تنقص من صاحب الشأن مش مني
سهي(معترضه):sorry يا لولو لو هو متجوز اتنين و واحده حامل يبقي اكيد النقص ده من عندك انتي خاصه لو متجوزهاش اصلا و ده ان دل علي شئ ميدلش علي حاجه غير انه مش شايفك اصلا
سالي:انا طالعه
سهي:au revoir chere (باي باي يا حبيبتي)
و ما ان صعدت سالي حتي قال آسر:
آسر(مخاطبا سهي):زودتيها انتي المره دي
سهي(بتافف):و ياريته نافع
و ما هي الا دقائق حتي وجدوا سالي تهبط من علي السلم و بيدها حقيبتها و قامت بمناداه احدي الخادمات و قامت بوضع الحقيبه بسياره سالي التي قالت لادم:
سالي(وهي تغادر القصر):انا ماشيه و يا ريت يا آدم تبقي تبعتلي ورقتي في اقرب وقت ممكن
خرجت سالي و ما زال الجميع مندهشين مما فعلت
فهل بالفعل ستترك سالي عائله الشاذلي بشأنها ام ان كل هذا ما هو الا تخطيط لكارثه جديده؟
•••••••••••••••••••••••••••••••••
عاد آدم الي القصر في المساء ليجد الجميع جالسين في الصالون فقال لهم:
آدم:مساء الخير
الجميع:مساء النور
ليلي:ها يا حبيبي عملت ايه
آدم(وهو يجلس علي احد الكراسي):طلقتها و خلصت كل حاجه
ليلي(بابتسامه وهي ترفع يدها الي السماء): الحمدلله يا رب
سهي(بدون مقدمات):انا خايفه
آسر:وانا كمان
احمد:ليه خايفين كده من ايه؟
سهي:ماهو مش معقول سالي هتتهز من الكلمتين اللي قلتهوملها الصبح و تسيبنا في حالنا كده علي طول
آسر:ما احنا لو نعرف انت اتجوزتها ليه اصلا يا آدم ممكن نعرف بردو هي عملت كده ليه
آدم(بتنهيده):مقدرش اقول و بالذات دلوقتي مقدرش اقول فعلا (ثم تابع قائلا)بعدين متخافوش بقي هي مش جامده للدرجه يعني
سهي(وهي تتوجه الي السلم):انا طالعه اوضتي تصبحوا علي خير
الجميع:و انتي من اهله
•••••••••••••••••••••••••••••••••
صعد آدم الي غرفته خلف سهي دخل ليجدها لم تبدل ملابسها بعد و تجلس علي السرير و يبدو عليها انها مستغرقه في التفكير فقال آدم لها:
آدم:هتفضلي تفكري كده كتير
سهي:مش بفكر بس قلقانه اوي و خايفه
آدم(وهو يقبل راحه يدها):طول ما انا جنبك ماتخافيش من اي حاجه
صمتت سهي فلم تكن تستطيع ان تخبره بما تفكر به اتخبره بأنها قلقه منه هو خائفه منه هو و هي توقن تماما بأن سالي لن تتخلي عنه بهذه السهوله لكن ان تمكنت من معرفه سبب هذه الزيجه من الاساس فلربما تستطيع ان تحزر ما تخطط له سالي. قطع عليها صوت تفكيرها صوت آدم وهو يقول لها:
آدم(وهو يناولها هاتفها):سهي الموبايل بيرن
نظرت سهي الي الهاتف لتجد المتصل مروان فردت قائله:
سهي(بلهفه):الو
مروان:سوس عامله ايه يا بت وحشاني
سهي:ماروو و انت كمان عامل ايه
مروان:انا تمام الحمدلله انتي و آدم عاملين ايه؟
سهي:كويسين الحمدلله
مروان:ولا بتسألي يا واطيه انتي
سهي:معلش ما انت لو تعرف اللي حصل هتعذرني
مروان:طب احكي احكي
سهي:لا مش هينفع في التليفون خالص
مروان:خلاص تعالي نتقابل كمان نص ساعه كده في كوستا
سهي(وهي تنظر الي ساعتها):دلوقتي لا الوقت اتأخر مش هقدر انزل
مروان:اتأخر مين الساعه لسه سبعه
سهي(بمرح):ايوه يا ابني انت ناسي اني بقيت ست متجوزه و الساعه سبعه دي زيها زي نص الليل كده
مروان:عشنا و شوفناكي في القفص يا سو (ثم استطرد قائلا)سلام بقي دلوقتي عشان مش فاضيلك هبقي اشوفك بكره بقي
سهي(بسرعه):الساعه كام طيب
مروان:ثلاثه اربعه بقي مهي دي المواعيد اللي بقت تناسب سيادتك
سهي:هههههه طيب ماشي سلام
مروان:مع السلامه
•••••••••••••••••••••••••••••••••
اغلقت سهي مكالمتها مع مروان لتجد آدم يعمل علي اللاب توب و قد بدا عليه الحنق فقالت له سهي:
سهي:مروان بيسلم عليك
آدم(بحنق):الله يسلمه
سهي(بتردد):احم،هو انا ممكن انزل بكره؟
آدم(بتفس النبره):عشان تقابلي مروان صح
سهي(وقد خف ترددها قليلاً):اه
آدم(وهو يغلق اللاب توب):يعني انتي بتيديني خبر و لا بتستأذنيني؟
سهي(بعدم فهم):ايه؟
آدم(بعصبيه):يعني حضرتك اتفقتي علي المكان و الوقت و كل حاجه و انا قرطاس لب
سهي(بصوت عال):ليه يعني كل ده لو مش عايزني اروح مش هروح ولا انت بتحب تتخانق معايا كل يوم و خلاص
آدم(وقد هدأ قليلاً):يعني لو قلتلك متروحيش مش هتروحي
سهي:لا طبعا مش هروح
آدم(بعند):طيب انا بقي مش عايزك تقابلي ولا مروان ولا حازم ولا عمر تاني
سهي(بصوت عالي):لا بقي ده انت اتجننت رسمي
آدم(ببرود):اتجننت عشان بغير علي مراتي
سهي(وهي تنظر له):مش مجنون عشان بتغير مجنون عشان انت اكتر واحد عارف دول بالنسبه ليا ايه و ان مش دول اللي تغير منهم (ثم قالت بتهكم)و لا صحيح هتميز ازاي ده انت بتغير عليا من اخوك (ثم قالت وهي تنظر له)مهو البعيد اعمي البصر و البصيره
آدم(بعصبيه وهو يمسك يدها بعنف):بقيتي تتبسطي لما تضربي صح بقيتي عايزه كل يوم تتصبحي بقلم و تتمسي بقلم مش كده؟هي دي المعامله اللي هتريحك صح؟
سهي(بهدوء):آدم طلقني
آدم(بنفس عصبيته):هو كل ما يحصل حاجه هتقوليلي الكلمتين دول طب كلمه كمان يا سهي و هتبقي طالق
سهي(بعند):طلقني يا آدم
آدم(بعصبيه):انتي طا....
