على لسان أمل ..
الصباح بدري صحينا كلنا ريلان قالت عايزة بسكويت بتعمل في محل ظريف وطلبت من ابوها يجيبو ليها م عرف الوصف ف طلبت من ريل تمشي معاهو
بعد ساعة كدا اتصلت علي ريل بتبكي
- ماما الحقي سمر سريع
* في شنو يا بت
- بعد وصلنا المحل وشلنا البسكويت سمر كانت جمب مطعم قريب من المحل كان معاها مؤيد كانت بتبكي ب هيستيريا مؤيد م قدر يهديها دخلها العربية واتحرك ،، بابا عصب وقال بنتو بقت لافة وبتاعت شوارع من الصباح بتلف مع الاولاد في المطاعم وكمان بتركب عربات من التعصيب ركب العربية خلاني واقفة ولحقهم الحقيها سريع ماما
اتصدمت من ردة فعل مختار لبست عباية بسرعة جيت طالعة ريلان اتشبكت تمشي معاي اضطريت اسوقها من طلعت من البيت حسيت في عربية بتباري فيني بس ما ركزت كتير كنت بتصل على مختار رد علي في الاخير
- مختار م تعمل ف سمر حاجة افهم الحاصل اول
* افهم شنو بعد بتي بقت لافة وبتاعت عربات افهم شنو صدقيني المرة دي حتى انتي م بتنقذيها مني
قفل الخط ف وشي وقدر م حاولت ابى يرد ريلان قالت لي ماما سمر مالها !؟
- حبيبة ماما ماشين ننقذ سمر اختك علشان بابا م يضربها بعد نوصل ح تفهمي
* يعني ماشين علشان سمر !؟
قبل أرد عليها العربية اتضربت من ورا يداب انتبهت لي الكان لاحقني هو جابر اخو جهاد ،، دوست بنزين واتصلت على العقيد عبد الله ما رد علي الا بعد كذا اتصال حتى رد وكان مختصرني شديد
" صحفية أمل انا حاليا في العزاء بتاع ولدي برجع ليك فيما بعد "
قفل وما اداني فرصة اتكلم رسلت ليهو رسالة محتواها
" جابر ،، بتي "
بعديها م حسيت الا ب عربيتي طارت طرف الطريق وعربية جابر وقفت نزل منها وسامعة صوت خطواتو
م قدرت اركز أو اقاوم لأني انضربت في راسي وبنزف بس بقيت ماسكة يد بتي شديد وبقول ليها ب صوت متقطع ريلان اهربي أتدسي في اي مكان واوع تطلعي مهما حصل سامعة
كانت بتبكي وبتقول لي ماما ،، قلت ليها اهربي سريع ورا الشجرة ديك وما تطلعي الا بعد يفوتو
فتحت ليها الباب وجرت اتدست ف نفس اللحظة جابر فتح باب عربيتي وقال أخيراً مسكنا الفريسة ،، انتي عملتي أسوأ حاجة ف الدنيا دي انك صورتي وكشفتي أسرارنا للعالم ،، أسوأ حاجة انو اخوي مات بسببكم وعدنان كنا مفتكرنو خاين طلع تابع للشرطة
عارفة ح اعمل شنو!؟
ح انتقم ل كل شي خسرناهو سواء كنتي السبب أو لا ح تدفعي التمن كلكم ح تدفعوا التمن م بخلي واحد فيكم عايش
