شرار الفجر

بارت (٥) وسط النار

🍀QABAS ADAM🍀للكاتبه
حسيت فعلا ما اكدر ابقى بسرعه نزلت وكعدت بالحديقه مال المدرسه وكانت هدوء ما بيهه احد لان الكل بالدرس والكتاب بايدي اللي بيه الظرف من خوفي جبته ويايه وخفت لا احد يشوفه احس الناس كلهه تعرف اليوم جايتني رساله من ولد واني متاكده من ابو وجه الاحمر لان مشايفه غيرة ولا اعرف احد غيرة بحياتي كلت خلي اوديهه لبابا وهو يعرف يتصرف واتقززت انه افتحهه وباوعت على الظرف احمر مثل وجهه كرهت حتى اللون الاحمر وقررت ما اعرف شبيهه ولا افتحهه وبقيت كاعده والحمد لله ورا درسين خلص الدوام وشلت جنطتي ورحت للادارة اخاف اطلع وحدي  انتظر مدرستي وفعلا طلعت وبسرعه صار بوجهي ومبتسم ويأشر بعيونه بحركات مقززة يعني قريت الرساله وعرفت شبيهه وصار تواصل فكرت اشمرهه بالكاع وادوس عليهه بس شفت هواي طالبات واكيد يشوفوني وانوب يكولون اني انطيته رساله مو دارجع رسالتي دنكت وعبرته بدوت ما اباوعله وحتى كتمت نفسي شكد ما اكرهه وكرهت الهوى اللي حواليه وافكر ما عندك اخت ام اهل ربوك علمود انه بنات الناس مو لعبه او على الاقل اللي تقبل هالشي دزلهه رساله مو اي وحده طبعا البعض يحس دابالغ بس لان البنت تربت بطريقه حذرة جدا وهالوحده لاهلهه ويخافون عليهه من الاوائل واهلهه تربويين يعرفون شلون يعلموهه صح وبحكم ما عدهه اختلاط لا باقارب ولا باصدقاء اكيد تصير اكثر من هالشكل المهم ما احس الا ابو امجد يكول عمو فجر وصلنه للبيت اليوم مبين تعبانه ممركزة فزيت وشكرته ونزلت دخلت للبيت وطبيت وسلمت على ماما وماحبيت اخوفهه كلت من يرجع بابا ويرتاح اسولف بس بابا تاخر هواي تقريبا ساعه على موعده وبعدها انفتحت الباب وفزيت باوعت بابا وجهه اصفر وتعبان وحلكه يابس للحضه فكرت عرفت اني اخذت رساله من ولد اليوم وبجنطتي بعدين سمعت ماما تسأله خير شبيك حسن تعال ارتاح يله وعين وحضنت بابا ودخلته للصاله وماما جابت مي ونزعته السترة واليلك الصوف اللي لابسه وبدت تسمح على وجهه وتقرأ ايات تساله شبيك قبل ساعه عفتك ما بيك شيء فدوة احجي طممنني عنك بابا بصعوبه جاوبهه ماكو شيء ارتاح واسولفلك بس انطيني بندول راسي راح ينفجر وانام واكعد احجيلك هي كادته وراحت للغرفه واني صعدت فوق لغرفتي ونسيت الرساله وكلشي بابا وجهه كلش قلقني بابا ضعيف كلش وناعم وما عنده مقاومه بسرعه يبين عليه المرض وقررت ما حجيلهم هسه اخاف بابا يصير بيه شيء وانتظر وضع بابا يصير افضل واخذه ويايه وهو يتصرف وللعصر وبابا ما كام من فراشه وماما مرة تطلع تسوي نومي بصرة ومرة تاخذ علاج وتصلي خفت وتوترت اكثر بليل اني كاعده بالصاله بقيت كاعده جتي ماما سالتهه عن بابا كالت كام ويعاند الا يقوم يصلي اكوله ارتاح واقضيهن بعدين مقبل وكام بالحمام يتوضى ماما خلي بالك يمك واني اسويله شيء خفيف ياكل اني نسيت نفسي حتى لا اكلت لا غدا ولا عشا وبالرغم ماما طابخه كانت بس مو الوضع المكركب الي عشته اليوم طلع بابا وصلى وطول بالسجود وبقى كاعد على السجاده يسبح واني اراقبه وسألته شبيك بابا شلون صرت ماما صاحتنه على العشا وكالت ليش مماكله مو طابخه شلون تبقين بلا اكل لهسه جاوبتهه مالي واهس بدونكم ما اعرف اكل بابا كال ميصير بنتي انت قويه وعندك دراسه محتاجه تركيز وجسمك مو مثلنه يحتاج طاقه يبني هالجمال هذا احنه بلش يهدم وصرنه انقاض جاوبته يمه قلبي انتو من جسمي وصحتي الكم شعندي غيركم ماما خلت كدام بابا اكل وبده ياكل على كيف تعبان بعده احسه واني جوعانه بس مو مشتهيه اي اكل وماما تشجع بينه وتغير جو سألت بابا على اللي صار اليوم كال