#شيزوفرينيا16
#تكملة
هزبر م عرف مرا كم من الوقت وهو واقف و ماسك الملف في يدو .......
ماف اي كلمه بتقدر توصف شعورو وقتها ..... جاهو احساس انو الدنيا دي كلها سامعه صوت ضربات قلبو حاليا ...
قرا الكلام تاني كم مره ..... احتمال يكون غلطان ....
احتمال تكون دي م امو ....
حسا انو الدقيقة بتعدي بعد مية سنه .... وانو الارض دي م بالصلابة المعتادة ..... كأنها شي رخو بيسحبو لي تحت .... والهواء دا تقييييييل ما قادر زاتو يتنفسو .
والجو حار ..... حار لي درجة خلت جسمو يتصبب عرق ..... وفي نفس الوقت باااااااارد ......
برودة خلتو يرتجف .
قعد في الارض .
وهو خاتي يدو في راسو ......
بعد وقت طويل ..... شال الورقة وصورها بتلفونو ....
وبعدها رتب كل شي زي م كان وقفل الخزنه وطلع من الاوضة .
حتى المسدس الجا يشيلو خلاه ......
جا جمب اوضة فداء ..... دق باب اوضتها .
م ردت عليه ....
فتح الباب براحه وعاين لسريرها لقاها نايمه ومتغطية بالبطانيه .
قفل الباب ومشا على اوضتو .
قعد في السرير ......
كان تفكيرو شارد وهو بيفتح في ازرار قميصو .
رقد على ضهرو وبقا بعاين للسقف وهو بيسأل نفسو .
انا ولد منو ? .... اذا هي م أمي .... انا امي منو ?
مشا يدو على كتفو المعوق .... وهو بتحسس مكان الجرح .
استغفر وهو بقوم على الحمام .
ملا البانيو موية باردة 🛁❄
وطلع باقي هدومو ونزل فيه.
فضل فيه لوقت طويل .....
فجأة كدا حسا انو انسان ضعيف .....
ونكره ........
قلبو وجعو لمن جاته فكرة انو ممكن يكون لقيط تم تبنيه .
وجاتو فكره تانيه انو قد يكون ابوه كان متزوج واحدة بالاول.
وحصل اي شي وجا اتزوج سوزان وهي الربتو ......
بس اكثر شي مؤلمو انو امو م حصل جابت ليه سيرة زي دي .
طوال ال32 سنه ماف مرة ولا بالغلط ولا حتى لمحت ليه بي شي.
نزل بي جسمو كلو تحت الموية ....
اخد وقت قبل م يطلع تاني ويشيل انفاسو بقوة .
مشا يدو في راسو وحسا بي شي نازل من عيونو .
شي حااااار ..... شي م كان نهائي معتاد عليه.
دموع 💔.
اخر مرة نزلت فيها دموعو كانت في وفاة ابوه .
كان كأي رجل شرقي شايف انو الدموع ضعف منو...
ملامح وشو كانت بتعكس كمية الالم الهو حاسي بيها .
عضى شفتو السفلية بي الم ومسح بيدو دموعو الماعايزة تقيف .
وشو بقا كلو احمر ....
ولون عيونو بيديك احساس انو بدل الدموع حينزل دم 💔.
( اتخيل بس تكتشف انو امك م امك 😀💔).
بي صعوبة قام .... ونشف جسمو .
ولفا البشكير في نصو .
وطلع من الحمام.
لبس هدومو ورقد في السرير .
رقد على ضهرو وسرح في السقف تاني .....
لحدي م سمع صوت عربيتها وهي بتقيف جمب الباب.
كانت الساعه 3 ونص .
اتكل على الشباك وزح الستارة شوية .
وعاين ليها وهي داخله .....
معقولة ?
معقولة بعد كل السنين دي تطلع هي م امو .
مشا على الابجورة العاملة اضاءة هادئة وطفاها .... ورقد وغطا نفسو .
عشان كان عارف انها حتجيه ...
وفعلا م تمت كثير الا وهو سامع صوت رجولها وهي جايا على اوضتو .
كان مديها ضهرو .... غمض عيونو لمن سمع صوت باب الاوضة وهو بتفتح.
قعدت في طرف سريرو .
مشت يدها على راسو .
بعدها قامت وصلحت ليه غطاه وباست راسو وطلعت من الاوضة .
الغصة حرقت حلقو .
غمض عيونو اكثر وهو بيشد ملاية السرير بي غضضضضضب .
ساعه ورا ساعه والوجع بزيد اكثر .
لحد م الفجر اذن ...
قام اتوضى وصلا .
ورجع قعد في الكنبه وتفكيرو شارد .
