شرار الفجر

بارت (٣٦) ولاده الحب

🍀QABAS ADAM🍀 
من شافت فجر اقبال خافت بس ما حسستهم بشي ودخلن سلمن وبنت اقبال تخوزر بعيونهه بفجر اللي طلعت للمطبخ تجهز الضيافه رتبت كلشي ودخلت تقدم الهم شاي والكيك واقبال تسأل عن شرار والجده كالت راح لبغداد اقبال ردت هالولد كاسر قلبي ما عنده حظ البصرة كلهه متلمه هج للبغداد راح اوووف ما عنده حظ وي النساوين ردت امهه الجده زكيه هي زوجته الاولى مو نكاوتك لو ناسيه مو سويتيهه علينه بنت السلطان وتالي طلعت ردي والشيطان يتعلم منهه وكان سكطت الوليد لو ما ربك رحم بيه ردت عليه يمه شبيك كالبه عليه اي ادري اني مغسل وضامن جنه بناتي كانن صغار والله لو بوكتهه وحده موالمه لعمرة الا اهديه هديه هو كل البصرة اكو وليد مثله وهسه اذا يريد واله نفس يكبع وياخذ بنتي على الاقل يعرف اصلهه من فصلهه مو كاعده كدامه وايدهه مدمايه بدم اخو وهي تخزر بفجر ردت عليهه ام شرار تعوذي من ابليس شهالحجي هاي كلهه كتبه الله ومقسوم حرام تشيل خطيه وذنب بهالكلام نطت من يمهه نيران وكالت عمه سلامه الشوف دشوفي مو هاي مرته كاعده تكول للقمر وخر واني اكعد بمكانك وبعدين شجاب الثرى على الثريا عصبت اقبال وكالت هاي فصليه ما تنحسب على النسوان وانه بنتي ثريه هاي بنت خالتك تسمعين يمه ترضين ببيتك وهاي من بزري وتكط عليه حجي اختهه ايمان ام ايهم ردت يا اختي الله يهداك انت ما تعرفين تحجين الرجال حظه فوق السطح شو اخذ بنت جنهه العافيه وصغيرونه عليش فصليه مو فصليه هاي قسمته والحمد لله ومو قصور ببنتك بس انتي بنتك ما تاخذ على شريجه ترة (الشريجه تحر لو جانت بالقبر) على كولتهم وهالبنت ما سمعنه حسهه والله بوكت جانت كرايبك مريم هنا بالبيت عياطهه وصوتهه لمطبخنه يوصل هاي البنت حسهه ما سمعناه ولا طلعت من باب البيت ذيك تفرفر من بيت لبيت هاي نظافه وترتيب وطبخ والله اليوم دازه النه ذيك الصينيه مرك سمك وتمن شكد عايشه ما ماكله مثله ردت اقبال مكيوله (اطعم الفم تستحي العين ) عاطت بيهه ام ايهم حدك لهنا انا ام ايهم عزيزة نفس والكل يشهدلي مو جايبه بنتي والزك بيهه لرجال متزوج لا ومرته فدعه قمر من طبينه وانت تلوصين بالحجي وعرفتك ماجيتي تكولين نروح نتعلل يم اهلي الا ووراك عجاجه كامت اقبال وهي تصيح اني بنتي مو ناقصه لو معيوبه والزكهه بس اني مستحيفه ابن المرحوم اخويه اسمه يروح من الدنيا وما متزوج وعنده ضنه يشيل اسمه وعيب عليك شتكول علينه هالفصليه الغريبه وانتي تكسرين بيه وببنتي وهذا البيت ماطبه ابد شكد مااني عايشه بيت ابوي وانذل بيه حسافه طلعنه من بطن وحده ردت عليهه اختهه والله اذلفي بيت اللي تطبي تهجميه واللي دك الباب يسمع الجواب جده زكيه عاطت اقبال اعكلي انتي مو صغيرة واركدي صاحت ببنتهه وهي تنفض عباتهه لا والله اني الطالعه والفصليه ام البيت وطلعت هي وبنتهه وام شرار والجده يصيحون وهي مترد عليهم وطلعت وهي تتوعد لفجر وتكول انه مو بنت ابوي اذا ما خليتهه تطلع من هالبيت بنت المجرمين و طلعتهه من هالبيت بفضيحه

