كيف أنسى

جزء ٨

الحلقه ٨

توجه ادم الي حيث تجلس سهي ليجدها قد هدأت قليلاً جثا علي ركبتيه امامها و امسك بيدها ليقول لها:

ادم(و هو ينظر اليها):سهي انا اسف بجد عارف ان اي حاجه هقولهالك مش هتنسيكي اللي حصل من شويه بس انا والله العظيم بحبك و عشان كده كنت عايز اعرف انتي بتعملي معايا كده ليه

سهي(باكيا):و لما عرفت ارتحت كده دلوقتي؟

ادم(بندم):انا اسف والله العظيم و اللي انتي هتقوليلي عليه انا هعملهولك

سهي:هتعمل اي حاجه اقولك عليها؟

ادم:اي حاجه تريحك حتي لو كانت هتبعدني عنك

سهي(بنبره حزم):تمام يبقي هتقبل استقالتي و مش عايزه اشوف وشك تاني يا ادم

تلقي ادم طلبها ببعض الصدمه لكنه سرعان ما تلاشي هذه الصدمه فقد كانت سعادتها اهم عنده من اي شئ اخر فقال لها:

ادم(بحزن):زي ما انتي عايزه بس تعالي اوصلك عشان الدنيا بدأت تضلم

سهي:طيب

اوصل ادم سهي الي بيتها لتجد سيارتها مركونة تحت باب بيتها همت سهي بالنزول لكن استوقفها ادم وهو يقول لها:

ادم(بحزن):لو احتجتي اي حاجه اي حاجه كلميني

اومأت سهي برأسها في صمت همت بالنزول لكن استوقفها ادم مره اخري وهو يمسك بيديها و يقول لها:

ادم(بحزن):عايزك تعرفي اني بحبك و هفضل احبك طول حياتي

نزلت سهي بسرعه من السياره قبل ان تبدأ عبراتها في الهطول.

توجهت سهي بسرعه الي شقتها دقت جرس الباب ليفتح لها محمد الذي ما ان راي ابنته بهذه الحاله حتي انتابه القلق فكر في ان يتصل بادم و يفهم منه ماحدث لكنه فضل تأجيل ذلك مفكرا في ان ما حدث كان له وقعه علي ادم ايضا
•••••••••••••••••••••••••••••••••
وصل ادم الي منزله بعد عناء فقد كاد شروده في الطريق ان يودي بحياته وصل الي المنزل ثم صعد الي غرفته في صمت وما هي الا دقائق حتي اقتحم اسر عليه غرفته قائلا:

اسر:ايه يا ابني انتا ما...

قطع كلامه حاله اخيه التي كان يرثي لها فساله قائلا:

اسر:مالك يا ادم سهي حصلها حاجه؟

ادم(بدموع):سهي ضاعت يا اسر ضاعت

اسر(باندهاش):نعم يعني ايه ضاعت؟

قص عليه ادم ما حدث بينه و بين سهي ثم ما لبث ان انتهي من قصه لتلك الاحداث حتي وجد هاتفه يرن فرد عليه دون ان ينظر اليه قائلا:

ادم(بصوت ضعيف):الو

مروان(بعصبيه):عملت فيها ايه

ادم(و هو ينظر الي شاشه هاتفه ليعرف انه مروان):ايوه يا مروان فيه ايه

مروان(بعصبيه):انا برضو اللي فيه ايه و لا انا اللي المفروض اسألك (ثم هدأ قليلاً وهو يقول) عملت ايه في سهي يا ادم

ادم(بحزن):هي لحقت تحكيلك؟

مروان(ببعض الهدوء):سهي محكتليش حاجه يا ادم (ثم تابع وهو يتنهد) سهي في المستشفي جالها انهيار عصبي

ادم(وهو لا يصدق كلام مروان):نعم انتا بتقول ايه؟

مروان(بعصبيه):زي ما سمعت كده و والله يا ادم لو حصلها حاجه ماهيكفيني فيك اني اقتلك

اغلق ادم الهاتف بسرعه تحت انظار اسر الذي كان يقول له:

