الجزء التاسع و الأربعون
يوم الإثنين 23 يناير
في مكتب صالح العابد
كان مقعمز على كرسيه الجلدي الوثير
و باله مشغول بأفكار و أفكار و عقله يخطط في خطط شيطانية
تفكر كيف عرف بخطة رعد بأنه يدمر شغله من خلال خسارته في صفقات متتالية
عند أي رجل أعمال الموضوع ممكن يكون صدفة لا أكثر
لأن سوق العمل فيه الربح و الخسارة
لكن عند إنسان معنداش ثقة حتى في أنفاسه زي صالح العابد الموضوع مفاتش عنده بسهولة
دور و دور و دور لعند وصل لطرف خيط
وصله في الأخير أن فساد صفقاته و خساراته كلها وراها شخص واحد و هو رعد فاروق رزق الله
إلي مكانش الأمر صعب عليه بفضل نفوذه و علاقاته القوية هو و عيلته
و من وقتها و هو يدور و يبحبش بش يعرف رعد شن مازال يعرف أو على شن ناوي
و لأنه عارف علاقة رعد الوثيقة بسليمان و معرفته بيهم من أيام كانوا يقروا في الكلية العسكرية
قعد وراهم لن فتحي ذراعه اليمين جنّد واحد من إلي يشتغلوا عند سليمان و خلوه يخدم لصالحهم
و قدر يسمع وحدة من لقاءات رعد و سليمان في مكتبه
لما يتكلموا عن خطتهم للإنتقام من صالح العابد
و من يومها و بعد لا تأكد شكه فيهم قرر يرد لهم الصفعة بألم و عذاب أكبر
و لأنه الكلام إلي قاله فتحي بأنه انجابت سيرة الدكتور عيسى في سياق حديثهم و لأنه صالح العابد عارف أنه
عند عيسى سبب قوي في التحالف معاهم و هو خوه علي إلي مات في ظروف غامضة
و هو كان يقرأ معاهم في الكلية العسكرية
لذلك صالح قرر هالمرة تكون ليهم بالقاضية
هو صح مش عارف هما كيف عرفوا أنه سبب توريطهم بتهمة تجارة المخدرات لأنه وقتها حسسهم أنه معاهم و متعاطف مع قضيتهم و بيدير جهده يساعدهم
و اضطر يقتل علي أخ عيسى بعد لا عرف أنه كشف صالح العابد على حقيقته
و بعدها هما تم تهريبهم قبل تنفيذ حكم الإعدام فيهم
لكن القرار عنده حاسم
يتخلص منهم الثلاثة في خطة شيطانية
يلفظوا فيها أنفاسهم الأخيرة
قاطع تفكيره طقة الباب و خش عليه فتحي :
صالح باشا
صالح : هات إلي عندك
المافيا جماعة مالطا وافقوا يتعاونوا معانا
المقابل أنت تمشيلهم بضاعتهم هنايا
و الربح كله يتحول لحسابهم
يعني تتنازل عن نصيبك في البيعة
صالح : نتنازلوا نتازلوا علاش منتنازلوش
الدكتور غالي علينا و ولد بلادنا حقه غالي
مفيش بأس المهم التهمة تكون لابساته بالمضبوط
فتحي : كون هاني يا باشا
قريبا حتسمع على كل القنوات و وسائل التواصل الاجتماعي عن الجراح الليبي المتهم بتجارة الأعضاء
و إلي يعتبر عضو فعال في مافيا من أكبر المافيات المالطية
و بالنسبة للأفندي تهريب السلاح لتشاد و السودان عقوبته واضحة
العسكري إعدام طول
يقعد لنا رعد رزق الله مأعطتنيش تعليماتك مازال
صالح بحقد: هذا بروحه
نبيه قدام عيوني يمشي أشلاء
و أماليه ميلقوش شن يلموا فيه بش يندفن
تصرف على هالأساس
نبيهم الثلاثة يتعاقبو في نفس الوقت
رتب أمورك و استنى مني إشارة
فتحي : تم يا باشا
ما تبي شي ثاني
صالح : البنت الروسية إلي وصلت أمبارح
نبي نروح نلقاها تراجي فيا
ارفعها للفيلا معنديش خلوق نمشي للمزرعة
و زي ما متعود يا فتحي نبيها عروس
فتحي : مايهمك في شي يا باشا
هادم 🤬🤬🤬🤬.....
عارفات شغلهم عالمضبوط
صالح : مية المية أني ساعة و مروح
فتحي : أوامرك يا باشا
YOU ARE READING
حين يعصف العشق 💕
Romanceروايتي الأولى 😍😍 شخصيات روايتنا عايشين في 2 مدن ليبية، المدينة الجبلية الشامخة يلي سطرت قصص آمال وآلام ،، يلي كانت فيها نهاية حلم ،، وبداية حب❤ قصص حفرت بشموخ في جبالها وصنعت بإصرارها وديان جارفة زي طوفان انتقام آتي من بعيد... ومعالم حالمة حترسم...