كعد الصبح شرار من وقت ومتفائل ومرتاح كلش ويريد يغبش للبصرة ويكعد ايهم اللي لازم على المخده ويصيح عليه اي ادري شبيك انجلبت تكعدنه من (٦) وربع جنود يم حضرته وميقبل يكوم وهذا يعيط اني نازل اشغل السيارة اقفل الشقه وتعال وقسم بالله ربع ساعه واشغل واطلع عود الحكني بالنفرات كام ايهم وهو يصيح لا بالله الولد نهبل ولازم نوديه للسيد ويقرأ عليه وكام وبسرعه يبدل لان يعرف بيه يعوفه لان هواي مسويهه قبل بيه هالدكه وقفل الشقه ونزل يركض ورا ويصيح عليه طلعتني بدون مااغسل وجهي بس وهو الله اذا ما ريكتني انزل وما اروح وياك هو ضحك ويكركر اصعد ابو بطن اوديك تتريك يالله بسرعه صعد ايهم وهو يدردم صابر (٣٦) سنه وهسه على حضي بيومين صار روميو هو يرد انجب واهرج شتريد ريوك وهو يكول انهبل الولد لا بالله انهبل وتريكو ورجعو بالطريق وشرار يسوق ويسمع باغاني كاظم ويحسهن نكتبن اله وبس من تطلع اغنيه عن الحب يسمعهه عن غير الحب يمشيهه وايهم يضحك عليه ويصنف وفرحانه اله لان راح يستقر وصلو العصر للبيت وايهم راح لبيتهم وشرار دخل يباوع على الحديقه وشلون حلوة وشكلهه جديد حس روحه مثل هاي الحديقه اللي تجددت وصارت حلوة وتزهي حس هو هالشكل حس فجر هم قلبت روحه ودخلت وحفرت بهدوئهه وحركاته واخلاقهه وجمالهه ووصلت لشيء مدفون بروحه ومن لمسته بايدهه كان ميت وانحيا من جديد احيت الشعور والحب والاحساس ومشاعر مدفونه بداخله عمره ما يعرف بوجودهه ولا عايشهه وبدون ما تسمعه كلمه منهه حس انه روحه طرب للحياه من جديد وهو صح عمره (٣٦) كبير بس هسه يحس بنفسه اكبر سنه لو سنتين من فجر من كد الطاقه الحلوة اللي حيتهه بداخله وحس بقلبه ينبض بقوة مثل الطبل ورجلينه تريد تركض وتدخل للبيت وتلمحهه وتشوف عيونهه ولمعتهن اللي طيرت عقله دخل وشافهه مثل الورده المزروعه بنص صحراء روحه وشامخه وزاهيه وواكفه تنتظره يرويهه ويداريهه بقه صافن بيهه لحضات وسلم عليهه وكال السلام عليكم هي دنكت وردت بهدوء وصوت ناصي وعليكم السلام هو بقلبه يكول وهو يدير وجهه عنهه حتى متفضحه عيونه اللي تلمع بشوفتهه لو ضحكته الفاضحته ياهلا بهالصوت هي كالت اصبلك غدا هو سحب نفس يريد يهدي من ارتباكهه ورجفته لوجودهه ويكدر يسيطر على تصرفاته يمهه وابتسم بوجهه ابتسامه خفيفه وكال اصعد اسبح وصبي الغدا هي ردت تمام صعد وهو شاك حلكه بضحكه ويقول اوووووف على التمام صعد وهو يغازل الدرج والباب والكنتور وباب الحمام وحتى الصابونه سبح وتعطر ونزل يلمع وشاف امه وجديته وجده كاعدين وديشربون جاي وهي ماكو سلم عليهم وباس روسهم وكعد الجد يكول ان شاء الله كضيت شغلتك هو يباوع لطولهه وهي تمشي باتجاهه وبايدهه صينيه الغدا ويكول قضت بخير بكل الخير ويبتسم اخذ منهه الصينيه وهي كعدت تقطع بالكيك وتقدم الهم وهو ياكل ويكول شهالاكل الطيب والله يا ام شرار صايرة تبدعين هي ضحكت وتكوله هني ومريء هذا طبخ مريتك هو لاول مرة يسمع موسيقى بهالكلمه قبل كان يتنرفز ويضوج هسه لا احلى قصيده لكاظم الساهر متلحك جمال كلمه مريتك هو باوعلهه ورد عاشت ايدك الجده فتحت عينهه وعرفت انه بلش يوكع بشباكهه اللي ما تعرف هي انه تملكهن اصلا بس تعرف وكع بحب هدوئهه واخلاقهه ولا مقصر جمالهه وكالت يول اشو راجع من بغداد تتبوسم جنك مهبول الجد ضحك وكال عساه دوم مرتاح والام كالت اي والله يريح بالك ويحلي ايامك الجده تباوعله وتكول واشوف ضناك قبل لا اموت فجر وكعت السكينه من ايدهه وباوعت للكل يباوعلهه دنكت ورجع تقطع الجده كالت يمه فجر هاذ الكيك مسويته للدجاج خايبه فرمتيه فرم انتبهت للكيك صدق مسويته قطع كلش صغار الا شويه مرجعته طحين ضحكو وهي شالت الكيكه وراحت للمطبخ وبعدهه طلعت للحديقه ترتب بيهه وتعدلهه طلع شرار شافهه تشتغل يباوعلهه ميشوف بنيه يشوفهه بعينه