اسر:في ايه مالك؟

ادم(بقلق):سهي في المستشفي جالها انهيار عصبي

اسر:طب استني انا جاي معاك
•••••••••••••••••••••••••••••••••
توجه ادم و اسر الي المستشفي بعد ان هاتف ادم جيهان ليعرف منها اسم المستشفي توجه الي المكان الذي توجد به غرفتها بعد ان سأل عنها في الاستقبال دخل الي الغرفه و بصحبته اسر ليجد الجميع موجودا و شبح ابتسامه ضعيفه علي وجه سهي التي سرعان ما اختفت عندما سمعت سهي صوته:

ادم:مساء الخير

الجميع:مساء النور

سكت الجميع عن الكلام فاحس انه الشخص الغير مرغوب في تواجده الان قطع هذا الصمت صوت راندا وهي تقول لابنيها:

راندا(لجلا و كريم):يلا برا خلي سهي تستريح شويه

ثم اتبعها حازم وهو يقول:

حازم:انا نازل الكافتيريا حد عايز حاجه؟

جيهان:اه استني انا جايه معاك

ريم:خدوني معاكو

اما اسر فقد خرج بمجرد ان خرجت راندا فلم يتبقي بالغرفه سوي ادم و سهي بعد ان خرج محمد هو الاخر خلف راندا فقال ادم لسهي:

ادم(وهو يقترب من فراش سهي):انا اسف

سهي(بشبح ابتسامه):عادي ولا يهمك

ادم(بحزن):لا مش عادي سهي بجد انا مش عارف انا عملت كده ازاي انا كل اللي كنت بفكر فيه اني عايز اعرف ايه اللي بيدور جواكي

سهي(بدموع):و لما عرفت كسبت حاجه؟

ادم(وهو ينظر اليها):بالعكس خسرت اهم حاجه بالنسبالي سهي انا مش بحبك انا بموت فيكي و مقدرش اعيش من غيرك

سهي(بدموع):ادم انا بحبك اوي اكتر ما انت متخيل بس انا خوفي من انك تسيبني اكبر بكتير من حبي ليك

ادم(وقد بدأ يشعر بالامل):طول ما انا معاكي متخافيش

همت بقول شئ لكنه قاطعها قائلا:

ادم(محاولا اسكاتها):هششش ارتاحي انتي دلوقتي و انا هجيلك تاني بكره تمام

سهي:اوك

ادم:(وهو متوجه ناحيه الباب):بحبك

سهي: و انا كمان
•••••••••••••••••••••••••••••••••
في صباح اليوم التالي استيقظت سهي باكراً نظرت حولها لتجد الغرفه خاليه من اي احد ظلت تعبث بهاتفها الي ان جائها اتصال من ادم فردت قائله:

سهي:الو

ادم(بخبث):انتي قاعده علي الزرار ولا ايه

سهي(بسرعه):لا ابدا انا بس كنت بلعب في الموبايل لحد مالقيتك بتتصل فرديت

ادم:طيب المهم انتي كويسه دلوقتي؟

سهي:اه الحمدلله

ادم:طب عدي كده من واحد لخمسه و انتي تلاقيني قدامك سلام

و قبل ان تكمل سهي عدها كان ادم قد دخل الي غرفتها و هو يحمل بوكيه ورد كبير و علبه شكولاته ضخمه فقالت له سهي:

سهي(وهي تمد يدها اليه):ايه ده الله ايه الحاجات الحلوه دي (ثم سألته وهي تأخذهم منه):دول لمين

ادم(بخبث):لوحده كده بحبها

سهي(و هي عاقده ما بين حاجبيها):و مين دي ان شاء الله؟

ادم(باستهبال):واحده كده

سهي:اممم طب قول كام حرف كده

ادم(مفكرا):هو فيه سين و ياء

سهي(و هي تهز رأسها نفيا):لا مش عارفه

ادم:عايزه تعرفي اسمها يعني

سهي(وهي تومئ براسها):اممم

ادم(بخبث):ماشي يا ستي اسمها ياسمين

سهي:طب يلا غور من وشي

ادم(ضاحكا):انتي علي طول لسانك متبري منك كده بقي فيه واحده تقول لجوزها غور دا حتي شكلها مش لطيف

سهي:انا كده بقي إذا كان عاجبك

ادم:مش عاجبني بقي هاه و هروح اتجوز ياسمين علي الاقل كيوت

سهي:اعملها و انا اقتلك انت وهي في نفس اليوم

قطع عليهم حديثهم دخول حازم الي الغرفه:

حازم:ايه يا سووس عامله ايه النهارده (ثم لنتبه الي وجود ادم فقال له)ايه ده دومه باشا الشاذلي هنا دا انتي حصلك الشرف يا بت انتي عامل ايه يا واد

ادم:ايه يا عم زومه من ساعه ما دخلت لوكلوك لوكلوك كده متاخد نفسك علي العموم انا كويس الحمدالله انت عامل ايه

حازم:انا كويس الحمدلله انتو مش ناويين تتجوزو بقي و تخلصونا ده الواحد قرف منكوا يا شيخ

ادم(وهو ينظر الي سهي التي انفجرت ضحكا): ايدي علي كتفك بس هي توافق

حازم(وهو ينظر الي سهي):هاتوافق المرادي متقلقش

سهي:المهم انتا عامل ايه مع جيجي

حازم(بحزن):علي نفس الحاله

ادم:ايه ده ايه ده ثانيه واحده كده انتا بتحب جيهان؟

سهي:اه يا ادم هما الاثنين بيحبوا بعض بس بيحبوا يقرفوا بعض في عيشيتهم

ادم(وهو ينظر الي سهي بعمق):زينا يعني

حازم:لا احنا افظع منكوا بكتير علي الاقل انتوا عارفين ان كل واحد فيكوا بيحب التاني لكن احنا لا

ادم:ده ايه الفيلم الهندي ده

سهي:و اي فيلم ده بقالو علي كده 5 سنين

ادم:ركزي معايا انا يا ستي بدل ما نبقي زيهم كده ها اجي لباباكي امتي

سهي:اشعرفني متروحله ولا تكلمه في اي وقت

ادم:طيب يعني انتي موافقه

سهي(وهي تمط شفتيها):معرفش

حازم:دي هتشلك يا عم روح لباباها علي طول انشالله يغصبها علي الجواز المهم انكوا تتلموا في بيت واحد و خلاص

ادم:معاك حق والله (ثم نظر الي سهي وهو يقول):انا مش هاخد رأيك في حاجه عشان انتي بتزهقيني بصراحه

سهي(بلوم):كده طب انا مش موافقه

ادم:عنك يلا ريحتي

سهي:طب يلا برا

ادم:اه صحيح استقالتك مرفوضه و جهزي نفسك عشان هنسافر شرم الاسبوع اللي جاي عندنا 3 اجتماعات هناك

سهي:بس احنا علي نفس الdeal بتاعنا مش كده؟

ادم:deal ايه ده معلش عشان مش فاكر

سهي:ان انا هاخد اسبوع اجازه بعد مانرجع من شرم

ادم(بلوم):و هتسيبيني اسبوع بحاله لوحدي

سهي(بدلال):معلش يا دومتي بقي عشان ماما و شروق وحشوني

حازم:احم نحن هنا يا حبيب انتا وهي

ادم: و ايه اللي مقعدك زي العزول كده ماتقوم تروح اي حته بدل ما تتعقد

سهي:و انتا مش ناقص عقد الصراحه

حازم:طب ادعولي معاكو

ادم:ربنا يحنن قلب جيجي عليك يا حازم يا ابني يا رب

وفي هذه اللحظه دخلت جيهان ليحملق الجميع لها في دهشه فقال حازم:

حازم(لسهي):انتي لازم تتجوزيه بسرعه لحسن يدعي ليكي تتسخطي قرد ولا حاجه

ادم:يارتني كنت افتكرت ربع جنيه

جيهان:اللللله جري ايه يا عم دومه لا بقولك ايه انتا مش قدي

سهي:ايه دومه دي يا بت انتي ماتحترمي نفسك

جيهان:لو مكنتش اعرفك كنت قولت انك بتحبي

حازم:اهي طبت ياختي علي بوزها

ادم(وهو ينظر الي سهي):ايه العيال المتشرده اللي انتي مصاحباها دي (ثم امسك حازم من ياقه قميصه)ايه بوزها دي ما تلم نفسك بدل ما المك