ليلي(وهي تقتحم الغرفه بسرعه):استهدوا بالله يا ولاد مينفعش كده
سهي(بعند اكبر):انا بقي مصممه و عايزه اتطلق احنا مش عارفين نعيش مع بعض زي البني ادمين بس انا اللي غلطانه من الاول فكرت بقلبي قبل ما افكر بعقلي و ادي النتيجه (ثم قالت وهي تتنهد)طلقني يا آدم لو سمحت
ليلي:مينفعش كده يا بنتي علي الاقل عشان ابنك او بنتك اللي لسه مجوش دول ايه ذنبهم يجوا الدنيا يلاقوا باباهم و مامتهم متطلقين
سهي(بدموع):يجوا يلاقوهم متطلقين احسن ما يجوا يلاقوا بباهم و مامتهم بيتخانقوا مع بعض كل يوم
آدم(بهدوء):شوفي انتي عايزه ايه يا سهي و انا هنفذهولك
سهي(بنفس عندها):عايزه اتطلق
آدم(وهو يخرج من الغرفه):طيب البسي و لمي حاجتك و انا مستنيكي تحت
ليلي(بشهقه):و انت هتطلقها بالسهوله دي يا آدم
آدم(وهو ينزل السلم):خلي عندها ينفعها
•••••••••••••••••••••••••••••••••
هبطت سهي درجات السلم بعد قرابه نصف ساعه حمل آدم عنها حقيبتها و وضعها بالسياره بينما كانت هي تودع اهل المنزل الذين ودعوها بحراره:
ليلي(بدموع):يعني خلاص مفيش فايده
سهي(وهي تحتضنها):خلاص بقي يا لولا و انا والله هبقي اجي ازورك كل فتره
آسر(بعبوس):هتوحشنا رخامتك
سهي(وهي تصافحه):و انت كمان
نيڤين:طب ما تفكري تاني يا سهي
سهي(وهي تقبلها):انا كده تمام اوي
احمد(وهو يمد يده اليها):مع السلامه
سهي(وهي تصافحه):باي باي
خرجت سهي و ركبت السياره بجوار آدم الذي انطلق بسيارته مسرعا كانت سهي تنظر من شباك السياره الي ان لاحظت ان الطريق الذي يسلكه آدم هو نفس الطريق المؤدي الي منزلهما فقالت له:
سهي:احنا رايحين فين؟
آدم:لما نوصل هتعرفي
فضلت سهي ان تصمت ولا تتحدث فاخر ماتريده الان هو ان تتشاجر مع آدم وهم في طريقهم الي المأذون علي حد علمها.
اوقف آدم سيارته امام منزله هو و سهي التي قالت له:
سهي:احنا ايه اللي جابنا هنا
لم يجبها آدم بل نزل و احضر حقيبه سهي و ادخلها الي المنزل نزلت سهي من السياره و قال لها آدم:
آدم(وهو يقف عند باب الفيلا):اتفضلي
سهي(وهي تنظر له متسائله):احنا ايه اللي جابنا هنا؟
آدم:تعالي و انتي تعرفي
دخل آدم الي الفيلا فدخلت سهي ورائه و ما ان جلس علي احدي الكراسي حتي قال لها:
آدم(وهو يشير الي الكرسي الذي امامه):تعالي اقعدي
ذهبت سهي وجلست في مكان الذي اشار اليه آدم و ما ان جلست حتي قال لها:
آدم(بجديه):الكلام اللي هقولهولك دلوقتي ده تسمعيه لحد الاخر و متقاطعينيش فيه تمام؟
سهي:تمام
آدم:بصي يا ستي انا طلاق مش هطلق و قبل ما تقولي اي حاجه انا جبتك هنا و هسيبك تقعدي هنا لوحدك و هخلي الشغالين اللي كانوا موجودين يقعدوا معاكي عشان لو احتجتي حاجه و خدي وقتك في التفكير اسبوع اتنين شهر براحتك مش هضغط عليكي و انتي قرري و اللي انتي عايزاه انا هعملهولك عايزه تطلقي ماشي اكيد هيكون صعب عليا بس احسن عندي من انك تعيشي معايا و انتي مش عايزاني ولو عايزه ان احنا نكمل مع بعض اكيد ساعتها هبقي مبسوط و هنربي بنتنا او ابننا اللي جاي مع بعض بس انتي فكري و خدي وقتك علي الاخر
سهي(بعبرات في عينيها):انت بتعمل معايا كده ليه
