The Loudest Silence [Completed]

Chapter 12

"ငါနဲ့လွှမ်းက ချစ်သူတွေပါလို့ မင်းကို ဘယ်သူပြောတာလဲ။ ငါတို့နှစ်ယောက် ဘာမှမဆိုင်ဘူး။ ဘာမှမဆိုင်ပါဘူးဆိုတာကို မင်းတို့အကုန်လုံး နားလည်အောင် ငါ ဘယ်လို သက်သေပြရဦးမှာလဲ"

ဇာဏီ တကယ် စိတ်လွတ်သွားမတတ် ပေါက်ကွဲနေခဲ့ရသည်။ သူတို့နှစ်ယောက် ဘာမှမဆိုင်ပါလျက်နှင့် လွှမ်းကို သူ့ကောင်လေး ထင်ပြီး သူ့အဖေ ရှင်းထုတ်ခဲ့သည်။ ရှေးက အလိုတူအလိုပါ ဖြစ်နေမှန်း သက်သေတွေများစွာ ရှိနေလို့ ထိုညက ရှေးအတွက် သူ လွှမ်း၏ အလောင်းကို မဖျောက်ပစ်ရုံတမယ် လုပ်ခဲ့မိသည်။

သူနဲ့ လွှမ်းကို အကုန်လုံးက အထင်လွဲနေခဲ့ကြတာပင်။

"လွှမ်းက ငါ့ကို ကြိုက်တာမဟုတ်ဘူး၊ ငါ့ချစ်သူလည်း မဟုတ်ဘူး။ လွှမ်း သဘောကျနေတာ ရှေးကိုကွ။ လက်စသတ်တော့ မင်းတို့ညီအစ်ကိုနှစ်ယောက်လုံး ငါ့ညီကို လာချိန်နေတာပဲ၊ ငါ မင်းကိုတောင် အတော်သည်းခံနေရတာ!!!"

ဒီတစ်ခါ အံ့ဩသွားရသူက ရှေးနှင့်ထိုက်ပင် ဖြစ်သည်။

မင်းမဟော်ထိုက် သူ ဓာတ်ပုံတွေ မြင်လိုက်ရကတည်းက တစ်ခုခု လွဲနေတယ်ဆိုတာတော့ နားလည်ထားပြီးဖြစ်သော်ငြား ဘယ်လိုပဲဖြစ်ဖြစ် သူ့ညီက ဒီမိသားစုလက်ချက်ကြောင့် သေဆုံးခဲ့ရတာတော့ အမှန်တရားပင်။

ရှေး ထိုနှစ်ယောက် ထပ်ပြောနေသည့် အချေအတင် စကားတွေကို နားထောင်ပြီးသကာလ အံ့ဩစွာပင် ထိုက်က အရှေ့ဟော်နန်းသခင်ဆိုတာ သိလိုက်ရချိန်၌ မသိမသာ နောက်ဆုတ်ဆုတ်သွားမိသည်။ သူ ဘာကြောင့်မှန်းမသိ ထိုက်အား စတွေ့ကတည်းက သဘောမကျတဲ့အပြင် ထိုလူ သူ့နား နီးကပ်လာချိန်တိုင်း အရှိန်အဝါ တစ်ခုပါလာသလို ခံစားရတာမို့ သူ ထိုအစ်ကို့အား ကြောက်ပင်ကြောက်နေခဲ့မိသည်။

"ဟေ့၊ မင်းရပ်နေစမ်း"

ဒိုင်း!

သူတို့နားက ပြေးတော့ဖို့ လုပ်နေသည့် ရှေးကို ထိုက် သတိထားမိသွားခဲ့တာမို့ ထိုက် ရှေး၏ ညာဖက်လက်မောင်းကို လှမ်းပစ်လိုက်တော့သည်။

သူ့ညီလက်မောင်းထဲ ကျည်စိုက်ဝင်သွားချိန်၌ ဇာဏီ ထိုကောင့် ဘယ်ဖက်လက်မောင်းအား ဒေါသတကြီး ချက်ချင်း ပြန်ပစ်လိုက်မိသွားခဲ့သည်။