حين يعصف العشق 💕

الجزء الخامس و الثلاثون

الجزء الخامس و الثلاثون

يوم الجمعة 11 مارس

الساعة 10:10 صباحا
حوش شكري

صباح الخير عميمة
أماني تصفي في الشاهي للفطور تلفتت عليها :
صباح النور
تعالي سيلا فيسع نفطروا توا كلمتني كريمة بنت عمتي للاهم قالت يوتوا في أرواحهم جايين
أسيل فرحت : حييييه عالجو
قصدك اليوم بيجونا؟؟
غريبة مكلموكش أنتي و لا عمي
قبل يتصلوا بيكم من قبلها بأيامات
أماني : قالت أمس عشية طلعت سيارتهم من الورشة
و قعدت تحاول تتصل منطقتهم مفيهاش تغطية شكلها
و أصلا أكثر كلامها مسمعتاش يقطع
المهم فهمت أنهم جايين اليوم و خلاص
أسيل : كلمتي عمي؟؟
أماني : إيه كلمته هيا فيسع خلي نفطروا
و أنتي حوسي في الحوش
أسيل مشت لحافظة الخبزة خدت منها و قعمزت عالكرسي و خدت من الجبنة المحطوطة عالطاولة :
باهي بالك فيه حاجة ناقصة للغدي و لا كيف بتتصرفي
أماني : عندي لحم يسد داساته في الفريز
نديرو غدانا كسكسي
و نفكرو نديرو حاجتين حارات معاه
و وصيت عمك يجيب فواكه و مشروب و حلويات
المهم منبيش نوصيك
عراكات و عار مع حكمات قدامهم منبيش
عيب سيلا أنتي توا كبرتي
و مفيش داعي يشوفوا عارنا كل مرة يجونا
أسيل تشرب من طاستها الحليب و شاهي
و ضحكت بهزوة :
على أساس هما مش عارفين حالنا
أماني جت قعمزت جنبها :
عارفتهم عارفين
و بعدين هما مهمش برانية لكن عيب ،،
تقعد في وجهها هيا العافنة
لكن أنتي لا لا هكي ربيتك و لا هذا طبعك
أسيل باست خد عمتها و ضحكت :
يحليلي كيف تلسني فيا و تلخبطي فيا ،،
خلاص حاضر نوعدك نقعد عاقلة قدامهم
لكن عاد كان حرقت لي دمي مفيش بأس
بحاجة هكي من تحت لتحت تبرد على قلبي
و أماني هزت رأسها بيأس :
مفيش فايدة فيك بكل أنتي،
أني شن نقول و هيا في شن تفكر
خلي نمشي انوض بيسا ندوشلها و نفطرها
بش نلهى بالغدي و أنتي خفي روحك فيسع
بش تحوسي عالحوش و تجي تعاونيني

🌿🌿🌿🌿🌿🌿🌿🌿🌿🌿

الساعة 12:35 ظهرا

كانت طالعة من دار عزوزتها بعد لا سألتها على مكان حاجة في المطبخ ،،
و هيا ماشية في الممر خطمت من جنب دار سلفها
و كان بابها مردود وسلفها كان يتكلم بصوت واضح فيه الإنفعال
هالشي خلا فضولها يغلبها
تلفتت وراها ملقتش حد
قربت من الباب بحذر و قعدت تسمع
عابد : قتلك منقدرش نجي باش تفهمي
سفراتي كثروا و معش نقدر نتسبل
بالخدمة أكثر من هكي خيرك معش تفهمي عليا
سكت شوية يسمع في الطرف الثاني
و بعدها تنهد
عابد : أوف أوف رأس مالكم الدموع أنتم
عارف عارف حتى أني مشتاقلك
ضحك بلطف :
خلاص بري مع خالتك و حنحولك فلوس يسدوك
غيري جو و أشري كل يلي في خاطرك
حاضر حاضر معش نتأخر عليك بالمكالمات
حاضر حنتصل بيك كل منقدر
باهي فهمت فهمت يا روحي مش كل منقدر
حنقدر غصبا عني و نكلمك كل وقت
يلا يا روحي خليني نخش ندوش
بنمشي للجمعة عارفة بوي ميحبش يمشي بدون منكونوا معاه أني و خوتي
باهي هي سلامات توا باي باي
باهي حاضر حاضر باي باي قلنا حاضر و باي
و لوح التليفون على السرير و جي بيطلع
و فاطمة لما سمعت صوت خطواته
طالع هربت تجري بش ميشوفهاش
و هيا قلبها ينبض من كثر ما جرت و من شدة فرحها بلي سمعاته
خشت للمطبخ و عيونها تلمع خبث و شر و شماتة