شيزوفرينيا

5

#شيزوفرينيا٥
الحلقة الخامسه :
كانت بتمشي وتجي والغضب واضح في وشها ... والراجلين واقفين بهدوء جمبها وبعاينو ليها ... كانت في عيونها في لمعه مرعبة .... مخيفة ... بتدل على اصرار وشر م طبيعيين قالت بصوت منفعل : الولد القدر يهرب وينو ؟
_ سفرناه
_ لي ؟
_ عشان م يقبضوه
_ دا منو الغبببببببي الادا اوامر بي كدا دا ؟
_ من دون اساءة ... دا انا
_ من دون شنو ؟ من دون اساءة ..... انا ماف مرة بتعلي صوتها علي .
وقفت تعابن ليه لي مسافه وماف اي تعابير تدل على اي شي في وشها ...... فحأة ابتسمت ابتسامه جانبية محيره .... دنقرت راسها شوية ومشت عليه بهدوء : عيدها
_ ماف مرة بت.....
م كمل جملتو .... واكتفى بصرخة متألمة بعد م ركلتو بقسوة في مكان حساس من جسمو .... قعد في الارض على ركبو .... بطرف جزمتها الجلدية السوداء القوية ركلتو تاني في فكو .... وقع على ضهرو وانفو وخشمو بينزفو .... مشت على جهت راسو وطلعت مسدسها .... صوبتو على جبهتو وهي بتعاين ليه بي ثبات : انا البيتحداني وبيحاول يمشي كلامو علي بيخسر .... بيخسر من كل النواحي .... اننننننا ما بحب التحدي ..... نهائي ماف زول يتحداني لمن اقول شي زيك زي اي كلب تنفذ وبس .... اياك ثم اياك تجادلني مفهوم ؟
صرخت بصوت على : ممممفففففهههههوووووممممم؟
طلع صوتو بي انين متألم ...  بمعني اي .
ختا يدو في راسو من صوت الطلقة العالي الضربتها في الارض جمبو كتهديد واضح وصريح ليهو : قول لي مفهوم (قول مفهوم ابوس ايدك 😭)
قال ليها بصوت متقطع ومرتجف وخايف : مفهوم .... مفهوم
قبلت على زميلو الكان واقف بعاين بي صدمه ... رجع خطوتين لي ورا لمن جات عليهو : اها انت عندك راي ؟
_ لا ... لا .... م عندي اي راي
_ لازم نوصل للظابط القدر يضبط الشحنه دي .... لازم نصفيه .... لازم .
_ تأمري (احححححي انا 🌚💔تأمري ولا هرشووووك)
_حكت بي مسدسها طرف حنكها وهي  بتقول : هيثم عندو معلومات كتيره شديد عننا يعني لو زنقوه حيعترف علينا لانو بغل وجبان .... فلازم نقدر نرجعو
_ لكن كيف ؟
_ دي خليها علي انا .... حعرف كيف اخليهم يسلموه لينا تاني  وبأسرع وقت .

_____________________________________
في اللحظات دي هزبر كان قاعد مع هيثم .... وقال ليه معلومات كثيرة شديد.... هزبر كان بسجل في كلامو وم ابدا اي ردة فعل وهو بحكي لبه .... كان مسترخي في الكرسي حقو وبي طرف صوابعو بيمشي في دقنو .
طبعا هيثم انداح عشان وراهو انو حيحميه من الناحيتين وماف اي زول حيقدر يتعرض ليهو .
بعد م خلص منو طلع ولاقى يوسف .
يوسف : اها ؟
_ خطتي ماشا بالضبط زي م رسمتها
_ حتوصلك لي شنو في النهاية
_ زعيمهم .... والقتل عبدالرحمن ..... باختصار تصفية حسابات
_ ان شاء الله .... اسمعني انا نعست شديد وصلني معاك البيت .
_ جدا .... ارح
طلعو الاتنين والساعه كانت ٢ ونص ...
