#شيزوفرينيا٦
الحلقة السادسة :
دينا اول م دخلت جوه لقت امل اختها .
امل : ان شاء الله خير ياختي مالك الابتسامه من الاضان للاضان
دينا : ياخ م تركزي 😑... التركيز الكثير والطويل دا خليهو ابوس يدك
_ تركيز شنو يا بنت 😂.... ياختي واضحة متكشمة زي القردة
_ اححححححي انا يا امل 😑💔
_ خلاص خلاص خليتك .... اسمعيني
_ اها ان شاء الله خير
_ عايزة لي خيار 😢
_ يا الهي وانت جاهي 🙂.
_ عليك الله 😢
_ ياخ انا راجلك ؟؟؟؟؟ والداك وناسياك ؟؟؟؟؟ معقولة بس السنه كلها انا بجيب في الخيار وانتي تقرشي 😑💔
_ عليك الله يا دينا والله نفسي فيه 😢
_ ياختي النفس دي امارة بالسوء .... م اي شي تشتهيه .... تطلعي زيتنا احنا بيه 🙂..... م كدا اقسم بالله .
_ خلاص انا عايزة خيار 😔💔
_ امري لله جيبي قروشك
ظهرت علامات السعادة في وش امل خيار 🙂.... وفي النهاية دينا مشت توشك توشك توشك ذهابا وايابا في رحلة احضار الخيار للسيدة امل 🙂.
لمن وصلت البيت وسلمت الخيار لأمل طوالي جرت على الصالون .... رتبتو كويس وجابت الشيت والدفتر الحتشرح فيه وفتحت المكيف وغيرت عبابتها بعباية نضيفة وكلمت امها .... وبقت قاعدة منتظرة سي كريم .
.
اما كريم بهناك ضرب ليهو صحبو راس البلاوي الاسمو مؤيد : يا كييييمو
_ ازيك يا مؤيد .... كيفك بلاي
_ بخير الحمدلله
_ كيف من امبارح ؟
_ والله يامان ياخ حسبت امي قربت تكشفني
_ ياخ عشان انت بس مبتدأ لكن لمن تبقى حريف ماف زول تاني بجيب خبرك .... اعم شي بس الراس دا يظبط
_ هي ظبطه عادية لكن 😂.... ياخ انا طرت عدييييل
_ 😂😂😂😂😂😂😂😂😂 راسك خفيف يا معلم .... خفيف شديد .... انا لو دخلت بيك على التقيل بتمشي دينا تااااااااانيه خالص .
_ والتقيل دا شنو ان شاء الله ؟
_ بوريك كدي تعال لي ....
_ شنو با صحبي حتى يوم الجمعه ؟
_ ياخ دا م فيهو فرق .... الايام كلها وااااحد اهم شي تكون متكيف ..... اهم شي شنووووو ؟
_ اكون متكيف 😂
_ يلا تعال لي
_ تعال لي انت ونعمل اننا ماشين صلاة ااجمعه
_ لي ياه م تجيني انت .
_ ياخ امي بتشغلها لي والله تعال انت ونطلع سوا عشان لو اتأخرت م تنق لي .
_ خلاص تمام نص ساعه وبكون معاك
كريم مشا استحما ولبس جلابيتو وبقا منتظر مؤيد .... بعد مسافه مؤيد جاهو .
كريم نادا امو تسلم عليهو : امي ..... دا مؤيد صحبي ... معاي ف الكلية .... حامشي اصلي معاه الجمعه واحتمال نمشي نقرا سوا .
مها م ارتاحت لي مؤيد خالص وحست بي ريبة ناحيتو .... والامهات عموما احاسيسهم دي م بتقع واطه .
سلمت عليهو كويس ووقفت في الشارع وهي بتعاين لي ولدها .... قالت ليهم بصوت عالي : خلو بالكم من نفسكم .
رفعو ليها يدينهم وهم بقولو ان شاء الله ...... طبعا مؤيد ساق كريم بيت صحبو .... وهناك بقو بيشربو في سجايرهم وم جايبين للدنيا خبر .....