ريم:بسم الله الرحمن الرحيم انا كنت سيباكو امبارح كويسين اتحسدتوا ولا ايه

سهي:مال الدنيا اتزحمت كده ليه

حازم:عشان الواد مروان و البت ريم جم

مروان:واد مين يابني ده انا مهندس قد الدنيا (ثم اكمل ناظرا الي سهي)ماتسيبك من الواد ده(مشيرا الي ادم)و تيجي اكلم باباكي و نتخطب بقي و كده

حازم:اوبا يا دومه وحشه في حقك

سهي:لا مش موافقه(ثم قالت بخجل) انا بحب ادم

الجميع:اووووووه

مروان:اعتراف صريح انها بتحبك يا دومه محدش قدك بقي دلوقتي

ادم(بغرور):طبعا و انتا فاكرني اي حد ولا ايه

اسر(وهو يدخل الي الغرفه):لا مش اي حد انتا اخ واطي ازاي تسيبني امبارح في انصاص الليالي كده اروح بمواصلات انتا ايه يا اخي قلبك حجر

انفجر الجميع ضاحكا الي ان قالت سهي :

سهي:اسرررر

اسر:سههييي وحشتيني

سهي:و انت كمان

مروان:اوباااا جرا ايه يا دومه فين الواد اللي كان مقطع السمكه و ديلها من شويه

ادم:استني بس اما افهم انا الاول هو ايه اللي بيحصل

سهي:مافيش بس تمويه تمويه لحد مااخد علبه الشيكولاته

ادم(وهو يمسك علبه الشيكولاته):و كل اللي انا جايبهالك دي مش مكفياكي

حازم:في ايه يا ادم البحر يحب الزياده هات يا اسر يا ابني هات خدي يا حبيبتي

ادم:يا ايه؟؟

سهي:جماعه انا تعبت و عايز اطلع من هنا

ادم:كان بودي يا روحي بس خايف اسيبك مع الناس دي ارجع الاقيهم كلوكي

سهي:لا خليك انتا روحو انتو اتنين اتنين كده يلا مع السلامه

اسر: و انا اروح مع مين

ادم:مع خيالك امشي اطلع بقي

آسر(وهو يغادر الغرفه) ماشي ماشي

خرج اسر و اغلق الباب خلفه لتقول سهي:

سهي:ادم هو انتا لسه مصمم تتجوزني حتي بعد اللي قولتهولك امبارح ده كله؟

ادم:اه طبعا مصمم الا إذا كان انتي لسه رافضه

اخفضت سهي رأسها ليقول لها ادم:

ادم(بخيبه امل):طيب انا كده فهمت بس يا سهي انتي حتي مش مديا لنفسك فرصه انك تثقي فيا يمكن لو وافقتي علي الخطوبه تقدري تثقي فيا و نتجوز بقي

سهي(و قد بدا عليها الاقتناع لكنها لم ترد الموافقه علي الفور):طيب هفكر في الموضوع و اقولك

ادم(بحزن):حتي دي هتفكري فيها طيب فكري براحتك و انا ماشي بقي

سهي(بحزن):ليه؟

ادم:معلش والله بس عندي معاد و انتي كمان لازم ترتاحي

سهي:طيب هتيجي تاني؟

ادم:اكييد اول ما اخلص من المعاد ده هاجي و افضل معاكي لحد ما تزهقي مني

سهي:هيييه ماشي

ادم:يلا باي

سهي(بنبره طفوليه):هتوحشني يا دومتي

ادم(مبتسما):و انتي كمان
•••••••••••••••••••••••••••••••••

مرت الايام حتي جاء ميعاد سفر سهي و العديد من المهندسين الاخرين الي شرم الشيخ استيقظت سهي صباحا لترتدي ملابسها

ثم توجهت الي الشركه لتجد جميع العاملين المتوجهين الي شرم الشيخ يركبون الباصات قامت بركن سيارتها ثم نزلت و قامت بالجلوس علي مقدمه السياره ظلت تبحث عن ادم بعينها لكنها لم تجده اخرجت هاتفها و قامت بالاتصال به لتجد صوتا ياتي من خلفها يقول لها:

ادم(بابتسامه):اكيد بتتصلي بيا

سهي(و هي تلتفت اليه):اه فعلا

ادم:وحشتيني

سهي(محاوله تغيير الموضوع):هو احنا مش هنتأخر كده

ادم:تووهي تووهي ماشي يلا بينا يا ستي

اشار لها الي سيارته فقالت له:

سهي(بابتسامه سخيفه):لا انا هروح بعربيتي

ادم:ايه يا بت السخافه دي يلا قدامي

سهي:هي كلمه قولت هروح بعربيتي يعني هروح بعربيتي

ادم(بملل):اووووف براحتك بقي انا ماشي السواق مستنيني

سهي(بانتصار):مع السلامه
•••••••••••••••••••••••••••••••••
انطلقت الحافله التي تقل المهندسين العاملين بالشركه تتبعها سياره سهي و تليها سياره ادم الذي اصر بشده ان يظل خلفها في حال حدث اي شئ.

