Be My Side [COMPLETED]

Part 20

Pete ;

Vegasနဲ့အတူနေရတာက ကင်မရာရှေ့မှာမမြင်နိုင်တဲ့ သူ့ရဲ့တခြားပုံစံတွေကို မြင်နိုင်ဖို့ရန်အတွက် အခွင့်အရေးတစ်ခုရလိုက်သလိုပဲ။ Vegasက ငါတစ်ယောက်တည်းကိုပဲ သီးသန့်အနေနဲ့ ဒီလိုပုံစံတွေမြင်စေတာလားတော့မသိပေမယ့် အရင်ကငါသိထားတဲ့ သရုပ်ဆောင်Vegasနဲ့ အခုငါသိလာရတဲ့Vegasက အလုံးစုံကွဲပြားနေလေတယ်။

လူတွေသိထားကြတဲ့ မျက်နှာထားအမြဲတည်တဲ့Vegasနဲ့ ငါသိလေတဲ့ အမြဲတမ်းပြုံးနေတတ်တဲ့Vegas ၊ လူတွေသိထားကြတဲ့ စကားနည်းတဲ့Vegasနဲ့ ငါသိလေတဲ့ စကားများလွန်းတဲ့Vegas ၊ လူတွေသိထားကြတဲ့ အိမ်မှုကိစ္စမနိုင်နင်းပဲ ရှုပ်ပွပြီးနေတတ်လောက်မယ့်Vegasနဲ့ ငါသိလေတဲ့ အိမ်ကိုသန့်ရှင်းအောင်ထားတတ်ပြီး ခေါက်ဆွဲပြုတ်တစ်မျိုးတည်းကို မရိုးနိုင်တဲ့နည်းအမျိုးမျိုးနဲ့ချက်ကျွေးတတ်တဲ့Vegas ။ ဒီလိုVegas ဟိုလိုVegasဆိုပြီး Vegasရဲ့ကိုယ်ပိုင်ပုံစံက အမျိုးမျိုးကွဲပြားနေလျက်ရှိတယ်။

ဘယ်ဟာကအမှန်၊ ဘယ်ဟာကအမှားဆိုပြီး ခေါင်းမူးခံလိုက်တွေးမနေတော့ပဲ ငါ့မျက်စိရှေ့က Vegasရဲ့သွင်ပြင်ကိုသာ အမှန်လို့ ငါယူဆထားလိုက်တယ်။ ဘာလို့ဆိုရင် ပြုံးနေပြီးစကားများလွန်းကာ အိမ်မှုကိစ္စနိုင်နင်းတဲ့Vegasကို ငါတအားသဘောကျတာမို့။

အိမ်ရှေ့ဧည့်ခန်းက စားပွဲကိုရှင်းနေလေတဲ့Vegasက ငါ့ရဲ့ထူးဆန်းတဲ့အပြုံးကို သတိထားသွားမိလို့ဖြစ်မယ်။ ငါ့ကိုချက်ချင်း လှည့်ကြည့်လာခဲ့တယ်။ ရုတ်တရက်မို့ ငါလည်းအကြည့်ကိုမဖယ်ခွာလိုက်နိုင်ပဲ သူခိုးလူမိဖြစ်သွားလေတယ်။ Vegasရဲ့အပြုံးကိုငါမြင်လိုက်ရတော့ စနောက်ခံရတော့မယ်ဆိုတာကို အသေအချာသိသွားရတယ်။ တကယ်လည်း Vegasကစနောက်လာတော့တာပဲ။