Artistahin

Prologue

“Basta smile” bulong ng nobyo niya kaya pagkalapit ng kotse tumigil ito sa tapat mismo ni Enan. Nakangiti yung dalawa pero sabay sila napalunok pagkat poker face si Enan at di kumikibo. “Oh my God, Shan kinakabahan ako” bulong ni Clarisse.

Lumabas ng kotse si Shan pero nakatayo lang siya sa tabi  ng nakabukas na pinto pagkat medyo kinakabahan siya sa itsura ng kanyang bestfriend. Si Clarisse sobrang guilty kaya lumabas din pero natatakot din lumapit. “Umagang umaga star struck ulit kayo sa akin ano?” biglang landi ni Enan sabay nag mister pogi pose.

Pigil tawa si Shan, nagtitigan sila ng nobya niya sabay muling tinignan si Enan. “My friends please, I do understand why you two seem frozen. Ganyan naman lahat ng nakakakita sa mga artistang tulad ko. Oha for change biniyayaan ko kayo ng full body shot ko. Para malayo palang kayo e kitang kita niyo na yung taglay kong kagwapuhan at matipunong katawan”

“Blessed you two for makakasama niyo ulit ang artistahing tulad ko ng buong semester. Gosh kakainggitan kayo ng marami, tulad ng mga kapitbahay ko na araw araw silang nabibiyaan, mula pag gising nila sisilip na sila agad sa labas para masilayan ako”

“Pagsapit ng hapon sisilip ulit sila para makita ako makauwi. Pag late ako makauwi talagang magpupuyat sila hanggang makarating ako para masabi nila na kumpleto ang kanilang araw pagkat nakita nila ang artistahin na tulad ko pagmulat ng mata hanggang sa pagpikit” litanya ni Enan at doon na nagtawanan ang mga kaibigan niya.

Natawa na sobra si Shan, si Clarisse niyuko ang ulo at nakitawan narin. “Pumasok ka na nga pare” sabi ni Shan. Umatras si Enan at muling nag mister pogi pose, “Don’t be shy, eto pa bibigyan ko pa kayo ng konting oras para titigan ako. Kasi mamaya pagdating sa school alam niyo na pagkakaguluhan na ako ng girls and even the girly boys”

“Since you two are my closest friends, eto treat ko sa inyo. Go on don’t be shy and admire my pleasing personality and masculine and always fantasized figure” hirit ni Enan at halakhakan yung magsyota na pumasok sa kotse.

“He is okay, normal na normal siya” bulong ni Shan. “Thank God, pero bakit nakacast yung two fingers niya?” bulong ni Clarisse. “Hayaan na natin, basta okay siya. Enan tama na pasok na” sabi ni Shan kaya pumasok na sa likod ang bestfriend niya.

“Pare word of advise iwasan mo yung mataong lugar, baka kasi dumugin tong kotse mo. Pero pag only way yon okay lang kasi inexercise ko naman na hands ko para kumaway, my facial muscles are ready to flash my irresistible and unforgettable artistahin smile…oh look tinitignan ako ng two girls over there…hello ladies” landi ni Enan at laugh trip yung dalawa sa harapan.

“So pare, tagal kitang di nakita. Oo magkatext tayo araw araw pero kumusta ka?” tanong ni Shan. Si Clarisse kinabahan kaya pasimpleng lumingon at tinignan yung binata. “Walanghiya ka, katabi mo girlfriend mo tapos aamin ka ng ganyan na nagtetext tayo araw araw. Look Shan, I know you are confused, Clarisse is very beautiful but I do understand if you are also attracted to me”

“I am flattered, but please my bestfriend, I do respect the third and fourth sex but I don’t see myself starring in my Husband’s Lover with you” sagot ni Enan at napahiyaw sa tawa si Clarisse. “Ano gusto mo gumawa sila ng sequel, my Boyfriend’s Lover? Wag ka na mangarap baka gusto mo Indie film pa with a title Trumpet…sa tagalog Torotot, o kaya Hinuli sa Kindat ni Juan si Pedro. Sus ka pare, ano gusto mo magsulat si Clarisse sa MMK, Dear ate Charo..”

“Itago niyo ako sa pangalan na Clarisse, maganda ako, boyfriend ko gwapo at siya yung current mister Commerce sa school namin. He has a bestfriend, he is a very very handsome actor…my boyfriend is falling for him and I don’t what to do” drama ni Enan at halos mamatay sa tawa si Clarisse.

“Ate Charo mula bata pa sila magbestfriend na sila. Even if he says I am the apple of his eyes, it seems that my boyfriend likes the snake of his bestfriend. Oh it pains me imagining them two kissing and embracing each other…teka nasusuka narin ako” sabi ni Enan at napahiyaw ang dalaga at nagsisipa. “Tado ka! Kinukumusta lang kita siraulo ka talaga!” sigaw ni Shan.

“Kumusta ako?” tanong ni Enan sabay biglang nanahimik. Nagtitigan sina Shan at Clarisse, napatigil yung kotse, sabay sila lumingon at nakita nila si Enan mukhang malungkot at nakayuko ang ulo.

“Kumusta ako?” bulong ni Enan sabay mala slow motion na tinignan yung dalawa. Dahan dahan siya napangisi sabay nag mister pogi pose.

“Eto…artistahin parin” sabi niya sabay kumindat.