شرار الفجر

بارت (٣٤) رغبات مبعثرة

🍀QABAS ADAM🍀
بقت فجر ترجف ورا باب الحمام وبردت وعركت وخجلت وخافت كل انواع المشاعر حست بيهه بهالحضات وسمعت يكول ايهم جوز مني عاد يمعود هسه طبيت واليوم رجعت من وقت لان صارت عندي شغله قريبه على البيت ومابقى شيء للغدا وهسه ابدل واصلي واتغدا وانام ولا اشوف اسمك بالتلفون الا وربك اللي خلقك احضرك كافي يمعود هسه عفتك بالمعرض قدري انت متكولي قدري جاي ونسيبي وابن عمتي وشريكي دروح وهو يضحك عرفت انتهت المكالمه وسمعته ديشمر شغلات عرفت ديبدل وهنا اذا تخلون على كصتهه عجينه تستوي وتصير خبزة من الحرارة بلحضه فتح الباب وهو لابس بس شورت وصار كدامهه
شرار كمل شغلته وشاف نفسه قريب والساعه ١١ وثلث وفكر انه متسوى يروح للمعرض قرر يطلع للبيت دخل والبيت كالعاده نظيف ومرتب وريحه الاكل تجيب التايه بس الغريب انه هدوء ماكو احد صعد فوق وقال ابدل وانزل اشوفهم اكيد بغرفه جديتي وهو عالدرج دك عليه

