#شيزوفرينيا١٩
الحلقة الاخيره
الجزء الاول
دينا رجعت ضربت تاني وتالت ورابع وبديها بس مغلق....
القلق اتملكها لكن طمنت روحها بي انو احتمال تلفونو قطع شحن وكدا .
ختت تلفونها وطلعت بره لي امها وأمل لقتهم خاتين في فشارهم وبحضرو ليهم في فيلم قديم ابيض واسود .... قعدت معاهم .... وبقت مركزة في الفيلم ونست او اتناست موضوع مصطفى .
❄
بالجهة التانية كريم كان ناااااايم 😴...
امو بقت ملاحظة لي انو بقا ضعيف وفي هالات تحت عيونو ومتجاهله كل دا .... حتى الكلام القالو ليها هزبر عن انو تديه بس اسماء اصحابو م عملتو .... لانها كانت خايفة على ولدها .
كانت في المطبخ بتغسل في عده .... بعد م انتهت نشفت يدينها ومشت على اوضتها .
فتحت دولابها ومرقت شنطة صغيرة كدا خاتا فيها القروش حقتها .....
كانت عايزة تشيل منها عشان تمشي تشتري حاجات الشهر .
حسبتها لقتها ناقصة ٧٠٠ حسبتها تاني عشان تتأكد ....
استغربت القروش دي مشت وين ..... يا ترى شالها واحد من عيالها ?
لكن هي معوداهم ومفهماهم من زمان انو ماف واحد منهم يشيل شي الا يستأذن منها .....
شكوكها كلها اتوجهت ناحية كارييييم 🙄.
دمها دا غلى وهي بتسأل نفسها كريم شال القروش دي عشان يعمل بيها شنوووو ? 🤔
دخلت القروش مكانها ومشت ليهو في اوضتو .... م لقتو في سريرو 🛏.....
سمعت صوت ماسورة الحمام ..... قعدت في سريرو وهي ممحنه وبقت منتظراه.
بعد مسافة كدا جا طالع من الحمام ...
اول م شافتو حاولت تمسك اعصابها : كريم
عاين ليها بلا مبالاة : اها
_انت شلت قروش مني ?
= م حصل
_ انا لقيت قروشي ناقصة ٧٠٠ جنينه
= وبعداك ?
_ اتكلم معاي بي ادب
= تمام
_ يعني القروش دي شالها شيطان ولا كيف ? لو معانا شغالة نقول معليش .... احتمال خشت وشالتهم ..... مع انو بقفل دولابي بالمفتاح وكذلك باب اوضتي ... واخوانك صغار ماف واحد فيهم بشيل قروش وقدر دا كمان .
= يا حجه افصليها عليك الله .... م تجوطيها معانا من الصباح ياخ .
قالت لي بي نهره : يا حجه و افصليها ? انت يا كريم بقيت قليل ادب باين ..... انا م واحدة من اصحابك انا امك اسلوب م محترم زي دا إياك تتكلم بيه معاي مفهوم ..... وقت اصلو المعاملة الحسنه م بتنفع معاك انا بعرف اربيك تاني.
كان بعاين ليها وبضحك بي كل تقالة دم ودمااااااامه وبرود.
مها : وريني هسه البضحك شنو كان م انت م مربي .
_ والرباني منو ? مش انتي😂👏
( انت بالنيني )
مها عاينت ليه بي غيظ وقامت قطعت فيه كف لمن اتخلع
( لو بتكفتي وبتلبعي من زمان دا م كان بقا حال كريم يا أم كريم ).
مها : حسارة تعبي وتربيتي ليك .... بعد دخلت الجامعه فرحت وقلت خلاص ولدي كبر وبقا راجل وكلها كم سنه ويجي يشيل همي .... لكن باين كنت غلطانه ... كل الغلط .
وحاقفلك هنا في اوضتك دي ونشوف قلة الادب دي اخرها شنو .
طلعت خلتو وقفلت عليه الباب بالمفتاح......... اول كرسي لقتو قدامها قعدت فيها وانفاسها قايمه وهي بتقول : لا حول ولا قوة الا بالله .
يارب اهدي لي ولدي ورجعو لي زي م كان وافضل .
سمعت صوت نغمة تلفونها ..... لقتها سوزان .... شالت نفس وردت عشان م تقول ليها صوتك دا مالو ....
اول م فتحت الخط اتخلعت بصوت سوزان البتبكي .
مها بخلعه : مالك يا امي في شنو ? ( بتقول ليها امي عشان ربتها وكدا )
ناخد وقفة هنا : مها اكبر من هزبر بي ٣ او ٤ سنوات .... وسوزان ربتها مع هزبر .... عشان امها كانت عيانه وم بتقدر تخلي بالها منها او تهتم بيها .
سوزان : هزبر مشا خلا البيت يا مها .... اخوك مشا خلاني
_يا امي كدي قولي بسم الله ..... فهميني مالو ومشا وين ?
_ والله م عارفة يا مها ..... م عارفة مشا وين شال شنطتو ومشا خلاني .
