شرار الفجر

بارت (٦) المصائب لاتاتي فرادا

🍀QABAS ADAM🍀للكاتبه
واني ارجف من خوفي بعد تقريبا ساعه وربع خفت لا اهلي يجون وينصدمون وبابا مريض وتاكدت انه انكشر وراح لان انتظرت هواي طلعت فتحت باب الكليدور وركض اخذتهه وقفلت الباب بس دقات قلبي طبل وارجف وظميتهه بالجنطه بنص الكتاب وي القديمه اللي اصلا ما فتحتهن وقريت كلمه منهن لان روحي لاعبه منه وكارهه نفسي وقررت يجي بابا واطمن عنه ويرتاح واسولفله وهو يتصرف ورحت للمطبخ ما عجبني ولا بنفسي اكل شيء منا بالي يم بابا ومنا خوفي من هذا ابو وجه الاحمر البيت نظيف ومرتب صعدت لغرفتي وبقيت اقلب بالكتب ومالي واهس اقرا وغفيت لان البارحه بليل ما قدرت انام من خوفي وقلقي وحلمت بابو وجه الاحمر نار وتشتعل بيه ووجهه يوكع من الحرق ويعيط ولازم ايدي وطرف ثوبي اشتعل نار منه وهو ديموت وماهد ايدي ابد واني اطفي بطرف ثوبي واعيط وفزيت اعيط ياربي ارحمني يااارب نزلت واني ارجف شربت ٣ اكواب مي جرة وحده واحس النار بصدري اللي شفتهه بالحلم وايدي ترجف وسمعت الباب تنفتح وكمزت من الخوف احسه هو راح يدخل عليه شويه سمعت صوت اهلي ورحت اركض شمرت نفسي بحضن بابا واشبك بي هو خاف كال بيك شيء بابا احجي اني شفت وجوههم مخطوفه كلتله لا بابا خفت عليكم وهاي اول مرة بعمري اكذب على اهلي جرني بابا وكعدنه ماما عيونهه حمر مبين باجيه كالت فجر ماما خلي ابوك يرتاح وطلعي صدر الدجاج من الفريز اسوي لابوك سوب ركضت بسرعه طلعت الصدر وبابا راح لغرفته وماما رجعت تشتغل بالمطبخ سألتهه شبي بابا كالت قلبه شويه تعبان بس لتخافين ان شاء الله يصير زين بس عمليه صغيرة نسويله ويكوم بالف خير باذن الله اني انهاريت من البجي وماما حضنتني وتهدي بيه تكول الدكتور طمننه وكال لتخافون سهله باليوم اسوي ( ٥ ) عمليات من هالنوع بقيت ابجي بس ماما كانت حازمه وكالت قومي غسلي واقري وما اريد بابا يشوفك تبجين او يحسك مو زينه والدكتور اكد على هالشيء اهم شيء حالته النفسيه لان هو ياخذ القوة من عدنه احنه بس اله توضي وصلي وادعي الله يقوم بالسلامه بعد اسبوعين عمليته ولازم ياكل زين ويتقوى حتى بالعمليه ميتاذى اني سمعت كلامهه وتوضيت وصليت واني على السجاده افكر ماما وبابا ميكدرون يتحملون هيك خبر مني شلون ربي انت حلهه من يمك ياالهي وقررت اسكت ما احجي (وهذا اسوء قرار بوقتهه) لان ماما بيهه اللي مكفيهه وبابا صحته متتحمل مغثه ابدا ولازم اصير قويه واني اواجهه واخليله حد لحد ميكوم بابا بالسلامه كعد بابا ورا الظهر واكل شويه سوب وقطعه خبز وزلاطه شيء قليل بضغط من امي وتقنيعهه واني اباوع عليهم ياربي لتشوفني بيهم مكروه ورجعت اقرا بس بالي مو يم الكتاب اصلا بس فاتحته علمود اهلي ليحسون عليه ثاني يوم الصبح رحت للمدرسه كالعاده وبقيت لازكه بالمدرسه وامشي يمهه وكان واكف ويحجي بالتلفون ويقصدني ويكول انت ليش متجاوب هاي رسالتين ادزلك فضهه عاد مو لهالدرجه واذا مترد هالمرة بالله اجيكم للبيت واكعد كبال اهلك واسولفلهم عليك اني هنا قطرة دم احس مبقت بيه دخلت للمدرسه مرعوبه وارجف ولا عندي احد افضفضله او اشكيله بالفرصه ابقى كاعده بالصف ما اريد اطلع مالي واهس وميته جوع بس مالي نفس اكل شيء بقيت لوحدي كاعده بالصف ودخلت هاي المكروهه ام شعر الاصفر شافتني كاعده اتفاجأت ورادت تطلع صحتهه كلت احجي وياهه بلكي تقنعه يعوفني وكلتلهه عفيه ولو اني ما اعرف اسمك كالت اسمي سهى كلتلهه فدوة سهى خلي هذا الولد يعوفني والله والله ما عندي شيء وياه وهو يلاحكني كالت غير عندك بخت وحظ خمو مثلي مقاول يلعب بالفلوس لعب ما شفتي سيارته ويركض وراك لو مني ومنك اخلي يتزوجني اشو جمال وشاب وجماله فلوس شتريدين بعد لا وكاتل نفسه عليك كتل كلتلهه انت مو طبيعيه لا اريد فلوسهه ولا شبابه ولا شيء منه اخذيه وخلصيني كالت شفايتلي بس