قوقعه الجمر

ح - ٧ - ( الجزء الثالث )

- باجي فوزية تكول تعاي جي علينا خطار

- منو ال جي علينا

- زلمه وجهال

- منو هذا الزلمه

عوجلي شفته الجوة وفتح جفوف ايديه
- ما عرفه

-شنو هذا وسخك ... شبيهن ملابسك

- جنت العب طوبة بالساحة

- تعال اعاين ايدك شلون صارت

صفك اجفوف ايديه بقوة
- مااا طيب الله وكيلج شبيب إيده خبيثه

-شنو هذا طول لسانك
شبيب شنو ...كول يابه

- جدتي تكول شبيب ايدة خبيثه

تجين لو ما تجين باجي تنطرج

- روح كبالي هسه أبدل واجي وراك

رجع يركض لباب الشارع
التفت عليه - عود مو ما تجين
أهلنا طابخين خوش غده

ضحكت على سوالفه ولسانه المشرشح
- هسه اجي وراك

رجعت ناديت عليه - تعااال حويدر

- ابشري

- روح نادي عمك معن من المسجد

- رجليه وسخه شون افوت

- من الباب نادي عليه

طلع يركض مو ولد لا والله شيطان وكح ولسانه مشرشح...

وره شويه جي معن
- هاا يابه

- أهلنا جاي عليهم خطار وباجي فوزية طرشت حويدر عليه تريدني امشيلهم

- روحي يابه ... اخذي أبرار وياج

اكلج أوس وين

- مشه لدار خالته ..

- روحي يابه وسلمينا على الاهل

كمت بدلت ملابسي لبست جبتي والنقاب
وابرار أيضا بدلت ملابسها ولبست حجابها

وصلت لدار أهلنا شو هدوء

جنت متوقعه عمي ثائر ( زوج سماح ) الجاي علينا

دخلت من المطبخ
لاكتني غيدة واكفه على طباخ تراقب كدوره الاكل
- هلا ب أم ضحى
منو يمنا

- هلا بيج
ابو شجاع وجهاله

- أبو شجاع منووو؟؟

- رجلج القديم

فزيت من جوابها ... وليش طرشتوا عليه

- جهاله رايدين شوفتج

جمدت ،، عقلي وكف للحظات عن التفكير
هسه شسوي ...
عادي ادخل واسلم عليه
لو حرام ما يصير اسلم لان اني على ذمة معن ..؟؟

كوثر جت تركض سلمت عليه

غيدة شجعتني ادخل للصالة ليش خايفة ومتردده
أهلنا كاعدين يمهم