شرار الفجر

بارت (٤٠) كيد النساء

🍀QABAS ADAM🍀
فهد وهو يقرأ بالرساله انفجرت عروك راسه وشاط من الغضب وشياطين الدنيا كلهه تتكمز كدام عيونه وصار كتله من غضب بس شلون بيه وباجر الجمعه الفجر طياره عمه ولازم هو اللي يجيبهم من المطار بقه يصبر نفسه ويهدي بروحه ودك الف مرة على الماسنجر وماكو رد يدك ومحد يشيله بقه يفور وياكل بروحه وهو يتوعد لشرار ولاهله وانه راح ياخذهه من عيونهم ويكسر خشمهم مثل ماهم ذلوهه واذوهه وبنفس الوقت فرح بفجر لان استنجدت بيه وما عدهه غيره وتريد يحاميلهه ويدافع عنهه وفرح انه هي ممتمه زواجهه وي شرار لان هو تمنى يكون اول رجل بحياتهه وكال بداخل نفسه هينه بس ارجع عمي من المطار واطمن عليهم واطلع بوجهي للبصرة واكلبهه عليهم كلاب

ام فجر جهزت كلشيء وحضرت نفسهه وقلبهه يرجف فرح لان تشافى رجلهه ولان قربت شوفت فجر وهي تحضر كلشي وترتب ادويه وعلاجات زوجهه واتصلت بالفندق وطلبت تكسي للمطار بالموعد المحدد ونامت ووقتت التلفون ونامت وهي مليانه تفاؤل وتحمد الله وتشكر فضله وتعرف انه فهد ينتظرهم بالمطار لان هو اكد عليهه هالشيء وفعلا ثاني يوم توجهو للمطار ونزلت بامان طيارتهم ببغداد بموعدهه وبمجرد ما ختمو وطلعو لكت فهد بوجهه لان عنده علاقات و معارف هواي وبسرعه سلم على عمه اللي تفاجأ كلش من شوفته واستغرب وكان بعده بالعربانه لان الدكتور كال بعد ميصعد بالطيارة وقت طويل ميصير يمشي على رجليه ويتعبهم الا ثاني يوم و لازم يسوي تمارين قبلهه اما ام فجر فرحت بفهد كلش سلم عليهم و صعدهم بالسيارة و عمه يسأله شلون عرف بجيتهم وهو رد بهدوء افأااااااااااااا عمي انت صار هواي قاطع ويايه واني دورت وسالت ربعي بالداخليه وعرفت وين بيكم واجيتكم اكثر من مرة للبيت وماكو رد ورحت لمدرسه ام فجر وطلبت رقمهه من المديرة واتصلت بيهه وعرفت بشغله عمليتك ورجعتكم اليوم وجيتك يعمي ما تريد نتواصل وياك طبعا هذا الكلام كله تاليف حتى لا يخلي عمه يعرف باتصال ام فجر وطلب المساعده منه وهم ما حسسه انه يعرف بمشكلتهم و صلهم للبيت و العم كان كلش تعبان ومرهق واول ما وصل صار ليمونه اصفر وجهه من التعب وتخربطت اوضاعه و هالشيء تعرفه ام فجر لان الطبيب كال اذا تعب راح يتخربط ودخلو للبيت اللي كان وسخ وتعبان لان صار فترة تاركينه وفهد يعرف انه البيت اكيد مابيه مسواك بمجرد ما دخلو راحت ام فجر شال فراش غرفه نومهه وخلت فراش جديد وفهد ساعد عمه اللي اخذ مسكنات قويه ونيموه على الفراش ونام بسرعه وام فجر بلشت تنظف بالبيت وترتب بيه فهد استاذن وكال رايح للسوق وهالشيء قهره كلش لان ميكدر يروح للبصرة اليوم ولازم يأجل روحته وعمه وضعيته ممستقرة والبيت فارغ ولازم يروح يتسوك وهالاشياء دتاخر انتقامه تسوك كلشي وجايب كل احتياجات البيت ودخل وعمته تتشكر منه وهو يرد عليهه عمه هذا بيتي وهي ترتب بالاغراض سالته عمه ماكو اخبار من فجر هو قدر وضعهه وخوفهه على بنتهه وتوترهه على عمه ما راد (يزيد الطين بله ) كال عمه بخير ومتواصل وياهم وبس يرتاح عمي اخذك ونروح عليهه وهي تتشكر منه انه بالمطار مجاب طاريهه وهو يضحك عمه لا تخافين ما اخليك تتندمين لان اختاريتيني سرك