بهناك دينا تدخل وتطلع .... تدخل وتطلع .... وتتاوق ومستنية لحد م خلاص زهجت ... قال ليها ساعه ومرة ٣ ساعات.
لمن خلاااااص ضاقت من الانتظار ضربت ليهو .... مرة مرتين ما رد .
زعلت منو شديد .... وقامت من السفره .
امها : اها وينو لسا م جا ؟
_ لا م جا
_ بكون انشغل ولاعندو شي .... انت اقري قرايتك ولو لقيتيه تاني وقال ليك اشرحي لي اشرحي ليه .
_ كويس .
دخلت الاوضة وطلعت العباية وقعدت وهي صاره وشها .... من اسوأ المشاعر .... شعور انك تنتظر ليك زول ويغيب منك 💔.
شالت تلفونها وضربت لي رهام :
_ الو
_ اها ياختي يومك كيف
_ زفت 😑
_ لي كدا 😂
_ اتخيلي بعد م جهزت اي شي ما جا 💔
_ اجججججي كيفن يعني
_ كدا عدييييل ما جا
_ يلا يا كريم حركتك واطه
_ وضربت ليه م برد
_ اسمعيني ياختي كدا م ينفع ركبي ليهو وش الككو
_ كيف يعني ؟
_ يعني بكره او م تشوفيه قولي ليه .... مفروض تحترم المواعيد وانا انتظرتك وضيعت وقتي وانت م جيت .... على الاقل كان تضرب لي تلفون وتقول لي انا ما جاي .... لا وكمان بضرب ليك م بترد كانو انا جاريه وراك .... مش انت عايزني اشرح ليك ولا كيف 😒
_ كدي عيدي الكلام دا تاني خليني احفظو 😭
_ اكتبي في ورقة عديل يا ماما 😎
_ انتي متأكدة اقول ليهو كدا ؟
_ اي يعني حتمشبها ليهو كدا ساي ؟ زول م عندو كلمة يكلكلو مجنون .
_ حرام عليك يا رهام بكون خاصل عليهو شي
_ يا بت تحرم عيشتك هو لو عايز يتصل ويعتذر كان عمل كدا .... لكن م خاتي ليك لا قيمه لا اعتبار
_ قيمة ولا كشري ههههههههه
_ دينا .... انصحك م تكرريها تاني 🙂
_ عايزة الطف الجو 😭
_ لا م تلطفيه شكر .... اه وبالمناسبة لقيت لينا زول يشرح لينا فيزياء
_ اه كويس .... لقيتي وين
_ سينيرنا ... شكلو كدا زول حفاااار المعم كلمتو وقال لي في الوقت الانتو عايزنو بجي اشرح ليكم .
_ كويس .
_ خلاص يلا مع السلامه نتلاقى بكره .
_ الله يسلمك .
_____________________________________
في مكان تاني :
كان في كمية من الاطفال الصغار بلعبو في الشارع قدام بيت كبير .... على بعد امتار وقفت عربية ..... نزل منها راجل لابس نضارات شمسية كبيرة وماف اي تعابير في وشو .... كان متابع بي نظراتو طفل صغير يكون عمرو زي ٥ سنوات ....
نزل من العربية علبة فيها كب كيك بي اشكال مميزة ... وبي حذر وراها للاطفال .... في اللحظات دي نسو نصائح امهاتهم بي عدم التعامل مع الغرباء وبقو بس عايزين يتحصلو على الكب كيك المميز دا ... اداهم كلهم م عدا الصغير العمرو ٥ سنوات .
قال بصوت طفولي بريئ متسائل : وانا يا عمو ؟
_ اه يا حلو .... الكب كيك خلص
ظهر الزعل في وشو وبقا بعاين لي اصحابو وهم بياكلو فيه ☹
الراجل : خلاص م تزعل .... تعال اديك واحد من الفي العربية ..... مد ليهو يدو .... بي كل ثقة مسك يدو ومشا معاه .... واول م حصلو جمب العربية شالو وركب بيهو والعربية اتحركت .
صوت احتكاك اطارات العربية مع الظلط كان عالي ... طلع شاب من البيت عشان يشوف الحاصل شنو .... لاحظ للاطفال كلهم شايلين الكب كيك وبياكلو .