الشوارع كانت فاضية وهادئة والهواء باااارد ... كانو فاتحين القزاز ويوسف شغال يتكلم ويضحك في هزبر : تتذكر يا هزبر اول ايام في المعسكر 😂😂😂😂😂زمان .... لمن كبو فيك موية باردة وخلوك تقيف في الهواء ساعتين عشان كنت مدروخ ونعسان
_ يعني هسه دا الشي الوحيد القدرت تتذكرو 😂
_ الحاجات كثيره ياخ 😂😂😂😂
_ اها انا اذكرك برضو لمن دقوك وواحد عضاك في كتفك وكنت حالف لو لميت فيهو م تخليه
يوسف ختا يدو في كتفو ونبرة صوتو اتغيرت : احححححي انا ذكرتني .... والله العظيم م عافي ليهو العضاني دا ولسا على حليفتي كان لميت فيهو الا يشوف شعاع بي كلو
_ كدي استهدى بالله 😂.... الموضوع دا ليهو سنيييييين .
_ ياخ انا م بقدر انسى زول اذاني
_ جمل انت ؟
_ والله اكعب من الجمل زاتو يعضبني انا ؟ اه ؟ سألتو انا عشان بعضيني ؟
هزبر وهو بضحك : لو عارفك حتعلق لي في الموضوع دا كدا م كان ذكرتك .
_ غايتو
سكتو الاتنين لمسافه قبل م يوسف يقول : كيف فداء ؟
_ كويسة الحمدلله قبيل ضربت لي اخوها وسألتو منها .
_ في شي تاني حصل ؟
_ لا تاني م حصل ليها شي .... لكن هي برضو تعتبر لغز .... الهاجمتها دي منو وعايزة شنو ولي قالت ليها انتي بتلعبي مع منو وبعدين اختفاء البنت الشغاله دا برضو شي غريب ..
_ بما انها صحفية احتمال تكون خبشت ليها ناس كدا او كدا وعايزين ينتقمو منها او يصفوها .
_ بس م اعتقد كانت بتكتب مواضيع تهبش فيها ناس خطرين كدا .
_ غايتو الله اعلم .... لكن الحقيقة مصيرها تظهر
_ ان شاء الله .
هزبر في النهاية وصل يوسف ومشا على بيته .... كانت انوار البيت جوه مطفية ومولعه لمبات خارجية بس .... طبعا البيت موحش شديد لكن بالنسبة ليهو عادي .... اول م دخل حرك مفاتيحو الاصدرت اصوات عاليه للكلاب البتنبح .... ومن م سمعت الصوت طوالي هدت .
ريحة عبير اشجار الليمون خلتو يشوف طيف ابوه ..... الذكريات حاصرتو من كل النواحي .... بين الاشجار دي قضا اجمل واعذب ايام طفولتو مع اب اقل م يقال عنو رائع .... كان الولد الوحيد لامو وابوه عشان كدا كانو مهتمين بيه شديد .... ابوه كان مخطط ليهو من نعومة اظافرو انو لمن يكبر يطلع كدا .
