حين يعصف العشق 💕

الجزء الثامن عشر

الجزء الثامن عشر

يوم الجمعة
21 أغسطس

الساعة 45: 1 ظهراً

في حوش الحاج عبد الرحمن النعاس
الكناين فاطمة و غادة يطيبوا في غداهم إلي زي عادة أغلب سكان المدينة إلي هما فيها بازين

حماتهم كاميليا هيا و حسنية الشغالة يضموا في الحوش برا
و الصغار يلعبوا في الجنان و الرجالة يصلوا في صلاة الجمعة

فاطمة من لما جت لحوش شبانيها و هيا اطنفر و تتأفف و مش عاجبها الجو نهائياً

سألت غادة: غادة مقالتلكش خالتي بكري نجوى (حماتهم) أمتى بتجي؟؟
غادة: بكري نسمع في كاميليا تكلم فيها قالت لها بنجيكم العصر لابسة و واتية بش نمشوا مع بعض

و أنتي خيرك من الصبح لاوية بوزك؟؟ شن صاير معاك خيرك متعاركة مع كمال؟؟
فاطمة بهزوة : هو كمال من أمتى يعرف يعارك و لا يعرف يهش ولا ينش فرقت حاله ديما سلبي في كل شي

أني الجو إلي برا كله كله تبي الحق مش عاجبني توا حني علاش موليات زي الشغالات و الدكتورة الصيدلانية مرت الأفندي تهيج و جوها مليح و زيادة تمشي كل يوم جمعة لأمها و بعدين تجي للعرس من برا برا على سنقت عشرة
شن فيها الزايد علينا قوليلي تره !!
علاش قعدا لحد الآن مخشتش و عاونتنا في الكوجينة و التطييب؟؟

غادة: سبحان الله يا فاطمة أنتي راك تزني على خراب عشك و تحبي المشاكل و الله لو سمعاتك خالتك ماحيصير طيب و لا تسمعك كاميليا و الله لما تعاودها لعابد و لعمتي تعرفيها حشيشتها تشوشد و ماتنبلش في فمها الفولة و نصبحوا في قصة حني في غنى عنها عابد راهو مش زي كمال و أشرف يفوت عابد ماعنداش الريح وين يدور ولد خالتك و تعرفيه أكثر مني
و بعدين المرا قعدا يادوبها صكرت شهر يعني قعدة عروسة
و هذه أول مناسبة تحضرها و هيا متزوجة طبيعي تمشي للمزين و تجي أنيقة و حلوة لأنه العين كلها عليها
و لو على قصة أمها عارفينها مسكينة عزوز مقعدة و مريضة معندهاش من بيها تبي من يهتم بيها و يدير باله على صحتها و معندهاش حد يدير باله عليها غير بنتها الوحيدة هالة

لذلك معليشي شن فيها كان مشت لأمها و شافت شن ناقصها و اطمنت عليها إلي مافيهاش الخير في أمها يا فاطمة مافيهاش الخير في حد و عابد من الأول عارف الظروف و مقدرها و راضي يعني لو بتتكلمي و بيسمعوك حتفتحي على روحك جبهة و بتنكدي على روحك قبل أي حد ثاني بالله عليك سلم سليفتي استهدي بالرحمن و ماتدخليش في شي ميخصكش و بعدين كانك عالغدي أني نكمله أنتي ارتاحي و قعمزي هدرزي عليا بس

فاطمة: إيه بش كان خالتي خشت علينا و لقتني مقعمزة تاكلني بلا ملح و تطلعي أنتي الكنة الناشطة و الفالحة ماهو 😏😏

غادة تفاجئت من رد فاطمة لكن قصرت الشر
: توا أني هكي ربي يهديك و بعدين تصطفلي تبي تنوضي تخدمي باهي متبيش دبري راسك 😔