#شيزوفرينيا١٢
الحلقة الثانية عشر
عزيزة اتحركت بي سرعة بعد م سوزان قالت ليها بي نهره :
انتي حتقيفي تعابني لي كثير ؟ تعالي شيلي الاكياس دي 😒.
عزيزة شالت الاكياس ودخلت
فداء وقفت تعاين لي سوزان ..... الجات عليها .
فداء : حمدلله على سلامتو .
سوزان طلعت نضاراها .... وهزت ليها راسها من دون م ترد عليها .... ومسكت يد هزبر .
_ محتاج مساعده ؟
رخا يدو من العصاية شوية وهو بقول ليها : لا لا بقدر امشي براي .
اتحركت معاهو واتجاوزو فداء الواقفه .
طبعا فداء عدم رد سوزان عليها اكل معاها جمبه .
قبلت وراها وعاينت ليهم وهم ماشين براحه براحه ... عشان رجل هزبر المعوقة .
طلعت لسانها لي سوزان بي كل السخط الموجود في الدنيا .
وبعدها مشت بي سرعه وفاتتهم ودخات .
سوزان عاينت ليها بي غيظ وبعدها عاينت لي هزبر : البنت دي م محترمه
هزبر : لي ؟
_ شوف اتجاوزتنا كيف من دون اي احترام
_ يا امي .... يعني لازم تمشي بي ورانا لحد م ندخل ؟
_ طبعا انت م بتشوف ليها شي غلط او عيب
_ لكن هي م عملت شي غلط هسه .... الحق يقال .
_ خلاص امشي 😑
مشت معاهو لحدي م دخلتو اوضتو .
هزبر قعد في سريرو بتعب .... اتنهد وهو بقول لي امو : انا حامشي اعزي .... ف .... ف يوسف
سوزان قعدت جمبو في السرير : انت مجنون ؟؟؟؟ يا ولدي انت جرحك لي هسه م برا ... ودا كلو خطر ليك انت ..... عليك الله ارتاح ع الاقل .... حتجيك مضاعفات وانت الخسران .
_ يا امي ... الله يرضى عليك م تضغطي علي .... م تخافي علي انا م بيحصل لي اي شي .... لازم امشي .
_ طيب .... طيب يا هزبر 😑.... اصلا انت بتعمل الفي راسك وبس .... جهز نفسك وانا بوصلك .
_ يا ست الكل .... خليكي ف البيت انا حيجيني واحد زميلي وحيوصلني .
_ كويس اللي تشوفو .
طلعت من الاوضة .... وخلتو براه .
مشا بيدو على مكان كتفو المعوق .
حسا بي الم اتجاوزو وقام على الحمام ..... كان كل شي صعب يعملو بي بساطه .... بس تقريبا كدا هو بقا متعود على كدا .
جهز نفسو وطلع من الاوضة ونزل تحت .... شوية كدا جات عربية وقفت .... ومشا ركب فيها .
اول م قفل الباب والعربية اتحركت .... زميلو بادر بالكلام :
_ حمدلله على سلامتك يا هزبر
_ الله يسلمك
_ كل تعزياتي ليك في يوسف
_ الحمدلله
_ قالو حتقيف من الشغل بي سبب اصابتك ..... وفي ضابط تاني حيستلم الموضوع دا .
ظهر عدم الرضا في وشو : الكلام دا م جاني كأمر رسمي .
_ والله دا السمعت بيهو .... لعدين فعلا يا هزبر اصابتك حتأثر فيك .... يعني م حتقدر تتحرك بي سرعة او تجري او كدا
_ م اول مره ..... ومصيري اتعافى منها .... وانا رافض انو اي واحد غيري يكون في مكاني .
_ اعصابك يا هزبر .... في النهاية م مهم القام بالشغل منو .... المهم انو الجماعه ديل يتم اكتشافهم والتخلص منهم وفي اسرع وقت .
_ صدقني .... ماف اي زول حيقدر ليهم ..... م غرور مني .... لكن دا شي انا متأكد منو .
_ شنو الخاليك واثق للدرجة دي ؟
_ لانو انا هزبر .... ودا مجال شغلي .... وخبرتي طويلة فيه .... وم اول مره امر بي شي زي دا .
