•unicode
' အမလေး .. '
အိမ်ရှေ့မှ ထွက်ပေါ်လာသော စူးရှသည့် အသံကြောင့် အိပ်ခန်းအတွင်းမှ အမြန်ဆုံးပြေးထွက်လာမိသည်။
အိမ်မကြီးတံခါးဝဝယ် လူစုံတက်စုံရောက်နှင့်နေပြီ ။
အော်ခေါ်သူကား မေနွယ်ပေ။
နောက်ဆုံးတွင်ရပ်ကြည့်နေသော ညီမလေးအား လှမ်း၍ မေးကြည့်လိုက်သည်။
' ဘာဖြစ်လို့တုန်း '
မိဆုက ရှေ့သို့ လက်ညိုးထိုး၍ ညွှန်ပြသည်။
သူ့လက်ညိုး ဦးတည်ရာကို လှမ်းကြည့်လိုက်တော့ ပုဆိုးစနက်ပြာရောင်ပေါ်တွင် ပလက်ယာ၊ကွင်း၊ဂွ ဆိုဒ်မျိုးစုံနှင့် ဓားမြောင်တစ်ချောင်းကို တွေ့လိုက်ရသည်။
' သေချာပြီ ညက အိမ်ကိုသူခိုးကပ်တယ် '
မေမေက အတည်ကောက်ချက်ချလိုက်သည်။
' ဒီလောက်ပစ္စည်းတွေစုံနေတာ သူခိုးတော့မဖြစ်နိုင်ဘူး၊ဆိုင်ဖွင့်စားလို့ရတယ် '
လေးလေးကျော်က ရယ်၍ပြောလိုက်သည်။
ဆုဆုနှင့်ကျွန်တော် သဘောကျစွာရယ်မိသည်။
' အမလေး ရယ်တယ်တော့၊ ဒီမှာ ရယ်မနေကျနဲ့ ဒီနေ့ အိမ်ကို စီစီတီဗွီ ကင်မရာတပ်ဖို့ပြင်တော့ အငယ်ကောင် '
' ဟုတ်ကဲ့ပါ မမရယ်၊ အခုတော့ ဒီပစ္စည်းတွေ ကိုသိမ်းလိုက်ဦးမယ်...'
' နေဦး နေဦး ၊ ဒီပစ္စည်းတွေကို အရင်ဓာတ်ပုံရိုက်ဦး ပြီးမှသိမ်း၊ အဲဒါမှ ရဲစခန်းသွားတိုင်ရင် သက်သေပြလို့ရမှာ '
မေမေ့ပြောသမျှကို အကုန်လိုက်လုပ်ပေးနေသော လေးလေးကျော်ကို လေးစားမိသည်။
အမစကားကို ရိုရိုသေသေ နားထောင်သားပဲ။
' သူခိုးကွာ၊ငါတို့ကို အိပ်ရေးပျက်အောင်ကို လုပ်တယ် '
' သားကြီး နိုးသွားတာလား၊ သွားပြန်အိပ်လေ ၊မနက်စာစားခါနီးမှ မေနွယ်လာနိုးမယ် '
အလိုက်သိတက်သောမေနွယ့် ခါးကိုဖက်ပြီးမှီလိုက်သည်။
မေမေကတော့ ပြုံး၍ကြည့်နေသည်။
' ကြည့်ပါဦး အဒေါ်ကို ကပ်ချွဲနေတာ အသက်ကကြီးနေပြီ မရှက်ဘူးလား ၊ ငါသားရဲ့ '