ايهم........... على وين انت وليش طلعت من وقت وهاااا اكو شيء بالبيت ويلمح على فجر وصاير بيتوتي ويصنف عليه هو رد عليه ودخل الصاله اللي بشقته ودخل لغرفته ونزع ملابسه وبقه بالشورت حب يسبح حتى يرتاح ويصلي وينزل لان بعد وقت للغدا وفعلا هو فتح باب الحمام وشاف فجر كدامه وجهه احمر وشعرهه مغطيهه من فوقهه لحد جوا ركبتهه ولونه ذهبي ولابسه اسود انذهل بالمنظر وبقه صافن حتى ميرمش من هاللقطه الحلوة والمفاجأه اللي ممتوقعهه لا والاغرب بغرفته بحمامه هي جايه برجليهه بقه صافن عليهه للحضات وجهه انخطف واغمى عليهه وبسرعه خطفهه وماخلاهه توكع على الكاع لان قريبه منه وشالهه بخفه وخلاهه على الجربايه وجاب عطر ويخلي على خشمهه يحاول يصحيهه وبايده الثانيه يضرب خدهه بخفه ويحاجيهه فجر اصحي شجرالك يمعوده اصحي قابل شفتي جني اصحي وهي عقجت عيونهه من قوة العطر وفتحت عيونهه بتثاقل وصحت على نفسهه وهي بحضنه وهو بدون ملابس ودفعته انت شدتسوي هنا ها وشتريد هو وكف وشاف نفسه شلابس انه بس شورت جر كلابيه مال بيت من الكنتور بسرعه ولبسهه وكال شبيهه ليش ششفتي هي كالت شجابني على الجربايه وتحاول تطلع شالهه من تحت شعرهه حتى تلبسه وتستر نفسهه هو كال وهو مبتسم اظاهر كعدتك وي جده زكيه مأثرة عليك والفضول يقرأ عندك الف هي وكفت ونترت ثوبهه لان من كامت شويه بينت رجليهه وكالت لا فضول ولا شيء بس ردت اخذ الملابس المتوصخه حتى اغسلهم وفتحت باب الغرفه وطلعت وصلت لباب الصاله وتمشي وتتعارك وي شالهه اللي التف على شعرهه لان طويل وهو صاح وراهه ويضحك بصوت عالي ومنطلق هااااااا ليش مااخذتي الملابس الجايه عليهن هي طلعت وسدت الباب وبقت تسمعه يكركر وهي تفور واستحت تنزل واحد يشوفهه هالشكل ونازله من فوق ويفكر بشيء ثاني دخلت لغرفه نيران وفتحت شالهه وسوت شعرهه كعكه بسرعه ولبست حجابهه وعدلته ونزلت تتهرب حتى لحد ينتبه عليهه وللحظ التعيس الجد صار بوجهه وسلم عليهه ومستغرب لان يعرف بيهه متصعد لفوق بس ماحسسهه بشي ودخل لغرفته هي دخلت على امه وخلت بخفه ايدهه على كصتهه وفتحت عينهه وكالت ها عمه شلون صرتي عمتهه وهي تشيل عنهه الغطا الف رحمه للبطن اللي شالتك والربتك يمه دواك قبل طلع البرد مني واحس مابيه شيء جني طبت هي ضحكت وكالت الحمد لله هذا يطلع البرد من المفاصل وينطي حرارة للجسم وبسرعه اتحسن عليه قبل ماما من كنت اتمرض معودتني عليه هي ردت الله يحفظهه الك ردت شكرا عمه بس هسه غيري ملابسك لان عركانه واخاف تبردين وتنتكسين هي كامت وكالت هي هم هيك وراحت تطلع ملابس من الكنتور وراحت للحمام تبدل فجر تحس بنفسهه سابحه بعطر شرار لان تحسه محاوطهه وتسم بنفسهه كلهه عطرة وتذكرت للحضات كانت بين اديه وهو بلا ملابس لا وعطرة مخلوط بين عطر وجكاير هالشيء مميزة استحت من نفسهه وتفكر شلون راح تكعد كدامه وتخلي عينهه بعينه لا وهي صاعد لغرفته وتفتر بيه ضربه راسهه بخفه وكالت انت غبيه شصعدك صلت وطلعت بعد ما خلت عطر من عطورة وغرقت روحهه حتى تخلص من عطرة دخلت للمطبخ وتفكر هسه لو ريحه السمك بيه ولا ريحته لزكه بخشمي ياربي وبقلبه تسولف وتلوم بيهه تجمع الكل ودخلت ام شرار سلمت والجده تسألهه شلون صرتي حبيبه وهي تجاوب بخير الله ينطيهه العافيه فجر انطتني كلاص دوا مثل الشربت شربته ونمت وكعدت منفوضه نفض كلشي مابيه سألهه شرار شبيك يمه وشربتيش اللي طيبك ويباوع على فجر اللي دتصب كالت البارحه استبردت المغرب صبحت بردانه من طلعتو شو كمت ارجف مثل السعفه ورحت نمت بفراشي وهالفجر كل شويه وجايه تكيس راسي وتشوفني مصخنه وطلعت من غراضهه دوا خلته بالمي وشربتنياه ولحفتني ونمت كعدت والله كلشي مابيه كال الحمد لله لو كايلتي اوديك للطبيب كالت جديته فجيرة يمه انه هم انطيني من هالدوا اخاف تجيني البرديه ضحك الجد وكال من تجيك عود انجيبلك محضرة الكطنه كبل الفلعه وضحك صبت الاكل وترتب بيه ودخل علي ابن نيران وسلم الجده كالت ها اجيت على وقتك عمتك تحبك الجد كال تعال جدي تغدا هو كال لا امي هم دتصب غدا بس جيت على عمتي انت مو كلت تريدني فجر ابتسمت من كال عمه وكالت علاوي اريد ورا صلاه العصر تساعدني بكم شغله بالحديقه اذا ما عندك شيء هو كال تدللي عمه يله راح اروح باوعت لام شرار وكالت اخلي بالصينيه لنيران غدا دتستأذن منهه هي كالت خلي يمه عاشت ايدك وصبت الهه ماعون مرك وماعون تمن وانطته ورجعت كعدت الجد كال عاشت ايدك السمك اليوم كلش طيب كالت ام شرار هذا شغل فجر اني اليوم ما مديت ايدي وجعانه وبالفراش الجده كالت اني من شفت السمكات كلت خلص اليوم نتزوهر مادام نعيمه مريضه بس والله ما ينشبع من اكلك يولي يسويكته الجد كال اي يابه عاشت ايدك تعلمت اكل من ايدك بعد ما اقبل باقل من هالشي ام شرار كالت اني طوفت عمي مو هو يرد انت البركه والخير اللي بالبيت كله شرار عينه منزلت من فجر وهو يبتسم بس على الموقف اللي صار بينهم مو على كلامهم وهي حاسه بهالشي لذلك ما ترفع عينهه بعينه بس هو حب يحرجهه وكال شهالعطر القوي اليوم بالصاله ويباوعلهه ورافع حاجبه هي دنكت بعد شويه تخلي راسهه بالماعون ورفعت راسهه وهو يبتسم وهي تخزرة وتدنك وهو يوزع ابتسامات الجده حسه بيه وكالت شرير يمه ضملك ضحكه للعيد شمالك جنك اهبل تتبوسم لحالك لايوكعن سنونك بحضنك  هي ضحكت والكل ضحك على ضحكتهه الجد عجبه عصير النارنج وكال بعد صبيلي منه يابه وهو هم رفع حاجبه ومد كلاصه الهه كال صبيلي خلي اضوكه الجده قبل كالت يمه ضوكه ضوكه بلكن يعجبك وتشربه كله وتخلصنه منه فجر كالت بيبي جربي والله يجوز تحبي انت ماعجبك بس مجربتي هنا شرار ضحك واختنك وشهك وبقه يكح بكل حيله لان هو فهم قصد الجده والكل فهم ماعدا هالفطيرة فجر اللي ورا ما هدئت كحه شرار بقه يضحك وشافهم يتغامزون وصلت الهه بسرعه كامت وبعد مارجعت للكاتبه 🍀QABAS ADAM🍀