_ لكن يا هزبر وريني وانت متصاب كيف حتقدر ليهم
هزبر وهو بأشر على راسو : لو جسمي متصاب دا ( قاصد مخو ) شغال .
ابتسم وهو بيقول : ربنا يشفيك ان شاء الله .... وترجع لي الشغل دا تاني .... حتى لو وقفوك انا واثق انو ماف زول غيرك حيقدر ليه .... وانت بتثثبت لي كدا كل شوية .
بي هناك فداء كانت قاعدة مع عزيزة :
وبتتشمشر ....
_ انتي يا عزيزة هو مش معوق .... الخلاه يطلع هسه شنو ؟
_ ماشي يعزي في يوسف
_ ممممممممممم 🤔 وهو يوسف دا كان شغال معاهو
_ يا بنتي م كلمتك قلت ليك صحبو من صغير
_ وهم شغالين شنو يعني ؟
_ في الجيش
_ ايواااا
_ وقتلو صحبو وخلوه هو ؟
_ ربنا كتب لي يمرق .... غايتو مسكين دا صحبو التاني يموت
_ اججججي 😳.... يعني عندو صاحب تاني مات ؟.
_ اي يا بنتي ...
_ وديل بموتو كيف 🤔
_ اجي يا بنتي ؟ موت الله دا
_ ممممممممم 😥.... لكن يعني م غريبة يقتلو ديلاك ويخلو هو ؟
_ هش هش اسكتي سوزان م تسمعك .... م تدخليني في كفوه ساي .
_ خلاص سكت سكت 🙊
_ بعدين بالمساء جايه صحبة سوزان وبنتها
_ القلتي لي خاطبنو ليها 🙊
_ خاطبنها هيييي ليهو
_ ايوا
_ لكن هو م عايزه
_ لي يعني ؟
ابتسمت وهي بتهز راسها : لانو راجل وود رجال يا بنتي ... وفي قلبو واحده .
قطع كلامهم صوت سوزان .
_ عزيزة ..... انتي قاعده هنا وبتتونسي ؟ وعارفة انو في ضيوف جايين ؟ .... امشي جهزي الغرفتين بي سرعه وفرشيهم بي احسن فرش .
عزيزة : كويس
وطلعت بي سرعه وخلت فداء براها .
سوزان ظهرت ابتسامه غريبة في وشها خلت الخوف يسيطر على فداء .
قالت ليها بصوت بارد : فداء ... كيفك ؟
_ الحمدلله .... الحمدلله بخير .
_ الليلة جايين ضيوف مهمين شديد لازم تشوفيهم وتستقبليهم معاي .
_ ان شاء الله
وقفت مسافه والابتسامه م فارقت وشها .
( اتخيل معاي زول مبتسم بي طريقة غريبة وواقف بعاين ليك من دون م حتى يرمش 🙂💔)
فداء بلعت ريقهاوظهر التوتر على ملامح وشها .... وهي بتعاين لي سوزان ... العاينت لبها من فوق لي تحت بي طريقة مستفزة جدا في النهاية ومشت .
هنا يادوب فداء قدرت تشيل انفاسها وهي بتخت يدها ف قلبها البيضرب بي سرعه رهيبه .
وطلعت بي سرعه على اوضتها .... وقفلت الباب بي وراها بي المفتاح .
م عرفت مرا كم من الوقت وبعدها سمعت صوت عصاية بتدق ع الارضية وبعدها صوت باب اتفتح واتقفل .
كانت الاجواء مغربية ... خلاص الشمس غابت والواطه بدت تضلم .
طلعت طوالي برا ..... وقفت لمن سمعت صوت حاجة عالية وقعت من الاوضة القريبة منها .... السمعت صوتها اتفتح واتقفل بعد شوية .
في شي جواها .... شقاوة منها او فضول او خوف خلاها تمشي تدق الباب .
بس م جاها رد .
اتنحنحت قبل م تقول : هزبر ؟
بس م جاها رد .
هزت راسها ومشت وهي لسا بتعاين ف باب الاوضة .
وبتتسائل دا شنو الوقع دا .
وهي نازلة قابلتها عزيزة .
عزيزة بي طرف خشمها :الضيوف وصلو
فداء بي ضحكه : ومالك زعلانه كدا ؟
_ حتعرفي براك لي انا زعلانه 😑 لي
#يتبع