سألهم باستغراب : دا شنو البتاكلو فيه دا ؟ وجبتو من وين ؟
واحد من الاطفال : جا عمو ادانا ليه.
الشاب وهو بيتلفت : وين .... وين حسان ؟
_ الطفل : حسان مشا مع عمو يديه واحدة لكن ركب معاه في العربية ومشا
الشاب بي صدمه : شنو ؟ عربية كيف ومشو بي وين
_ مشو فب الشارع دا طوالي .
الولد ختا يدينو في راسو وقام جاري في الشارع على اساس يشوف اي عربية لكن الشارع كان فاضي ..... جرا بسرعه جوا وكلم اهل البيت .... وشوية كدا الحلة كلها بقت مقلوبة رأس على عقب ..... الجيران وام الطفل واعمامو وخيلانو والشرطه وجووووووطه .... طبعا الطفل الاتخطف دا حسان ولد الظابط القتلوه .
امو هبطت وجرو بيها المستشفى ..... والشرطه بقت بتحقق مع الاطفال وطلبو منهم يوصفو ليهم شكل الراجل الجا .
والعربية ... واذا لاحظو للارقام بي ورا .
هزبر كان بيتهم ومعاه يوسف لمن ضربو ليه وكلموه ..
يوسف : في شنو يا هزبر
_ حسان اتخطف
_ شنو ؟؟؟؟؟
_ زي م سمعت
_ لا حول ولا قوة الا بالله .... والحيحصل شنو هسه
_ باختصار كدا هو ضمن خطه
_ كيف يعني
_ يعني وسيلة للوي الدراع
_ اها ؟
_ انا متأكد حيكون اتخطف لي سبب وفي وقت قريب حنعرف ..... والفي بالي لو خصل حتتأكد لي شكوك كثيره
_ غايتو م عارفك بتفكر في شنو لكن ربنا يستر .
تاني تلفونو ضرب .... رد بهدوء .... جاهو صوتها والعبره الخانقاهو وواضح الضعف فبهو .
_ هزبر .... رجعو لي ولدي يا هزبر .... ولدي م لبه دخل او ذنب في اي شي يا هزبر ..... انا صبرت على موت ابوه .... لكن والله م بصبر على فراقو هو دقيقة واحده ..... دا الشي الوحيييييد المصبرني على الدنيا دي ..... رجعو لي ولدي يا هزبر ...... انا بموت والله العظيم بموت .... عايزة اسمع صوتو ..... واضمو علي ..... حسان م بيستحمل يبعد مني م عارفة هسه حااتو كيف ..... ولدي لو حصل لي شي م بسامح نفسي وبموت والله العظيم 💔💔💔💔💔💔💔
هزبر وهو بيحاول يطمنها : ام حسان .... استهدي بالله .... م تخافي ولدك بإذن الله م حيحصل لبهو اي شي ..... واوعدك وعد رجال ..... حيرجع ليك سالم غانم .... وم حخلي زول يلمس شعره واحدة منو .... دا وعد .... حسان زي ولدي برضو .... وبإذن الله حيرجع ليك .
_ الله يخليك يا هزبر ..... انا واثقة فيك ..... برد لي النار الفي حشاي دي ورجع لي الولد .
_ ان شاء الله .... ان شاء الله حيرجع .
قفل الخط وبقا بعاين ليوسف .... وبعدها طلعو الاتنين .
_______________________________________
في بيت فداء :
علا صوتها وهي بتقول : شننننننو ؟ انا هامله ولا هامله .... عايزين تفكوني مع راجل لا بعرفو لا بعرفني يا امي ؟
الناس تقول علينا شنو ؟ بتبيعوني كدا للأغراب .
رائد : يا ولد ..... اقصد يا بت الناس انتي عبيطه ؟ الليلة هو لو خاجة بتأذيك وبتجيب ليك الكلام احنا كنا وديناك ليها بنفسنا
_ شنو ؟ بياتو منطق وبياتو مبرر دا ... كيف زول م بعرفو تودوني اسكن معاه .... وقال شنو قال عشان تحموني .