اتلقى عناية وتربية بطريقة جميلة .... من مرحلة مبكره ابوه بدا يعلمو السباحة لحدي م اتقنها ....  كان عايزو يكون مثقف عشان كدا حببو في الكتب ... بداها لينو بكتب القصص الملونه الصغيره واتدرج بيهو لحدي م خلاهو يقرا كتب كبيرة لكتاب عالميين قبل م يكمل حتى التمنتاشر سنه ... كان قارئ نهم جدا .... ساعدو عشان يتعلم اللغة الانجليزية والاسبانيه والفرنسية والايطالية والصينيه من بدري .... ابوه م كان بيقول انو هو طفل صغير وبدري عليه .... كان شايف انو افضل مرحله يتعلم فيها كل شي هي الطفولة .... وم كان تعليم بي اجبار .... ..... لا كان بيحفزو وبيحببو في الحاجه .... لمن عمرو بقا ٥ سنوات بدا يعلمو فنون التايكوندو ولمن اجادها بدا يعلمو في الكونغ فو ......... في عمر الاتناشر سنه .... هزبر توج من حفظة القرآن الكريم..... وكذلك علمو الفروسية وركوب الخير من عمر مبكر .... كان بيهتم بيه اكثر من امو .... م كان ابو وبس .... كان ابوه وصحبو واخوه ..... رباه على الوطنيه وحب الوطن .... ومن ما امتحن الشهادة السودانيه واتخرج دخل الكلية الحربية كان من اميز الطلاب  الفيها .... وبعد م اتخرج بي كم سنه انضم للمخابرات .... اثبت جدارتو في كل المهمات الوكلت ليه ..... وادرج في الرتب والترقيات بشكل ممتاز خلت كل القادة بتاعنو يكونو معجبين بيه جدا .... اسوأ يوم في حياتو اليوم الصحا فيه على استشهاد ابوه 💔💔💔💔💔💔💔💔💔💔..... كانت فتره قاسية جدا بالنسبة ليه ..... بس ابوه كان في قلبو .... صبر واحتسب الاجر عند ربنا .... لحدي م قدر يتعايش مع فكرة انو ابوه خلاص ودع للأبد ..... لكن كانت ريحة اشجار الليمون بتحرك دايما مشاعرو  وذكرياتو مع ابوه .
هز راسو وهو بيرجع للواقع حقو وتابع مشيو لحدي م دخل البيت .... الظلام كان حالك ولع اضاءة هادئة عشان يلتمس بيها طريقو .
طلع في السلم بهدوء واول شي فتح باب اوضة امو بهدوء عاين ليها بحنيه كأنها بنتو .... صلح ليها غطاها ... صحت بيهو .
قعدت في السرير وهي بتعاين ليه : دي الجيا ؟
_ اي
_ اكيد تكون تعبان وجعان
_ لا لا يا ست الكل ..... اكلت من بدري .... حاخد لي دش وانوم .
_ ربنا يحفظك ويغطي عليك .
باس يدها بهدوء : اللهم امين .
طلع من اوضتها ودخل اوضتو .... بدا يفك في ازرار القميص بتاعو وفجأة سمع صوت صهيل واحد من الاحصنه بصوت عالي .... وقف البيعمل فيه وقبل وراه ناحية الشباك البفتح في الاسطبل .... حسا بي انو في شي .... ....استلم مسدسو وشال بطارية كبيره نظرا لي انو الاسطيل مضلم عاين للساعة لقاها ٣ ونص فجر .... نزل بي سرعة في السلم وفتح الباب ..... لفا بي ورا البيت وبقا منور البطارية وماشي ( يعني الساعة ٣ ونص والواطه ضلام واسطبل وصوت حصان بيصهل 🙂 والله كان شنو داك م انزل 🙂)
دخل الاسطبل ومشا ناحية الحصان البيصهل .... ولع البطارية حولين المكان عشان يتأكد لو في شي وبعدها مشا للحصان  ..... كان بيضرب الارض بحوافرو بقوة ومستمر في الصهلان .
ختا يدو في وشو وهو بيهمس : هشششششششششش مالك ؟ في شنو ؟ اهدا ..... اهدا مافي شي (طيب انا محتاجة للكلام دا اكثر منو لكن 😢)
اخد قرابة العشره دقايق وهو بيهدي فيه ..... لحدي م هدا وهمد .... بعدها رجع اوضتو .... طلع هدومو ودخل اخد ليه دش طويل ودافي وبعدها نام.
__________________________________________
صباح اليوم التالي واللي هو يوم جمعه :
رائد وهو بينده : امي يا امي
شادية : اي يا رائد
_ سمعتي امبارح ضرب النار دا ولا انا بتهيأ ؟
_ هي حالتي انا الكنت قايلة نفسي بتهيأ ولا قلبي دا لمن حسيت بي وقف .