هو المصخم شافك واخترع ما ادري ظفيرتك لو بياضك ولو هسه اجيب بوستيجه اطول من ظفيرتك والله اني حتى احلى منك كمت ودموعي تجري كلتلهه انت احلى المدرسه كلهه بس الله ينطيك خلصيني منه كالت دروحي تبيعن ثكل وتكسرن اكبر راس والمدرسه كلهه تحلف براسجن حظك اعلى من برج خليفه دروحي واحنه يركضن ورانه المدرسات يمسحي كحلتك يا ضمي شعرك وكصي اظافرك شلون حظ مطركع صدك نسيتيني المدرسه نور ام الرياضيات تريدك بالعجل دوختيني ونسيتيني خفت لا بابا بي شيء وخابرو عليه لان هي ست نور ترجع ويايه بالخط وركض نزلت ادور عليهه كالت اني مدازه عليك رجعت واني متفاجأه ليش تكذب عليه بده الدرس ونسيت كلشي رجعت للبيت وما شفته بالرجعه لها الغثيث الله يخلصني منه على اهون سبب ارتاحيت شويه ودخلت اطمنت على بابا لان كان هو وماما ماخذين اجازة يرتاحون دخلت وبوست بابا واشاقي اكوله انت تاخذ اجازة ومرتاح انت مو مريض يمكن هاي علمود الاجازة تكول مريض هو ضحك وكال لا اريد اشبع من هالقمر القدامي اخذت اجازة بدلت وتغدين لان صار يومين ما اكل زين واليوم مرتاحه لان ما شفته وخلصت بلكي الله ينكشر وما اشوفه بعد بس ماما وجهه مو تمام تغدينه وسالتهه بيك شيء ماما كالت لا بس بابا قال امك انغثت لان بهالايام خطابتك كثرانين قبل كم يوم ابو الاسواق واخوهه لست ود واليوم جايك مهندس ابتسمت واني اقول لبابا لا بابا اني اريد طيار علمود اسويهم سيت وضحكت ماما كالت لا بس مو انغثيت بس هالمواضيع تاثر على دراستك مو وقتهه هسه باخر مرحله بالجامعه اقبل بهالسوالف مو من هسه بابا جاوبهه قابل هي دتدز عليهم يا غاليتي هم يشوفوهه ويجون يعني اليوم المهندس مو شايفهه يم المدرسه وسائل علينه وجاي هو الذهب الناس تدوره ياعيوني وبنتك شاطرة وتعرف شلون تفكر من هي صغيرة ربي يسلمهه وحضنني كلتلهه ماما اني ما اعرف احد قالت اي ولد مهندس لازم مشروع مال مجاري بشارع مدرستكم هنا اني نشف دمي واحس صفر ضغطي بسرعه لحكت على روحي لينتبهون وكلت لبابا وماما اني ما افكر بهالخرابيط بعدني صغيرة ومثل متكول ماما اخلص كليتي ويصير خير وكمت حتى مكملت غدايه وبالرغم كنت ميته جوع صعدت ودموعي تجري واني ارجف ياربي هذا الصبح هدد يطب بيتي ويكعد وي اهلي الظهر نفذ ياللهي شلون وبابا وجهه كركم مريض خاف احجيله يتخربط وماما بس احجيلهه يبين عليهه وبابا يعرف لان متعرف تظم عليه ياارب خلصني منه ياللهي بقيت حايرة وارجف ارجف بس حمدت الله وشكرته الف مرة من تذكرت باجر جمعه ماكو دوام وارتاح والله يحلهه فكرت لو عندي اخ واشكيله كان راح كسرة او كان اصلا ميقدر يحاجيني لان اكيد بوديني ويجيبني اوووف الحمد لله يارب على قسمتك بقيت افكر وافكر ونمت بدون ما احس وثاني يوم جمعه كلت ارتاح ونزلت الصبح بعد الصلاه لان متعلمين على كعده الفجر ورحت يم ورداتي ونباتاتي واحجي وياهن واشكيلهم مثل اخت واشكيلهه واعتذر منهن لان صار كم يوم ما جايتهن عقلي قام ميستوعب اللي داعيشه اني اللي كنت مدلله من بابا وماما عايشه مثل الاميرة هسه وفجأه كل هالمصايب تنزل عليه بابا مريض وراح يسوي عمليه وعمري كله اذا قال راسي يوجعني اقوم ارجف خوف عليه هسه انوب عمليه وهذا المحروك الله يحركه الوقح اللي دخل نص بيتنه وبدون ميخاف ولا يحترم شلون ياارب حلهه من عندك بعد ما كملنه الريوك واني وماما نرتب بالبيت وبابا يباوع اخبار ندكت الباب اني خفت بابا طلع فتح الباب ودخل علينه وجهه اصفر مخطوف ماما سألته منو كاللهه هذا المهندس اللي البارحه جانه لا وجايب وياه رجال شنو البارحه كلامي ما فهمه من كلتله بنتي صغيرة ما ازوجهه واليوم جايني وجايب هالرجال شنو القضيه البارحه وحده طلعته بادب اليوم
🍀QABAS ADAM🍀للكاتبه

يارب عجبتكم القصه وطريقه سردهه واي نقد اني جاهزه ويتبع بقيه القصه ..... لاتنسون التصويت ⭐شكرا الكم .