_ايواااا .... وانتي فداء دي حتقعد معاكم طويل ؟
_ والله العظيم يا هدى زاتو م عارفة ... انا لو علي اكشها هسه على اهلها لكن ولدي عنيد اسوي شنو .
_ المشكله انا بنتي عبيطه وهبله م وما ملحلحه
إكليل : انتي عايزاني اعمل شنو يعني يا ماما ؟ .... ماف زول بفرض نفسو على زول
سوزان : انتي حاولي اتقربي ليه .... اتونسي معاه .... سوي اي شي قربيه عليك 😉.... وماشاء الله يا لولو انتي جميلة وجذابة استغلي حلاوتك دي 😉
إكليل بضحكة : اوكي بحاول
_ ااااي لازم تحاولي .... عايزة ان شاء الله مع الشهر الجاي دا احدد ليكم عرسكم .... عايزة افرح بولدي فرحة حقيقية قبل م اموت .
هدى : بعد الشر عليك حبيبتي .... ان شاء الله ربنا يطول بالعمر ونشوفهم عرسان ونفرح بيهم ونربي عيالهم
سوزان : ان شااااااء الله يارب ... عقبال م اشوفك كدا يا إكليل شايلة اولاد هزبر .
إكليل بي فرحة : امين ان شاء الله 🤗☺
_ خلصوا اكلكم عشان مطلعاكم معاي
_ على وين ؟
_ لمه كدا بتاعت صحباتنا انا وامك .... صحبات من زماااااان من ايام الجامعه
_ طيب حلو ☺.... لكن انا م حمشي معاكم
_ لي ؟
_ م حاسا انو عندي نفس عشان اطلع .
_ خلاص حبيبتي اهم شي راحتك .
بعد م خلصو ونستهم واكلهم .....هدى و سوزان مرقو ... وإكليل طلعت فوق .... طبعا ابت تمشي عشان عايزة تشوف ليها طريقة مع هزبر وبس ...
دخلت اوضتها عشان تغير هدومها وتمشي لي هزبر .
فداء كانت قاعدة مع عزيزة لوقت .... بعهدها طلعت من المطبخ ومشت فوق وهي صارة وشها وقافلة معاها من السمعتو .
لمن قربت من اوضة هزبر سمعت صوت حاجه وقعت .... وهنا خلاص م قدرت تتمالك نفسها طوالي مشت اتجاه اوضتو وضربت الباب وهي بتنادي : هزبر ؟
استغربت لمن جاها صوتو طوالي : اتفضل .
اترددت لثواني قبل م تفتح الباب وتنحاش على قول السعوديين 😂.
الاوضة بتاعتو كانت واسعه .... فيها شباك كبير وبلكونه .... مغطية بستارة بيضا مدخله اشعه الشمس ..... الارضية بسيراميك بني قريب للأسود .... وفيها سجادة صوفية بيضاء .... بتديك احساس انها جلد دب قطبي .... السرير كان كبير باللون البيجي والفرش الفيه بني .... وجمبو ابجورتين كبار للإضاءة ..... بالاضافة لي كنبه وثيره بنفس لون السجاده....وجمبها طوالي في درج طويل فوقو مراية اترصت فيه كمية من العطور ..... ومقابلة السرير طوالي كان في شاشة تلفزيونية .
الغرفة كانت مريحة جدا ومناسبة لي انو الزول يجي ينوم فيها طوالي .
كان في بابين تانيين ... واحد واضح انو الحمام والتاني ياهو مكتب هزاع واللي هو مانع الدخول ليه .
بغض النظر عن كل دا .... فداء اتخلعت ونطرت عيونها ورجعت لي ورا لمن شافت هزبر قاعد في السرير وهو مملص قميصو .... وخاتي جمبو علبه بلاستيكيه فيها ادوات تعقيم ولصقات وشاش وقطن .
دنقرت راسها وكانت حتطلع .
بس وقفت لمن هزبر قال ليها : استني .
لاحظت لي عصايتو الواقع في الارض وعرفت انو الصوت القبل شوية دا كان صوت وقعة العصاية .
هزبر وهو بيأشر ليها على الحاجات : ممكن تساعديني ؟
رفعت راسها : كيف يعني ؟
_ تساعديني في تعقيم الجرح ولفو
_ لكن انا م بعرف
_ حوريك تعملي شنو ... تعالي
جات عليه بتردد وقعدت جمبو .
وبدا يوريها حتعمل شنو .
زحت اللصقة المختوته في المكان .
زحت بي سرعه وظهرت ملامح الالم في وشها : وااااااي دا شنو ؟
هزبر بضحكه : دي حيا 😂..... حيكون شنو يعني
_ اححححي دي استحملتها كيف؟؟؟؟ بتوجعك
_ سألتيني السرال دا وقلت ليك لااااااا م بتوجعني ولا شي 😂.
جراها من يدها وقعدها في السرير تاني : يلا بسرعه
بيدين مرتجفة شالت قطنه وبللتها بمعقم ومشتها على الجرح ... وهي ضاغطه على اسنانها وفاكراه متألم معاها ... لكن هو كان مستمتع بي منظرها 😂.
رمت القطنه وهي بتعاين بعين واحدة : اها ... اها بعد كدا اسوي شنو ؟
_ ختي ليه لصقة ولفيه
عملت القالو ليها وفي النهاية ناولتو قميصو .
_ ممكن لو تكرمتي تساعديني برضو في لبس القميص
_ طيب
ساعدتو .... ووقفتو عشان تزرزر ليه زرايرو .
وهي بتزرزر ليه حست بيه بعاين ليها ... كانت نظراتو ثابته على وشها وفي ابتسامه صغيرة مرسومه في وشو .
قفلت ليه اخر واحده وابتسمت بتوتر : خلاص كدا انتهينا 😅
اتفاجأت بيه بشدها عليهو ....
مسك وشها وباس راسها بوسة طويلة وبعدها زحاها وهو بقول : شكرا
فداء م بدر منها اي رد فعل من الخلعه 😳.
اكتفت بي هز راسها وفللي طلعت .
وقف مراقبها وابتسامتو بدت تزول تدريجيا لحد م بقى ماف اي تعبير في وشو ( بسم الله 😢)
دخل يدو لي جيبو وطلع وصلة شعر مستعار (اكستينشن )
ضغط عليها بكفو وهو بتمتم بكلمات م مفهومه .
#يتبع
__________________________
طبعا انا الليلة اتجهجت جهجهة ..... شبكتي اقل م يتقال عليها سييييييييئة .... العلامة حقت الداتا م ظهرت اساسا ...م عارفة المشكله شنو ....
قفلت التلفون وفتحتو وحاولت افعل ساعه سريعه وكلو هشتك بشتك 🙂💔.
اللهم هسه جريت وايفاي .... اسفة عشا اتأخرت عليكم بس ما بيدي 💔
بعد دا الزول يمشي ينوم وهو مرتاح 😪