_ لا حول ولا قوة الا بالله ... الحله دي بقت م بتنقعد والله
_ يا ولدي الخوف كلو على اختك .... انا خايفة يحصل ليها شي .
_ والله انا برضو يا امي .
_ هي وين هسه ؟
_ بتكون نايمه في اوضتها
_ لا لا م في الاوضة انا قبل شوية دخلت ليها
_ كيف يعني ؟
رائد جرا على المطبخ : فداء .... يا فداء .
شادية : يا فداء .... يا بنت انتي وين ؟
رائد فحط على الحوش وامو مخلوعة بتعاين ليه .... بس فحأة تشوفو ليك اول م رجلو هبشت الحوش يطير فوووووووف وينكفي في الواطه .... امو اتخلعت ونطرت عيونها .... وعينها فجأة لفداء جاتو جارية وهي مكفكفه رجلين البجامه وشايلة السياكه وداقة جرس .
رائد : حسببببببي الله ونعم الوكيل
فداء وهي بتضحك : انت عينك لي بغسل في الحوش تجيني جاري زي كلب الحر .
رائد وهو راقد في الواطه : وفي زول يا فداء بغسل الحوش الساعه ٨ .
نفضت ملابسها وهي بتقول : والله صحيت بدري ولقيت نفسي فاضية قلت اغسل الحوش.
شادية حاتهم جارية : في شنو ؟
رائد وفداء : خليك قبلك م تنزلي في الحوش .
شادية : في شنو يا اولاد
فداء : بغسل في الحوش يا امي وولدك الدلاهة دا جا جاري ووقع 😂
رائد : حسسسسبي الله
شادية : خلاص ارفعيه
فداء وهي بتمد ليه يدها : قوم قوم
اول م مسك يدها شداها وخلاها تقع وهو قام 😂
فداء : يعني دي الحسنه رائد افهمي العايزة تفهميه .
فجأة جرس الباب ضرب .
رائد قام وفتح الباب ... ظهرت كلامح الفرح في وش رائد : اوووووووه هزبر ازيك اتفضل
فداء : هزبر ؟ سجمي
وفرررررر قامت حارية وخشت جوه .
رائد : براحه اعمل حسابك الارضية مبلوله.
هزبر جا داخل لابس جلابية سمنيه ..... وشبشب جلد اسود وساعة سوداء وطاقيه بلون الجلابية .... يسو كدي كدي
رائد : اتفضل اتفضل .
مشا معاهو ودخل الصاله
رائد : معليش م اكون ازعجتك وجبتك على ملا وشك
هزبر : لا ولا يهمك
رائد : صراحة كدا يا هزبر البيت دا بقا م امن بالنسبة لي فداء وانا وامي اي واحد فينا خايف عليها .... عايزك تتصرف ....
_ كيف يعني ؟
_ يعني باختصار كدا شوف ليها اي مكان تاني يكون امن ليها .... ممكن .... ممكن تسوقها بيتك
_________________________________________
دينا لقت كريم مرسل ليها رسالة
" ممكن لو سمحتي تلاقبني برا ؟ "
جرت جري غسلت وشها ولبست عبايتها وطلعت ليه ... لقتو واقف جمب الباب .
كرييم : صباح الخير
_ صباح النور
_ كيفك
_ الحمدلله .... وين انت امس ؟
_ والله تعبت كدا ورجعت البيت طوالي
_ اهاااا سلامتك.
_ الله يسلمك .... عايز الشيت حق محاضره امس
_ م اعتقد تقدر تفهمو والله المخاضره كانت ملخبطه
_ خلاص م مشكله اشرحي لي انتي
دينا بسعادة : طيب ... طيب طوالي ماف مشكله
_ اجيك متين
_ ساعه كدا وبكون فاضية
_ خلاص تمام ساعه واكون معاك ... يلا عن اذنك
_ اتفضل .
اول م دخلت بيتهم وقفلت الباب بقت بتصفق بي فرحة وهي بتقول : yyyyyyeeeeeessss
#نهاية الحلقة الخامسه