#شيزوفرينيا٨
تكملة الحلقة التامنه :
الساعه ٨ صباحا :
الجو كان مغيم ... الشمس بتظهر وتختفي بين الغيوم ... والجو بارد .... في منطقة بين الجبال وقفت كمية من الشاحنات وعربيتين لاندكروزر ... طلع من العربية اللاند كروزر راجل وهو لابس نضاره شمسية .... ظهر التضايق في وشو وهو بيقول : الزول دا ناوي يجي متين ؟
جاهو صوت واحد تاني : انحنا م بنقدر نمشي من دون اذنو يعني ؟
طلع نضارتو وهو بيمسح جبهتو : لا ... م حنقدر نمشي .... اكيد حنلاقي دوريات تفتيش في الطرق ....
وم حنسلم منهم
_ عاين عاين شكلو وصل .
نزل من العربية الكان راكب ففيها ..... ابتسم بي طريقة غبية وضحت السن الفضية الفي خشمو .
ابتسم الراجل الكان شايل النضاره قبل شوية لمن شافو : ابو رؤوف نورت .
_ بي نورك
_ كأنك اتأخرت
_ الشوارع صعبه يا ولدي .
ملامح وشو كانت بشعه بالندوب العميقه الفيها ....
الباقيين كانو بعاينو ليهو بس بي وهو بيتكلم معاه.
_ اها ورينا حنعمل شنو .
_ حتمشو بالطريق الشرقي .... نقطتين التفتيش الاوائل حتجتازوهم .... السواقين حيقولو لظباط التفتيش احنا تبع ابو رؤوف وحتعدو .....
_ بالبساطه دي ؟
_ البساطه دي في نظرك انت .... بياخدو حقهم تالت ومتلت عشان بس يخلوك تمشي .
اما نقطة التفتيش الثالثة دي حتتأخرو فيها شوية ... حيفتشوكم لكن م اعتقد يلقو ليهم شي بما انكم مؤمنين اي شي .
_ طيب ممتاز وحنلاقيك تاني وين ؟
_ حتلاقوني مستنيكم بعد النقطة التالته دي ....
عاين لي ساعتو قبل م يقول : تتحركو الساعه ٩ انا حاسبقكم .
_ كويس .
ابتسم بي نفس الطريقه الغبية الاولى الظهرت ندوب وشو اكثر : يلا .... على بركة الله .
طلع في العربية بتاعتو واتحرك
______________________________________
في بيت هزبر :
سوزان كانت قاعدة في كرسي ....خالفة رجلها وخاتا كباية قهوة قدامها وجريدة .
نادت بصوت عالي : يا عزيزة
م كملت جملتها الا وعزيزة جاتها جارية.
سوزان : البنت دي لسا م صحت ؟
_ لا لسا
_ هي قايلة نفسها في بيت ابوها ولا شنو 😒
_ يا ست سوزان هي كان صحت حتعمل شنو يعني ... اخير ليها تنوم
_ اعتقد م طلبت رايك 😒
عزيزة دنقرت راسها وسكتت .
سوزان : شيلي القهوة دي بردت .... اعملي لي واحدة تانيه سكر خفيف ومن دواء مفهوم ؟
_ مفهوم
_ اتفضلي
عزيزة شالت القهزو ودخلت .
سوزان مسكت الجريدة وعاينت على جهة السلم : لما نشوف نهايتك شنو .
طبعا فداء كانت صاحيه في الوقت دا ... بس م حبت تنزل عشان عارفة انها م مرحب بيها في البيت دا .... وكانت في كمية من الخوف متملكاها . .... من الاحساس حق امس بتاع الممر انو في زول مراقبها .
كانت قاعدة في السرير قرابة الساعه .... لحدي م في النهاية لعنت الشيطان وقامت .... خشت الحمام .... اتسوكت واخدت ليها دش .
وهي طالعه من الحمام فجأة وقفت ..... لمن لاحظت لي حاجه جمب الباب الزجاجي حق البلكونه ..... مشت براحة عليها .... قعدت في الواطه وبقت بتعاين للارض .... كانت اثار جزمة وفيها طين .... زي اربعه خطوات والاثار اختفت .
كاننت متأكدة انها قبل م تنوم قفلت البلكون كويس ولحد هسه البلكونه مقفولة .