شادية : يا بنتي اسمعي الكلام احنا عايزين مطلصحتك
_ لا لا لا لا انتو اظن لي جنيتو .... جنيتو عديييييييل كدا .
ظهرت دموع في عيونها وصوتها اتبح : انا زول م بعرفو ولا شفتو قبل كدا ولا عارفة اصلو ولا طبعو تقولو لي امشي اسكني معاهو ؟؟؟؟ حتى ابوي احتمي بيه يقول لي نفس الكلام ؟ حرام عليكم انا عملت شنو عشان تسو فيني كدا ؟؟؟؟؟ رائد .... عرضك ساهلك كدا يا رائد حتخلي اي زول يتكلم في اختك ويقول البنت السايبة الهامله اهلها رموها عند الراجل ؟
اتفاجأت برائد وهو بيمسك وشها ببن يدينو وبعاين ليها في عيونها : فداء ... انا م قادر اشرح ليك لانو انتي م حتفهميني وم حتصدقيني .... لكن والله العظيم بيت هزبر دا اكثر مكان امن ليك ..... المكان الوحيد الحنضمن فيه انك بي سلام وماف اي شي حيمسك يا اختي .... ولو م كنتي مهمة عندنا م كان قلنا ليك امشي .... عليك الله من دون كلام كثير ومن دون التفكير حق احنا هاملنك وم شغالين بيك وتفكير الناس ..... دا كلو خليه .... وخليك واثقة انو دا احسن شي سويناه .
سكتت مسافة وهي بتعاين ليه .... قبل م تمسح عيونها وتقول : خلوني افكر اول شي .
رائد بي ضحكة : جايين يخطبوك اصلو 😂
_ اخرس يا حيوان 😂
شادية : الله يحفظكم يا اولادي ان شاء الله وم يوريني فيكم شر في يوم .
علا صوتهم : اااامممميييييننننن
______________________________________
هزبر كان قاعد ومراقب تلفونو ومترقب اي مكالمه ... اول م بدا يرن فتح .
الو
جاهو صوت خشن مبحوح : انا الخطفت حسان
هزبر : عارفك .
_ طيب يا ذكي لو عايزين الولد يرجع سالم من دون ولا خدش تطلعو لينا هيثم .
_ اها ؟
_ سلم تسلم .... تسلمو هيثم نسلمكم الولد
_ كويس اتفقنا العاوزنو حينفذ بس نتقابل وين ؟
_ جمب محطة السكه حديد .
_ ممتاز .... ممتاز جدا جدا .... الوقت ؟
_ الساعه ٧ مساء
_ تمام
_ لو حاولتو انكم تتذاكو كدا او كدا الولد رصاصه واحدة بتلحقو ابوه .
_ طيب
الطرف التاني فصل الخط .
يوسف جا من برا وهو شايل قزازة موية ....
هزبر : المتوقعو حصل
_ اللي هو ؟
_ انهم يتصلو بي
_ اتصلو بيك في رقمك دا ؟
_ اي ؟ ..... بتفكر في البفكر فيه ؟
_ اللي هو ؟
_ من وين جابو رقمي ؟ .... واشمعنا انا بالذات الاتصلو بي ؟
_ حاجة غريبة صراحة
_ مممممممممم ..... بس مصير اي لغز يتحل ويتكشف مهما طال .
_ فعلا
يوسف كان بفكر انو لحدي هسه الموضوع دا م لقو ليه حل .... اللغز كل شوية بيتشربك زيادة .... مقتل عبد الرحمن ..... عصابة .... خطف حسان ..... ودا كلو هزبر حيتوصل لي حلو كيف .... مع انو كان واثق جدا من قدرات صحبو .... الا انو كان حاسي انو الموضوع دا بالذات حياخد فيه وقت طويل
اما هزبر بهناك فدماغو كان شغال بنشاط شديد وشغال وبقا بربط في الاحداث مع بعض .... وبدا يحس انو قرب يوصل للهو عايزو .
#نهاية الحلقة السادسة
اعتذر لاني م طولت الحلقة دي زي م الناس كانت عايزة لظروف خارجة عن الارادة .
من حلقة بكره ان شاء الله حندخل في الاكشن