________________________________________
الساعه 7 :
طبعا مصطفى بقا ثااابت بجيب دينا معاهو حتى لو عندو اوف بيجي الجامعه عشان يوصلها .
دينا طلبت منو يجي يسلم على امها ...
لانها بتحكي ليها كثير بيه .
ام دينا طبعا طيبة شدييييييد .
وبقت كل م يجي لي دينا تظبط ليه الشاي واللقيمات وتديهم ليه بي مزاج 😂
وهو متكيف .... وبقا بقول لي دينا م تقيف في الظلط هو بجيها جمب البيت ......
اللهم الليلة لمن جا لقاها واقفة مع كريم .
عاين لي كريم لي مسافة .....
وبعدها ضرب لي دينا بوري .
دينا مشت على اتجاه العربية وهي مبتسمه : صباح الخير .
_ صباح النور
_ ممكن نوصل كريم معانا 😅.... لو م فيها ازعاج يعني .... عشان عندنا كويز ومفروض نوصل بدري .
اتحول بي نظرو لي كريم : اكيد م عندي مشكله .
ركبت ورا .....
وكريم ركب قدام .
كريم ومصطفى اتكلمو مع بعض شوية وتاني سكتو لحدي م وصلو الجامعه .
اللهم دخلو .
مصطفى لاحظ لي نظرات الاهتمام في عيون دينا لي كريم .......
وهي بتشرح ليه قبل م يدخلو .
في شعور صغنوني كدا ضايقو .....
م كان عايز نظرات الاهتمام دي تكون لي كريم ...
لكن كأي ولد قدر يخبيها ....
انتبه لي صوت تلفونو العلا ....
رد ببرود : خير ?
_ ازيك .
_ الحمدلله
_ عايزة اشوفك ممكن ?
_ مشغول
_ طيب فاضي متين ?
_ اسمعيني انتي عايزة شنو ?
_ عايزة اشوفك يا مصطفى عايزة اشوفك .
_ خلاص لي بعدين اشوف لو فضيت .
_ حاول عليك الله .
_ تمام
قفل الخط.قبل م تكمل كلامها .
شاف دينا جايا عليه وهي صارة وشها .
ابتسم ليها : ان شاء الله خير ?
_ اتخييييل بعد م قرينا وتعبنا
الدكتور لغى الكويز واللكشر
_ وزعلانه ? 😂
_ ياخ احساس قريت وحفرت وفي النهاية اتلغى هسه لو م كنت قارية م كان حيلغيه .
_ معليش لي خير 😂.... وهسه حتعملي شنو ?
_ مفروض ارجع البيت 😀
_ اوكي.حرجعك
_ لا لا لا ياخ ماف داعي والله كدا اوفر يا مصطفى .... يعني كل مره انت بتوديني وتجيبني وانا بتقل عليك ماف داعي .
_ خلصتي كلامك ? يلا ارح
مشا قدامها ......
نزلت راسها بخجل ومشت ورا .
اول م ركبو قال ليها : طبعا هديل ضربت لي
_هديل ?
_ امي
_ اهااا.... اسمها جميل .
_ قالت عايزاني ضروري .... اللهم اختصرتها وسكت منها .
_ لي ?
احتمال عايزاك في شي مهم .
_ صراحة م نفسي اشوفها زاتو
_ يا مصطفى ..... والله م صح.كدا .... اي هي غلطت عليك ف شي والله اعلم لي هي عملت كدا ..... لكن مهما حصل هي امك .... ولو غضبتها ربنا بغضب عليك .
_ وهي م حتتحاسب على العملتو فيني ?
_ مصطفى ياخ ..... كدي هسي شوفها مالا احتمال مشتاقة ليك ولا مارة بمشكله ولا اي شي ..... والله الدنيا بقت صعبة والزول ف خلال ساعه ممكن يفقد اغلى ناسو .... عشان الزول م يندم ..... اعفي عن الناس وسامحهم واتجاوز ليهم.كلها ايام بنقضيها وحنمشي .
مصطفى طلع تلفونو بتردد وضرب ليها : انتي وين ? اي جاييك ? تمام ..... ولو سمحتي م طولي معاي عشان وراي محاضرات ..... طيب .... الله يسلمك .
عاين لي دينا : ممكن طلب ?
_ اتفضل
_ ممكن اسوقك معاي ?
_ لكن ....
قاطعها وهو بقرب راسو من الدركسون بتوتر : عليك الله م عارف لو شفتها حيحصل لي شنو .... عايز زول معاي .
_ خلاص كويس ... ارح
دينا لاحظت ليه متوتر من حركات يدو ..... وكل شوية يمسح على وشو
اللهم بعد ربع ساعه كدا وصل مقر شركه .
نزل من العربية وبقا واقف ومتكل على مقدمة العربية وهو مكتف يدينو .
