السيدة العظيمة رقية (عليها السلام)
واگـفـه اباب الخرابـه وشافـت أطفـال
تركـض وتلـعب بلايه اسيـاط واحبـال
ورجعو المغرب لأهلـهم
گالت أرد اصبح مثلـهم
رقيـة...رقيـة
واگـفـه ابـاب الخــرابــة...وشـافت الأطفـال تلـعب
وكل طفل يحضَرلّه والد...ايشيله من يگول مُتعب
وباوعـت لجـروح إديـهـا...والحبل دم منهـا يشرب
اتوخـره من الجـرح گـوه...لَنّه طاح بجـرح أصعب
يالاحبـال..منيلي والد يا عجـب..يشيلني بوكت التعـب
وعالقصر راسه أنصلب..يالاحـبـال
وذيـچ الاحبال اشيهمها بطفله وتنوح
هيه خشنه وكل شغلها اتكثـر اجروح
وبالسـبي رادت أجلهـم
گالت أرد اصبح مثلهـم
رقيـة...رقيـة
ــــــــــــــــــــــ١ـــــــــــــــــــــــ
شـافت الأطفـال تضـحك...استغـربت هاي القضيه
من زمـان اطفـال تضحك...ثـاري مـا شـافت رقـيه
وطفل سمعت صاح عمي...التفتت وشهگت خطيه
وإله صـاحـت وينـه عمي...وگـلهـا يـا عـم يالسـبيه
وبچـت حيل..وعمي گـلتله گـمر..گصته تترس چم نهر
وگـلها وينه ما حضر...وبچـت حيـل
وين يحضـر عالشـريعه ابـلايـه چـفيـن
وذاكه راسه اعله الرمح بس بفرد عـين
ويا عمامي الگـضو كلهم
گـالـت أرد اصبـح مثلهم
رقية...رقية
ــــــــــــــــــــــ٢ـــــــــــــــــــــــ
طلـعت أم شافت لإبنها...وعدها إبن جَوه العـبايه
امگـمط إمبَـيّـن إزغَـيّـر...وصاحت بصوت الرزايه
ركضي رجعي وديري بالچ...حرمله ايحب الرمايه
ذبح عبد الله اعله شـربه...المـاي عنده أكبر جنايه
إله سهـام..ما يشـابهـه سهـم..امثلثه امنگـعـهـا سـم
وما تِـرد ابلايـه دم...إله سـهـام
إخذي أطفالـچ تـرى هنـا هِوّ موجـود
حرمله وبي طبع يذبح ويـن الاورود
وخاف ليشتت شملـهم
گالت أرد اصبح مثلـهم
رقيـة...رقيـة
ــــــــــــــــــــــ٣ـــــــــــــــــــــــ
طفلـه تلعب لنـها طاحت...ومن بچـت راحِلها أبوهـا
وصاحت إعليه باوِعِـلّـها...خــاف تـرچـيـه خــذوهـا
ايأذي عَم جرح التراچـي...بسـرعـه يا عَم ضَمِدِوهـا
ومو حكـيم اتسألـه عنهـا...اسـأل ابنـيـه اسـلـبـوهـا
ترى الناس..هنانه ما عدهم عَدل..وينسلب سهله الطفل
وإلا ينشد بحبل...ترى الناس
وزين بنتك عدها أبو يحضـرها بالضيـج
أنه والـد عـنـدي ذبـحـوه نـاشـف الريـج
وبالدمع واتسولف إلهـم
گـالت أرد اصبح مثلهـم
رقيـة...رقيـة
ــــــــــــــــــــــ٤ـــــــــــــــــــــــ
طفله صاحت خويه وينك...ولن رقيه اترد عليـهـا
هِــوّ بـالطــف الـتــوذر...لاختـه هم يگـدر يجيـهـا
عـنـدي اخـوي هـنا ولكـن...عمـتي گـايدته بإديـهـا
مـا يـگـوم ابــلا عـصـاتـه...وحتى هاي امسـلبيـهـا
والإگـيود..كثر ما بيـها ثگـل..مـنحـني مـنـهـا يظـل
وحتى من يوگـع غفـل..بالإگـيود
