شرار الفجر

بارت (٢٢) المستقبل المجهول

🍀QABAS ADAM🍀للكاتبه
دخلنه للبصرة وما بقى شيء نوصل للبيت وهي بمجرد ما مشت السيارة ورا ربع ساعه بالضبط رجعت نامت لا اكلت ولا شربت ولا حجت حرف واحد ولازكه بالباب اللي يكول كاعد اسد وياهه بالكشن(🤨 لا تفهموني خطا للمرة الثانيه) بس حسيت جايب علاوي ابن ايهم و نيران ويايه مو كبيرة بس اكيد بهالطريقه والتمسكن ضحكت على علاء اصلا هو مو سهل وملعب وعلى كولتهم مكطع السمجه وذيلهه تجي هالطفله هاي تكلب حياته كلب قطع الصمت القاتل كلام الحجي ابني راح نوصل مثل ما فهمتك وليدي منريد مشاكل والجرح جديد ما اريد تنفتح نقاشات وكلام ماله لزوم المات الله يرحمه لا شلون ولا ليش ولا شصار مفهوم شرار وايهم ردوا عليه تمام جدي وكمل كلامه الجد الحجي الزايد اندفن وي المرحوم تنهد شرار وكال الله يرحمه تؤمر جدي هي عدلت نفسهه وتذكرت مصيبتهه بعد ما ارتاحت ونامت هاجت جروح قلبهه ورجع انقبض ودموعهه اللي بهاي الفترة ما تركوهه تجري وماوكفن خايفه من كلشي حواليهه ومقهورة على كلشي خسرته دخلو بمنطقه زراعيه وبقت تباوع على النخل العالي والخضار اللي مالي المكان من كانت تسمع البصرة حارة ورطوبه متخيلتهه صحراء وبيوت قديمه بقت تباوع بس دموعهه تغوش على نظرهه وتمسحهن وترجع تركز وصلو بيت كلش كبير وبابه كبيرة كلش نزل شرار وفتح الباب وبفتحت الباب شافت بيت عالي كلش حلو ارقى موديل مبني والكراج بالوسط ومن الجانبين حديقه تجنن كلهه نباتات واشجار وشكل البيت بوسط النخل منطيه جماليه وشموخ الجد نزل وهو يكول الله ياطيب هواك الله ياديرة هلي يله يابه بنيتي تفضلي نزلت ومشت بسرعه بظهر الجد مثل حمايه الهه لان برغم مشافت شكله وركزت بيه لان مبوشه بس من صوته وكلامه ارتاحت وبعدهم دخل ايهم وشرار كان البيت بيه بابين دخلو من الباب اليمين مباشر على الصاله وكان يسلم الجد وركضو الجهال يبوسون ويسلمون عليهم وهي بقت واكفه عند الباب وتتراجف شتسوي شتتصرف تحاول تركز من ورا الشال اللي مغطي وجهه بس تشوف هواي ناس صاح عليهه الجد بهدوء تفضلي بنيتي هذا بيتك من اليوم وتعالي سلمي على جدتك مشت وحس بيهه مدتشوف لان توجهت على نيران  ما فرقت بين الوجوه كال بنيتي ذبي بوشيتك انت ببين اهلك وماكو احد غريب هي تستحي بس تريد تششوف وتتنفس برغم شتا وبارده بس اختنكت منهه رفعتهه وكالت بخوف  السلام عليكم ودنكت بهدوء ورزانه وخجل على ملامحهه اشر الجد تعالي بنيتي هاي جدتك هي قبل لتتقرب والجده كامت تنعي على علاء وتبجي وهي كعدت على ركبتهه كدام الجده لا تكدر تبوسهه وتسلم عليهه وتقاطع بجيهه ولا تبقى واكفه بقت تنزل دموعهه لان الطريقه مال الجده تبجي بالرغم ما تفهم نص كلامهه وبعد ما هدئت الجد كال استغفري الله يا حجيه كلمن بيومه ومثل ما فهمتك هي شغله قضاء وقدر والحمد لله وهالبنيه بنيتنه من هذا اليوم والله يحاسبنه