آدم(بعبوس وهو يغادر):عشان مراتي و ام ابني او بنتي و قبل كل ده البنت اللي حبيتها واللي لحد دلوقتي مش عارفه انا بحبها اد ايه (ثم استطرد قائلا)انا ماشي ولو احتجتي اي حاجه كلميني اوك
سهي(بدموع):ماشي اوك
آدم(وهو يغلق باب الفيلا ورائه):مع السلامه
سهي:سلام
•••••••••••••••••••••••••••••••••
عاد آدم الي القصر ليجد امه تجلس وهي تبكي و ما ان رأته حتي قالت له:
ليلي(ببكاء):طلقتها يا آدم ارتحت و طلقتها
آدم(بهدوء وهو يجلس بجانب والدته):لا طبعا
ليلي(وقد توقفت عن البكاء لتنظر له بعدم فهم): نعم؟اومال هي فين مرجعتش معاك ليه
آدم(وهو يقص علي والدته ما قاله لسهي):بس يا ستي و باذن الله من بكره هبعتلها سنيه و كام شغاله تانين كده و هبقي اروح معاها عند الدكتوره و لو عايزه تقعدي معاها استئذني بابا و روحي اقعدي عندها اد ما انتي عايزه
ليلي(بفرح):اهو كده انت آدم ابني بصحيح (ثم قالت وهي تتوجه الي السلم)انا هطلع اقول لابوك و اروحلها من النجمه
آدم(بابتسامه):نفسي اعرف انتي مهتمه بيها كده ليه ما عندك نيڤين اهي
ليلي(وهي تصعد السلم):نيڤين حبيبتي بردو بس سهي دي اول فرحتي
آدم:طب لما تعرفي هتروحيلها امتي قوليلي عشان اوصلك
ليلي:طيب
•••••••••••••••••••••••••••••••••
ظلت سهي جالسه بمكانها بعد رحيل آدم فقد كانت تعلم انه يحبها لكن لم تكن تعلم انه يحبها لدرجه ان يضحي بالبقاء معها علي حساب راحتها هي ايضا تحبه لكن كبريائها منعها من ان ترجع في كلامها بعد ان طلبت منه الطلاق كان قرارها محسوما منذ ان خيرها آدم بين البقاء معه و بين ان يطلقها فهي لن تستطيع الابتعاد عنه بسبب حبها له و بسبب طفله الذي تحمله في احشائها قامت وتوجهت الي غرفتها و ابدلت ملابسها ثم غطت في سبات عميق
•••••••••••••••••••••••••••••••••
في صباح اليوم التالي استيقظت سهي علي صوت جرس الباب فتحته و
توجهت الي الباب و نظرت من العين السحريه لتجدها ليلي فتحت لها سهي بسرعه و ما ان رأتها ليلي حتي ضحكت فقد كانت ملامح سهي يبدو عليها النوم و شعرها مبعثر بطريقه اعطتها مظهرا طفوليا بريئا كان آدم واقفا بسيارته امام باب الفيلا و ما ان رأها حتي ظل شاردا بها جري به خياله في لحظه ان ارادت سهي الطلاق و صممت عليه قطع عليه شروده صوت امه وهي تأمره بأن يذهب اومأ آدم برأسه اليها ثم انطلق بسيارته بينما دخلت ليلي الي الفيلا و جلست تتحدث مع سهي
•••••••••••••••••••••••••••••••••
ظل آدم يجوب الشوارع بسيارته و قد كان تفكيره منحصرا في القرار الذي قد تأخذه سهي ظل يصول و يجول الي ان قرر الذهاب الي الشركه و ممارسه عمله الذي اصبح مقصرا فيه فمنذ ان تزوج سهي و هو لا يذهب الي الشركه كثيرا مثل ذي قبل ارتسمت علي شفتيه ابتسامه عندما تذكر ايام كانت سهي تعمل تحت اشرافه تذكر ايضا ما فعلته عندما اخذها الي ذاك المكان الذي اعترف فيه بحبه لها اخذ عقله يسأله كيف ستكون حياته بدونها فهذه المره ان خرجت سهي من حياته لن تعود مره اخري حتي ان كانت علي الاقل صديقه
•••••••••••••••••••••••••••••••••
كانت سهي تجلس مع ليلي في حديقه الفيلا يحتسيان الشاي حتي قالت ليلي:
ليلي(وهي تاخذ رشفه من كوبها):مقولتيليش يا سهي قررتي ايه في موضوعك انتي و آدم
سهي(و هي تنظر لها):يعني مش عارفه؟
ليلي(بحزن):يعني خلاص مصممه علي الطلاق
سهي(بهدوء و ابتسامه):مين قالك اني عايزه اتطلق من آدم
ليلي(بفرح):بجد يا سهي يعني مش هتطلقي
سهي(بنفس الابتسامه):لا مش هتطلق
ليلي:ايوه كده بقي فرحتي قلبي (ثم استطردت قائله)طب مش هتقولي لادم
سهي:لأ خليه يستوي شويه
ليلي(بمرح):يا عيني عليك يا ابني
سهي(بابتسامه):متخافيش اوي كده
ليلي(بابتسامه):لا ما انا عارفه ان هو في ايد امينه
سهي(بشرود):انا والله بحبكوا اوي انتي و آسر و احمد و نيڤين و عمو محمود بحبكوا اوي
ليلي(بنصف عين):احنا بس
سهي(بهيام):و آدم
ليلي(وهي تقلدها):اه و آدم
سهي:عارفه يا طنط علي قد ما بحبه علي قد ما في حاجه مخوفاني علي طول حاسه انه هيسيبني و خايفه اوي من انه يسيبني بجد مش عارفه اتعودت انه يبقي جنبي علي طول عارفه انا دلوقتي حاسه ان في حاجه غلط في حاجه نقصاني و مش هقدر استحمل الاحساس ده لو هو اللي سابني
ليلي(و قد تأثرت من كلامها):ليه يا بنتي كده انتي لسه صغيره علي انك تشيلي الهم ده كله(ثم قالت وهي تربت علي يدها) يا بنتي عيشي حياتك انتي لسه صغيره عيشي الحياه بحلوها و مرها خوفك ده مش هيعمل حاجه غير انه هينكد عليكي انتي و جوزك و بعدين ده قدر و مكتوب لو آدم مكتوبله انه يسيبك هيسيبك لو مكتوب انكو تعيشوا و تموتوا مع بعض محدش في الدنيا دي كلها يقدر بمنع ده اهدي بس انتي كده و طلعي الكلام الاهبل ده من دماغك
سهي(و قد اقتنعت بكلام ليلي):معاكي حق يا طنط و الله
ليلي(مغيره الموضوع):ها يا ستي وراكي ايه النهارده؟
سهي:عندي معاد مع جيجي هروحلها كمان ساعه كده
ليلي(وهي تخرج هاتفها):طب يلا اطلعي البسي علي ما انا اكلم آدم
سهي(باستغراب):تكلميه ليه؟
ليلي(وهي تنظر اليها):هو ايه اللي ليه ده واحده رايحه للدكتوره لازم جوزها يبقي معاها طبعا
سهي(بسرعه):لا لا لا يا طنط ريم قالت انها هتعدي عليا توديني و ترجعني و تقعد معايا شويه متصليش بيه
ليلي:طب علي الاقل اعرفه انك نازله
سهي(بتنهيده):طيب بس حضرتك هتيجي معايا
ليلي(وهي تضع الهاتف علي اذنها):طيب ماشي
•••••••••••••••••••••••••••••••••
كان آدم يعمل بتركيز الي ان قطع تركيزه صوت رنين هاتفه نظر اليه ليجد والدته هي المتصله فرد عليها قائلا:
آدم:الو
ليلي:ايوه يا آدم ازيك يا حبيبي عامل ايه
آدم:الحمدلله يا ماما خير في حاجه
ليلي:ايوه انا و سهي رايحين للدكتوره صاحبه سهي جيجي
آدم:طب خليكو عندكوا و انا جاي اخدكوا
ليلي(بسرعه):لا يا حبيبي ماتجيش دي ريم صاحبه سهي جايه معانا و كده يعني انا قلت اقولك بس
آدم(بتنهبده):طيب ماشي يا ماما (ثم قال وهو يتنحنح)هي كويسه
ليلي(بخبث):هي مين؟
آدم:يا ماما بقي قولي الله يخليكي
ليلي(ضاحكه):اه كويسه يا حبيبي
آدم:طيب ماشي يا ماما لما ترجعوا البيت كلموني ولو حصل اي حاجه كلموني و هتلاقوني عندكوا في دقيقه
ليلي:مانتحرمش منك يا حبيبي يلا مع السلامه بقي
آدم:سلام
•••••••••••••••••••••••••••••••••
