العميل الصهيوني والجاسوسة المغربية

البارت 163

البارت 163 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚

أبراهام : ميستر أرسلان صافي قضينا الغرض
أرسلان : فينها؟
أبراهام : فالمكتب ديالها رتبنا الأمور تما و طبيب كل مرة كايراقب حالتها
أرسلان : راقبها و ماتتحركش من تما .. مشا و خلاه
غاندير لكم تسريع الأحداث فشنو وقع باش نتفادا التكرار ... دازو 6 ايام على داك النهار و فهاد 6 ايام خرج سي أصلان من المستشفى من مور ما جا أرسلان و الاب ديالو و عمامو أما أسوار من مور ديك الضربة لي دار ليه أرسلان جلس 24 ساعة فالكلينيك ... موراها فاش خرج دار عليه سي أصلان المراقبة حيت الكدبة ديال سي إيتان كاع مادخلات ليه للراس ... بيان سيغ مادخلش ليه للراس ماتنساوش بلي حفيدو لي تربا على يدو كايعرف بنادم واش كايكدب واش خايف واش واش واش ... غير من النبرة ديال الصوت و بغيتو داك الشارف مايكونش كايعيق بالكدوب؟ ... من مور هادشي .. تفرغ أرسلان للحرب فقط و بدا بتحركاتو ... مشا لجميع المعسكرات لي فيها القوات الداعمة و قسمهم لأقسام و عطاهم التعليمات ايمتا يتحركو ... بالنسبة للخطوة الأولى لي كان دار أرسلان فديك الليلة كان سيفط القوات الداعمة الأمريكية للمغرب باش يدخلو بحال السياح ... بقا كايسيفط مجموعة بمجموعة حتى بقات مجموعة وحدة ... إيفا بدات كاتتحسن شوية ولكن مابقاتش خرجات من غرفتها ماشي بسباب الحراسة لي فالباب ولكن بسبب حاجة خرا دابا تعرفوها ... من الوقت لي سترجعات فيه وعيها .. رجعو لها ذكريات داك النهار زادت تأكدات بلي مستحيل يكون عندو قلب كيفاش تيرا فيها و كان باغي يصفيها لها؟؟ و دوك التصرفات ديالو اش معناهم؟؟؟ نفضات تفكيرها و بدات كاتنفذ داكشي لي فبالها مابقاش الوقت بزاف و الضربة مشكلة ليها عائق كبير ولكن مع ذلك ماهتاماتش ... من نهار سترجعات وعيها و هي كاتضغط على راسها باش تنوض و من نهار سترجعات وعيها و هي مهدنة مادارت حتى شي محاولة للهرب كايدخلو عندها ابراهام و الطبيب كايلقاوها مجبدة فالباياص اما ارسلان ماطلش عليها نهائيا ... و غير كايخرجو كاترجع دير ترويض لراسها مابقاش بزاف للحرب و اكيد ماغاديش تخلي الإصابة تأثر عليها باش تبقا و فعلا بدات كاتتحرك شوية و بدات كاتسترجع صحتها شوية مع الدوا و مع الحركة بزاف و الأهم من هادشي كامل هو الدافع القوي ديالها واليديها لي كاتظن ماتو على يد المغاربة داكشي لاش حالفا تا تنتاقم و كلشي عارف الغضب كايخليك دير اي حاجة ...

♔ جالسة فغرفتها كاتهز الأثقال عن طريق الأثاث لي فالغرفة و المكتب ... بقات مجموعة وحدة غاتمشي غدا و مستحييل تخليهم يمشيو بلا بيها شوية هبطات طراكسيون حبسات حد 50 و ماقدراتش تكمل كتر ماشي حيت ضعيفة ولكن كاتحاول على الضربة باش ماتتحلش و يتضرب لها كلشي فزيرو .. شوية سمعات الباب بدات كاتتحل ، ماجاو فين يحلوها حتى كانت مخشية فالفراش و رجعات دوك الخيوط ليديها دايرا راسها بحالا راكباها الموت .. مشا لجهتها الطبيب و بدا كايقيس فجبهتها و كايدير فحوصات سطحية
أبراهام : كي بقات؟
الطبيب : حرارتها مزال مانزلات خاصنا نجيبو لها دوا ***** بان ليا هادا مانفعش معاها ... بدات كاتحل عينيها بشوية بشوية زعما عاد فاقت
الطبيب : كي كاتحسي براسك؟؟؟
إيفا : ( الصمت )
أبراهام : 5 ايام و هي فايقة و مزال ماقدرات تهضر؟؟
الطبيب : كاتوقع فبعض الحالات ولكن هادشي ماكايعنيش انها غاتبقا على هاد الحال
أبراهام : و شنو الحل دابا؟
الطبيب : خاصها تاكل مزيان باش تقدر تسترجع عافيتها
أبراهام : راها عافية نيت ... خرجو من تما و خلاوها ... بقات مجبدة و عينيها فالسقف كاتفكر و تبلاني كي غادير دوز مع المجموعة الاخيرة لي بقات اكيد خاصها شي خطة محكمة و هادو لي ماكايتزعزعوش من الباب كي غادير لهم؟؟ ... طاحت فبالها خطة و ناوية طبقها هاد الليلة حيت مايمكنش تتسنا حتى لغدا فصباح ... غمضات عينيها باش ترتاح و تستاعد لهاد الليلة .
أبراهام : و دابا شنو المطلوب؟؟
الطبيب : كانظن كان غايكون حسن كون نقلناها للكلينيك
أبراهام : ياك الغرفة ديالها ولات مجهزة بحالها بحال الكلينيك ايلا كانت ناقصة شي حاجة قولها
الطبيب : فهمني راه المريضة حرارتها ماكاتنزلش و السبب ماعرفناهش زيد على هادشي الجرح مافهمتش كيفاش كل ليلة كانلقاو فيه الدم
أبراهام : اش كاتقصد؟؟؟
الطبيب : شاك يكون عندها شي نزيف و خاصنا نتأكدو من الشكوك باش مانصدقوش فشي حوايج خطيرين يأديو بحياة المريضة
أبراهام : تقدر تجيب الطاقم الطبي ديالك و تحققو هنا نيت ... ميستر أرسلان حذرنا باش ماتخرجش من هنا
الطبيب : واخا .. غدا غانعيط للطاقم الطبي و غانتحققو من شنو عندها ... يتبع