لكفت الأوراق والقلم الكدامها
وطشرتهن بوجهه
-احتررررمي حالج خاتونه لو أشك حلكج
انتي العجمية مو احنه ال......
معروفين بالاسم
وصيتنه ما يقبل القسمة على أثنين يالمثقفه يالواصله
هي بلشت تصرخ
-اطلعي بررره شلون ناس همج رعاع
جايه من وره الهوش وتعلمني بشغلي
سليطة اللسان
بسمه طلعت واني أمشي وراها
بطلعتي التفت عليها ومليت وجهه تفال
-هذا مستواج يا قذره المنطق
عفتها تصرخ وتغلط وطلعت
اعاين بممر المشفى كل الناس يعاينون عليه
من طلعت من غرفتها
الحقير تصرخ و تغلط حسها عالي
عاينت بسمه واكفه يم أمي ومريم
وكلهن يتباجن
اني منا اعصابي تفور بسبب هاي الحقيره
ومنا حال بسمة دمرني
طلعت من المشفي أجرت تكسي
وناديت عليهن مدوهنات وحايرات بزمانهن
رجعنه لدارنه
و يايمه فوزية كسرت خاطري
من رجعنه ودخلنه من المطبخ
و لكيناها واكفة تطبخ الغده
ما عاينت بوجة أمي زعلانه من يمها
سألت بسمه
-ها يمه شكالولج
بسمة
-دكتوره كتبتلي على عمليه
تكول لازم يرفعوا مو زين يبقه
صايره بي كتل وباجر تصير أورام سرطانية
هي جمدت و بس تجول بنظرها بوجوهنه
صرخت
-ياااا خويه يا فيصلللل
و دموعها بساع بساع كوطرن على وجهه
تركتنه بحالتنه وصعدت فوك
اجتنه حالة هستيريا وكلنه كعدنه نتباجة
نهضت كفاح و كملت كدورة الغدة
وأمي تعصبت ودك ولطم
للعصر أجة ذيب من دوامه شايل خشمة
وجافي وجهه،،،لا سلام ولا كلام
يريد يصعد فوك
امي نادت عليه
-تعااال يالحيد وعاين الحالي
هو جاوبها بصوت ضايج مخنوك
-خيرج يمه
عمشه
-ولك اختك ماهي زينه
لزوم تدخل للمشفي ويسولها عمليه
اختك انهجمت أيامها
-ولك لا ردنه من جيبك فلوس
ولا ردنه من جدرك غموس
ردناك يايمه يا ذيب هيبه وناموس
-هجي يمه ترفع خشمك علينه
وتتعدانه لا سلام ولا كلام
-هجي يمه لا تنشد على خواتك
ولا تكول يمة شلونج
-ولللك يمه فيصل تعال عاين حال بنيتك
لا عدها أخو الينشد عنها
ولا عدها أبو حالها من حال البنات يحميها
ذيب
-يمه رحمة لروح موتاج شكو
أني جاوبته وحجيتله بالمختصر حالة بسمة