دينا كانت بتعاين على بوابة الشركة عايزة تشوف امو .... كل م تجي مرة بتقول دي هي لكن بتطلع م هي
لحد م في النهاية جات واحدة كدا وووووووووب ..... سممممممحه كدا لمن عوارة ..... وفارعه ..... بتديك احساس كيم كاردشيان 😂😂😂
والمشية كييييييييف .... كانت لابسة ليها توب كحلي .... ولابسة شبط انيق كعبو عالي بالاصفر .
اللهم الزول م بقدر يعاين ليها في عيونها مرتين .
هديل .....40سنه .... طبعا عرفنا شكلها من الوصف .
مرة كدي انيقة ومجيهة ومهتمه بنفسها شديد والبشوفها بقول عمرها 20 سنه
( لينا..... 18 سنه .... عندي وجع فقر وقطايع وكان قعدت تاني م بقدر اقوم 😀💔.... فيني روح مره عمرها 60 سنه وكاسرة مخروقتها )
اول شي عاينت لي دينا الفي العربية .... ابتسمت ليها .... ومشت اتجاه ولدها .... الكان سلامو عليها بارد كل البرود .
فجأة جا جاري ولد صغير بكون عمرو زي 3 سنوات ووراهو فلبينيه .
هديل لمن سمعت صوتو قبلت وراها ضحكت وشالتو .
كان بيمد يدينو لي مصطفى عشان يشيلو .....
لكن مصطفى صاري وشو وابا يتفاعل معاه .
كان واضح انو بتكلم معاها ببرود وكلمه ورد غطاها .
دينا بقت بتعاين في المبنى حق الشركه ....
في الطابق الاول لاحظت لي انو في زول واقف .....
فضل واقف لي مسافه .... كأنو مراقب هديل ومصطفى
دينا بقت بتعاين لي مصطفى وترجع تاني تعاين للزول الفوق .
لحدي م مصطفى خلص كلامو مع امو وجا راجع .
كان وشو محمر وانفاسو قايمه ..... وواضح انو زعلان شديد .
دينا م سألتو .....
الغريبة انو فضل ساكت لحدي م وصلها خشمو م فتحو .
نزلت وقالت ليه شكرا .... ويادوب سمعت صوتو لمن قال ليها العفو .
بي هنااااااااك كريم وشلتو المصاحبها جديد دي .... مشو محل غير الشقه بتاعت المره الفاتت .
مؤيد : هوي يا كريم خالك م يجي يطب علينا زي المره الفاتت
_ لا لا يا معلم م تخاف ..... ولا بجيب خبري زاتو .
مؤيد : اها وريني جبت معاك كم ?
_ 500
_ خلاص جيبها
_ انت مش قلت لي 150 بس
_ ياخ 150 دي م بتخارجنا .... جيب جيب ال500 خلي الليلة تعدي ع خير 😂.....
كريم اداه القروش .
طلع بره وجا وجاب معاهو شنطه وبدا يطلع في البلاوي الزرقا الحيشربوها ويشموها .
________________________\_____________
الساعه 10 :
هزبر طلع من اوضتو .
وهو طالع قابلتو إكليل لمن شافتو لمن رجعت لي ورا .
عاين ليها باستغراب : صباح الخير
قالت ليه بتردد : صباح النور .
وطوالي مشا .
وقفت تعاين ليه باستغراب .... هزت راسها وهي بتهمس :
والله العظيم انت م طبيعي .
وفي اللحظات دي فداء فتحت باب اوضتها وجات منسلة 😂.
ادت إكليل نظره كدا م جميلة خالص .
ونزلت .
إكليل عاينت ليها وضحكت وهي بتقول بي صوت شوية مسموع : الناس دي.كلها م طبيعيه ولا شنو ?
نزلت وراهم ومشت على جهة الجنينه وهي بتفكر : يعني معقولة هزبر بالبساطه دي نسا العملو لي امبارح ?
ولا بتناسى ..... لكن دا م شي بتنسي ..... هزبر دا واحد من الاتنين .... يا مستهبل وتافه وقليل ادب .... يا بالحد فيه خلل .... مريض .
لكن اعرف كدا كيف .... لازم يحصل لي معاه موقف يؤكد لي الشي دا ..... لكن على كل حال مصيري اعرف .
فداء جات نازلة ...
وقفت لمن سمعتو بيناديها ....
كان قاعد ف الشرفة .....
عاينت ليه بعدم اهتمام : خير ?
استغرب من اسلوبها ....
لكن قاليها : ممكن تجي تقعدي معاي
_ معليش مشغولة
_ مشغولة ?
_ اي
_ طيب اتفضلي .
تابعها بنظراتو المستغربة .....
لحدي م اختفت ....