توجهت سهي الي عياده جيهان بصحبه ريم و ليلي و ما ان وصلوا حتي رحبت بهم جيهان ترحيبا حارا و ما ان انتهت من كشفها حتي قالت جيهان:
جيهان(بابتسامه):لا تمام اوي ما شاء الله الجنين صحته كويسه اوي و حركته كمان طبيعيه (ثم قالت وهي تناول سهي بعض الحلوي) اتفضلي يا ستي دي عشان مشيتي علي الادويه كويس (ثم قالت بخبث وهي تناولها قطعه حلوي اخري)و ادي دي لادم عشان هو سمع كلامي و قوليلي خلاص كده يعيش حياته بقي
سهي(بعدم فهم):طيب (ثم قالت بحماس)هو ولد ولا بنت
جيهان(ضاحكه):متحمسه اوي انتي لا يا ستي لسه مش هنعرف دلوقتي كمان شهرين كده تكوني تميتي التالت ممكن نعرف ساعتها
سهي(باحباط):يييييه يعني لسه هستني شهرين
جيهان:و ممكن اكتر (ثم قالت بسرعه)يلا مع السلامه شرفتي
سهي(بمرح):ماشي يا جيجي بتزحلقيني افتكريها بس
جيهان(مخاطبه ليلي):بجد يا طنط اتبسطت اني شفت حضرتك اوي
ليلي(بابتسامه):و انا كمان يا حبيبتي
سهي(وهي تخرج من الغرفه):يلا مع السلامه
جيهان:مع السلامه
•••••••••••••••••••••••••••••••••
عادت سهي الي المنزل بصحبه ليلي و ريم و ما ان عادت حتي ابدلت ملابسها و
نزلت السلم لتجد والده آدم تقول لها:
ليلي:انا همشي انا بقي يا حبيبتي
سهي(بعبوس):ليه يا طنط ماتباتي معايا النهارده
ليلي(وهي تتوجه الي الباب):معلش بقي يا حبيبتي مره تانيه باذن الله انا همشي بقي عشان آدم مستنيني بره
سهي(وهي تمشي معها):طيب استني هاجي اوصلك
ليلي(بنصف عين):توصليني بردو
سهي(ضاحكه):ههههه خلاص بقي يا لولا
ليلي:طب يلا ياختي وصليني
سهي:ههههه حاضر
اوصلت سهي ليلي الي الخارج لتجد آدم ينظر امامه بل لم ينظر بناحيتها تماما و ما ان ركبت امه السياره حتي انطلق بها دون ان يلتفت ورائه •••••••••••••••••••••••••••••••••
في اليوم التالي استيقظت سهي و هي تشعر بالارهاق نظرت الي ساعتها لتجدها الرابعه عصرا قامت و توجهت الي الحمام اخذت دشها
و ما ان خرجت حتي نظرت في ساعتها لتجدها الخامسه نظرت في هاتفها لتجد العديد من الاتصالات من ليلي و آدم فقامت بمهاتفه ليلي اولا و ما ان اتصلت حتي ردت ليلي قائله:
ليلي(بسرعه و قلق):الو يا سهي انتي كويسه
سهي:ايوه يا طنط كويسه والله معلش بس كنت نايمه و لسه صاحيه و يادوب خدت دش و لاقيت كل الmissed calls دي اتصلت بيكي علي طول مش عارفه ليه بقيت انام كتير اوي كده
ليلي:معلش يا حبيبتي هتبقي كده في اول الحمل بس بعدين خلاص (ثم تابعت كأنها تتذكر شيئا) صحيح يا سهي كلمي آدم احسن ده كان قلقان عليكي اوي
سهي:هو مش عندك طيب تطمنيه انتي
ليلي:لا يا حبيبتي ده في الشركه من بدري النهارده كلميه ونبي يا سهي
سهي:حاضر هتصل بيه دلوقتي حالا
ليلي:ماشي يا حبيبتي يلا باي
سهي:مع السلامه
•••••••••••••••••••••••••••••••••
كان آدم يجلس علي مكتبه عندما وجد هاتفه يرن باسم سهي فرد بسرعه قائلا:
آدم(بعصبيه):اهلا اهلا لسه فاكره
سهي(بهدوء):معلش يا آدم و الله كنت نايمه و مسمعتش الموبايل خالص
آدم(بجفاء):المهم انتي كويسه
سهي:اه الحمدلله
آدم:طيب كويس مع السلامه
اغلق آدم المكالمه دون ان يسمع ردا من سهي فقد قرر آدم ان تكون هذه هي معاملته مع سهي حتي تقرر هي مصير حياه كليهما.