عليهه هي كامت باست ايد الجده والجده باوعت عليهه وتنهدت وكالت الله يرحمه مثل ابو يعرف ينكي يعني يختار الجد كال بعد عمك ام شرار هاي جنتك هالت الهله بيهه كالت واشر عليهه كامت وبوستهه هي ارتاحت هنا لان وجه الجده كان قاسي وجاف بس ام شرار لا طيبه وعرفهه على الباقيات نيران ام علي اللي من شافتهه صلت على النبي وابتسمت بوجهه هي هنا تنفست حست اكو بشر بالبيت راح تكدر تعيش وياهم وعمتهم ايمان اللي سلمت عادي وسالتهه شكد عمرك جاوبتهه وهي مدنكه( ١٦) سنه  كالتله العمر كله يارب وعمتهم اقبال اللي كالت الله لا يوفق ابوك من ما يريد ينطيك عليش هد عليه بالسكين يكول ما انطيهه وخلاص عليش راح هالولد من كيسنه الجد عاط بيهه اقبال هالموضوع ما ينحجي بيه ابد هو لو حاشمنه ما يروح وحده يخطب ويريد يتزوج ولو منطيهياه كان خلف الله وكيلك واحنه ما ندري الله يرحمه هاي كتبه الله والبنت مالهه ذنب
شرار كان كاعد على طرف بعد ماسلم على اهله وبوسهم كعد ونار واجه بصدره وشافهه بس ما اهتم بيهه لان هي بعينه صغيرة قدر ومكانه وقليله حياء واخلاق بس شويه وجتي نيران كعدت بينه وبين ايهم رجلهه كالت ابو علي شفت شلون مجنص ذاك الواحد فوق ما قمر ونازل من السما يمنه جماله عمرهه (١٦) والله شكل انعام قصدهه امهه داعيتله بليله القدر هو خزرهه وايهم اشرلهه اسكتي ام شرار صاحت بنيران ام علي يمه اخذي هالبنيه ووديهه للغرفه مال اخوك لان دربهم طويل شرار جاوبهه خليهه جوا بغرفه امي ما استغربو ومحد كسر كلمته هي دنكت ومشت وي نيران سالتهه ما جايبه وياك غراض هي تذكرت بالسيارة جنطتهه ايهم كام وكال اني اجيبهه انت وديهه للغرفه ودخلتهه لغرفه كبيرة نظيفه مرتبه بيهه جربايه وحده وكنتور وكدامه شاشه ودواشك بالكاع كالتلهه اكعدي لحقتهم طفله صغيرة تقريبا عمرهه ٣ او اربعه حلوة بيضه مدبدبه تموت ابتسمتلهه ونزلت باست ايدهه قالتلهه هاي بنتك ردت اي هاي بنتي ألق هالنتفه شايله البيت ومحد يكدر عليهه ردت كالت ربي يحفظهه كعدتهه بطرف الجربايه وكالت اني اسمي نيران ام علي اخت شرار الصغيرة وزوجي ايهم وعندي (٣) اطفال الكبير علي تريدين ناديني ام علي او نيران  وهاي غرفه امي هسه تحبيهه طيبه كلش وجده زكيه هم حنينه كلش بس هي تبين جافه وقويه وجدي تحطي بقلبك من اهل الله وشرار احسن رجال بس ترة هو مقبل تروحين لغرفته لان هو حزين على علاء الله يرحمه ونزلت دموعهه ومسحتهن كالت بس يرتاح خوش انسان واخلاقه ذهب والله يحبك صح بعدك طفله وانظلمتي بهالزواجه وهالطريقه الفصليه بس الله يحبك وذبك عدنه اكو فصليات من الباب يتلكوهن كتل وتعذيب وخدامه احنه لا الحمد لله نعرف الله زين ومثقفين بس هذا امر الله لازم نرضى بيه وهسه اجيبلك جنطتك نامي وارتاحي هي كالت منعسانه بالطريق نمت كالت الهه جيد وراحت فرغت اخر خانه طبقات بالكنتور وجابت جنطتهه كالتلهه هاي الجهه رتبي