كانت سهي شارده في ما آلت اليه حياتها لم تنتبه الي انحراف السياره عن طريقها الا عندما وجدت السياره قد قاربت علي الاصطدام بالرصيف
•••••••••••••••••••••••••••••••••
كان ادم يشعر بالملل في الطريق فلم يكن يحبذ وجود السائق معه الا انه اصطحبه معه تحسبا لاي ظرف طارئ.
كان يعبث في هاتفه الي ان افزعه صوت فرامل قويه نظر امامه ليجد سياره سهي و قد قاربت علي الاصطدام بالرصيف.

نزل ادم من السياره في عصبيه ثم قال بعد ان قام بفتح باب سياره سهي:

ادم(بعصبيه):انا كنت حاسس ان ده هيحصل اتفضلي معايا من غير كلمه واحده

كانت سهي تنظر اليه كانها تراه لاول مره فحدثت نفسها قائله:"اإلي هذه الدرجه تحبني و تخاف علي كيف لم أشعر بهذا من قبل كيف كنت اعذبك بعنادي و غموضي الي هذه الدرجه كيف كنت اقسو عليك الي هذه الدرجه اهه لو تعلم كيف اتالم يا ادم" قطع عليها تفكيرها صوت ادم وهو يقول لها:

ادم(بعصبيه):اتفضلي يلا

توجهت سهي الي سياره ادم وهي صامته فقد كانت بالفعل لا تقوي علي ان تسوق السياره كل هذه المسافه لكن عنادها كان اكبر منها قطع شرودها مره اخري صوت ادم وهو يقول لها:

ادم(بعصبيه):كنتي عايزه تموتي حضرتك

سهي(بصوت خافت):خلاص يا ادم بقي عدت علي خير

ادم(بنفس عصبيته):عدت علي خير المرادي بس الله اعلم المره الجايه ايه اللي هيحصل

سهي(بملل):خلاص بقي يا ادم متزودهاش (ثم بدا و كأنها تذكرت شيئا فقالت): ايه ده العربيه اقف بسرعه عربيتي فين

ادم(بذهول):ايه يا بنتي ما انا قايل للسواق يوديهالك عند البيت قدامك

سهي:بجد مخدتش بالي

ادم(بمرح):كنتي سرحانه فيا طبعا

سهي:سبحان الله بتقلب ‭‭‭360‬‬‬ درجه في ثانيه

ادم(بزعل):يعني هو ولا كده عاجب ولا كده عاجب

سهي(بنعاس):خلاص خلاص سيبني انام بقي

ادم(بمزاح):ايه ده هو انتي بتنامي في اي حته كده عادي

سهي:اي حته ازاي يعني

ادم:يعني تنامي في العربيه او في ميكروباص او عالكنبه عادي يعني

سهي(باستغراب):اه ايه المشكله يعني

ادم:لا مفيش مشكله بس مستغرب

سهي:مستغرب من ايه يا ابني انت متفهمني في ايه
ادم(مرح):اصل انا زيك كده برضو بس ماما كانت علطول تقولي انا مشوفتش بني ادمين كده ف حسيت ان انا قرد مثلا

سهي(بمزاح):لا متخافش انا كمان ماما كانت مستغربه و كانت محسساني اني قرد

ادم(بهمس):و احلي قرد

سهي:ركز في الطريق يا ادم و سيبني انام

ادم(بتافف):و انا هفضل قاعد لوحدي كده

سهي(وهي مغمضه العينين):محدش قالك تمشي السواق

ادم(بغيظ):ماهو كله بسببك

سهي:هو مش فيه سواق تاني في الباص؟

ادم:اه صح ايه ده نسيت خالص يلا هكلموا دلوقتي
•••••••••••••••••••••••••••••••••
و في الباص:
توقف الباص فجأه لينظر الجميع الي بعضهم البعض لتقول احدي المهندسات:

شاهيناز(متسائله):في ايه يا عم عبدو

عم عبدو:البشمهندس ادم عايز الاسطي احمد معاه

فقالت مهندسه اخري:

سلمي(متسائله):ليه هو مش السواق بتاعو معاه

عم عبدو(بعفويه):لا مهو بعته في عربيه البشمهندسه سهي لانها كانت هتعمل حادثه ف البشمهندس ادم خاف و بعت السواق بتاعو يودي عربيه البشمهندسه لبيتها

شاهيناز(بغل):اموت و اعرف البت دي عاملاله ايه

سلمي(بحقد):و هو بيحبها يعني ادم الشاذلي بجلاله قدره يحب واحده موظفه عندو

شاهيناز:ملناش دعوه ياكش يولعو في داهيه
••••••••••••••••••••••••••••••

وجدت سهي صوتا يهمس باسمها فتحت عيناها لتجد نفسها نائمه علي كتف ادم فشعرت بالحرج و احس ادم ذلك و قال لها:
ادم:يلا وصلنا
سهي(بصوت نائم):حاضر نازله اهو
ادم(بشفقه):طب خليكي انتي هنا و انا هروح اجيبلك مفتاح السويت بتاعك و اجي ماشي؟
سهي(بامتنان):هو ينفع؟
ادم(مبتسما):اه ينفع هروح بسرعه مش هتاخر استنيني انتي هنا
سهي:طيب ميرسي اوي يا ادم
ادم(بابتسامه):علي ايه يا هبله
وبعد قرابه النصف ساعه عاد ادم الي سهي التي كانت قد افاقت بالكامل فقال لها:
ادم(باسف):بصي بقي انا ملقتش هنا سويت ليكي لوحدك ف هتنزلي في سويت مع مهندستين تانيين تمام؟
سهي(بغضب):يا ريت يعني يا بشمهندس طول ما احنا في شغل ابقي زيي زي زمايلي بظبت
ادم:ما انتي لو تريحيني و توافقي علي الطلب اياه مش هتبقي زيي اي حد ساعتها
سهي(و هي تخطف المفاتيح من يده):مع السلامه
ادم:سلام
•••••••••••••••••••••••••••••••••
صعدت سهي لغرفتها لتفاجئ و لسوء حظها انها تشارك شاهيناز و سلمي الغرفه ذاتها فكرت في ان تقول لادم ان ينقلها لكنها لم ترد ان تثقل عليه فدخلت وهي تقول:

سهي:مساء الخير

شاهيناز(بمضض):مساء النور

سلمي(بحقد):اهلا

ابدلت سهي ملابسها ثم جلست علي فراشها تعبث باللاب توب الخاص بها الي ان رن هاتفها فردت قائله:

سهي(بحبور):مااااروو

مروان(بمرح):سوووس عامله ايه يا بت وحشتيني اوي

سهي:و انت كمان وحشتني اوي انا تمام الحمدالله انتا عامل ايه

مروان:انا كويس الحمدالله الواد ادم عامل معاكي ايه

سهي(بتنهيده):كويس

مروان(بقلق):لا شكلو مش كويس خالص في ايه يا سهي احكيلي

سهي(بحزن):مش عارفه يا مروان كل ما يعمل موقف و احس انه بيحبني كل ما شعور الذنب بيكبر جوايا حاسه اني كده بظلموا معايا و ان هو يستاهل حد احسن مني بس في نفس الوقت انا كمان بحبه و لو بعد عني ممكن اموت فيها

مروان:لا لما ترجعي بقي بالسلامه نبقي نتكلم

سهي:طيب تمام باي باي

مروان:سلام

سهي(بسرعه):مروان

مروان:هاا عايزه ايه تاني

سهي:لو بابا كلمك ابقي طمنه عليا تمام

مروان:تمام اوكي سلام

سهي:سلام

كانت عينا شاهيناز و سلمي ترصدان هذه المكالمه و بعد ان انتهت سهي قالت شاهيناز ل سلمي:

شاهيناز(بحقد):و مين مروان ده كمان

سلمي(بحقد):ما يمكن خطيبها مسمعتيش لما قالتله ابقي طمن بابا لو اتصل

شاهيناز:لا مش خطيبها مسمعتيش لما قالتله بحبه و خايفه اظلموا معايا

سلمي:طب ما نسألها

شاهيناز:تمام يلا اسئلي

سلمي(لسهي):هو ده.....