_ مشا لي السبب شنو ?
_ السبب م بيتحكي ي بتي .... م بيتحكي 💔.... هزبر لو م جاني راجع انا بموت ي مهاا
_ استهدي بالله كدي انا هسه بجيك .
قفلت الخط ومشت على اوضة كريم .... فتحت ليهو الباب ومشت على الحمام غسلت وشها ولبست ليها عباية ومرقت .... وم انتبهت اصلا لي انو كريم مافيش ف الاوضة .
❄❄❄❄❄❄❄❄❄❄❄❄❄❄
في اللحظات دي رائد وشادية امها وصلو المستشفى لي فداء .
م ما شافتهم حست دموعها دي نازلة منها عشرة عشرة كانت مشتاقة ليهم شدييييييييد .. طولت م شافتهم ....
رائد جا عليها بسرعه : فداء مالك ? انتي كويسة .
مسكتو حضنتو وشغالة تبكي قدرتها .
رائد : يا فداء في شنو ?
جرتو من اضانو بيد ومسحت دموعها باليد التانيه وهي بتقول بصوت منخنخ من الجعير : اشتقت ليك .
شادية : الجابك هنا شنو يا بنتي ?
قالت جملتها دي وهي بتحضنها ...... بي كل حنان .. حست بي امان كدا طولت منو .
فداء : رائد معاه منديل .
طلع ليها المنديل .... مسحت دموعها وفررررر نفت .
رائد وهو بيتلفت : وديناها فضيحه وجبناها فضيحه 😀💔
شادية : احكي يا فداء .... احكي حاصل شنو ?
فداء وهي بتعاين ليهم بي عتاب : انا عارفة كل شي هسه .
رائد : م فهمتك !
فداء : انا كنت فاقدة الذاكره .... بس لي م وريتوني ?
رائد وامو عاينو لي بعض كدا 😳.. ورجعو عاينو ليها كدا😳
رائد : فداء كدي فهمينا الحاصل
_ انا منت مستغربة كيف انكم تخلوني امشي مع راجل غريب م بعرفو بالبساطه دي .... واتاريهو عاقد علي ... طيب لي م قلتو لي انو انتي اتعرضتي لي حادث وخلاك كدا .
شادية : الف شكر وحمد ليك يارب الحمدلله انو ذاكرتك رجعت يا بنتي ..... يوم عملتي الحادث م كنا قايلنك فقدتي الذاكره الا لمن جا راجلك داخل .... وشاكلتيه كأنو غريب .... انا ورائد اتهجمنا وكلمنا الدكتوره الجاتك داخله وبقت بتتكلم معاك وعملت صور مقطعية لي راسك ..... وبعدها اكدت لينا انك فاقدة الذاكرة جزئيا .... وانو م حتاخد كثير عشان ترجع ليك ..... فقدلنك للذاكره كان محصور على اخر زول كنتي بتفكري فيه او شفتيه واي شي متعلق بيهو .... سواء اهلو او حياتو او اي شي تاني .... وللأسف دا كان من نصيب هزبر
( عرفنا الاجابة الاولى ✔.... لي فداء نست هزبر بالذات واي شي متعلق بيه )
رائد : خفنا عليك تتصدمي او تقلقي وتخافي لو عرفتي انك فاقدة الذاكره .... عشان كدا م وريناك انو حصل ليك شنو .... وفضلنا ساكتين لحدي م ترجع ليك براها .
فداء بعد كلامهم دا سكتت واكتفت بي انها تقول ليهم : رجعوني البيت .... وفضلت تخفي عليهم موضوع هزبر .
رائد عمل كل الاجراءات اللازمه لي خروجها ومشو بيها على البيت .
بالجهة التانيه دينا فلمها خلص ...
مشت اوضتها وضربت لي مصطفى لكن الحال في حالو .... التلفون مغلق .... في قلق وخوف مهيبين سيطرو عليها... لدرجة كلمت امها واختها بالحصل .... والاتنين لفحو تيابهم ومشو معاها علي بيت مصطفى ...
لقو باب الشارع مفتوح على مصراعيه ....
دينا لمن دخلت لقت في نسوان ورجال في الحوش .... دينا قلبها وقع ف الواطه وسألت مرة واقفة : في شنو ?
المرة : والله يا بنتي مرت الجيران واقفة في البلكونه شافت مصطفى مشا على عربية وضربوه ف راسو وركبوه بالقوة .
دينا قلبها بقا بضرب بسرعة رهيبة وقبلت وراها لامها واختها العايزين يعرفو ف شنو................. ...................
امل :دينا ف شنو اتكلمي .
قالت ليها بخوف : مصطفى اتخطف .
الام وبنتها ختو يدينهم في صدرهم وهم بقولو بخلعه : سجمي .
امل وهي بتمشي للمرة الاتكلمت معاها دينا : وهسه عملو شنو ?
_والله جدو ومعاه كم راجل كدا مشو يفتحو بلاغ .
_ انتو عرفتو كيف انو اتخطف ?