ختت يدها في قلبها وبفت بتعاين حوليها .... منو الدخل هنا وهي م حست بيه .
طلعت بي سرعه من الاوضة وهي بتنادي لي عزيزة .....
عزيزة كان عملت القهوة لي سوزان وودتها ليها واول م سمعتها بتنادي جاتها
_ صباح الخير يا بتي
_ صباح النور
_ مالك ان شاء الله خير وشك دا مالو اصفر ومختوف كدا ؟
_ انتي ي خالتو عزيزة في زول غيرنا في البيت دا ؟ ولا في حرامية بجو ولا كدا ؟
_ بري يا بنتي .... وبعدين حرامية شنو .... ماف زول بتجرأ يخش الببت دا
_ تعالي معاي عايزة اوريك حاجه
_ ارح
دخلتها الاوضة وورتها اثار الجزمه
عزيزة بقت بتتلفت حوليها وفتحت باب البلكون .... م شافت ليها اي اثار .
فداء : نمت وماف اي شي ولمن صحيت لقيتها
عزيزة : بسم الله الرحمن الرحيم واعوذ بالله من الشيطان الرجيم .... اكيد ديل هم
_ هم منو
_ ديل اهل الواطه
_ اهل الواطه شنو كمان يا خالتو العزيزة
_ يا بتي هم موجودين في اي مكان .... البيت دا قدييييييييييييييييم يا بنتي والاوضة دي كانت مقفولة ليها فتره ..... اكيد ديل هم ماف تحليل غير كدا
_ اعوذ بالله من الشيطان الرجيم ..... انا عايزة ارجع بيتنا💔
_ يا بنتي ماف شي بجيك ان شاء الله بس اتحصني وانا بكلم ست سوزان عشان يغيرو ليك الاوضة دي
حسو بحركه وراهم قبلو الاتنين .... لقوها دي سوزان .... واقفة مربعه يدينها وبتعاين ليهم .... الاتنين ختو يدينهم في قلبهم من الخلعه
سوزان بي طرف خشمها : في شنو ؟
عزيزة : صراحة يا
فداء قاطعتها : ماف شي .
سوزان بقت بتعابن ليها بثبات من دون م حتى ترمش ..... نظرتها براها كانت مخيفة بشكل رهيب .
عاينت لي فداء من فوق لي تحت بي استفزاز وطلعت
عزيزة : ها يا بنتي كان تخليني اكلمها
_ لا لا ... م تكلميها .... لانها م حتصدق وحتطلعني كذابه
_ هندا الدليل قاعد
_ شفتيها بتعاين لي كيف 💔
اصلها كدا والله يا بنتي .... قلت ليك م بتحب الناس ..... الا ناس كدا معينين بتدورهم ....على كل حال انا حامشي اجيب الممسحه وامسح الحاجات دي ... بكب ليك ملح في الموية وامسح اوضتك دي وان شاء الله اي شي كعب يروح ..... وبجيب المبخر وبرضو ببخرها ليك بالملح .... وان شاء الله العوجه م بتجيك بس انتي اتحصني كويس وم تخافي .... وزاتو م تقعدي هنا براك ارححكي معاي المطبخ نشربو الشاهي هناك
_ كويس
عزيزة طلعت وفداء قعدت في طرف السرير وهي بتشيل في انفاسها وبتعاين لي اثار الرحلين وبتتسائل الرماها في البيت دا وسوزان دي شنو .٠
فجأة لاحظت لي يدها .... في الاصبع البنصر .... كان لون الجزء الاخير افتح من من باقي يدها كأنها كانت لابسة خاتم لي فتره طويلة وطلعتو .... استغربت انها يادوب ولاول مره تلاحظ للشي دا .... ام هزبر جات مارة وعاينت ليها ومشت زي افلام الرعب فجأة بتظهر .... ونظراتها م كانت مطمنه ... فداء طوالي طلعت من الازضة ومشت لي عزيزة في المطبخ .
يا ترى حيحصل لي فداء شنو في البيت دا ولي سوزان بتكرها كدا ؟ ..... ويوسف وهزبر حيحصل ليهم شنو ؟
#نهاية الحلقة الثامنه
في ناس بتسائلو انو ناس كريم ودينا دخلهم شنو في القصة دي .... اي شخصية هنا ليها علاقة بالقصة وفي النهاية حتعرفو اي زول دخلو شنو بس الصبر 😂
