الجزء الواحد و الستون 💔
يوم الإثنين 6 مارس
الساعة 1 ظهرا
في المستشفى إلي راقدة فيها سمر
كانت معاها عواطف مرت رضوان ولد خالها
و شريفة مرت خالها
و سمر مازالت راقدة على بطنها حسب تعليمات الأطباء
و عواطف تساعد فيها تشرب في عصير طبيعي
عن طريق الممص 🥤🥤
سمر يا دوب شربت منه جغمتين
و معش قدرت تشرب أكثر
و عواطف تكلمت بمسايسة :
ليش بس كملي يا سمورة
و لا تبي رائد يقول أنه مرات خويا
ما حافظت على
الأمانة كيف ما أنا وصيتها
هيا حبيبتي عشان خاطري خودي شفطة زيادة بس
سمر : و الله ما ليا نفس يا توفي
ماليش نفس لا في إيكال و لا حتى شراب
حاسة وجع ظهري زايد عليا اليوم واجد
شريفة مسحت على كتفها بحنان :
طبيعي حبيبتي الدكتور قال لازم يخففوا
عنك المسكنات
عشان من بكرا تبدي في جلسات العلاج الطبيعي
و يعرفوا مدى استجابة عمودك الفقري
للعلاج و التمارين
المسكنات حيخلوكي طول الوقت فاشلة و أعصابك مرخية مش حتكون فيه نتيجة لأي جلسات
اصبري سمورتي أكيد ربي حيشفيك عن قريب
و سمر من كثر الوجع قعدوا دموعها ينزلوا في صمت
و عواطف و شريفة شافوا لبعض بحزن و يأس
شريفة مكانش عندها غير حل واحد
التفتت على شنطتها تبي تطلع تليفونها منها
على طقت الباب و أول ما عطت عواطف الإذن
لرائد إلي عرفوه من طقته فتح و خش:
السلاااااام عليكم
شريفة ردت عليه السلام و بعدين تكلمت :
طيب فيك لأنك جيت
ولد حلال و عمرك طويل
توا توا كنت حنتصل بيك عشان تجينا حالا
و أشرت بعيونها على سمر
و رائد قرب منها و قعمز على ركابه مقابل وجهها
و باس على رأسها و قعد يمسح على شعرها
و بيده الثانية يمسح في خدها الباين عليه من أثر الدموع :
كنها بنيتي السمحة بس
شن يلي مضايقها عمر رائد قوليلي بس؟
و سمر قعدت تبكي بصوت منخفض:
ظهري يوجعني يا رائد ..
وجع مش طايقاته خلاص و لا قادرة نتحمله
و رائد قعد يمسح بيده على طول عمودها الفقري
بحنان و لهفة :
بعيد الشر عنك من الوجع يا قلبي
سلامتك يا عمري بس
معليش حبيبتي نحنا أمس شن اتفقنا لما خبرنا
الدكتور أنه حيخفف عنك المسكن
قلنا حنتحملوا شوية عشان نشفوا بسرعة صح
و سمر جاوبت بحروف متقطعة: ص....ح
و رائد طول باس رأسها ثاني :
خلاص حبيبتي أنا كنت ناوي نعدي نشوف
لو محتاجين شي من الفيلا نجيبه هنا
و نجيب رهف معايا
بس مادام حبيبة قلبي موجوعة
أنا حنقعد معاكي هنا و ندير بالي عليك
و نفوتوا رهف لعند يخف الألم و بعدها نبعت حد يجيبها
شريفة شافت لعواطف :
صح بلاش منها رهف توا
مش حتتحمل تشوف سمر تتوجع و تقعد تبكي حتى هيا
خليك مع بنيتك هذي
و أنا حنعدي نشوف بنتك هاذيك
هيا عواطف نعدوا و بعد الظهر إن شاء الله
راجعة
لو احتجتوا شي اتصل بيا رائد
و رائد تلفت على أمه :
خلي السائق يجيبك بعدين
شريفة: ليش السائق مافيش داعي
أنا حنجي وحدي مش من بعدها المسافة
ليا واجد ماطلعت سيارتي من القراج
و بعدين ناقصتني كم حاجة ليا
بنعدي ندير شوبينج
YOU ARE READING
حين يعصف العشق 💕
Romanceروايتي الأولى 😍😍 شخصيات روايتنا عايشين في 2 مدن ليبية، المدينة الجبلية الشامخة يلي سطرت قصص آمال وآلام ،، يلي كانت فيها نهاية حلم ،، وبداية حب❤ قصص حفرت بشموخ في جبالها وصنعت بإصرارها وديان جارفة زي طوفان انتقام آتي من بعيد... ومعالم حالمة حترسم...