فراشه حلوة ملونه تفتر بين الورود استحى يبقى وطلع وهو ميعرف الطريقه اللي يقربهه منه ويكسب ثقتهه وحبهه واللي يقدر يعتذر بيهه عن اللي سوا بيهه من يوم عرفهه لليوم راح للمعرض وهو يفكر شيسوي يستحي يشتريلهه هديه وينفضح يريد يبين حبه بس مينرفض لان هو اخذهه فصليه بطريقه قاسيه ومؤذيه ومهينه يريد يرد اعتبارهه يرد يسعدهه يفرحهه يريد الضحكه متفارك وجهه ولا بيوم هاي عيونهه اللي موتته بجمالهن تنزل منهن دمعه وتأذي قبل لتأذيهه قبل ليوصل للمعرض شاف معرض اثاث وشاف مرجوحه حلوة فكر انه يمكن تحبهه اذا جابهه لان هي تحب الحديقه وهاي راح تزيد جمالهه وبيهه من الجوانب مكان تتخلى بيه سنادين مال ورد وبسرعه طبك ونزل اشتراهه وانطاهه العنوان وقال ودوهه للبيت وراح اشترى سندانتين وبيهن دموع الطفل اللي تنزل مثل المتسلق وفكر ياخذهن وياه من يروح بليل وتكون واصله المرجوحه ويخليهن بالمكان على المرجوحه وينزل مدندل النبات وشكله يكون حلو ونازل كلش فرح ورجع راح للمعرض كمل شغله ورجع المغرب بس بعد ما جايبين المرجوحه طلع بالسيارة وراح على كهربائي قريب عليهم وجاب منه نشرتين لونهم سمائي نازكه كلش وسيار كهربائي طويل حتى يربطه حديقتهم كانت كلش كبيرة وكلهه اضويه وفكر انه يربط النشرات فوق المرجوحه ويصير كعده حلوة رومانسيه ويتأمل يجي يوم ويكعد بيهه هو وفجر رجع للبيت ولكه منزلين المرجوحه بالحديقه والجد واكف يمهم سلم وراحو ودخل هو والجد وهو يكول مادام دترتبون الحديقه كلت مرجوحه نكعد عليهه الجد يباوعله وبدأ يفهمه انه قلبه مال بيه وما يكدر يضم بعد اكثر مفضوح الحب بعيونه وبتغيره وخلاهه بمكان حلو قريب للكعده اللي مرتبتهه فجر وبقى يرتب بالنشرات وربطهن وشغل عليهم الكهرباء وفعلا صارت كلش الكعده حلوة ومرتبه واله واهس يكعد بالحديقه بالرغم من انه الورود مو كلهه مفتحهن لان بعد الجو بيه بروده وما بدا الربيع بعد دخل وهو مرتاح وصعد بدل ونزل شاف جده معصب سأله خيرك جدي توك شزينك كول شبيك كال وهو يكعد على السفرا وفجر ترتب بالعشا وهي خايفه على الجد ويرد الجد ويكول عماتك عبالهن بعدهن جهال البارحه رحت اتعلل وجايات هنا وواصله بينهن للشيطان الرجيم وعمتك حالفه ما تدش للبيت وباجر اريد تسوون غدا واعزمهن واصالحهن على بعض حسبو حسابكم وانت وليدي شوف اذا بالبيت معوزين شيء كل وحده احفادهه تارسه الشارع ويتعاركن شخليتن للبزران بدو ياكلون وشرار سأل هنه عليش تعاركن شكو بينهن الجده كالت عليك يتعاركن شايف بسبتك كل هالمكافش هو رد باستغراب اني واني شكو ردت تريد تحرك غيرة فجر وهالشيء بان بعيونه اللي فتحتهن على وسعهن ما توقعت الجده تسولفله وكالت قبوله تريد تزوجك بنتهه وتكول نريد نشوف ضناه هالسويكته ما وراهه حباله وجيابه وهي تأشر على فجر اللي استحت وصار طماطيه وايمانو ما تقبل تحجي وتكول هاي مريته كدهه تكفي وتوفي واصبرولهه هالشهرين وهي تبشرنه بحبالتهه طبعا الجده ضافت الحجي من عدهه حتى تحرجهم ويتممون زواجهم ويعيشون زوجه وزوجه طبيعيين شرار كال وعلى هاي عركتهن ما ادري اني هيك عندي هيك جيش بظهري هنا فجر بعد متحمل وعركت صارت ماي من المستحه بسرعه كامت وراحت للمطبخ ترتب بالشاي وايدهه ترجف من الخجل وهي تسمع ضحكهم وتصنيفهم

اذا حابين تعرفون شنو راح يصير وشنو التطورات بعلاقه فجر وشرار تابعو البارت الجاي ولا تنسوت التصويت ⭐⭐⭐ويارب تعجبكم الاحداث
🍀QABAS ADAM🍀