تعرفين الطالب بالخامس ابتدائي اللي اسمه احمد عامر ابن التاجر هذا الطفل السمين كالت اي اعرفه كال اليوم امه اجتى اخذته وكالت عنده مراجعه وي الطبيب بالدرس الاول واخذته وراحت من خلص الدوام وبقو شويه طلاب وانتو طلعتو صارت هوسه بباب المدرسه واقترب الصوت طلعت وبالباب مال غرفتي اشوفلك ابو الطالب ووياه حمايته ٥ حواليه والمدرسه تنترس شرطه همزين الطلاب راحو ودنقفل بالمدرسه سالتهم شكو كام يعيط الاب هذا سياده العميد اكيد اله يد باللي صار لابني واني صافن عليه شبيه ابنك غير اعرف والهوسه شعلوهه وكلهه تعيط كال الولد مخطوف من المدرسه واني اتهم المدير هو اله يد بخطف ابني حتى يساوموني ويريدون مني فلوس اني عصبت وكتله انت مخبل اني صار سنين هاي مدرستي والعالم كلهه تعرف اني منو واسأل التربيه والناس عن استاذ حسن كلهه تعرفني كال راح تتعاقد وعجزت شفت ابن التاجر كبالك كلت هاي خوش تقاعد عصبت كمت اعيط كتله للعميد سيدي امه من الدرس الاول اجتي اخذته وكالت عنده مراجعه وي الطبيب قابل امه تخطف هي امه اخذتله اجازة واني خليت مسؤليتي وهذاك سجل الاجازات واتاكد منه كال الاب اني مطلقهه صار شهرين وهي حاجزه طيارة وما خذته وطايرة كتله سيدي اني ما اعرف ومحد مبلغني وهو الطفل عنده سايق خاص يجي ياخذه يوميه بس مرات امه هم تجي تاخذه واني من ينتهي الدوام الطفل يطلع من ذمتي من يطلع باب المدرسه طول ماهو بالمدرسه بمسؤليتي بس من يطلع خلص من ذمتي وماكو احد بلغني اذا هم متطلقين وممنوع انطي الولد للام وعصبت حيل والعميد كال حقك استاذ حسن وهو ابو غلطان كان المفروض يبلغكم ممنوع تسلمون الطفل لغير السايق والحق وياك وهدي نفسك اني كلتله مسمعت يقول اني شريك واطلع تقاعد بخطف ابنه وهنا كبل تخربطت واخذوني للمستشفى والطبيب كال الضغط مرتفع وشويه ارتاحيت واجيتكم ماما كالت لازم باجر نروح للدكتور نجيك ونطمن بابا ما قبل بس ماما حلفت وكالت والله ازعل وبعد ما احاجيك اني عبالي اليوم نروح بس انت كنت تعبان ونمت بعمق خليتك ترتاح وباجر من الصبح نطلع اني خفت اروح للمدرسه واشوف ابو وجه الاحمر لعب روحي وكرهني حياتي قررت ما اداوم وابقى بالبيت وكلت لماما اني تعبانه انه بطني توجعني وفعلا عندي مغص من الخوف وكلت من يصير بابا زين اخلي يتكفل بالموضوع ماما كالت اوك الصبح اخابر ابو امجد والمدرسه اللي وياك هم اخابرهه تاخذلك اجازة ونامي ارتاحي واحنه من نقفل البيت عليك من برة منكعدك اني نمت بس شربت حبايه مهدئه من ماما وبسرعه نمت واحلام وكوابيس اشكال الوان وفزيت ساعه ٩ الصبح اوووف شكد نمت نزلت بابا وماما طالعين وتقريبا نص ساعه اندك الباب اني خفت لان وحدي وبابا وماما عدهم مفتاح منو يجي هسه محد يعرف بيه وحدي بالبيت ورحت وصلت قريب عن باب الكليدور خفت افتح باوعت من شباك الصاله شفت رجلين مال رجال يمه متت خوف فكرت منو يجي معقوله فقير يطلب مساعده او ابو جه الاحمر بعدين كلت شكد خبله اني هو وين يندل لبيتنه شويه وندكت الباب اقوى ورفع راسه وشفته هو والله هو من ورا الباب بسرعه سديت البرده بس متاكده شافني حيلي كله كام يرجف وباوعت باوع بوجهي من فوق الباب لان بابنه ناصي مو عالي وشمر ظرف احمر بالكراج يمه متت خوف ورفع ايده يسلم وراح يمه متت رعب رجليه متحملني من الرعب لو انذبح ما بيه نقطه دم خفت افتح الباب خاف يعبر ويجي عليه وخفت اعوف الظرف وبابا يدخل وهو تعبان ويشوفه ويقراه واكيد كاتب سخافات مثله والله يمكن بابا يموت بمكانه اسم الله عليه بقيت ارجف وخايفه  

للحديث بقيه لا تنسون النجمه ⭐نورتوني
🍀QABAS ADAM🍀للكاتبه