ابو فجر بتركيا بدا جوله العلاج الفيزيائي بعد ما الدكتور اكد نجاح عمليته وبلش بس كان جدا صعب ومؤلم اله ومن ينتهي العلاج الدكتور ينطي مسكن قوي ويبقى نايم وام فجر تداري وتعتني بيه وفرحانه بتطور حالته وصح تفكر بفجر بس افضل بعد ماعرفت من فهد انه مارضت ترجع وي فهد وانه تحمد برجلهه وعيالهه صح هي عدهه شك انه سوت هالشي ردا على ابوهه وتصرفه وياهه وانه سلمهه فصليه بسهوله بس تحاول تقنع نفسهه انه هي زينه على الاقل لحد مترجع للعراق هي وزوجهه من يكوم بالسلام وتروح بنفسهه تتطمن على بنتهه واذا كانت مو مرتاحه مستعده تحارب كل الناس وحتى تستعين بفهد واهله وتخلص بنتهه وميهمهه كلامهم ورأيهم اهم شيء تخلص بنتهه وترجعهه لحياتهه لان هي واثقه من فجر وتربيتهه وبرائتهه بس سكتت لان ما رادت تخسر زوجهه وحبيبهه ورفيق دربه من وكع وتمرض بس هسه من ترجع لا مستعده لحرب كبيرة وكامله علمود تسعد بنتهه على العكس من ابوهه اللي سلمهه بدون ميتعب نفسه ويدور للحضه على برائتهه وسلم الرايه البيضا من اول مشكله وخسر بيهه فجر

فهد اللي بقه متواصل وي عمته ويسأل عنهم وينتظر جيتهم حتى يرجع فجر باي ثمن ومانزلت لحضه فجر من فكره ومستعد يسوي اي شيء بس يرجع فهد اله ومستحيل بفكر يخسرهه او تبعد عنه طول حياته

رن العصر تلفون شرار وهو نايم كعد وشاف رقم وضاح طفر من مكانه وعدل كعدته ورد
شرار .... الووو هلا بالبطل شلونك اخبارك
وضاح .... هله والله الحمد لله بكل الخير انت شلونك اخبارك طمنني عنك
شرار........ دومك بخير يارب بشر اكيد اكو خبر
وضاح ...... وهو يضحك اكيد لزمتلك الفار المبلل وهسه حاجزة بالمركز يم صاحبي اني عن طريق صديقي نزلت اسمه بقائمه المطلوبين بحادثه اخوك بقضيه المرحوم ونادى عليه صديقي وكال يريد يدخل لبغداد من وحده من السيطرات وهسه حاجزيه بالمركز يم صاحبي بس ما نكدر نحجزه اكثر لازم تشوف شتريد تسوي

شرار...... قاطعه وكال اني هسه طالع وجاي يمك بس مسافه الطريق اووووف
وضاح ..... اوك هله بيك انتظرك خويه
شرار .... ما انسالك هالمعروف نلتقي باذن الله في امان الله
فتح الواتساب وسجل لايهم تسجيل صوتي ايهم اني طالع لبغداد ديربالك على الشغل وباجر ارجع باذن الله وضاح خابرني ولازمه لقاسم الخسيس ولتجيب طاري لاحد راح اكوللهم عندي شغل ضروري
وعالسريع بدل بنطروب وبدي وعليه سترة وعدل نفسه واخذ فلوس وتلفونه والسويج وطلع يمشي سريع لكاهم مجتمعين كالعاده يشربون شاي العصر وكال جدي اني طالع لبغداد عندي شغل ضروري ولازم اكون موجود وباجر العصر راجع باذن الله من رخصتكم الجد كال انتظر وروح باجر ما ظل شيء على اذان المغرب تسوق بليل شلون هو كال لا لازم اروح اليوم ما الحك كال الجد خلص توكل بالله والله يحميك ولا تسد تلفونك طمنني عنك طلع وقال مع السلامه وصعد سيارتهه وشغلهه زمسافه يسوق يله يوصل للباب لان كراجهم طويل وفتح الباب شاف ايهم لابس وجاهز وواكف كدامه هو كال ولك والله مو صوجك صوج اللي انطاك خبر يول كلتلك ابقه بالشغل رد ايهم امشي خويه وبلا لغوة ما اعوفك تروح وحدك ابد والشغل ميطير طماطه وتخيس هنه سيارات والعمال يفتحون وباجر راجعين بس تدري شكد فرحتني اووووف واشوف هالناقص وابرد قلبي بيه خاين صديقه ..........

انتظروني ببارت جديد راح يعرف بيه شرار فجر مذنبه لو لا شتتوقعون قاسم يحجي الصدق لو راح يكذب حتى ينقذ نفسه لا تنسون التصويت ⭐⭐⭐⭐⭐🙂🍀QABAS ADAM🍀