سهي(مقاطعه كلامها ثم قالت بابتسامه سخيفه ):لا مش خطيبي انا مش مرتبطه اصلا

نظرت سلمي و شاهيناز الي بعضهم البعض ثم قطعت هذه النظرات بصوت رنين هاتف سهي للمره الثانيه فنظرت سهي اليه ثم توجه الي شرفه الغرفه لتجيب عليه
•••••••••••••••••••••••••••••••••
دخل ادم الي الغرفه الخاصه به وهو يشعر بالارهاق ابدل ملابسه ثم توجه الي سريره فالقي بجسده عليه لكنه مالبث ان اغمض عينيه حتي لاحت امام عينيه صوره سهي امامه فارتسمت ابتسامه سعاده علي شفتيه لكن سرعان ما اختفت فقال محدثا نفسه:"الي متي يا ادم؟الي متي سيتحمل قلبك هذا البعد الذي بينك و بينها متي سيذوب هذا الجليد الذي بينكما نعم اعلم انها تحبني لكنها لا تتخذ اي خطوه في سبيل هذا الحب" اوقف تلك الافكار عندما وجد انها قد تجعل الفجوه التي بينه و بين سهي تكبر فقام من علي سريره ثم توجه الي هاتفه و طلب رقمها و ما ان اجابت حتي قال لها بسرعه:انزلي في الريسبشن كمان عشر دقايق هستناكي تحت
و اغلق المكالمه دون ان يسمع ردا منها سواء بالموافقه او بالرفض
•••••••••••••••••••••••••••••••••
اندهشت سهي من مكالمه ادم كما اندهشت من طريقته الجافه في الكلام فكان عقلها يحثها علي عدم الانصياع لاوامره اما قلبها فقد حثها علي النزول وفي النهايه تغلب فضولها علي الاثنين فقررت ان تنزل و تعامله بنفس معاملته الجافه
•••••••••••••••••••••••••••••••••
نزلت سهي لتعرف ماذا يريد ادم منها
دخلت الرسيبشن لتلمحه من زجاج المطعم جالسا علي احدي الكراسي فتوجهت له و قال لها:
ادم(بنبره تخلو من المشاعر):كنت خايف متلاقينيش
سهي(و هي تجلس ثم قالت بنبره حاده):اوعي تفتكر في يوم انك ممكن تحطني قدام الامر الواقع لان مش انا اللي اتعامل بالطريقه دي
ادم(بسخريه):و انتي نزلتي عشان تقوليلي الكلمتين دول؟
سهي(بغيظ):لا نزلت اشوف سيادتك عايز ايه
ادم(ببرود):سيادتي عايز يتكلم مع جنابك في موضوع مهم
سهي(و قد بدأت تفقد اعصابها):اتفضل

ادم(و هو ينظر لها بعمق):احنا هنفضل كده لحد امتي

سهي(متسائله):كده ازاي؟

ادم:كده ازاي زي ما احنا كده بنحب بعض علي فاضي كده ولا دبله ولا بتاع

سهي:ادم انتا عارف كويس اوي رايي في الموضوع ده (ثم استطردت قائله )و بعدين انت مش مديني فرصه افكر انت طول الوقت معايا لو مكنش في الشركه يبقي علي التيليفون (ثم تنهدت وهي تقول)انا
عارفه انك بتعمل كده عشان نقرب من بعض و انا اقدر اثق فيك لكن انت
كده مش بتخليني افكر كويس لان انت كده بتخليني افكر بقلبي مش
بعقلي

ادم(و قد بدا عليه الحنق فقال لها):ماشي يا سهي انا هبعد عنك تماما الفتره دي عشان تعرفي تفكري و يا ريت لما اجي بعد الفتره دي اطلب منك الطلب اللي كل يوم تقريبا بطلبه منك اتمني انك توافقي

سهي:ان شاء الله (ثم تابعت قائله):انا هطلع بقي
ادم:طيب ماشي مع السلامه