ملابسك وغراضك وراح تنامين على هذا الفراش بالكاع وبالكنتور اكو بطانيه لان الغرفه بيهه سبلت متحتاجين لحاف والحمام بصف الغرفه اذا تحتاجيه وبدلي ملابسك واذا جوعانه اصبلك غده ردت لا شكرا ما جوعانه استحت منهه وطلعت جمر وسدت الباب وهي بدت ترتب اغراضهه صح خايفه منهم ومن الحياه اللي تنتظرهه بس ارتاحت افضل من كلام امهه انه يضربوهه ويعذبوهه حستهم فعلا مثل مكالت نيران  يعرفون الله وبقت تبجي على غرفتهه وكنتورهه واغراضهه بيتهم وامهه وابوهه
🍀QABAS ADAM🍀للكاتبه

شرار ساكت وأيهم كال اني اروح انام الجد كال اي وليدي ما قصرت تعبت ويانه وصار كومه عايف بيتك وجهالك عساني ما اشوف بيك مكروه جاوبه صدك تحجي جدي انتم اهلي وعزوتي المن الوكفه اذا مو الكم رد عليه شرار كدهه ابو علي الذهب روح نام واني هم راح اصعد انام وعلى العشا نتشاوف وصعد لغرفته حاير بهاالبلوة اللي انفرضت عليه واللي هسه كدامهم هي مظلومه وحلوة وصغيرة وهي تهجم البيوت العامرة وتكربس بيهه ومحد يعرف سرهه غير أيهم ونيران صعد لغرفته وقبل دخل للحمام سبح ورجع غفى بفراشه بسرعه
ام فجر بعد ما راحت فجر بقت تبجي بالمطبخ وابو فجر شرب حبايتين مال منوم ودموعه تجري بس يكابر وامهه المسكينه صعدت حضنت التراكسود اللي كانت لابسته فجر وبقت تبجي وتفكر بحال بنتهه شلون راح تتحمل وتعيش بهالطريقه وتدعيلهه الله يهدي القلوب لمحبتهه
عمتهم اقبال اخذت بنتهه وطلعت وايهم اخذ مرته وجهاله وطلع وامه ايمان  كالت هسه اجي وراكم واندارت على امهه جده زكيه كالت يمه شو اني حسيتك قبل لا يجون تكرضين بروحك كلت هسه من تطب الفصليه تكسريهه بعصاتك كنت خايفه من ردت فعلك شو من نزعت خمارهه وشفتيهه سكتي وحبتك وما كلتي شيء عادي كالت والله يمه صدكتي صح هو علاء بعيد صار سنين منشوف غير بالصدف بس يبقى عزيز كولت اهلنه بالعربان ولا بالتربان وكنت مقهورة واريد اكسرهه بعصاتي بس هي نزعت خمارهه يمك جنهه خشف (الخشف ابن الغزال الصغير ) صغيرونه وبيضه وعيونهه التقول صابين بيهن عسل سبحان الخالقهن وخصرهه هالكدوته اني امك شوفتهه تغسل العيون وتنظفهن واللي عرفته انه هي وابوهه مالهه ذنب يعني حادث وشفت تلوك لهالسويكت ابن اخيك شرار وين يلكي بحسنهه وانوب هو صايم على النسوان وقافل ما يتزوج هاي خيرة من الله جته مرة ما شفت بحسنهه كالت بس يمه هو ما قبلهه ولا خلاهه تنام بغرفته هزت ايده وكالت انت شبيك اصبري عليه وهو يحبسهه بغرفته وما يطلعهه واذكرك كالت عاد ان شاء الله طبايعهه مثل شكلهه شالت العصا وضربتهه بالكاع كالت اذا مو مثلهه بهالعصا اخليهن احسن من وجهه الجد كام وكال وانت تكدرين على زكيه كل نسوان البصرة ما تكدر عليهه تدربهه وتخليهه حالهه حالك بيومين الله وكيلك وكال اني رايح انام تعبان وكعدوني قبل العشا

يتبع ياريت اللي يقرأ وتعجبه القصه يصوت ⭐⭐⭐ الهه شكرا
🍀QABAS ADAM🍀للكاتبه