الجزء الحادي عشر💛
الساعة 4 مساء
في فيلا فاروق رزق الله
مقعمزات صفاء ورواسي ورغدة وسمر يشربوا في قهوة ويدردشوا
رواسي: يانا عليا لو يدري عنك خويا قعدة تشربي في قهوة
صفاء: والله مامني ،، ياخية خوكي قاعدلي عالوحدة حاجات واجدة يديرلي فيهن تخليك تنجني،، قعد دكتور نساء ودكتور تغذية
على هذي كوليها وهذه ممنوعة مزطلي كبدي
رواسي: خايف عليك خويا ومهتم بصحتك أنتي والبيبي
رغدة وهيا تضحك عليهم :
شايفاتك يا رواسي درتي فيها جو الصبايا إلي ماسكينها ورا نسوان خوتهن
رواسي وهيا تشقلب في عيونها: كني ياحنا
نقعد منهم نا قاعدة بعقلي خايفة عليها نا لا أكثر ولا أقل،، بنت عمتي قبل تقعد مرات خويا ونقعد صبيتها
رغدة : خلاص تو خلونا من دوتكن الواجدة
وخلونا مع الهبلة إلي رافضة تعدي معانا لتركيا تغير جو وحاولوا تقنعوها معايا
رواسي شافت لسمر إلي من أول التقعميزة تسمع فيهم وساكتة ومهدرزتش عليهم بكل:
ليش ماتبي تعدي معاهم والله نا لو كنت فاضية
ماضيعت هالفرصة
وأنتي راحة توا ومازال أكثر من 5 أسابيع لعند يبدأ الفصل الجاي تغيري جو وترتاحي
وبيعدوا معاكي رغدة وصفاء
رغدة: قلتها حتى نا ،،
ليا يومين من لما حكى معانا رضا ويبينا نعدوا معاه ونا ماسكة فيها وهيا رافضة رفضا قاطعا
ليش مش فاهمة!!!
رواسي : توا نا نبي نفهم يلي يشوف لهفتك لأوفي لما كانت هنا في آخر مرة جت فيها في الفرح
يقول أول متحصل فرصة تعدي حتعديلها
معقولة مش مرايفة عليها
سمر: والله مرايفة عليها وواجد أخرى
بس مش جاي على بالي
نعدي برا البلاد أصلا ،،
نبي نقضي العطلة هنا
مع العيلة نوم وراحة وبس
رغدة جت قعمزت جنبها
ولفت إيديها وحضنتها وهيا تترجى فيها:
بالله عليك عدي معانا نقضوا وقت حلو وااااجد
لو ماسافرتي معايا حنقعد بروحي
يعني خويا وأختك حيجددوا شهر العسل
ورائد أكيد مش حيفضى بيا الوقت كله
عدي معايا نصيعوا غادي ،، نلقولنا مهند أوغلو
ولا كمال بالي بيك يااااي تخيلي مورتي 😍😍
سمر بضحكة: هههههه ياقعادك تحلمي
رغدة وهيا ترمش بعيونها : وكني مانحلم قاعدة سنقولة وفري بالك نلقى نصي الثاني بعيدا عن الليبيين ورومانسيتهم المعاقة
هيا هيا مورتي بالله عليك وافقي وسافري معايا
بعدين رعد قال لو سافرتوا مصاريف الرحلة كلها عليا ،، شوبينق وجو حلو واجد نعدوا نفلسوا بيهم وتمت
صفاء بضحكة: رغدة حطت قدامك كل المغريات غر عدي معايا وبعدين رضا خدالك الموافقة من باتي وقال أنه ماعنده مانع
سمر بتنهيدة استسلام : خلاص خلاص موافقة نعدوا بس أول مانقول خلاص بنرجعوا لليبيا
نرجعوا على طول
رغدة قعدت فرحانة وحاضنتها بقوة: ناعليا منها أقنعتها وأخيرا وأخيرا
سمر وهيا تبعد في رغد عليها: بعدي عني خنقتيني خلاص
رغدة: رهف حتموت بالفرح لو عرفت أننا حنسافروا عندها
سمر : شن رأيك نخلوها مفاجئة ،،رضا يقول لرائد أننا مش مسافرين معاهم
لعند نوصلوا عنده ونفاجئوا رهف
رغدة بفرح: واااااو فكرة حلوة واجد خلاص
صفاء مرت خويا الحلوة قوليله يخليها مفاجآة
أنت تقرأ
حين يعصف العشق 💕
عاطفيةروايتي الأولى 😍😍 شخصيات روايتنا عايشين في 2 مدن ليبية، المدينة الجبلية الشامخة يلي سطرت قصص آمال وآلام ،، يلي كانت فيها نهاية حلم ،، وبداية حب❤ قصص حفرت بشموخ في جبالها وصنعت بإصرارها وديان جارفة زي طوفان انتقام آتي من بعيد... ومعالم حالمة حترسم...