•••••••••••••••••••••••••••••••••
كانت سهي مندهشه من معامله آدم لها بهذا الشكل لكن سرعان ما نفضت هذه الافكار من رإسها و نزلت الي الدور السفلي لتبحث عن اي شئ تفعله لكنها لم تجد شيئا لفعله فجلست تتابع التلفاز في ملل الي ان انقطع التيار فجأه لم تهتم سهي بهذا كثيرا لكنها سمعت صوت شئ يقع و ينكسر فاصابها الذعر فمدت يدها لتصل الي الهاتف و قامت بالاتصال به فرد عليها قائلا:
آدم:الو
سهي(بصوت خافت):آدم الحقني النور قطع و في صوت حاجه وقعت انا خايفه اوي
آدم(بسرعه):طيب بس متخافيش انا جاي حالا
سهي(و قد اوشكت علي البكاء):بسرعه الله يخليك
و في اقل من ربع ساعه سمعت سهي صوت فتح الباب فكادت ان يغشي عليها من الخوف لكنها كتمت صوت بكائها بيدها وجدت شخصا يدخل من الباب و سرعان ما سمعت هذا الشخص و هو ينادي باسمها ليتبين ان هذا الشخص هو آدم.
ما ان سمعت سهي صوت آدم حتي ركضت اليه قائله:
سهي(وهي تحتضنه):انا خايفه اوي
آدم(وهو يملس علي شعرها):متخافيش خلاص اهدي (ثم قال محاولا تهدئتها)مش كنتي خايفه و انتي لوحدك انا موجود اهو (ثم قال وهو يجلسها علي احدي الكنبات)اهدي كده طيب و انا هروح اشوف في ايه و اجي
سهي(وهي تمسك بيده و تقول بصوت باكي):متسيبنيش
آدم(وهو يجلس بجانبها):خلاص اهو مش رايح في حته اهدي بس
و ما ان جلس آدم بجانبها حتي انفجرت سهي في البكاء فاحتضنها آدم محاولا تهدئتها قائلا:
آدم(وهو يحتضنها):بتعيطي ليه طيب ما انا جنبك اهو
سهي(وهي تشهق كالاطفال):خايفه اوي
آدم(وهو يربت علي ظهرها):متخافيش طول ما انا معاكي متخافيش من اي حاجه
سهي(بدون مقدمات):وحشتني
آدم(وهو يغلق عينه بشده كأنه يحاول كبح مشاعره):و انتي كمان
و في هذه اللحظه عاد النور من جديد فقال آدم لسهي:
آدم(دون ان ينظر لها):اهو شوفتي النور جه اهو
سهي(وهي لا تزال ساكنه في حضنه):اممم
آدم(وهو يقف):طيب انا همشي بقي
سهي(بارتباك وهي تمسك يده):لا خليك شويه عشان اتأكد انه مش هيقطع تاني يعني
اد(وهو يجلس بجوارها):طيب
سهي(وهي تنظر له):و انت عامل ايه مبسوط
آدم(وهو ينظر لها ليصطدم بما كانت ترتديه لكنه حاول التماسك):اه يعني الحمدلله
سهي(وهي تقترب منه متظاهره الحزن):مبسوط من غيري
آدم(بثبات):منا مش هقعد ابكي علي الاطلال يعني
سهي(وهي تقبل شفتيه):انا بقي مش مبسوطه من غيرك
آدم(وهو يحملها متجها بها الي الغرفه):ولا انا الصراحه
سهي(وهي تلف ذراعها حول رقبته):بحبك
آدم(وهو يقبلها):و انا بموت فيكي
••••••••••••••••••••••••••••••••