شوية كدا عزيزة جاتو بالشاي .
طبعا للأسف فداء شافت الحصل بينو وبين إكليل عشان كدا بطنها طمت .
فداء مشت على الاسطبل والزهج قاتلها قتل ....
من ما جات هنا م بتعمل شي غير انها تتمشى بين الاشجار وتتجي تتفرج على الاحصنه وتطلع اوضتها وتكتب لمن تهف ليها وخلاص ...... روتين .... روتين قااااتل من كل النواحي .
اتكلت على السور وهي بتعاين للفرسة السوداء البتجري بي جوه .... كان واضح انها عنيفه .
بقت بتعاين ليها ..... لوقت طويل اكثر من الوقت الطبيعي .
ضربت راسها وهي بتقول : شفتها وين ..... شفتها وين ياربي ..... الحاجه دي انا شفتها قبل كدا اتهيأ لي .
فداء ?
قبلت وراها عاينت ليه ورجعت تعاين قدامها .... هزبر استغرب .
وقف جمبها وهو بيقول ليها : فداء ? مالك
_ ولا شي.
_ متأكده ?
_ اي
سكتت شوية وتاني قالت ليه : اسمعني لمن تكون عايز تقل ادبك مع خطيبتك شوف ليك مكان م فيه ناس
_ نعم ?
_ اللهم وريتك .
واتحركت .... وقفت لمن جراها من يدها .....
ظهرت الجدية في وشو وهو بقول ليها بي هرشة كدا : اتكلمي زي الناس ووريني في شنو ( فديت البهرش😍 )
ضحكت : الله ? نسيت امبارح ? لمن انت وإكليل كنتو هنا الساعة 12 واستغفر الله العظيم من الباقي
هزبر : انااا ?
_ ااااي انت .
ختا يدو في راسو : فداء .... عايني انا م مجمع هسه وريني الحصل شنو بالضبط .
_ امشي اسأل خطيبتك ..... والله يعف لساني عن اني احكي شي زي دا لي راجل .
جرت يدها ومشت ......
هزبر اتزكر ردة فعل إكليل اول م شافتو وصدق انو امبارح فعلا حصل شي ..... بس هو م متذكرو .
فداء رجعت جوه .... واول م ختت يدها في السلم وقفت .....
وفجأة لقت دموعها نازلة .....
غصبا عنها ...
عاينت باتجاه الباب وبي طرف يدها مسحت دموعها وجرت فوق .
هدى وسوزان كان طلعو ......
ما كان في اي شي يذكر لحدي الساعه 11 بالليل .
المكان كان هادئ .....
إكليل طلعت لي صحبتها وبايته برا ....
وهزبر برضو طلع ......
وعزيزة في اوضتها ....
فداء كانت بتحضر في التلفزيون في الصالة .
فجأة الكهرباء قطعت ....
المكان بقا مضلم ....
فداء كانت عندها مشاكل مع الضلام خصوصا مع البلاوي الحاصله ليها دي .
بي سرعه فتحت تلفونها عشان الاضاءة ....
فجأة حست بي صوت رجول جايا من جهة باب المطبخ .
سكتت .... وطفت النور وقامت براحه وهي بتتحسس قدامها في شنو ....
نادت بي صوت مرتجف : عزيزة ?
فجأة صوت الرجلين بقا كأنو في زول جاري عليها .
زحت من مكانها وجات واقعه ف الارض .
فجأة في نور ولع عليها .....
بقا جاهرها وم شايفة المولعو عليها منو ....
قجأة الكهرباء جات ....
صرخت بأعلى صوتها لمن شافت زول لابس اسود في اسود وبنيتو بتوضح انو راجل م بت ..... وكان لابس قناع مظهر عيونو بس .
عايزة تجري مسكها من يدها وجراها عليه كان شايل سكين ....
صرخت بأعلى صوتها .....
وحاولت تفك منو ....
صوت صرختها العالية خلاه يرمي سكينتو عشان ختا يدو في اضانو شالت السكينه وضربتو بيها في يدو .... لمن شافت الدم صرخت زيادة ورمت السكينه وجرت ... رجلينها م كانت شايلاها تجري وتقع .... وجسمها كلو برجف ..... جات مارة بي اوضة عزيزة لقتها.مقفولة بي برا .... وعزيزة بتدق في الباب بي قوة .
عاينت وراها لقت ماف ااااي زول .... بس اثار الدم في الارض .
دخلت اول حمام لقتو فاتح وقفلت الباب عليها .... قعدت ف الارضية وهي بتبكي بي قوة وبتشد في شعرها .
#نهاية الحلقة السادسة عشر
يا ترى لي فداء هي الوحيدة المستهدفة ودا منو الاتهجم عليها دا