_مرة الجيران واقفة ف البلكونه حلفت وقسمت قالت ضربو بحاجه ف راسو وكروه جوه العربية .
ام دينا : لا حول ولا قوة الا بالله العلي العظيم.
طلعت حبوبتو من جوه تبكي وتوصف : كر علي يا ولدي كر علي ي مصطفى ... ياربي ساقوك وين وعايزين منك شنو يا مصطفى ... ي الطيب ي اامهذب ... الله يردك سالم يا ولدي ... الله يردك سالم .
انتبهت للعربية الوقفت ووشها اتقلب احمممممممر من الغضب والزعل .... وطلعت الشارع والحريم متابعنها بنظراتهم .
دينا قبلت وراها وشافت المره الجات نازلة من العربية ..... كانت هديل ... ام مصطفى .
حبوبة مصطفى انفصمت فيها وبقت بترررردح ليها ياالفعلتك والتركتك وجايبك هنا شنوو يا ام قلبا حجر.
هديل وهي بتطلع نضارتها : لو سمحتي انا م جيتك انتي ... انا جايا لولدي .
_هه جايا لمنو ? ولدك ? الولادة الماتلمي فيها بركة الله .... ولدك الجادعه والهاملة يا هديل ? ولدك اتخطف .... ولدك خطفوووووووووه ..... جايا بعد شنو انتي?
جايا بعد شنو
ظهرت الصدمه ف وش هديل وهي بتقول : خطفوه ? كيف يعني خطفوه ?
_ لا استني اترجمها ليك بي لغه تانيه عشان تعرفي خطفوه كيف .... اطلعي بره بيتي دا وتاني م تجي هنا .... حسسسسيبي الله ونعم الوكيل فيك.
هديل لبست نظارتها وطوالي رجعت على عربيتها والقلق متملكها .... دينا جرت وراها وهي بتفول : خالتو هديل ... لو سمحتي ....
وقفت وعاينت ليها .
دينا : هايزة رقمك لو سمحتي .
م ردت عليها .... فتحت مطبقتها وشال كرت ادتو ليها وسرعه ركبت العربية .
دينا : الله يستر عليك ويغطيك يا مصطفى .
هديل او م اتحركت بالعربية .... طلعت تلفون صغير وضربت في رقم خاص .... اول م رد عليها بقت بتبكي : خطفو .... خطف ولدي .... عايز يلوي لي يدي .
_ ارجعي البيت عادي زي الماحتصل شي وم تجيبي سيرة الموضوع .... واوعدك ولدك م حيحصل ليه اي شي
_ انا خايفة .
_ ساعة الصفر قربت ماف مكان للخوف فوضي امرك لله واتذكري انو الشر خلاص جا وقتو عشان يقيف
_ ونعم بالله ... طيب .... حاعمل كل القلتو دا .
_ خلاص هانت .
❄❄❄❄❄❄❄❄❄❄❄❄❄❄❄
بي هناااااااااااك مها وصلت البيت ....
ونزلت بي سرعة ..... شهقت بي صدمه لمن شافت الغفير واقع ف الارض ف بركه من الدم ..... صرخت وجرت جو ... بقت بتنادي بهستيرية على امها وعزيزة بس ماف اي رد ...... البيت كان فاااااااضي .
صرخت وقامت جارية على برا وركبت عربيتها بسرعه واتحركت وبقت بتضرب لهزبر بس ماف اي رد .🌐
كانت زي المجنونه م عارفة تعمل شنو .
ساقت لحدي م وصلت البيت وطوالي جرت على اوضة كريم ...... بس كانت الصدمة التانية ...... الشباك مفتوح وكريم مافيش ......
طبعا كريم امو قفلت عليه الباب بي هنا فتح
الشباك وهرب بي هنا .... وياريتو لو م هرب .....
مشى لي مؤيد لقاهو مستنيه ......
قعدو سطلو بقاه طيييينه .... وشوية كدا ملاذ الماااابتغباه حبيبتو جات قعدت ....
اظن ف اللحظات ديك م منتبه ليها زاتو .... مسكتو شنطه وطلعت وشوية كدا لحقها مؤيد .....
وفلان دا يشرب سااااي م جايب للدنيا خبر .... زشايف انو ممكن يكسر حيطه بصباعو الصغير ..... بس فجأة الشرطة جات طابه .
طوالي مسكوه ذلوه ومرمطوه مرمطة السواد قبل م يسوقوه معاهم .... وبي هناك امو خايفة من الجهتين وشغالة تفتش عليه بهستيرية ..... لفت الشوارع كلها على فد رجل زي المجنونه.... وم كانت راكبه في عربيتها .... بعد مرور قرابة ال٣ ساعات تلفونها ضرب ......
وبلغوها انو ولدها في القسم بتهمة حيازة الممنوعات .
ولااااا هظرت بي طولها جات واقعه ف الواطه .... والشارع كلو اتلمى فيها وهوب جرو بيها المستشفى .
#نهاية الجزء الاول
قلت اعملها جزئين عشان تتم ٢٠ حلقة 😪
